Doy küme adümuwnge tami amuldungual: Adkünuaiñ kiñe dungu taiñ wiñopemetuafiel ti che

CHUMNGELU FALIN-NGEY:

Taiñ amuldungun mu, ngankeiñ reke tati rüf dungu, feymu küpa wütrukofiyiñ (1Ko 3:6). Fey kiñe che küme allkütunieeliyiñmu, kümeafuy taiñ elkünual kiñe ramtun, fey wiñoldunguafiel ka rupa taiñ pemetuafiel. Femngechi tati che llüwatuleay taiñ wiñotual, ka küme pepikawküleaiñ taiñ wiñopemetuafiel. Feymu wiñotuliyiñ, ‘wiñoldungulelpapeeyu ti ramtun tañi elkünuel newe chumül’, feypiafuiñ.

CHUMNGECHI ÑI FEMNGEAL:

• Pepikawülmi tami nütramkayal fill ruka püle, ka pepikawnge tami elkünual kiñe ramtun, fey tami wiñoldungual pemetufilmi ti che. Feypiafuymi kiñe ramtun ñi wiñoldungungeel ti papil mu tami elelfiel. Kafey ramtukünuafuymi kiñe dungu mülelu taiñ papil mu pepikangelu taiñ chillkatuafiel Biblia kiñe che engu, fey wiñopemetufiliyiñ, pengelelafiyiñ ti papil.

• Dew nütramkafilmi ti che tami küme llowetew, feypiafuymi ‘ka antü doy pichi nütramkayafuyu’, fey ramtukünuafimi chi dungu tami pepikanieel. Ramtuafuymi chew ka chumngechi tami wiñopemetuafiel.

• Wiñotunge ti ora mu tami feypikünuel (Mt 5:37).