1921 Pataca Tripantu Cuifi

1 CONCHI enero mu 1921 tripantu mu, tüfachi revista mu tripai quiñe ramtun: “¿Chem falin cüdau taiñ femal tüfachi tripantu mu?”. Ñi lloudungungeal tüfachi ramtun mülei Isaías mu, capitulo 61, versiculo 1 ca 2. Tüfa acordaleyu ñi amuldungucheal engün. Isaías ñi huirintucun feipi: ‘Jehová dullieneu ñi quimeltuafiel ti cümeque dungu tati pu ñom chengelu, ñi huldungual ti tripantu Jehová tañi cüme fürenequefiel pu che, ca ti antü taiñ Chau Ngünechen ñi apümcayafiel tañi pu caiñe’.

AMULDUNGUQUELU NEHUEN PIUQUE MU

Ñi huechunentual ñi amuldungun engün, mülefui ñi nehuen piuquengeal engün. Re ñomngechi che müten ngelafui ñi amuldungulelafiel engün, ca mülefui ñi feipiafiel ti huesaque che cüpalei antü ñi apümcangeal engün.

Quiñe peñi Canadá tuhun-ngelu John Hoskin pingei, amuldungui ñi caiñetungen mu rume. Ellaconchi tripantu 1921, nütramcafi quiñe ministro metodista. Feipifi: “Nieafuyu quiñe tüng nütramcan Biblia mu, quiñeque mu trürcülenole rume tayu raquiduam. Huelu deumayafuyu tayu nütram quiñe huenihuen reque”. Huelu femngechi dungu rupalai. Feipi taiñ peñi: “Pichin minuto mu ñi nütramcan iñchiu, cerratui nehuentu tañi puerta. Iñche trananagalu ti vidrio troquifiñ”.

Huirarün mu feipifi: “¿Chumngelu nütramcamelafimi ti quimnofilu Dios?”. Taiñ peñi Hoskin ünatui ñi quehun, raquiduamcülen amutui: “¡Tüfa ca quimlafi ta Dios!”.

Cangelu antü mu, ti huesa ministro niei quiñe hueupin tañi iglesia mu, fei huesaque dungu mu duamtufi taiñ peñi Hoskin. Fei ti huesa ministro tañi iglesia mu feipifi ti pu che: “Feiti amuldunguyaulu doi fütra coila, mülefui tañi langümngeal”. Taiñ peñi tüfa huesalcalaeyu, amulei tañi amuldunguchen, fei fentren che nütramcaniefi. Feipi: “Rume ayühunquechi amuldungun. Quiñeque che feipieneu: ‘Eimi ta cüdahuelquefimi ta Dios’. Quiñeque ramtueneu engün chem ñi duamnien ca chem no rume tañi faltalenoal”.

ÑI PAPELTUNGEAL BIBLIA QUISUQUE CA FAMILIA ENGÜN

Tañi quelluafiel pu che doi ñi quimafiel ta Biblia, Jehová tañi troquiñche entui quiñe revista nielu ramtun ca lloudungun. Fachantü ¡Tami quimafel! pingei. Ca mülei ramtun pu chau tañi papeltuafiel tañi pu yall engün. Pu chau mülei ñi ramtuafiel tañi pu yall ca ñi quelluafiel ñi quintual Biblia mu. Quiñeque dungu ñi femal quiñe cüdaungenochi ramtun. Quiñe ejemplo: “¿Tunten lifru ta niei ta Biblia?”. Caquelu ramtun mu, pu chau pepicaquefui ñi pu yall engün ñi llicanquechi amuldungunoal. Ca quiñe ejemplo: “¿Com pu cristiano che raquiduampeafui ñi üdengeal engün?”.

Mülei quiñe revista ñi nentungeam ramtun ca lloudungun. Tüfa deumangei ñi papeltuafiel pu che ñi pichin quimnierpufiel ta Biblia. Tüfachi ramtun nentungei ti lifru mu Estudios de las Escrituras pingelu. Tüfachi ramtun quimeltufi fentrenque che, huelu feipingerumei ñi tripahuenoal turpu. ¿Chumngelu?

QUIÑE HUE LIFRU

Tati lifru *El Arpa de Dios* pingelu.

Tarjeta chem pagina mu ñi papeltungeal.

Tarjeta nielu ramtun.

Pu peñi hunelelu tüfachi cüdau mu, quimürpuingün pu che ñi duamnien ñi papeltungeal Biblia quiñeque troquiñque dungu mu. Femngechi tripai inglés quehun mu El Arpa de Dios pingechi lifru. Pu che lloulu tüfachi lifru, huirintucungei quiñe curso mu ñi quisu papeltuafiel ta Biblia. Tüfachi curso quellufi pu che ñi quimal chem ñi feipicünun Dios. ¿Chem dungu femngequefui tüfachi curso mu?

Pu che lloulu tüfachi lifru, elungei quiñe tarjeta chem pagina mu ñi papeltuafiel ti lifru. Cangelu semana mu llohui cangelu tarjeta, niei ramtun deu ñi papeltumum. Ca ti tarjeta feipieyu chem ñi papeltual cüpalechi semana mu.

12 semana mu, ti trahunche mandaquefui tarjeta fill semana mu. Taiñ pu peñi ca pu lamngen putremcülelu, ca quiñeque dungu mu pepi tripaquenolu engün ñi amuldungual, fei engün mandalquefi tarjeta tati papeltuquelu ti lifru. Taiñ lamngen Anna Gardner, Estados Unidos tuhun-ngelu, feipi: “Ñi lamngen Thayle pingelu, pepi amuldunguquelafui. Huelu tripalu ti lifru El Arpa de Dios, mandaquefui tarjeta, fei doi amuldunguquefui”. Dehun mu ti curso, pu peñi trahunqueche mu fei pemequefuingün ti pu che papeltuquelu ti lifru ñi quelluafiel ñi doi quimürpual engün.

Thayle Gardner anülei tañi silla de ruedas mu.

RUME FENTREN CÜDAU CÜPALEI

Epe aflu ti tripantu 1921, peñi Rutherford huirintuculelfi carta ti pu trahunche. Fei feipi: “Tüfachi tripantu doi cümei taiñ amuldungun rupachi tripantu mu, ca femngechi doi ca mapu puhuiyiñ. Doi petu mülei fentren cüdau taiñ femal cüpalechi antü mu. Elufimün nehuen caquelu ñi conal tüfachi falin cüdau mu”. Jehová tañi pu che feyentun mu inafingün tüfachi ngülam. 1922 conchi tripantu pu peñi doi nehuentu amuldunguingün.

Llicaquenochi hueni

Jehová tañi pu che hueluconque quelluhuingün, femngechi pengelingün tañi piuqueyehun. Cüme hueningeingün llicanon mu, quelluhuingün rupalu cutrancahun mu (Prov. 17:17). Peafiyiñ quiñe rupan dungu.

31 conchi mayo 1921 Estados Unidos mapu mu, quiñe curü huentru culpatungei ñi hulelcafiel quiñe flang domo, feimu carceltucungei. Rupalu tüfachi dungu, doi 1.000 flang huentru amuingün ñi quehuayafiel tati curüque huentru. Tüfachi quehuan puhui cheu ñi mülen re curüque che. Doi 1.400 ruca ca chi ruca ngillacapemum hueñecangei ca lüpümngei. Feipingei ñi lan 36 che, huelu rüfcünu epe 300 che peno lai. Tüfa quiñe fütra langümcahun ürque.

Curü huentrungefui taiñ peñi Richard Hill, mülelu feichi lof mu. Fei feipi chem rupai: “Feichi pun rupalu chi quehuan, iñchiñ trahuluhuiyiñ chumngechi taiñ femquen fill semana. Aflu taiñ trahun, allcütuiñ ñi tralcatumequen tati pu che rangiñ huaria mu. Tati tralcatun amulerpui epe com pun. Hunlu, doicülei tati quehuan. Quiñeque che feipieiñmu ñi amual quiñe centro municipal mu taiñ langümngenoal”. Feimu taiñ peñi Richard lefmahui tañi domo engu ca tañi pu pichique che tati centro municipal mu. Feichi ruca mu acui 3.000 huentru ca domo curüngelu, fei incañpenieyu pu soltau ñi langümngenoal.

Taiñ peñi Arthur Claus flang huentrungefui, fei hueningefui taiñ peñi Richard engu curü huentrungelu. Taiñ peñi Arthur allcütui ñi hueñemequengen ca lüpümmequengen ruca cheu ñi mülen taiñ peñi Richard. Feimu cuñihun-ngefui rume, amui ñi pemeafiel chumlen tañi hueni Richard.

Peñi Arthur Claus pünefi ti lifru El Arpa de Dios, quellufi mari meli pu hueche ñi quimafiel ta Dios.

Puulu tañi peñi ñi ruca mu, pefi quiñe flang huentru nünielu quiñe tralcatuhue. Tüfachi huentru ca hueningefui taiñ peñi Richard engu, fei raquiduami peñi Arthur hueñefengei. Fei huirarelfi: “¿Chem chummequeimi tüfachi ruca mu?”.

Arthur feipi: “Tati huentru feyentunoelimu, tralcatuafeneu. Feipifiñ ñi hueniyefiel ta Richard ca ñi huitrantuconquefiel”. Arthur ca tati huentru cuidafingu tati ruca ñi teifüngenoal ca ñi lüpümngenoal.

Pichi rupalu, Arthur quimürpui ñi mülen tañi hueni Richard ca tañi familia tati centro municipal mu. Arthur feipingei pu curüqueche pepi tripaquelai tüfachi centro mu, elunoeliyu permiso tati general doi mandaquelu. Arthur feipi: “Cüdaungequefui ñi trahuluhual tati general engu, huelu femürpun. Feipifiñ tañi yemeafiel tañi hueni Richard tañi familia engu, fei ramtueneu: ‘¿Cuidayafimi tüfachi familia ca eluafimi com tañi duamnieel?’. ‘Mai, femngechi feman’ pifiñ ayühunquechi”.

Elungelu chi permiso, Arthur pürüm amui ñi yemeafiel tañi hueni. Puulu, pengelelfi chi papel ta quiñe soltau. Fei ti soltau feipi: “¡Ahuem! Tüfa ta huirilei general tañi firma mu. Tüfa mu tripaquelai inei no rume. Eimi huneleimi tami yeafiel tüfachi familia fachantü”. Arthur ca tati soltau pürüm pefingün tañi hueni Richard ca tañi familia. Com püraingün Arthur tañi auto mu, fei amuingün Richard tañi ruca mu.

Peñi Arthur yafüluhui ñi cümeleal tañi hueni Richard ca tañi familia. Puque che pefilu ñi llicaquenon ca ñi cüme hueningen ta Arthur, afmatulehuingün. Arthur feipi: “Tati huentru cuidaquefilu Richard ñi ruca, feula doi yamfi pu Dunguquelu Ineingen Jehová. Fentren che peingün Jehová ñi pu che hudalelaingün tañi tuhun mu, doi mai com quimeltungequei inei rume doicülelai caquelu mu. Feimu fentren che eluhui ñi doi quimafiel ta Jehová”.