1 | Ti llellipun. Feipifinge tami chum duamcülen

BIBLIA FEIPI: “Chau Ngünechen duamtunieimünmeu. Fei tañi cuhu mu elcünuafimün com tamün fill raquiduamelnieteu” (1 PEDRO 5:7).

¿Chem quimeltueiñmu?

Chau Jehová mangelqueiñmu taiñ nütramcayafiel chem huesa raquiduam rume cutrantupiuqueleiñmu (Salmo 55:22). Tuntengepe rume tati huesa dungu, llellipungeafui ta Jehová. Huesa duamcüleliyiñ, Jehová ca huesa duamcülei. Rume falin-ngei taiñ llellipunieafiel ta Chau Dios taiñ tüngcüleal (Filipenses 4:6, 7).

¿Chumngechi quelluafeiñmu?

Cutrancülele taiñ raquiduam, quisulelu troquihuafuiñ. Caquelu che müte quimquelaingün chi chumngechi taiñ rupalen (Proverbios 14:10). Huelu llellipufiliyiñ ta Chau Dios chumngechi taiñ duamcülen, quisu cüme allcütuaiñmu ca cutranpiuqueyeaiñmu. Jehová penieiñmeu, quimniei taiñ cutrancaucülen ca ayüquei taiñ llellipuafiel fill dungu taiñ raquiduamelnieteu (2 Crónicas 6:29, 30).

Llellipufiel mu ta Jehová, doi maneluucüleaiñ taiñ duamtunieteu. Ti salmista reque iñchiñ ca troquihuafuiñ, quisu feipifi ta Jehová: ‘Penieñmaen tañi hueñancülen; ca cüme quimnieimi iñche tañi fütra cutrantupiuquelen’ (Salmo 31:7). Jehová puquintunieiñmu taiñ chum rupamequen. Quimün mu tüfa, quelluafeiñmu taiñ nehuentuleal ruparupangeliyiñ huesaque dungu mu. Huelu re puquintunielaeiñmu taiñ cutrancaucülen, quisu müten cüme quimniei chumngechi taiñ rupalen ca yafültucuqueiñmu Biblia mu.

Biblia quellufi ta Julian

Chumngechi huesalcaqueneu ti ansiedad

“Iñche nien ansiedad ca trastorno obsesivo compulsivo cutran, TOC pingelu. Quiñeque mu cümelcalequefun, huelu conturumequeneu ti ansiedad. Mülelu caquelu che iñchiñ, doi fill raquiduamcülequen. Ramtuuquefun: ¿Chem am raquiduammequei pu che iñche mu?”.

“Tañi pu hueni quimnieneu tañi nien ansiedad cutran, rume quelluntucuqueneu engün. Rüfcünu mai, quiñeque mu müte quelluquelaeneu tañi feipieteu engün. Huelu mañumquefiñ engün tañi cüpa quellueteu”.

“Quiñeque mu tañi ansiedad ca TOC cutran mu, rume cüdautuquen ñi cüme raquiduamal ca ñi llellipuafiel Jehová. Tañi raquiduam matu leftripaquei reque tañi lonco meu, fei müte quimquelan chem piafel. Pepi ngünelan tañi raquiduam. Rume cüdaungei feipiafiel ta Jehová chem raquiduamcülen ca tañi chum duamcülen”.

Chumngechi quelluqueneu ta Biblia

“Biblia pengeli duamfalngelai alüñmayal taiñ llellipun taiñ allcütuaeteu Chau Dios. Quiñeque mu pepi feipiquelafiñ ta Jehová chum duamcülen, llellipuquen müten: ‘Jehová quelluen’. Femngechi rume, inaduamquen Jehová tañi duamtunieteu ca eluqueneu tañi duamnieel. Huelu ca quintuquen ñi lahuentuaeteu ta doctor. Tüfachi epu dungu ñi duam mu, doi cümelcaletun. Tunte cüdautuafun rume llellipuafiel ta Jehová, huelu femquen müten. Quisu piuqueyeneu ca quelluqueneu”.