Manelfalngei Biblia ñi feipin

Quisuque femliyiñ inchiñ taiñ ayüqueel cam inaliyiñ caquelu che ñi femqueel, quimlaiñ ñi cüme tripayal taiñ dulliqueel. Biblia quimeltuqueiñmu chumngelu rupaquei tüfa. Ca feipiqueiñmu chem mülei taiñ femal taiñ ayüucüleal. Biblia niei manelfalchi ngülam.

DUAMNIEIÑ CHAU DIOS TAIÑ ADNIEAETEU

Biblia mu, Chau Jehováa feipiquei com pu che duamniei quisu tañi quellu. Iñchiñ deumangelaiñ taiñ quisutu adcünuhual (Jeremías 10:23). Feimu Chau Dios eleleiñmu ta Biblia taiñ cüme dullial falinque dungu taiñ mongen mu. Fente taiñ piuqueyenieteu cuñiutucuqueiñmeu taiñ connoal cutrancahun dungu mu. Ayüquelai taiñ huesa duamcüleal huelulcaulu iñchiñ (Deuteronomio 5:29; 1 Juan 4:8). Chau Dios fei deumaeiñmu. Niei fentren quimün ca cüme quimnieiñmeu, feimu eluqueiñmu tati doi cümeque ngülam (Salmo 100:3; 104:24). Chau Dios inei no rume obligaquelafi ñi inayafiel tañi huercün dungu.

Tati hunen huentru ca ti hunen domo, Adán ca Eva, Chau Jehová elueyu engu com ñi duamnieel tañi ayüucüleam engu (Génesis 1:28, 29; 2:8, 15). Ca elueyu engu huercün dungu müte cüdaungenolu ñi inayal. Huelu elucünungei quisu ñi chem chumal engu (Génesis 2:9, 16, 17). Adán engu Eva eluhuingu ñi allcütunoafiel ta Chau Jehová. Quisu ngünehuingu ñi chumal (Génesis 3:6). Famülque mu, pu che quisu dulliqueingün chem ñi cümen ca chem ñi cümenon, feimu ¿chum amulei ñi mongen?, ¿cüme amulepeingün mai? Femlai. Rupalechi antü meu quimfali feyentunoliyiñ Chau Dios ñi feipingeel, nielayaiñ tüngün ca ayühun (Eclesiastés 8:9).

Ti Biblia eluqueiñmu ngülam taiñ quelluafeteu. Chem tuhun-ngeliyiñ rume, Biblia quelluafeiñmu taiñ cüme dullial (2 Timoteo 3:16, 17; inaduamnge ti huichulechi dungu “Quiñe lifru com pu chengealu”). Feula peaiñ chumngechi quelluqueiñmu Biblia.

Inaduamnge chumngelu feyentuafuimi tati Biblia Chau Dios mu cüpalu, tüfa ta “Chau Ngünechen ñi dungu” (1 Tesalonicenses 2:13). Amunge ti pagina jw.org mu ca pefinge ti video ¿Inei am ta deumai Biblia?

QUIÑEQUE CHE, ¿CHUMNGELU FALINTUQUELAI BIBLIA?

Quiñeque che feyentuquelai Biblia ñi nieel manelfalchi ngülam. Feula peaiñ quiñeque dungu ñi feipiqueel pu che.

Quiñeque che feipiafui: “Ti Biblia quiñeucülelai ñi feipin”.

Ti rüf dungu: Hue quimfiliyiñ Biblia, quiñeucülenolu quechileafui ñi feipin quiñeque troquiñ. Huelu quimfiliyiñ chumngechi huirintucungei ca tunten mu, fei inaduamafuiñ com ñi quiñeucülen.

Ayülmi peal quiñeque ejemplo, amunge ti pagina jw.org huincadungun mu ca papeltuafuimi ti troquiñ feipilelu “¿Se contradice la Biblia?”.

Quiñeque che feipiafui: “Pu che feyentuquelu Biblia mu ca femquei huesaque dungu, feimu ¿müte cümepelai ñi quellu?”.

Ti rüf dungu: Quiñeque che inanienofile Biblia ñi feipin tañi mongen mu, culpatulayafuiñ ta Biblia. Biblia feipicünui fentren che, ti pu loncolechi religioso cütu, femquelaingün Biblia ñi quimeltuel. Ca feipi tañi huesa femquen engün ‘huesa dunguyengeafui’ Biblia (2 Pedro 2:1, 2).

Cüpa pefilmi chumngechi am fentren loncolechi religioso inaquelaingün ñi enseñael Biblia, amunge ti pagina jw.org mu ca pefinge ti video Iñche famtripafun religion mu.

Quiñeque che feipiafui: “Pu inanielu Biblia ñi dungu yamquelafingün pu nielu caquelu feyentun”.

Ti rüf dungu: Biblia quimeltuqueiñmu taiñ yamnieafiel caquelu che. Ca feipiqueiñmu taiñ femal tüfachi fillque dungu:

Doicülelu troquiulayaiñ caquelu mu (Filipenses 2:3).
Yamnieafiyiñ itrofill che, niele rume caquelu feyentun ca raquiduam (1 Pedro 2:17).
Obligalayafiyiñ caquelu che ñi raquiduamal iñchiñ reque (Mateo 10:14).

Biblia pengeli Chau Ngünechen piuqueyechefengei ca norngei pu che meu. Ca ayülei taiñ inayentuafiel (Romanos 9:14).

Tami doi quimal, amunge ti pagina jw.org mu ca papeltuafuimi ti troquiñ “Dullichequelayaimi”, tripalu ti chillca Ti Huerquen numero 1, 2022 tripantu.

CHAU DIOS QUIMELTUQUEIÑMU BIBLIA MU

Biblia cüme pengeli chem ñi raquiduamqueel Chau Jehová pu che mu. Quimelqueiñmeu chem ñi cümen ca chem ñi cümenon Chau Ngünechen ñi adquiñ meu, chem cümelcayaiñmu ca chem huesalcayaiñmu (Salmo 19:7, 11). Tüfachi ngülam cuifingefulu rume, petu quellunieiñmu famülque mu.

Feula peaiñ quiñe cüme ngülam mülelu Proverbios 13:20 mu: “Quimche engu miyauquelu ca quimchengeai, huelu tati quiñeucülelu pu huedhuedque che engün huesa triparpuai”. Tüfachi ngülam quelluquefui pu che cuifi mu, huelu ca quelluafeiñmu famülque mu. Biblia niei fentren cümeque ngülam (inaduamnge ti huichulechi dungu “Biblia ñi ngülam rumel cümelcachequei”).

Huelu ramtuuqueimi chi: “¿Chumngechi quimafun Biblia ñi ngülam rüf quelluafeneu?”. Cüpalechi troquiñ mu, peaiñ chumngechi ñi quelluquefiel quiñeque che.

a Chau Dios ñi üi Jehová pingei (Salmo 83:18).

BIBLIA ÑI NGÜLAM RUMEL CÜMELCACHEQUEI

Tati Biblia deumangelu rume epe 2.000 tripantu cuifi mu, famülque mu petu falin-ngei ñi quimeltun. Pu che duamniei ñi ayüucüleal ca tañi cüme feleal, tüfa caletuquelai (Eclesiastés 1:9). Biblia ñi cümeque ngülam quelluafeiñmu taiñ nieal femngechi mongen.

Nor chengeal

“Ayünieiñ taiñ nor chengeal com dungu mu” (Hebreos 13:18).
“Tati hueñequelu fentecünupe tañi hueñemequen, nehuentu cüdaupe” (Efesios 4:28).

Cüme yeucüleal caquelu che iñchiñ

“Inei no rume ngelai ñi quisu duamuhual müten, doi mai caquelu che ñi cüme feleal” (1 Corintios 10:24).
“Huesa femngelmün, illcutumequeulayaimün. Hueluquentu perdonahuaimün com piuque mu” (Colosenses 3:13).

Cüme dullial chem chumal

“Ti quimchengenolu feyentuquei com ñi feipingeel, huelu ti adümuhun-ngelu cüme raquiduamquei tañi chem chumal” (Proverbios 14:15).
“Feichi che quimün nielu ngüneduamquei ti cuñihun dungu, fei ellcauquei, huelu tati nienolu quimün fei mu rupaquei ca cutrancauquei” (Proverbios 22:3).