¿Chumngelu fente falintuquefiyiñ taiñ perdonaqueteu Jehová?

1, 2. Ñi rupan ti hueche ca iñchiñ, ¿chumngelu trüri tüfachi epu dungu?

RAQUIDUAMAIÑ quiñe hueche. Tañi chau niei rume fentren plata. Quiñe antü lai tañi chau ca ñi ñuque. Tüfachi hueche rume cutrantupiuquei ñi rupan mu tüfachi dungu. Huelu mülei ca quiñe huesa dungu. Ti hueche quimi tañi chau ca ñuque ñi niehuenon plata, doi mai fentren defen elcünuleleyu tañi chau. Feitichi che defeniengelu ayüi ñi matu cullingeal, huelu tüfachi hueche nielai chumngechi ñi cullial.

² Com iñchiñ ca femngechi rupaqueiñ. Taiñ hunen chau Adán ca Eva culpan chengelafuingu ca mülequefui quiñe cüme mülehue mu (Gén. 1:27; 2:7-9). Rumel mongeleafulu engu, huelu Adán engu Eva culpai, ñamümi ñi cüme mülehue engu. Feimu niehuetulai ñi rumel mongeleafel engu. ¿Chem elcünulelfi tañi pu yall? Biblia feipi: “Quiñe huentru ñi femün mu coni ta culpan mapu meu. Fei ti culpan cüpali lan dungu. Com pu che culpafengetui, feimu ti lan dungu com che meu puhui” (Rom. 5:12). Adán elcünuleleiñmu culpan dungu, cafei coni lan dungu. Tüfachi culpan quiñe fütra defen reque felei, iñchiñ quisu taiñ duam mu pepi cullilayafuiñ (Sal. 49:8).

3. ¿Chumngelu trürümngequei culpan dungu defen mu?

³ Biblia mu trürümngequei culpan dungu defen meu (Mat. 6:12; Luc 11:4). Culpalu am iñchiñ, quiñe fütra defen mu conqueiñ Jehová mu. Quisu iñchiñ cullilayafuiñ ti defen, laliyiñ müten culliafuiñ. ¡Müna huesa! (Rom. 6:7, 23).

4. 1) Nienoliyiñ quellu, ¿chem rupayafui com iñchiñ mu? (Salmo 49:7-9). 2) Biblia mu, ¿chem cüpa feipi culpan? (Inaduamnge ti huichulechi dungu “Culpan”).

⁴ Iñchiñ taiñ duam mu, huiño nietulayafuiñ Adán engu Eva ñi ñamümel (papeltunge Salmo 49:7-9). Nienoliyiñ quellu, layafuiñ ca huiñomongetulayafuiñ. Ti pu culliñ reque nielayafuiñ maneluhun (Ecl. 3:19; 2 Ped. 2:12).

5. ¿Chumngechi quellueiñmu Jehová ñi cullial taiñ culpan? (Inaduamnge ti adentun).

⁵ Ca huiño raquiduamaiñ ti hueche mu taiñ dungupeel hunen parrafo mu. Quiñe ricu huentru feipieliyu iñche cullian tami defen pingele, ¿chum duamafui ti hueche? ¿Mañumcülepelayafui ca ayühunquechi lloupelayafui ti quellu? Ca femngechi taiñ Chau Jehová culli ti defen taiñ elcünuleleteu Adán. Jesús femngechi feipi: “Chau Ngünechen fente ñi piuqueyefiel mapu müleyechi pu che, hulcünui tañi quiñen Fotüm. Femngechi tuchi feyentule quisu meu, apümcangelayai. Huelu mai nieai rumel mongen” (Juan 3:16). Cafei Jesús ñi lan mu, hueniyerpuafuiñ ta Jehová.

6. ¿Chem inaduamafiyiñ tüfachi chillcatun mu ca chumngechi quelluaiñmu?

⁶ ¿Chumafuiñ taiñ cümelcayaeteu ñi femün ta Jehová fei ñi perdonangeal taiñ culpan? Ñi huiñoldungungeal tüfachi ramtun, inaduamafiyiñ quiñeque dungu chem pin ta Biblia ca chem cüpa feipi. Raquiduamliyiñ Jehová ñi femün taiñ perdonayaeteu, doi mañumafiyiñ.

JEHOVÁ AYÜQUEI TAIÑ HUENIYERPUAFIEL

7. 1) ¿Ca chem ñamümi Adán engu Eva? 2) Iñchiñ cüpaiñ Adán ca Eva engu, feimu ¿chem duamnieiñ? (Romanos 5:10, 11).

⁷ Adán ca Eva ñamümi ñi rumel mongeleal ca caiñeyerpufi Jehová. Ellaca mu, coneltulequefui Chau Jehová ñi familia mu (Luc. 3:38). Huelu feyentuhuenofilu, Jehová eluñmahuelaeyu coneltual ñi familia meu. Tüfachi dungu rupai petu ñi nienon yall engu (Gén. 3:23, 24; 4:1). Cüpaiñ Adán ca Eva mu, feimu duamnieiñ cümelcautual Jehová iñchiñ (papeltunge Romanos 5:10, 11). Rume duamnieiñ hueniyerpuafiel ta Chau Jehová. Quiñe lifru feipi ti palabra griego quehun meu feipilu “cümelcautual” ca cüpa feipi “hueniyeutual quiñe caiñe engu”. Huelu Chau Jehová hunelu mu eluhui ñi cümelcautual tati pu che engün. ¿Chumi?

JEHOVÁ ADCÜNUI CHI DUNGU PERDONANGEAL TAIÑ CULPAN

8. ¿Chem eluhui ñi femal Jehová? ¿Chumngechi cümelcaqueiñmu iñchiñ?

⁸ Chau Jehová eluhui ñi cümelcautual tati pu che engün. Feimu pepicacünui ñi huiñoleltuafiel pu che Adán ñi ñamümel. ¿Chumngechi femi? Romanos 3:25 feipi huli “quiñe chalintucun reque”. Feichi chalintucun rume falin-ngei, trürümngei Adán ñi ñamümel. Femngechi pu che hueniyerpuafui Chau Ngünechen.

9. ¿Chumi Jehová ñi perdonayafiel tati pu Israel che ñi culpan mu?

⁹ Cuifi mu, Jehová eluhui ñi perdonayafiel pu Israel che ñi culpan, femngechi ñi cümelcautual engün. Fill tripantu mu, tati pu Israel che niequefui feitichi Antü ñi Liftungeal ti Culpan. Feichi antü mu, ti hunen lonco sacerdote mülefui ñi chalintucuafiel culliñ ta Jehová pu Israel che ñi üi mu. Huelu com feichi chalintucun, tacuquelai reque com ñi culpan ñi niequefel tati pu Israel che. Femngelu rume, tati pu Israel che chalintucufile quiñe culliñ, Jehová eluhui ñi perdonayaeteu tañi culpan (Heb. 10:1-4). Com feichi chalintucun femquefulu ti Antü ñi Liftungeal ti Culpan ca caquelu antü mu, quelluquefi tati pu Israel che ñi loncontucual ñi culpan chefengen engün. Ca ñi duamfalngen ca dungu ñi perdonangeal com tañi culpan mu.

10. ¿Chumi Jehová ñi perdonayafiel tati pu che ñi culpan mu?

¹⁰ ¿Chumi Jehová ñi perdonayafiel tati pu che ñi culpan mu? Huercüfi tañi saquin Fotüm Jesús, fei “quiñe rupa müten chalintucui tañi mongen, fei ñi famentuafiel fentren che ñi culpan” (Heb. 9:28). Jesús “hulpai ñi mongen tañi ngillanentuafiel fentren che” (Mat. 20:28). ¿Chumngelu femngechi femi Jehová?

JESÚS TAÑI LAN MU CULLI TAIÑ MONTULAETEU

11. 1) ¿Chumngelu duamfalngefui ñi montulngeal tati pu che? 2) ¿Inei am culliafui ñi montulafiel tati pu che?

¹¹ Biblia feipi taiñ perdonangeal taiñ culpan ca taiñ hueniyerpuafiel ta Jehová, duamfali quiñe cullitu taiñ montulaeteu. Adán engu Eva ñi culpan mu ñamümingu ñi culpan-ngenochi mongen ca ñi rumel mongeleafel. Feimu duamfalngefui ñi cullingeal Adán ñi ñamümel (1 Tim. 2:6). ¿Inei am culliafui ñi montulafiel tati pu che? Quiñe culpan-ngenochi huentru, rumel ñi mongeleafel mapu mu ca eluucülelu ñi hulal tañi mongen tati pu che mu. Feichi che ñi mongen culliafui com ñi ñamümel Adán.

12. ¿Chumngelu am Jesús müten mülefui ñi cullial ñi montulafiel tati pu che?

¹² ¿Chumngelu am Jesús müten mülefui ñi cullial ñi montulafiel tati pu che? Raquiduamnge tüfachi cüla dungu mu. 1) Culpan-ngenochi mongen niefui, “turpu culpalai” (1 Ped. 2:22). 2) Culpan-ngenolu am rumel mongen nieafui tüfachi mapu mu. Ca 3) eluucülefui hulal ñi mongen tati pu che mu (Heb. 10:9, 10). Jesús culpan-ngelafui, femngechi mongen niequefui Adán petu ñi culpanon (1 Cor. 15:45). Jesús tañi lan mu culli Adán tañi culpan (Rom. 5:19). Femngechi Jesús “ti inan Adán” ngetui. Duamfal-lai cangelu culpan-ngenochi che ñi layal tati pu che meu. Jesús “quiñe rupa müten chalintucui tañi mongen, femngechi ñi quelluafiel pu che rumel meu” (Heb. 7:27; 10:12).

13. ¿Chumi Jehová taiñ cüme hueniyeafiel?

¹³ ¿Chumi Jehová taiñ cüme hueniyenieafiel? Adcünui chi dungu taiñ perdonangeal taiñ culpan mu. Jesús chalintucui tañi culpan-ngenochi mongen, femngechi tañi mollfüñ mu culli iñchiñ taiñ culpan mu (Efes. 1:7; Heb. 9:14).

JEHOVÁ LIFRENENTUEIÑMU TI CULPAN, LAN MU CA NOR CHE PIEIÑMU

14. ¿Chem inaduamaiñ feula ca chumngelu?

¹⁴ ¿Chumngechi am cümelcaeiñmu tañi femün mu Jehová? Feula inaduamaiñ epu dungu ñi feipin ta Biblia. Femngechi doi cüme adümafiyiñ chumngechi cümelcaqueiñmu Jehová ñi perdonachequen.

15, 16. 1) ¿Chumngechi lifrenentungeaiñ taiñ culpan mu? 2) Taiñ lifrenentungen mu ti culpan ca lan mu, ¿chum duamelqueiñmu?

¹⁵ Tati Biblia feipi Jesús huli tañi mongen ñi montulcheal, feimu lifrenentungeiñ taiñ culpan mu. Tati apostol Pablo feipi: “Tamün pu cuifiqueche elcünueimünmeu tamün ngünam mongen yenieal. Eimün montulngeimün feichi mongen meu, huelu hulngelai huesañmauquechi chemcün, plata cam oro no rume. Doi mai hulngei Cristo ñi falin mollfüñ, quiñe lif cordero ñi mollfüñ reque nienolu huelulcan” (1 Ped. 1:18, 19).

¹⁶ Jesús tañi chalintucun mu lifrenentungeafuiñ tati culpan ca tati lan mu taiñ rume cutrancaqueteu (Rom. 5:21). Feimu rume mañumniefiyiñ ta Jehová ca Jesús tañi femün mu engu (1 Cor. 15:22).

17, 18. 1) Jehová nor che piqueiñmu, ¿chem pi tüfa? 2) ¿Chumngechi cümelcaqueiñmu nor che pingetual?

¹⁷ Biblia feipi Jehová nor che piqueiñmu. Tüfa feipi Jehová feipiquelaeiñmu taiñ cullial taiñ culpan mu. Femnolu rume, Jehová inaquefi quisu ñi huercün dungu ca ayüquelai taiñ culpayal. Cafei iñchiñ taiñ duam mu nor che piquelaeiñmu. Doi mai taiñ feyentulen ñi femün Jehová ca Jesús taiñ montulaeteu, feimu Jehová eluuquei taiñ perdonayaeteu (Rom. 3:24; Gál. 2:16).

¹⁸ Nor chengeliyiñ Jehová ñi adquiñ mu, ¿chumngechi cümelcaqueiñmu? Quiñeque nor che piqueteu Jehová dullingei ñi müleal huenu mu Jesús engu, fei Chau Dios ñi pu yallngerpuingün (Tito 3:7; 1 Juan 3:1). Jehová perdonaquefi tañi culpan mu, culpan chengenolu reque troquiquefi, feimu dullingeingün ñi ngünenieal huenu mu (Rom. 8:1, 2, 30). Caquelu nor che pingequeel rumel mongeleai ta mapu mu. Jehová perdonaquefi tañi culpan ca hueniyerpufi (Sant. 2:21-23). Ti fütra troquiñche mongetripayalu Armagedón mu turpu lalayafui (Juan 11:26). Tati “pu norngechi che” ca “pu norngenochi che” huiñomongetuai (Hech. 24:15; Juan 5:28, 29). Mülen antü mu com pu feyentulechi che mülealu mapu mu “lifreletuai engün Chau Dios ñi pu yall reque” (Rom. 8:21). Rume ayüqueiñ müleal feichi antü taiñ culpan chengehuenoal ca Chau Jehová ñi pu yallngerpual.

19. Jehová ca Jesús ñi femün, ¿chumngechi cümelcaqueiñmu? (Ca inaduamnge ti huichulechi dungu “Jehová ñi perdonachequen”).

¹⁹ ¿Acordaimi chi ti hueche tripalu hunen parrafo mu? Tañi chau rulpaleleyu quiñe fütra defen ca nielai chumngechi ñi culliafiel. Iñchiñ ca femngechi felequefuiñ, niequelafuiñ maneluhun. Huelu Jehová quellueiñmu, huercüfi ñi Fotüm ñi lapayal ta com pu che mu. Taiñ feyentulen Jesús ñi lan mu, ¿chumngechi quelluqueiñmu? Montulngeafuiñ culpan ca lan dungu mu. Jehová perdonayafeiñmu, fei acordahuequelafi reque taiñ culpan. Cafei feula hueniyerpuafuiñ ta Jehová, tüfa doi falin-ngei.

20. ¿Chem inaduamafiyiñ cüpalechi chillcatun mu?

²⁰ Raquiduamliyiñ Jehová ca Jesús ñi femün mu, rume mañumniefiyiñ (2 Cor. 5:15). Femnofule engu, nielayafuiñ maneluhun. Huelu Jehová ñi perdonachequen, ¿chumngechi cümelcaqueiñmu caque quisuque iñchiñ? Cüpalechi chillcatun mu inaduamafiyiñ.