Inayentuafiyiñ pu cümeque püllü

1, 2. 1) ¿Chem dungu mu trürcülelaiñ pu cümeque püllü mu? 2) ¿Chem dungu mu trürcüleiñ pu cümeque püllü mu?

JEHOVÁ cüpaleiñmu tañi troquiñche mu, feimu coneltuleiñ quiñe fütra familia. Tüfa mu püramyequefiyiñ ta Jehová quiñentrür pu peñi ca lamngen iñchiñ ca pu cümeque püllü (Dan. 7:9, 10). Raquiduamliyiñ pu cümeque püllü mu, trürngelai iñchiñ mu piafuiñ. Rüfngei, pu cümeque püllü hune deumangeingün (Job 38:4, 7). Doi nehuen-ngeingün iñchiñ mu. Pu cümeque püllü doi yamfalngeingün ca norngeingün. Iñchiñ taiñ culpan chengen felelaiñ (Luc. 9:26).

² Huelu ca femngechi pu cümeque püllü iñchiñ trürcüleiñ quiñeque dungu mu, ¿chem dungu mu? Pu cümeque püllü reque, iñchiñ inayentuafuiñ ñi chumngen ta Jehová. Cafei pu cümeque püllü reque, iñchiñ ca quisutu dulliafuiñ chem taiñ femal. Quisuque taiñ üi tuculelngeiñ, caquerumei taiñ chumngechi chengen, ca nieiñ caquerume cüdau Jehová ñi troquiñche mu pu cümeque püllü reque. Cafei fei engün reque, duamnieiñ taiñ püramyeafiel ta Chau Dios (1 Ped. 1:12).

3. ¿Chem quimürpuafuiñ pu cümeque püllü mu?

³ Fentren dungu trürcülenolu am iñchiñ pu cümeque püllü mu, feimu tañi cümeque femün engün yafültucuafeiñmu ca quimeltuafeiñmu. Tüfachi chillcatun mu ngüneduamaiñ pu cümeque püllü ñi ñom piuquengen, ñi piuqueyechequen, tañi aguantalequen engün, ca fente ñi cüdauquen engün ñi lifcüleal ti trahunche. Fei inaduamaiñ chumngechi inayentuafuiñ engün.

ÑOM PIUQUENGEINGÜN

4. 1) Pu cümeque püllü, ¿chumngechi pengelqueingün tañi ñom piuquengen? 2) ¿Chumngelu fente ñom piuquengeingün? (Salmo 89:7).

⁴ Pu cümeque püllü ñom piuquengeingün. Fei engün fentren adümuhun nieingün. Nehuen nieingün ca quimün nieingün. Femlu rume, eluucüleingün ñi inayal Jehová ñi huercün dungu (Sal. 103:20). Femlu engün quiñe cüdau Jehová tañi elueteu, mallmauquelaingün tañi femel mu. Ca pünequelaingün tañi nehuen tañi afmatuaeteu caquelu. Chem rume tañi pedieteu Jehová, pu cümeque püllü eluucüleingün tañi femal, quiñeque mu üitungequenofulu rume (Gén. 32:24, 29; 2 Rey. 19:35).a Eluuquelaingün tañi püramyengeal, Jehová müten mülei ñi püramyengeal. ¿Chumngelu fente ñom piuquengeingün? Fente tañi piuqueyefiel ca respetaquefiel ta Jehová (papeltunge Salmo 89:7).

5. Ti cüme püllü norümtufilu ti apostol Juan, ¿chumngechi pengeli ñi ñom piuquengen? (Ca inaduamnge ti adentun).

⁵ Peaiñ chumngechi quiñe cüme püllü pengeli ñi ñom piuquengen. Feiti 96 tripantu püle, quiñe cüme püllü pengelelfi afmatufalchi dungu tati apostol Juan. Quimlai ñi üi feitachi cüme püllü (Apoc. 1:1). Juan pefilu tañi pengeleleteu ti cüme püllü, ¿chumi? Pochongnagi tañi püramyeafiel, huelu ti cüme püllü feipifemeyu: “¡Cuñiutucunge! ¡Femquelayaimi! Cüdaufe müten ta iñche, eimi ca tami pu peñi reque [...]. ¡Chau Ngünechen mai ta püramyefinge!” (Apoc. 19:10). Quimfalngei fente ñi ñom piuquengen ti cüme püllü. Ayülafui tañi püramyengeal, pürüm feipifi Juan ñi püramyeafiel Jehová müten. Ti cüme püllü raquiduamel-lafi ta Juan ñi müte falinon. ¿Chumngelu feipiafuiñ tüfa? Ti cüme püllü doi fentren tripantu yeniefui ñi serfifiel Jehová, ca doi nehuen-ngefui Juan mu. Femlu rume, chaf cüdaufe pifi ta Juan. Cafei ti cüme püllü norümtufilu rume ta Juan, huelu piuqueyen mu femi. Illcutulafi tañi pochongnagün ta Juan. ¿Quimtucupelafui fente tañi afmatulehuen Juan?

6. ¿Chumngechi inayentuafuiñ pu cümeque püllü ñi ñom piuquengen?

⁶ ¿Chumngechi inayentuafuiñ pu cümeque püllü ñi ñom piuquengen? Fei engün reque, ayüqueiñ femal fillque cüdau Jehová mu. Huelu mallmauquelaiñ taiñ femel mu, ca rume adümuhun nielu troquiuquelaiñ (1 Cor. 4:7). Cafei doi tripantu yeniefuliyiñ rume taiñ serfifiel Jehová, ca nieliyiñ rume falinque cüdau Jehová ñi troquiñche mu, doicülelu troquiuquelaiñ caquelu che mu. Loncontucuaiñ: doi cüdau nieliyiñ Jehová ñi troquiñche mu, doyelchi mai mülei taiñ ñom piuquengeal (Luc. 9:48). Pu cümeque püllü reque, doicülelu troquiuquelaiñ, huelu mai ayüqueiñ taiñ quellucheal.

7. Norümtucheliyiñ ca ngülamtucheliyiñ, ¿chumngechi ñom piuquengeafuiñ?

⁷ Norümtufiliyiñ ca ngülamtufiliyiñ quiñe peñi, lamngen ca taiñ pu yall, ¿chumngechi ñom piuquengeafuiñ? Ngülamtucheliyiñ, quiñeque mu nehuentu ngülamtufemafiyiñ ti cüme püllü reque. Huelu piuqueyen mu femafuiñ taiñ huesa duamelnoafiel ti che. Doicülelu caquelu che mu troquiulayaiñ. Feimu Biblia mu ngülamtuafiyiñ caquelu che, huelu piuqueyen mu ca yamuhun mu femaiñ (Col. 4:6).

PIUQUEYEQUEFINGÜN TA CHE

8. 1) Pu cümeque püllü, ¿chumngechi pengelqueingün ñi piuqueyechequen? (Lucas 15:10). 2) Tati pu cümeque püllü, ¿chumngechi quelluqueiñmu amuldunguyahun mu? (Ca inaduamnge ti adentun).

⁸ Pu cümeque püllü quimnieingün iñchiñ taiñ rupamequen, ca “feita müte falilai” piquelaeiñmu. Fei engün piuqueyechequeingün. Quiñe che fütra culpafule, fei repentiutule, pu cümeque püllü ayüduamqueingün. Quiñe che püntütripafule Jehová mu, huelu huiñotule, ca ayüuqueingün. Cafei quiñe che quimürpufile ta Jehová ca eluule ñi cüme elcünutuafiel ñi mongen tañi serfiafiel, rume ayüuqueingün (papeltunge Lucas 15:10). Pu cümeque püllü ca coneltuqueingün tañi amuldungual engün (Apoc. 14:6). Pengequelaingün tañi amuldunguyahun engün, huelu adniequefi tati amuldunguyaulu, femngechi peal ti che ayülu tañi quimafiel ta Jehová. Rüfcünu, pu cümeque püllü müten adniequelaeiñmu. Jehová ca püneafui tañi nehuen ñi quelluafiel pu che ayülu tañi quimaeteu, cafei ñi adnieafiel tañi pu che tañi quelluafiel caquelu (Hech. 16:6, 7). Jehová müna pünequefi tañi cümeque püllü taiñ quelluaeteu amuldunguyahun mu. Feimu maneluucüleaiñ taiñ quelluaeteu engün (inaduamnge ti huichulechi dungu “Allcütuñmangei tañi llellipuel engün”).b

9. ¿Chumngechi inayentuafuiñ pu cümeque püllü ñi piuqueyechequen?

⁹ ¿Chumngechi inayentuafuiñ pu cümeque püllü ñi piuqueyechequen? Huiñotule quiñe peñi, lamngen püntülefulu trahunche mu, rume ayüuqueiñ pu cümeque püllü reque. Quimfalcünulelafiyiñ taiñ rüf piuqueyefiel ca taiñ ayüucülen quisu meu (Luc. 15:4-7; 2 Cor. 2:6-8). Cafei pu cümeque püllü reque, cüdauconcüleaiñ amuldungun mu (Ecl. 11:6). Cafei chumngechi quelluqueiñmu tati cümeque püllü taiñ amuldungual, ca femngechi quelluafiyiñ taiñ pu peñi ca lamngen. ¿Chumafuiñ? Compañtuafuiñ quiñe hue peñi, hue lamngen tañi amuldungual. Ca quelluafuiñ quiñe peñi, lamngen füchalelu cam cutrancülelu ñi amuldungual.

10. ¿Chem quimeltuafeiñmu ñi femün ta Sara?

¹⁰ ¿Chumafuiñ pepi femnoliyiñ taiñ ayüquefel taiñ serfiafiel ta Jehová? Caque dungu femafuiñ taiñ quiñentrür cüdahual pu cümeque püllü engün. Peafiyiñ ñi rupan ta Sara.c Quisu India mapu mu mülefui, 20 tripantu yenielu tañi precursorangequen, Sara cutranrumei. Feimu pepi huitrahuelai tañi cahuitu mu. Rupalu tüfa, ca contueyu depresion cutran. ¿Chem quellueyu? Quellueyu tañi pu lamngen trahunche mu, ca tañi papeltuquen Biblia fill antü mu. Tüfa quellueyu tañi doi ayüucületual. Feimu cacünutui chumngechi tañi amuldungual. Tüfachi lamngen pepi anüquelafui tañi deumayal carta, telefono mu müten amuldunguquefui. Ti lamngen ca huiño mütrümtufilu feichi pu che ñi dunguel, ca feipingei ca mülei che ayülu ñi chillcatual Biblia. ¿Chum tripai? Rupalu quiñeque cüyen mu, doi 70 che enseñalelfi ta Biblia. Fentren che fel am, feimu itrocom che pepi enseñal-layafui. ¿Chumi ti lamngen? Feipifi caquelu lamngen ñi quelluaeteu ñi quimeltulelafiel Biblia. Quiñeque feitachi che amuquei trahun mu. ¿Rume ayüucülepelafuingün pu cümeque püllü? Sara nehuentu cüdahui ñi amuldungual. Caquelu peñi, lamngen ca femngechi cüdauquei Sara reque. Fei pu cümeque püllü, ¿müna ayüucülepelaingün tañi trür cüdauquen fei engün mu?

AGUANTAQUEINGÜN

11. Pu cümeque püllü, ¿chumngechi pengelqueingün fente tañi aguantalequen engün?

¹¹ Pu cümeque püllü inayentufali ñi aguantaquen mu. Fentren tripantu mu chaftuqueingün huesaque dungu ñi rupamequen. Fei engün peingün chumngechi Satanás caquelu huesaque püllü engün püntütripaingün Jehová mu (Gén. 3:1; 6:1, 2; Jud. 6). Biblia ca nütramcai quiñe cüme püllü fentren antü mu chaftufi quiñe huesa püllü (Dan. 10:13). Adán ca Eva ñi antü mu ca fantepu, pu cümeque püllü pequeingün chumngechi fentren che piquelaingün tañi serfiafiel Jehová. Femfulu rume, tüfachi cümeque püllü ayühunquechi ca com nehuen mu serfiniefingün ta Jehová. Cüme quimnieingün pichin mu Jehová apümcayafi com tati huesaque dungu.

12. ¿Chem quelluaiñmu taiñ aguantayal?

¹² ¿Chumngechi inayentuafuiñ pu cümeque püllü ñi aguantalequen? Pu cümeque püllü reque, iñchiñ ca pequeiñ ca chaftuqueiñ huesaque dungu. Huelu fei engün reque, maneluuqueiñ pichiñma mu Chau Dios apümcayafi com tati huesaque dungu. Feimu pu cümeque püllü reque, ‘fentecünuquelaiñ taiñ cüme femün’ (Gál. 6:9). Fei Jehová quelluaiñmu taiñ aguantayal (1 Cor. 10:13). Llellipuafiyiñ ta Jehová taiñ eluaeteu ñi nehuen, femngechi nieaiñ paciencia ca ayüucüleaiñ (Gál. 5:22; Col. 1:11). ¿Inantucungeliyiñ cai? Maneluhuaiñ Jehová mu ca pellquelelayaiñ. Jehová rumel quelluaiñmu ca yafültucuaiñmu (Heb. 13:6).

CÜDAUQUEINGÜN ÑI LIFCÜLEAL TI TRAHUNCHE

13. Afaelchi antü mu, ¿chem falin cüdau niei tati cümeque püllü? (Mateo 13:47-49).

¹³ Afaelchi antü mu, Jehová elufi falinque cüdau tati cümeque püllü (papeltunge Mateo 13:47-49). Fentren millonque che com mapu püle mülelu ayüqueingün allcütuafiel feitachi cümeque dungu. Quiñeque feitachi che norümquetui tañi mongen engün tañi serfiafiel ta Jehová, huelu ca quiñeque femquelai. Pu cümeque püllü elungei tüfachi cüdau, feiti pu nor che meu püntünentuafiel pu huesaque che. Feimu cüdauqueingün ñi lifcüleal ti trahunche. Huelu tüfa feipilai taiñ rupanoal huesaque dungu trahunche mu. Cafei quiñe che püntütripale Jehová ñi trahunche mu, pu cümeque püllü catrütulayafi ñi huiñotual. Maneluucüleiñ pu cümeque püllü com nehuen mu cüdauqueingün ñi lifcüleal ti trahunche.

14, 15. ¿Chumngechi inayentuafuiñ tati cümeque püllü ti trahunche ñi lifcüleal? (Ca inaduamnge ti adentun).

¹⁴ ¿Chumngechi inayentuafuiñ tati cümeque püllü ti trahunche ñi lifcüleal? Chumaiñ rume taiñ cüme hueniyenieafiel ta Jehová. ¿Chumngechi femafuiñ? Hueniyeafiyiñ feiti piuqueyefilu ta Jehová, famentuafiyiñ com taiñ püntünentuafeteu Jehová mu. Femngechi femliyiñ, quelluntucuaiñ ñi lifcüleal ti trahunche (Sal. 101:3). Ca quelluafiyiñ taiñ pu peñi ca pu lamngen ñi püntütripanoal Jehová mu engün. Por ejemplo, ¿chumafuiñ quiñe taiñ pu peñi ca lamngen fütra culpale? Piuqueyefilu am iñchiñ, feipiafiyiñ ñi entudungulelafiel pu loncolelu. Femnole, iñchiñ feipiafiyiñ pu loncolelu. Iñchiñ ayüqueiñ ñi pürüm cüme hueniyetuafiel ta Jehová engün (Sant. 5:14, 15).

¹⁵ Quiñe che fütra culpale entungeai trahunche mu. Entungele, hueniyehuelayafiyiñ. Femngechi lifcülequei ti trahunche (1 Cor. 5:9-13).d Eluuliyiñ taiñ hueniyehuenoafiel ti fütra culpalu, pengelelafiyiñ taiñ cutranpiuqueyefiel, femngechi raquiduamaingün tañi huiñotual Jehová mu. Fei huiñotule engün, iñchiñ ayühuaiñ. Ca femai Jehová ca tati pu cümeque püllü (Luc. 15:7).

16. ¿Chumngechi inayentuafuiñ pu cümeque püllü?

¹⁶ Chau Jehová enseñalqueiñmu ñi chumngen pu cümeque püllü ca elueiñmu taiñ trür cüdaucüleal pu cümeque püllü iñchiñ. Rume falin dungu tüfa. Inayentuafiyiñ engün, ¿chumngechi? Ñom piuquengeaiñ, piuqueyecheaiñ, aguantaleaiñ ca quelluaiñ ñi lifcüleal ti trahunche. Inayentufiliyiñ ñi femün pu cümeque püllü, femngechi trür serfiafiyiñ Jehová rumel mu.