TROQUIÑ ÑI CHILLCATUNGEAL 26
ÜLCANTUN 123 Cüme llounieafiyiñ Chau Dios ñi Ngünenien
Ñom piuquengeaiñ taiñ quimnoelchi dungu meu
“Com adümlayafuiñ tati Com Nehuen Nielu ñi chumquen” (JOB 37:23).
¿CHEM QUIMAIÑ?
Quimnoel mu rume com ñi rupayal, huelu raquiduamtucuaiñ taiñ quimnieel ca maneluhuaiñ Jehová mu, femngechi cüme miyahuaiñ.
1. Deumaeteu iñchiñ Jehová, ¿chem elueiñmu? ¿Chemu?
CHAU JEHOVÁ deumaeteu mu müten iñchiñ, elueiñmu taiñ quim raquiduamal, ca elueiñmu taiñ quimürpual hueque dungu ca cüme inayafiel chem taiñ quimürpuel. ¿Chemu femngechi deumaeiñmu? Jehová ayüquei taiñ quimafiel quisu tañi quimün, femngechi taiñ cüme femal (Prov. 2:1-5; Rom. 12:1).
2. 1) ¿Chem raquiduamtucunieafiyiñ? (Job 37:23, 24; ca inaduamnge ti adentun). 2) ¿Chemu fente falin-ngei taiñ com quimlu troquiunoal?
2 Chau Jehová elueiñmu fentrenque dungu taiñ quimal, huelu com quimiyiñ tati pilayafuiñ (papeltunge Job 37:23, 24). Raquiduamaiñ Job mu. Jehová fentrenque dungu ramtucafi ta Job, femngechi Job quimtucui mülefui fentren dungu tañi quimnoel. Tañi ramtucangen mu Job, quellueyu tañi cüme elcünutual tañi raquiduam ca ñi ñom piuquengeal (Job 42:3-6). Ca femngechi iñchiñ quimiyiñ fentren dungu, huelu com quimlafiyiñ. Raquiduamtucuniefiliyiñ tüfachi dungu, quelluafeiñmu taiñ ñom piuquengeal, cafei maneluhuaiñ Jehová taiñ quimeltuaeteu com taiñ duamnieel taiñ cüme dullial (Prov. 2:6).
Job reque, quimtuculiyiñ ñi mülen quiñeque dungu taiñ quimnoel, cümelcayaiñmu. (Inaduamnge parrafo 2).
3. ¿Chem inaduamaiñ feitachi troquiñ mu?
3 Feitachi troquiñ mu ngüneduamaiñ quiñeque dungu taiñ quimnoel, ca peaiñ chumngelu cüdaungeafui taiñ mongen quimnofiel mu tüfachi dungu, ca chemu cümei taiñ quimnoal quiñeque dungu. Taiñ inaduamel feitachi troquiñ mu, quelluaiñmu taiñ doi maneluhual Jehová mu. Fei am com quimlu, feimu feipiaiñmu com taiñ duamnieel (Job 37:16).
QUIMLAIÑ CHUMÜL ÑI ACUAL JEHOVÁ ÑI ANTÜ
4. Ñi feipin Mateo 24:36, ¿iñchiñ chem dungu quimlaiñ?
4 (Papeltunge Mateo 24:36). Iñchiñ quimlaiñ chumtepu ñi afal Huecüfü tañi ngünenieel. Jesús rume mülepalu mapu mu, quimquelafui “chem antü ca chem hora” ñi cüpayal.a Jesús ca feipifi tañi pu apostol Jehová müten ngen-ngei ñi feipial chumtepu ñi rupayal ti dungu (Hech. 1:6, 7). Chau Jehová deu marcacünui reque chumül ñi afal Huecüfü tañi ngünenieel, iñchiñ ta quimlaiñ.
5. Quimnoliyiñ chumtepu ñi acual Jehová tañi antü, ¿chum duamafuiñ?
5 Quimlaiñ chumtepu taiñ esperayal ñi afal Huecüfü tañi ngünenieel. Quimnolu am iñchiñ chem antü tañi acual, feimu quiñeque mu acunoalu troquihuafuiñ, feimu huesa duamafuiñ. Doi cüdautuafuiñ yenieliyiñ fentren tripantu taiñ esperalen ca huesa duamafuiñ ayentungeliyiñ acunon mu Jehová tañi antü (2 Ped. 3:3, 4). Ca raquiduamafuiñ: “Quimliyiñ chem antü tañi acual, doi cüdautulayafuiñ taiñ esperayal ca huesa duamlayafuiñ ayentungen mu” piafuiñ.
6. ¿Chemu cümei taiñ quimnoal chumtepu ñi acual Jehová tañi antü?
6 Jehová feipinoaeteu am iñchiñ chumül ñi acual tañi antü, pengelelafuiñ taiñ serfiquefiel taiñ piuqueyefiel mu ca taiñ maneluhun quisu mu. Ayünieiñ taiñ rumel poyeniefiel ta Jehová, femquelaiñ taiñ esperaniefiel mu Chau Jehová ñi antü. Müte raquiduamcülelayaiñ chumül ñi acual Jehová ñi antü, doi mai raquiduamcüleaiñ com tati cümeque dungu ñi rupayal feichi mu. Femliyiñ, doi fülconcüleaiñ Jehová mu, doi maneluhuaiñ quisu mu ca chumaiñ rume taiñ ayühulafiel (2 Ped. 3:11, 12).
7. ¿Chem dungu quimnieiñ?
7 Falin-ngei taiñ raquiduamal taiñ quimnieel mu. Quimnieiñ 1914 tripantu mu coni ti afaelchi antü. Biblia mu, Jehová feipicünueiñmu fentren profecia, fei pengeli 1914 mu ñi rupan tüfachi dungu. Ca pengeli chem dungu ñi rupayal tüfachi antü mu. Com tüfachi profecia huechurpui, feimu cüme quimnieiñ ‘Jehová ñi fütra antü fülcülepai’ (Sof. 1:14). Ca quimnieiñ Jehová ayüniei taiñ amuldungulelafiel tati cümeque dungu com pu che mapu mu (Mat. 24:14). Amuldunguqueiñ feitachi cümeque dungu 240 troquiñ mapu mu, doi mil quehun dungu mu. Duamnielaiñ chem antü ñi acual Jehová tañi antü taiñ quelluntucual tüfachi falin cüdau mu.
QUIMLAIÑ CHUMNGECHI TAIÑ QUELLUAETEU JEHOVÁ
8. ¿Chem quimeltuqueiñmu Eclesiastés 11:5?
8 Quiñeque mu, quimlaiñ “ñi chumquen tati rüfngechi Ngünechen” (papeltunge Eclesiastés 11:5). Felei llemai, com quimlaiñ tañi femquen ta Jehová femngechi ñi femürpual tañi ayüqueel. Cüme quimlaiñ chemu Jehová rulpacünuquei quiñeque dungu, ca com quimlaiñ chumngechi taiñ quelluaeteu Jehová (Sal. 37:5). Biblia feipilei iñchiñ com quimlaiñ ñi chumquen ta Jehová, ca femngechi quimlaiñ chumngechi ñi tremquen quiñe pichiche tañi ñuque tañi pütra mu, tati pu cientifico rume com quimlaingün tüfa.
9. Quimnoliyiñ chumngechi taiñ quelluaeteu Jehová, ¿chum duamafuiñ?
9 Quimnon mu iñchiñ chumngechi taiñ quelluaeteu Jehová, quiñeque mu cüdautuafuiñ taiñ femal cümeque dungu. Por ejemplo, cüdautuafuiñ taiñ adcünual taiñ mongen taiñ doi amuldungual, cam eluulayafuiñ chi taiñ huiñamtuhual cheu ñi doi duamniengen ta quellu. Raquiduamcüleliyiñ femal fillque dungu taiñ doi cüdahuelafiel Jehová, huelu huechurpunoliyiñ, raquiduamafuiñ Jehová ñi ayüucülenon iñchiñ mu. Rume amuldunguqueiñ chi, huelu nielaiñ quiñe che taiñ enseñalelafiel ta Biblia. Nehuentu cüdaumequeiñ chi taiñ deumarucayal Jehová ñi troquiñche mu, huelu chaftuquefiyiñ cüdaungechi dungu. Rupan mu femngechi dungu, ramtuhuafuiñ chi: “¿Quelluquepeneu mai ta Jehová?”.
10. Quimnon mu chumngechi taiñ quelluaeteu Jehová, ¿chem quelluafeiñmu taiñ femal?
10 Quimnon mu chumngechi taiñ quelluaeteu Jehová, fei quelluafeiñmu taiñ doi ñom piuquengeal, ca quimafuiñ Jehová tañi raquiduam doicülei iñchiñ taiñ raquiduam mu (Is. 55:8, 9). Cafei quimafuiñ maneluuliyiñ Jehová mu, doi cüme tripayai taiñ dungu. Cüme tripan mu taiñ amuldungun cüdau cam caquelu cüdau Jehová ñi troquiñche mu, iñchiñ püramyequefiyiñ ta Jehová (Sal. 127:1; 1 Cor. 3:7). Huelu ca femliyiñ caquelu cüdau, fei cüme tripanole, quimtucunieaiñ Jehová tañi com penieel, feimu quelluaiñmu taiñ tüngcüleal (Is. 26:12). Femqueiñ com taiñ pepi femqueel, maneluucüleiñ Jehová taiñ quelluaeteu. Jehová femlayai afmatufalchi dungu taiñ adnieaeteu chumngechi ñi femquefel cuifi, huelu quimnieiñ quisu taiñ rumel adnieaeteu (Hech. 16:6-10).
11. ¿Chem falinque dungu quimiyiñ?
11 Acordanieliyiñ taiñ quimnieelchi dungu, quelluafeiñmu. Quimnieiñ Jehová tañi piuqueyechefengen, ca norngei ca com quimün niei. Jehová ca müna falintuniequeiñmu taiñ femqueel quisu mu ca taiñ pu peñi ca lamngen mu, ca rumel cümelcaquefi tati pu püntütripaquenolu quisu mu (Heb. 11:6).
QUIMLAIÑ CHEM TAÑI RUPAYAL CÜPALECHI ANTÜ
12. Ñi feipin Santiago 4:13, 14, ¿chem dungu quimlaiñ?
12 (Papeltunge Santiago 4:13, 14). Quimlaiñ chem tañi rupayal taiñ mongen mu. Com iñchiñ ruparumeafuiñ huesaque dungu mu (Ecl. 9:11). Feimu com taiñ raquiduamnieel taiñ chumal quimlaiñ ñi femtripayal, quimlaiñ rume taiñ mongeleal taiñ femal.
13. Quimnoliyiñ chem ñi rupayal cüpalechi antü mu, ¿chum duamafuiñ?
13 Quimnoliyiñ chem ñi rupayal cüpalechi antü mu, cüdautuafuiñ taiñ nehuencüleal. Rume raquiduamcüleliyiñ chem tañi rupayafel, ayüucülehuelayafuiñ. Taiñ mongen pichiñma mu calerumetuafui ca ruparumeafuiñ huesaque dungu raquiduamnoliyiñ rume. Feitachi dungu rume hueñancülafeiñmu. Ca quiñeque mu femtripalayafui taiñ ayüniefel, fei huesa duamelafeiñmu (Prov. 13:12).
14. ¿Chem mülei taiñ femal taiñ rüf ayüucüleal? (Ca inaduamnge ti adentun).
14 Chaftufiliyiñ rume huesaque dungu taiñ mongen mu, pengelafuiñ taiñ serfiquefiel Jehová taiñ piuqueyefiel mu. Biblia mu ngüneduamquefiyiñ alün dungu pengelquelu Jehová com catrütulayafui taiñ huesa rupayal, fei ca adcünuquelai chem mu taiñ rupayal cüpalechi antü meu. Chau Jehová quimniei taiñ ayüucüleafel quimnolu rume iñchiñ com ñi rupayal taiñ mongen mu. Doi mai ayüucüleaiñ eluuliyiñ Jehová taiñ adnieaeteu ca taiñ feyentuafiel (Jer. 10:23). Feimu dullilu iñchiñ, tüngcüleafuiñ chem tañi rupayal. Fei Santiago reque feipiafuiñ: “Chau Jehová pile mongeleaiñ, fei femaiñ tüfa cam feiti” (Sant. 4:15).
Eluuliyiñ taiñ adnieaeteu Jehová ca inaniefiliyiñ, fei rüf cümelcayaiñmu. (Inaduamnge parrafo 14, 15).b
15. ¿Chem quimnieiñ taiñ rupayal cüpalechi antü meu?
15 Quimnolu rume iñchiñ chem tañi rupayal, huelu quimnieiñ Jehová taiñ feipicünueteu ñi müleal afnoachi mongen mapu mu ca huenu mu. Quimnieiñ Jehová coilatuquelai, ca inei no rume catrütulayai ñi femtripayal ñi feipicünuel (Tito 1:2). Fei müten feipiafui: “Ellaca mu feipicünun chem ñi rupayal, ca fütra cuifi chi dungu ñi femngequenon”. Com ñi feipicünuel cuifi femtripai, ca com ñi feipicünuel ñi rupayal femtripayai llemai (Is. 46:10). Ca quimnieiñ inei no rume ca chem no rume catrütulayafui Jehová taiñ piuqueyeaeteu (Rom. 8:35-39). Feimu Jehová eluaiñmu quimün, yafüluhun ca nehuen taiñ chaftuafiel chem dungu rume. Iñchiñ maneluucüleiñ Jehová taiñ quelluaeteu ca taiñ cümelcayaeteu (Jer. 17:7, 8).
MÜTE ADÜMLAYAFUIÑ FENTE TAIÑ QUIMNIETEU JEHOVÁ
16. ¿Tunte quimnieiñmu Jehová? Tüfa, ¿chum duamelqueiñmu? (Salmo 139:1-6).
16 (Papeltunge Salmo 139:1-6). Chau Jehová cüme quimnieiñmu quisuque iñchiñ. Quimniei taiñ raquiduamqueel ca chemu taiñ femngechi raquiduamqueel. Ca femngechi quimniei taiñ feipiqueel ca chem ñi mülen taiñ piuque mu. Ca quimniei com taiñ femqueel ca chemu taiñ femngechi femquen. Tati rey David feipi Chau Jehová rumel eluucülequei taiñ quelluaeteu. Chau Dios com deumalu ca nielu com nehuen, afmatufali chumngechi taiñ puquintunieteu ca taiñ duamtunieteu. Feimu llemai, David feipi: “Feichi quimün pepi adümlafiñ. Fente ñi alüpüralen pepi ditulafiñ” (Sal. 139:6).
17. ¿Chemu quiñeque che cüdautuquei Jehová tañi quisuque quimnieteu?
17 Chumngechi taiñ tremümngeel, taiñ tuhun meu cam taiñ cuifique feyentun mu, cüdautuafuiñ taiñ peafiel Jehová quiñe poyen-ngechi Chau ca taiñ rume duamtuqueteu. Cafei, David reque, huesa duamcüleafuiñ taiñ cuifique culpan mu, fei raquiduamafuiñ Jehová taiñ cüpa hueniyenoeteu (Sal. 38:18, 21). Ca quiñeque che eluumequei tañi cüme elcünutual tañi mongen ñi cüme hueniyeafiel Jehová, huelu cüdautuqueingün. Feimu raquiduamafui chi: “Chau Dios quimnieteu iñche, ¿chemu mülei tañi cacünutual ñi mongen tañi hueniyeafiel? ¿Chumngelu hueniyelaeneu chumngechi tañi femngen müten?” piafui chi.
18. ¿Chemu cümelcaqueiñmu quimtucual Jehová taiñ doi cüme quimnieteu? (Ca inaduamnge ti adentun).
18 Cüdautuliyiñ rume, huelu quimtucuafuiñ Jehová taiñ doi cüme quimnieteu. Cüdautuafuiñ chi taiñ ngüneduamuhual taiñ cüme chumngen, huelu Jehová peñmaqueiñmu llemai. Fei quimniei taiñ huelulcauquen, huelu ca peniei taiñ cüpa ayühulfiel ca piuqueyeiñmu (Rom. 7:15). Felei llemai, Chau Jehová ngüneduamquei chem che taiñ ngerpuafel. Quimtuculu tüfa, feita eluqueiñmu nehuen taiñ serfinieafiel ayühun mu.
Quimlaiñ com dungu ñi rupayal, huelu maneluuqueiñ tañi feipin Jehová ñi mületual re cümeque dungu. Feita quelluqueiñmu taiñ chaftuafiel huesaque dungu. (Inaduamnge parrafo 18, 19).c
19. ¿Chem cüme quimnieiñ Jehová mu?
19 Com piuque mu quimtucunieiñ Jehová tañi doi piuqueyechequen (1 Juan 4:8). Quimnieiñ Jehová tañi huercün dungu com pengelquei taiñ piuqueyeteu ca ayüquei taiñ cüme miyahual. Ca quimnieiñ Jehová ayüniei taiñ nieal afnoachi mongen, feimu huli tañi Fotüm. Jesús cai hultuculu ñi mongen iñchiñ mu, fei rüf maneluucüleafuiñ taiñ ayühulafiel Jehová culpafe chengelu rume iñchiñ (Rom. 7:24, 25). Ca quimnieiñ “Chau Ngünechen doicülei iñchiñ taiñ piuque mu, fei com quimniei” (1 Juan 3:19, 20). Jehová cai cüme quimnieteu iñchiñ, maneluucülei iñchiñ mu taiñ pepi ayühulafiel.
20. ¿Chem quelluaiñmu taiñ fill raquiduamcülenoal taiñ quimnoelchi dungu meu?
20 Taiñ peel tüfachi troquiñ mu, Biblia mu Jehová com quimeltuqueiñmu taiñ duamnieel, feimu ngelai taiñ fill raquiduamcüleal quimnoelchi dungu meu. Doi mai raquiduamtucuafiyiñ doi falinque dungu. Femngechi femliyiñ, pengelaiñ taiñ ñom chengen ca taiñ maneluuquen Jehová mu, fei com quimün niei (Job 36:4). Mülei quiñeque dungu taiñ quimnoel fachantü, huelu maneluucüleiñ Jehová ñi rumel amuleal taiñ quimeltuaeteu. Rume ayüucüleiñ taiñ fentepuuquenon Jehová taiñ quimeltuqueteu (Ecl. 3:11).
ÜLCANTUN 104 Chau Ngünechen eluqueiñmu ñi nehuen
a Jesús loncoleai tañi hueichayafiel Huecüfü tañi ngünenieel. Feimu lle, fachantü Jesús quimniepelai chumül ñi acual ti Armagedón ca ñi huehuafiel tañi pu caiñe (Apoc. 6:2; 19:11-16).
b ¿CHEM PENGELI TI ADENTUN? Quiñe chau tañi fotüm engu pepicamequei quiñe mochila ñi pünengeal rupafule huesa dungu.
c ¿CHEM PENGELI TI ADENTUN? Quiñe peñi petu rupalu cüdaungechi dungu meu, raquiduamtucui tañi rume ayüucüleal ti hue mapu meu.