Maneluunge tami perdonaqueteu Jehová

1, 2. ¿Chem femquei Jehová repentiulu taiñ culpan mu? Fei, ¿chum duamelqueiñmu tüfa? (Ca inaduamnge ti adentun).

TATI lonco ülmen David quimniefui chum duamcülequen che culpalu (Sal. 40:12; 51:3, huenuntu meu ti versiculo 1). Huesa culpai quiñeque dungu meu. Huelu repentiutui tañi huesa femün mu, fei Jehová perdonaeyu (2 Sam. 12:13). Feimu David rume ayüucületui quimlu Jehová tañi perdonaeteu (Sal. 32:1).

² Iñchiñ ca femngechi ayüucületuaiñ quimlu Jehová taiñ cutranpiuqueyeteu ca perdonaeteu. Fütra culpaliyiñ, mülei taiñ repentiutual, llellipual, entudungulelafiel pu loncolelu ca conhuenoal culpan dungu mu, fei Jehová perdonayaiñmu. Feita rume yafültucuqueiñmu (Prov. 28:13; Hech. 26:20; 1 Juan 1:9). Jehová rüf perdonaquei, feimu turpu acordahuequelai taiñ culpan (Ezeq. 33:16).

3, 4. 1) ¿Chum duami quiñe lamngen deu fautizaulu? 2) ¿Chem peaiñ tüfachi troquiñ mu?

³ Quiñeque cüdautuafui maneluhual Jehová tañi perdonaeteu. Ngüneduamaiñ ñi rupan Jennifer. Fei tañi pu chau tremümeyu Jehová ñi troquiñche mu. Huelu doi tremlu, epu rume mongen nierpui ca coni huesaque dungu meu. Huelu rupalechi tripantu mu, cüme elcünutui ñi mongen, hulcünui ñi mongen Jehová mu ca fautizahui. Feipi: “Cuifi mu conquefun pod cudumuhun meu, ngollicauquefun ca illcufengefun, tañi nieal plata doi falintuquefun. Quimniefun Biblia feipi taiñ culpan perdonangeafui Jesús ñi duam mu, huelu tañi piuque rume huesa duamcülefui, ¿perdonapeneu mai Jehová? pilefun”.

⁴ ¿Raquiduamimi chi Jehová tami petu illcutunieteu tami huesa femün cuifi? Jehová ayüquei taiñ maneluhual fei tañi cutranpiuqueyechequen, David reque. Tüfachi troquiñ mu peaiñ chemu falin-ngei taiñ maneluhual Jehová ñi rüf perdonachequen, ca chem quelluafeiñmu taiñ maneluhual.

¿CHEMU FALIN-NGEI MANELUHUAL JEHOVÁ TAIÑ PERDONAETEU?

5. ¿Chem ayüquei Huecüfü taiñ raquiduamal? Feipinge quiñe ejemplo.

⁵ Maneluuliyiñ Jehová taiñ piuqueyeteu ca perdonaeteu, ngünencalayaiñmu Huecüfü. Acordayaiñ, Huecüfü chumquei rume taiñ serfihuenoafiel Jehová. Huecüfü raquiduamelafeiñmu Jehová taiñ turpu perdonanoeteu. Raquiduamnge ñi rupan ti huentru Corinto trahunche mu, fei coni pod cudumuhun mu, feimu entungei trahunche mu (1 Cor. 5:1, 5, 13). Rupachi antü mu, ti huentru repentiutui. Huecüfü ayüniefui ti trahunche ñi perdonanoaeteu ca ñi cüme llounoaeteu. Fei ti trahunche perdonanoeliyu, fei ti huentru raquiduamafui Jehová tañi ca perdonanoeteu, fei doi huesa duamcüleafui ca serfihuelayafui Jehová. Fachantü ca femngechi femquei Huecüfü, ayüquei taiñ raquiduamelaeteu taiñ perdonanoeteu Jehová, femngechi taiñ serfihuenoafiel. Huelu iñchiñ “quimnieñmafiyiñ tañi ngünen” (2 Cor. 2:5-11).

6. Deu repentiuliyiñ, ¿chem quelluafeiñmu taiñ ayüucületual?

⁶ Feyentuliyiñ Jehová taiñ perdonaeteu, huiño ayüucületuaiñ. Culpalu iñchiñ, huesa duamqueiñ (Sal. 51:17). Fei cüme dungu tati, quimtuculiyiñ taiñ culpan quelluafeiñmu taiñ norümtuafiel ti huesa dungu (2 Cor. 7:10, 11). Huelu amulele taiñ raquiduamün Jehová taiñ perdonanoeteu, nehuen-ngehuelayafuiñ taiñ serfiafiel ta Jehová. Huelu feyentulu iñchiñ Jehová taiñ perdonaeteu, furicünuafuiñ taiñ culpan, femngechi ayühunquechi serfinieafiyiñ Jehová ca ngüneduamaiñ tañi ayüucülen iñchiñ mu, tüfa ayüquei Jehová (Col. 1:10, 11; 2 Tim. 1:3). ¿Chumngechi am feyentuafuiñ Jehová taiñ rüf perdonaeteu? Peafiyiñ.

¿CHEM QUELLUAIÑMU TAIÑ QUIMTUCUNIEAL TAIÑ PERDONAETEU JEHOVÁ?

7, 8. ¿Chem feipi Jehová quisu meu? Ca, ¿chem mu maneluucüleafuiñ? (Éxodo 34:6, 7).

⁷ Raquiduamnge ñi feipin Jehová quisu ñi femngen mu. Loncontucuaimi Jehová ñi feipifiel ta Moisés Sinaí huincul mu (papeltunge Éxodo 34:6, 7).a Jehová niei rume alün cümeque dungu ñi feipiafel quisu meu, huelu feipifi ta Moisés ñi cutranpiuqueyechequen ca ñi cuñillchequen. Feimu quiñe che poyequefilu Jehová repentiule ñi huesa culpan, ¿feipiafuiñ Jehová turpu ñi perdonanoaeteu? ¡Felelai! Jehová cai yafü piuquengenolu, doi mai cutranpiuqueyechequei.

⁸ Maneluhuafuiñ Jehová ñi cutranpiuqueyechequen. Jehová am feipilu ñi cutranpiuqueyechequen rüfngei ñi feipin, quisu coilatuquelai (Sal. 31:5). Eimi cüdautulmi tami culpatuuhuenoal tami huesa femün mu, ramtuunge: “¿Rüf feyentuquen Jehová ñi cutranpiuqueyechequen ca cuñillchequen?¿Feyentuquepen mai ñi perdonaquefiel inei rume rüf repentiule?”. Ca femngechi llemai, Jehová perdonayafeimu eimi.

9. ¿Chem quimeltueimu Salmo 32:5 Jehová ñi perdonachequen?

⁹ Raquiduamnge taiñ quimeltuqueteu Jehová Biblia mu tañi perdonachequen. Raquiduamaiñ David ñi huirintucun (papeltunge Salmo 32:5). “Eimi perdonaen ñi culpan mu” pi. Hebreo quehun mu ti palabra perdon ca feipi “entuñmangeal” ca “yeñmangeal”. Jehová perdonafilu David, David troquifi quiñe fanechi dungu entuñmaeyu Jehová. Fei David ayüucületui quimlu Jehová tañi perdonaeteu com ñi culpan (Sal. 32:2-4). Iñchiñ ca femngechi ayüucületuafuiñ. Rüf repentiuliyiñ, ngelai taiñ fanetuleal reque taiñ cuifi culpan mu. Doi mai, ayüucüleafuiñ Jehová taiñ rüf perdonaeteu, yeñmaeiñmu reque taiñ culpan.

10, 11. Ñi feipin Salmo 86:5, ¿chem quimeltueiñmu Jehová mu?

¹⁰ (Papeltunge Salmo 86:5). David feipi Jehová pepicaucülei tañi huiñoduamtucheal. Tüfa pengeli huelulcaulu iñchiñ, Jehová illcufemquelai ca rumel eluucülequei ñi perdonayafiel tati pu repentiulu. ¿Chemu femngechi femngei? Ti salmo feipi: “Tami nor piuqueyen alün-ngei com tami pu ngillatuqueteu mu”. Rupachi chillcatun mu, ngüneduampeiñ Jehová feipicünui ñi rumel piuqueyeafiel tuchi poyequeteu ca quisucünuquelafi. Feimu llemai, rüf perdonaquefi tati pu repentiulu tañi culpan mu (Is. 55:7). Cüdautulmi feyentual Jehová tami perdonayaeteu, raquiduamnge tüfa: eimi, ¿feyentuquepelaimi Jehová ñi perdonaquefiel com pu repentiulu? Feimu, ¿chumngelu perdonalayafeimu eimi?

¹¹ Biblia pengeli Jehová cüme quimniei chumngechi taiñ deumangen ca taiñ culpafe chengen, feita yafültucuqueiñmu (Sal. 139:1, 2). Peaiñ cangelu salmo ñi huirintucuel David, feita pengelqueiñmu Jehová tañi perdonachequen.

¿CHEM QUIMTUCUNIEI JEHOVÁ IÑCHIÑ MU?

12, 13. ¿Chem acordaniei Jehová iñchiñ mu? Fei, ¿chumquei? (Salmo 103:14).

¹² (Papeltunge Salmo 103:14). David feipi chemu Jehová eluucülei taiñ perdonayaeteu, feipi: “Acordaniei taiñ trufür mapungen”. Feita pengeli Jehová ñi quimtucunieel taiñ culpan chengen. Doi ngüneduamaiñ ñi feipin David.

¹³ David feipi Jehová “cüme quimniei chumngechi taiñ deumangen”. Felei, “Chau Jehová nüi trufür mapu, fei deumafi” ta Adán, feimu Jehová cüme quimniei tati pu che ñi chumngechi deumangen ca chem tañi duamnieel engün: iyal, umautual ca neyüal (Gén. 2:7). Huelu David feipilu “taiñ trufür mapungen”, cüpa feipi taiñ culpan chengen. Adán ca Eva culpalu, com iñchiñ culpafengetuiñ ca cüdautuqueiñ taiñ cüme femal. Jehová quimniei taiñ huelulcauquen taiñ culpafe chengen mu. Feimu huelulcauliyiñ iñchiñ ca repentiuliyiñ, Jehová cutranpiuqueyequeiñmu ca perdonaqueiñmu (Sal. 78:38, 39).

14. 1) ¿Ca chem feipi David Jehová taiñ perdonaqueteu? (Salmo 103:12). 2) ¿Chem pengeli Jehová chumngechi ñi perdonafiel David? (Inaduamnge ti huichulechi dungu “Jehová rüf perdonachequei”).

¹⁴ Ñi feipin Salmo 103, ¿ca chem quimeltueiñmu Jehová ñi perdonachequen mu? (Papeltunge Salmo 103:12). David feipi chumngechi alü camapulei ti conhue antü ca tripahue antü, ca femngechi Jehová alü camapucünuquefi taiñ culpan. Fente tañi camapu yefiel, chumcaunorume acordahuelai taiñ cuifi culpan taiñ huesalcayaeteu (Ezeq. 18:21, 22; Hech. 3:19).

15. ¿Chem femafuiñ culpatuumequeliyiñ taiñ cuifique culpan mu?

¹⁵ Cüdautulmi tami feyentual Jehová tami perdonaeteu, ¿chumngechi quelluafeimu ñi feipin Salmo 103? Raquiduamnge Jehová ñi raquiduamqueel. Jehová acordaniei taiñ culpafe chengen ca perdonafi com tati pu repentiulu ñi huesa femün. Feimu repentiutulu am eimi, ¿perdonalayafeimu Jehová? Ca acordafinge Jehová feipicünui tañi acordahuenoal tami cuifi culpan, feimu Jehová ñimitulayai tami huesa femün tami huesalcayaeteu. Jehová raquiduamtucunielai tami cuifi culpan, feimu eimi ca femlayaimi (Sal. 130:3). Feyentulu iñchiñ Jehová taiñ perdonaeteu, culpatuuhuelayaiñ, ayühunquechi serfinieafiyiñ Jehová.

16. Re raquiduamcüleliyiñ taiñ cuifique culpan mu, ¿chumngelu cuñihun-ngeafui? Feipiaimi quiñe ejemplo (ca inaduamnge ti adentun).

¹⁶ Raquiduamnge tüfachi ejemplo mu. Quiñe che amulniefilu quiñe auto mülei ñi adquintuafiel ti espejo retrovisor tañi peal furi püle. Huelu re adquintuniefile ti espejo retrovisor cuñihun-ngeafui, feimu femquei quiñeque mu müten. Doi mülei ñi adquintuafiel amulechi rüpü mu, femngechi doi cüme amuleai. Ca femngechi quiñeque mu acordanieliyiñ cuifique huelulcan, cümeafui. Quelluafeiñmu taiñ huiño connoal tüfachi dungu mu. Huelu re raquiduamcüleliyiñ taiñ cuifique culpan mu, ayühunquechi serfihuelayafiyiñ Jehová. Doi mai raquiduamcüleaiñ chumngechi taiñ serfiquefiel Jehová ca acordanieaiñ Jehová ñi feipicünuel. Cüpalechi antü mu, com taiñ huesa duamelqueteu ngoimacünungeai (Prov. 4:25; Is. 65:17).

DOI MANELUHUAIMI JEHOVÁ ÑI PERDONACHEQUEN CA PIUQUEYECHEN

17. ¿Chemu duamfali taiñ doi maneluhual Jehová ñi piuqueyechequen ca perdonachequen?

¹⁷ Taiñ ngüneduampeel, Huecüfü ayüniei taiñ püntünentuaeteu Jehová mu, feimu chumquei rume taiñ raquiduamelaeteu Jehová taiñ piuqueyenoeteu ca perdonaquenoeteu. Huecüfü quimniei ñi pichilehuen tañi antü, feimu doi eluuquei taiñ ngünencayaeteu (Apoc. 12:12). Feimu yafüluhuaiñ taiñ doi maneluhual Jehová taiñ piuqueyenieteu ca perdonaqueteu, femngechi hueulayaiñmu Huecüfü (1 Juan 3:19).

18. ¿Chumafuimi tami maneluhual Jehová tami piuqueyeteu ca perdonaeteu?

¹⁸ Tami doi maneluhual Jehová ñi piuqueyechequen mu, inayafimi taiñ peel rupachi troquiñ mu. Ca tami doi maneluhual Jehová ñi perdonachequen mu, inayaimi taiñ peel tüfachi troquiñ mu. Raquiduamnge ñi feipin Jehová quisu ñi femngen. Raquiduamnge ñi feipiel Biblia Jehová ñi perdonachequen mu. Ca acordayaimi Jehová quimniei taiñ huelulcauquen, feimu cutranpiuqueyeiñmu. Ca loncontucuaimi: Jehová taiñ perdonaeteu acordahuetuquelai taiñ culpan. Femngechi femülmi, quimtucunieaimi Jehová tami cutranpiuqueyeteu, fei cüme duamcüleaimi. David reque, feipiaimi: “‘Eimi perdonaen ñi culpan mu’, feimu mañumeyu Chau Jehová” (Sal. 32:5).