¿Chumaiñ mülen mu norngenochi dungu?

1, 2. ¿Chum duamquei pu che pefiel mu norngenochi dungu, ca chem ramtuhuafuiñ?

FAMÜLQUE mu fentren che huesalcangequei. Quiñeque huesalcangequei tañi pofrengen mu, tañi tuhun mu, tañi ad mu ca caquelu dungu mu. Cafei quiñeque gobernante ca tati pu ngen empresa quisutu duamuuquei tañi ngülümal plata müten, fei tañi huesa dulliel mu engün cutrancaquefi tati pu che. Fillque norngenochi dungu huesalcayafeiñmu iñchiñ cam taiñ quimnieelchi che.

² Felei, com ayünieiñ taiñ tüngcüleal ca taiñ cüme femngeal. Feimu llemai tati pu che pefiel mu norngenochi dungu, huesa duamquei ca illcuquei. Feimu quiñeque che eluuquei ñi cüme elcünutuafiel ti dungu mapu mu, feimu protestaqueingün ñi chaftuafiel ti gobierno ca quiñeque ley ñi entungeel, ca quelluntucuquefi quiñeque candidato feipilu ñi cüme elcünutuafiel ti dungu. Huelu taiñ pu cristianongen coneltuquelaiñ politico dungu mu, doi mai maneluuqueiñ Chau Jehová ñi Gobierno müten cüme elcünutuafi com dungu (Juan 17:16). Femfuliyiñ rume, huesa duamqueiñ ca illcuqueiñ pefiel mu caquelu che ñi huesalcangequen. ¿Chem femafuiñ? Famülque mu, ¿chaftupeafuiñ mai tati norngenochi dungu? Tüfachi troquiñ mu ngüneduamaiñ. Huelu hunelu mu, peaiñ chum duamquei Jehová ca Jesús pefiel mu norngenochi dungu.

JEHOVÁ CA JESÚS ÜDEQUEFI TI NORNGENOCHI DUNGU

3. ¿Chemu huesa duamqueiñ pefiel mu norngenochi dungu? (Isaías 5:7).

³ Biblia feipi chemu huesa duamqueiñ pefiel mu norngenochi dungu. Jehová deumaeiñmu taiñ inayentuafiel fei ñi chumngen. Fei piuqueyeniefilu am ti nor dungu, iñchiñ ca femqueiñ (Gén. 1:26; Sal. 33:5). Jehová turpu femquelai norngenochi dungu, ca ayüquelai caquelu ñi femngechi femal (Deut. 32:3, 4; Miq. 6:8; Zac. 7:9). Cuifi, Isaías tañi antü mu, quiñeque Israel che cutrancamequefeyu tañi pu chafche, fei Jehová allcütui aungen pilu engün (papeltunge Isaías 5:7). Jehová ayülafui tüfa, feimu castigafi tati pu inaquenolu tañi ley ca tati pu huesalcachequelu (Is. 5:5, 13).

4. ¿Chum duami Jesús pefilu ñi cutranpiuqueyengenon quiñe huentru? (Ca inaduamnge ti adentun).

⁴ Jehová reque, Jesús piuqueyefi ti nor dungu ca üdequefi ti norngenochi dungu. Quiñe rupa, Jesús pefi quiñe huentru lañmalelu tañi cuhu, fei cutranpiuqueyefi ca tremoltufi. Feiti pu loncolechi religioso pefilu ñi femün, illcuingün. Fei ti pu huentru feipingün Jesús ñi inanofiel ti ley ürcütun antü meu, huelu duamtulaingün tati huentru ñi tremotun. ¿Chumi Jesús? “Rume cutrantupiuquei ngüneduamlu ñi yafü piuquengen engün” (Mar. 3:1-6).

5. Rupan mu norngenochi dungu, ¿chumngelu ngelai taiñ alüntu illculeal?

⁵ Jehová ca Jesús pefiel mu norngenochi dungu illcuqueingu, feimu huesa dungu no taiñ ca femngechi femquen (Efes. 4:26 ca ti nota de estudio “Cuando se enojen”). Huelu mülei taiñ ngünehual taiñ fente illcunoal. Loncontucunieaiñ: taiñ alüntu illculen mu, norümlayafuiñ ti norngenochi dungu. Alüntu illculeliyiñ, cutranconafuiñ ca hueñancüleafuiñ (Sal. 37:1, 8; Sant. 1:20). ¿Chem mülei taiñ femal pefiel mu norngenochi dungu? Taiñ quimal, ngüneduamaiñ Jesús tañi femün.

CHUMI JESÚS PEFILU NORNGENOCHI DUNGU

6. ¿Chem norngenochi dungu mülefui Jesús ñi antü mu? (Ca inaduamnge ti adentun).

⁶ Jesús mülepalu mapu mu, pefi alün norngenochi dungu. Jesús quimniefui feiti pu loncolechi religioso entuquefui fentren huercün dungu, huelu tüfa cüdaungefui tañi com inangeal, feimu cutrancauquefui pu che (Mat. 23:2-4). Jesús ca quimniefui tati pu ngünenielu Roma ca huesalcaquefui pu che, feimu fentren judio ayüfuingün ñi ngünehuenoaeteu pu Roma che, feimu quiñeque adcünuhuingün ñi chaftuafiel ti gobierno mülelu Roma mu. Jesús turpu quelluntuculafi chem troquiñche rume ñi cacünutual ti gobierno. Quimlu tati che ñi reycünuaeteu, amufemtui (Juan 6:15).

7, 8. Mülepalu Jesús mapu mu, ¿chemu apümlafi ti norngenochi dungu? (Juan 18:36).

⁷ Jesús coneltulai pu politico ñi norcünual ti huesaque dungu tañi antü mu. ¿Chemu femlai? Fei am quimnielu tati pu che ñi nienon pepiluhun tañi quisutu ngünehual ca ngen-ngelai rume tañi femal (Sal. 146:3; Jer. 10:23). Ca femngechi tati pu che pepi apümlayafui cheu ñi tuhun ti norngenochi dungu. Quiñe tüfa: Huecüfü cai ngünenielu tüfachi mapu, fentren che inayentuqueyu ñi huesa femngen (Juan 8:44; Efes. 2:2). Ca femngechi culpafe chengeiñ, feimu cüdautuqueiñ taiñ cüme femal cüme raquiduam nieliyiñ rume (Ecl. 7:20).

⁸ Jesús quimniefui Chau Dios tañi Gobierno müten folilnentuafui tati huesaque dungu, feimu com tañi nehuen mu eluhui ñi amuldungual “tati cümeque dungu Chau Ngünechen ñi ngünenietual ta mapu” (Luc. 8:1). Femngechi yafültucufi pu che ayünielu tañi peal nor dungu (Mat. 5:6 ca ti nota de estudio; Luc. 18:7, 8). Quiñe gobierno no rume cüme elcünutulayafui tati norngenochi dungu. Chau Dios tañi Gobierno müten femai, huelu tüfachi Gobierno coneltulai mapu meu müleyechi gobierno (papeltunge Juan 18:36).

PEFIEL MU NORNGENOCHI DUNGU, INAYENTUAFIYIÑ JESÚS

9. ¿Chemu maneluucüleimi Jehová tañi Gobierno müten ñi apümafiel com cutrancahun?

⁹ Taiñ mülen afaelchi antü mu, fachantü doi mülei huesaque dungu tañi mülequefel Jesús tañi antü mu. Huelu Jesús tañi antü meu reque, fachantü ca mülei cutrancahun tati Huecüfü ca tañi pu inaniequeteu tañi duam mu (2 Tim. 3:1-5, 13; Apoc. 12:12). Iñchiñ ca quimnieiñ Chau Jehová tañi Gobierno müten apümafi Huecüfü ca com tati huesaque dungu. Feichi Gobierno müten quelluntucuquefiyiñ, feimu protestaquelaiñ ca maneluuquelaiñ caquelu gobierno ñi cüme elcünutuafiel ti norngenochi dungu. Peaiñ ñi rupan quiñe lamngen Stacy pingelu.a Petu tañi testigongenon, protestaquefui tañi chaftuafiel ti norngenochi dungu. Huelu rupachi antü mu, ramtuhui ñi cümepen mai ñi femün. Taiñ lamngen feipi: “Protestayaulu iñche, quiñeque mu ramtuuquefun ‘¿rüf quelluquepefi mai tati pu che tañi femngechi femquen?’. Huelu feula incaquefiñ Chau Dios tañi Gobierno, feita queta cüme tripayai. Quimnien Chau Jehová tañi apümafiel com ti cutrancahun, iñche tañi pepi femnoafel” (Sal. 72:1, 4).

10. ¿Chemu coneltuquelaiñ taiñ cacünutual ñi femqueel ti gobierno? (Mateo 5:43-48; ca inaduamnge ti adentun).

¹⁰ Quiñeque che adcünuquei tañi cacünutuafiel ti gobierno ñi femqueel, huelu fentren engün pofolcauquei ca huesalcachequei, femngechi quimeltulai Jesús (Efes. 4:31). Ti peñi Jeffrey pingelu feipi: “Tati pu che protestamequelu müchai müten illcuafuingün, fei mülerumeafui quehuan ca hueñen dungu. Huelu Jesús feipi taiñ piuqueyeafiel ca cüme femafiel com pu che, ca raquiduam niefule rume cam caiñetueliyiñmu rume” (papeltunge Mateo 5:43-48). Iñchiñ taiñ cristianongen, eluuqueiñ taiñ inayafiel Jesús ñi femün ca tañi quimeltun.

11. ¿Chumngelu quiñeque mu doi cüdautuafuiñ taiñ inayentuafiel Jesús?

¹¹ Quimnieiñ Chau Jehová tañi com apümafiel ti norngenochi dungu. Huelu iñchiñ huesalcangeliyiñ, doi cüdautuafuiñ taiñ inayentuafiel Jesús. Peaiñ ñi rupan taiñ lamngen Janiya pingelu. Fei illamcangequefui tañi tuhun mu. Fei feipi: “Rume hueñancülefun ca illculefun. Ayüfun tañi pu illamcaeteu tañi castigangeal engün, feimu raquiduamfun tañi quelluntucual tati pu protestaquelu ñi mülenoal illamcahun. Raquiduamfun tañi doi cüme duamal” pi. Huelu taiñ lamngen ngüneduamürpui tañi cüme elcünutual tañi raquiduam. Fei feipi: “Quimtucun tañi maneluucülenon Jehová mu, doi mai maneluucülefun tati pu che ñi feipiqueel mu. Feimu trahuluuhuelan feichi pu che engün”. Huesa femngeliyiñ ca pefiel mu norngenochi dungu, illcuafuiñ. Huelu mülei taiñ ngünehual ca turpu coneltunoal tüfachi mapu müleyechi dungu mu ca politica dungu mu (Juan 15:19).

12. ¿Chumngelu cuñiutucuhuaiñ taiñ pequeel, allcütuqueel ca taiñ papeltuqueel?

¹² Huesa femngeliyiñ cam pefiliyiñ norngenochi dungu, ¿chem quelluafeiñmu taiñ tüngcüleal? Cuñiutucuhuaiñ chem taiñ papeltuqueel, taiñ pequeel ca taiñ allcütuqueel. Internet mu mülei quiñeque nütram tañi huesa dunguyengeal pu gobierno ca ñi llicalcayafiel pu che. Quiñeque mu, tati pu periodista doi amulcünuquei tañi feipin engün. Rüfngefule rume quiñe noticia, huelu quelluquelai doi quiñe rupa tañi pefiel mu, ti dungu amulei ñi felen. Doi mai rume raquiduamcüleafuiñ, lladcüafuiñ ca huesa duamafuiñ (Prov. 24:10). Cafei, acordahuelayafuiñ Chau Dios ñi Gobierno müten tañi norümafiel com dungu.

13. Papeltufiel Biblia fill antü, ¿chumngechi quelluqueiñmu?

¹³ Ca quiñe dungu taiñ quelluafeteu: taiñ papeltual Biblia fill antü ca raquiduamal taiñ papeltuqueel mu. Taiñ lamngen Alia rume illcui pefilu quiñeque che fei tañi comunidad meu tañi huesalcamequengeel ca tati pu huesalcalu tañi castigangenon. Fei feipi: “Ngüneduamün tañi doi maneluhual Jehová müten tañi norümal com dungu, feimu mülei tañi cacünutual tañi raquiduam iñche. Ca papeltufiñ Job 34:22-29 feipilelu Jehová com peniei, fei müten cüme juzgayafui tati pu che ca fei müten norümtuafui ti dungu”. Huelu petu tañi acunon Jehová tañi norümafiel com dungu, ¿chumafuiñ feula?

¿CHUMAFUIÑ MÜLEN MU NORNGENOCHI DUNGU?

14. Mülen mu rume norngenochi dungu, ¿chem femafuiñ? (Colosenses 3:10, 11).

¹⁴ Iñchiñ pepi catrütulayafuiñ caquelu che tañi femal norngenochi dungu, huelu dulliafuiñ taiñ cüme femal. Chumngechi taiñ ngüneduampeel, inayentuquefiyiñ Jesús taiñ piuqueyechen mu, feimu respetaquefiyiñ com pu che taiñ huesa femqueteu cütu (Mat. 7:12; Rom. 12:17). Jehová am dullintuchequenolu, feimu rume ayüuquei pefiel mu taiñ femquen nor dungu ca taiñ cümelcaquefiel com pu che (papeltunge Colosenses 3:10, 11).

15. Amuldunguchequen mu, ¿chumngechi quelluquefiyiñ pu che?

¹⁵ Quimeltucheliyiñ Jehová ñi dungu, doi cüme quelluafuiñ engün. ¿Chumngelu feipiafuiñ? Quiñe che quimfile ta Jehová ca cüpa ayühulfile, cüme elcünutuafui ñi mongen, fei ñomngetuafui ca piuqueyecheafui (Is. 11:6, 7, 9). Peaiñ chem ñi rupan quiñe huentru Jemal pingelu. Quisu huesa femquelu ti gobierno troquiquefui, feimu quiñehui caquelu che engün ñi chaftuafiel ti gobierno. Rupachi antü mu, quimürpui tati rüf dungu. Feipi: “Chaftungen mu che, cüme elcünuquetulai ñi mongen. Huelu quimürpulu ti rüf dungu Biblia mu, fei mu queta cüme elcünuquetui ñi mongen. Femngechi dungu rupan iñche”. Felei, Jemal quimürpufilu Biblia, ñom chengetui ca fentecünui ñi pofolcahun. Doi fentren che eluule tañi adnieaeteu Biblia, doi pichin-ngetuai pu huesalcachequelu.

16. ¿Chemu ayüqueimi tami quimeltucheal Jehová tañi femal?

¹⁶ Jesús reque, ayüqueiñ taiñ feipiafiel pu che Jehová tañi Gobierno müten cüme elcünutuafi com dungu, femngechi tati pu che huesalcangelu nierpuafui maneluhun (Jer. 29:11). Lamngen Stacy taiñ nütramcapeel parrafo 9 mu feipi: “Feula quimnien Jehová tañi apümafiel com cutrancahun, feimu huesalcangelu iñche cam caquelu che, nehuencülequen. Jehová yafültucuqueneu Biblia mu”. Taiñ yafültucuafiel pu che Jehová ñi feipicünuel mu, mülei taiñ cüme pepicaucüleal. Doi cüme quimfiliyiñ ñi feipin Biblia chumngechi ñi afal ti cutrancahun, doi piuquentucunieafiyiñ, femngechi doi cüdautulayaiñ taiñ nütramcayafiel caquelu che tüfachi dungu cüdau mu cam colegio mu.b

17. ¿Chumngechi quelluqueiñmu Jehová taiñ nehuencüleal rupan mu norngenochi dungu?

¹⁷ Tati Huecüfü petu ngüneniele tüfachi mapu, amuleai ti cutrancahun. Huelu cümeque dungu mülei: Jehová quelluaiñmu fachantü, ca cüpalechi antü apümafi Huecüfü ca com huesaque dungu (Juan 12:31). Biblia mu Chau Dios feipi chemu tañi mülen cutrancahun ca tañi huesa duamquen cutrancahun mu iñchiñ (Sal. 34:17-19). Cafei Jesús tañi femün quimeltueiñmu chem taiñ femal huesa femngeliyiñ. Cafei, pichiñma mu Chau Dios tañi Gobierno apümafi com cutrancahun tañi turpu mülehuetunoal (2 Ped. 3:13). Feimu llemai, amulepe taiñ amuldungumequen Chau Dios tañi ngünenietual mapu, ca com piuque mu esperanieaiñ chi antü tañi mületual re nor dungu (Is. 9:7).