¿Eluwaymi tami üngümküleal ñochi duam mu?

1, 2. 1) ¿Chumngelu ramtuafuiñ ta Jewba “¿Tunteñma am ta?”? 2) Ñi rupan pu manelfal wentru kuyfi mu, ¿chumngelu yafültukuafeiñmew?

“¿TUNTEÑMA am ta, awem Jewba?”. Isaia ka Abakuk, epu manelfalchi pelon wentru, ramtuyngu tüfa (Isaías 6:11; Habacuc 1:2). Ka femngechi, ti longko ülmen David wirintukufilu ti Salmo 13, meli rupa ramtuy tüfa (Salmo 13:1, 2). Jesus kütu pefiel tati pu che ñi feyentukenon, ka femngechi ramtuy (Matew 17:17). Feymu fachantü iñchiñ kütu ramtuwafuiñ tüfa.

² Welu, ¿chumngelu (chemu) ramtuafuiñ ta Jewba “¿Tunteñma am ta?”? Femngechi feypiafuiñ femngeliyiñ norngenochi dungu, füchaleliyiñ kam kutranküleliyiñ. Kafey rume weda duamküleafuiñ mülelu kay “kuñiwünngechi dungu” (2 Timotew 3:1). Kam ngañwadelafeiñmu pu che ñi weda chumngen. Kuyfi mu, pu manelfal wentru feypilu chumngechi ñi duamkülen, Jewba kondenalaeyew, kimfiel tüfa müna yafültukukeeiñmew.

3. Rupaliyiñ wedake dungu mew, ¿chem kelluafeiñmu?

³ Rupaliyiñ wedake dungu mew, ¿chem kelluafeiñmu taiñ yafüluwküleal? Santiaw, Jesus tañi peñi ñuke püle, Jewba tañi duam mew feypieiñmew: “Ngenoafeluwküleaymün [ñochi duamküleaymün] küpatule wüla ta Ñidol” (Santiaw 5:7)a (inaduamnge ti kimal dungu). Feley llemay, kom iñchiñ müley taiñ ñochi duamngeal. Welu, pu ñochi duampiwkengelu, ¿chem chumkeyngün? Ka, ¿chumngechi pengelafuiñ taiñ ñochi duamngen?

PU ÑOCHI DUAMPIWKENGELU, ¿CHEM CHUMKEYNGÜN?

4, 5. 1) Pu ñochi duampiwkengelu, ¿chem chumkeyngün? 2) Santiaw, ¿chem dungu mu trürümfi taiñ rupan? Ka ¿chumngelu? (Inaduamnge ti adentun pagina 3 mu.)

⁴ Biblia feypi, llowliyiñ Jewba tañi newen, ñochi piwkengeaiñ. Kom iñchiñ kulpafe chengeiñ, feymu nienoliyiñ Jewba tañi kellu, ñochi duamngelayafuiñ taiñ chaftuafiel ti wedake dungu. Chaw Ngünechen kiñe yewün reke elueiñmew taiñ ñochi duamngeal, feymu femngechi chengeliyiñ, pengelaiñ taiñ piwkeyeniefiel ta Jewba ka taiñ pu peñi ka lamngen. Welu femnoliyiñ, ñochikechi piwkeyewelayafiyiñ taiñ pu peñi ka lamngen (1 Korintio 13:4; Galata 5:22, Traducción del Nuevo Mundo [TNM]). Feymu pu ñochi duampiwkengelu, ¿chem chumkeyngün? Tüfa engün chaftukey ti wedake dungu küme rakiduam mu (Kolosense 1:11; Santiaw 1:3, 4). Ka femngechi, püntütripakelay Jewba mew rupan mu wedake dungu, ka weda wiñoleltukelafi tañi weda femkeetew. Ti Biblia kimeltukeeiñmew ñi duamfalngen taiñ eluwküleal ñi üngümküleal. Fey tüfa kimeltueiñmu Santiaw 5:7, 8 (papeltunge).

⁵ ¿Chumngelu müley taiñ eluwküleal ñi üngümküleal Jewba ñi feypikünuel? Santiaw feypi taiñ rupan ñi trürümfalngeafel kiñe ngankelu ketran reke. Ñi küdawülafiel ti mapu, kiñe ngankelu rume yafüluwkey, welu kidu pepi ngüneniekelafi ti mawün ka antü, ka femngechi ñi doy pürüm tremal ti fün ketran. Feymu, ñochi duam mew müley ñi üngümküleal “tañi ñimituael tañi fün ketran”. Ka femngechi rupakeiñ iñchiñ, petu taiñ üngümkülen Jewba ñi femürpual tañi feypikünuel, müley fillke dungu taiñ pepi ngüneniekenofiel (Marku 13:32, 33; Hecho 1:7). Feymu feychi ngankelu ketran reke, iñchiñ ka müley taiñ üngümküleal ñochi duam mew.

6. Mikea ñi rupan, ¿chem kimeltukeeiñmew?

⁶ Taiñ rupameken famülke mew trürümfalngeafuy Mikea ñi rupan kuyfi mu. Kidu mülerkefuy ngünenielu ti weda longko ülmen Akas. Feychi mew, re wedake dungu mülerkefuy. Biblia feypi: “Tati che nor piwkengelu ngewelay mapu mew; rangi tati pu che mew, ngelay kiñe nor che no rume. Kom katrürüpütuwkeyngün ñi langümuwal. Kiduke engün challwawe mew reke nükefingün tañi chaf peñi. Adümuwkeyngün ñi femal wedake dungu tañi kuwü mew, ti principe ‘kullitumuchi’ feypikey, ti kues ngillatukey ñi kümelkangeal, ti ülmen che kimelkey tañi ayükeel, ka kom engün kiñentrür pepikakünukefingün ñi dungu” (Miqueas 7:2, 3). Mikea pepi küme elkünutukelafuy ti dungu, ka kidu kimniefuy tüfa, feymu feypi: “Iñche kay, Jewba ñi duam mew llüwatulean. Ka küme rakiduam mu maneluwkülean Chaw Ngünechen ñi duam mu, iñche tañi montulkeetew. Tañi Chaw Ngünechen allkütuaenew” (Miqueas 7:7). Fey Mikea reke, iñchiñ ka müley taiñ maneluwküleal Jewba mew “küme rakiduam mu”.

7. ¿Chumngelu küme rakiduam mu eluwküleaiñ ñi üngümküleal tañi femtripayal Jewba ñi feypikünuel?

⁷ Maneluwküleliyiñ Jewba mew Mikea reke, küme rakiduam mu eluwküleaiñ ñi üngümküleal tañi femtripayal Jewba ñi feypikünuel. ¿Chumngelu? Tami doy küme kimal tüfa, rakiduamnge: kiñe che püresulele üngümniey ti antü ñi langümngeal. Kidu ayünole rume ñi akual feychi antü, müley ñi üngümküleal müten. Welu iñchiñ feychi che reke felelaiñ, kimnielu am Chaw Jewba taiñ eluaetew afnoachi mongen ka ñi femürpual tañi feypikünuel medin antü mew, feymu küme rakiduam mew üngümküleiñ. Fey inaniekeiñ tüfachi ngülam: ‘Yafüngeaymün ka ñochi duam nieaymün’ ayüwkülen mu (Kolosense 1:11, 12). Welu petu taiñ üngümkülen, kuñiwtukuwaiñ taiñ rakiduamnoal Jewba ñi alüñmaken tañi femal ñi feypikünuel. Femngechi rakiduamliyiñ, lladkülafiyiñ ta Jewba (Kolosense 3:12).

KUYFIKE CHE ÑOCHI DUAMPIWKENGELU

8. Petu taiñ ngüneduamfiel pu manelfal wentru ka pu domo ñi femün, ¿chem rakiduamaiñ?

⁸ ¿Chumngechi doy eluwküleaiñ taiñ üngümküleal? Fentren manelfal wentru ka domo ñochi piwke mu üngümkefuyngün ñi femtripayal Jewba tañi feypikünun, rakiduamafuiñ kidu engün mu (Romanu 15:4). Petu taiñ ngüneduamfiel tüfa, rakiduamaiñ tunteñma mu ñi üngümkülefel tüfachi pu che, chumngelu eluwkefuyngün ñi üngümküleal, ka tati kümeke dungu ñi llowel engün tañi ñochi piwkengen mu.

9, 10. Abraam ka Sara, ¿tunteñma mew üngümkülefuyngu ñi peal Jewba ñi feypikünuetew?

⁹ Inaduamafiyiñ Abraam ka Sara ñi rupan. Kidu engu tañi ‘ñochi piwke mew ka mupiltun mew’, llowingu Jewba ñi feypikünuetew. Biblia feypi ta ‘Abraam maneluwi ñochi piwke mew’, ka fey wüla Jewba feypikünueyew ñi kümelkayaetew ka ñi alün-ngerpual tañi pu che (Ebrew 6:12, 15). Welu Abraam, ¿chumngelu duamniefuy ñi ñochi duamküleal? Rupalu am fentren tripantu ñi wechurpual Jewba ñi feypikünuel. Konlu 14 antü nisan küyen, 1943 tripantu petu ñi mülenon Jesus, Abraam, Sara ka kom ñi kompañnieetew nometuyngün Ewfrate pingechi lewfü, ka koningün tati Feypikünuelchi Mapu mew. Welu Abraam üngümkülefuy 25 tripantu ñi choyüngeal tañi fotüm Isaak, ka fey wüla üngümkülefuy 60 tripantu ñi choyüngeal tañi epu laku, Esaw ka Jakob (Ebrew 11:9).

¹⁰ Abraam, ¿ngen-ngerpuy kiñe trokiñ feychi mapu mu ñi feypikünuetew Jewba? Biblia feypi: “Ngünechen elulafi kiñe pichin no rume ñi chem koneltuael tüfeychi mapu mew ñi nüafel ta Abraam. Welu feypikünufi kisu dew lale ñi eluafiel ti mapu kisu ñi pu yomelche. Feychi mew Abraam nierkelay kiñe fotüm no rume” (Hecho 7:5). Abraam nometulu Ewfrate pingechi lewfü, rupay 430 tripantu kiñe trokiñchengerpual tañi pu küpanche, femngechi ñi müleal feychi mapu mew (Éxodo 12:40-42; Galata 3:17).

11. 1) Abraam, ¿chumngelu eluwkefuy ñi üngümküleal? 2) Jewba, ¿chumngechi kümelkafi ta Abraam ñi ñochi duamngen mu?

¹¹ Abraam maneluwkefuy Jewba mew, eluwkefuy ñi üngümküleal, kimnielu am Jewba ñi wechurpuken kom ñi feypikünuel (papeltunge Ebrew 11:8-12). Abraam ñi mongen mew femtripalay kom ñi feypikünuetew Jewba, welu kidu ayüwün mu üngümkülefuy. Rakiduamnge fente ñi ayüwküleal Abraam wiñomongetule ti küme mülewe mu. Afmatuleay papeltufile kidu ka tañi pu che ñi mongen fentren trokiñ Biblia mub (inaduamnge ti kimal dungu). Rakiduamnge tunte ñi ayüwküleal kimle fente ñi falin-ngen kidu tañi femken ñi akual ti Mesia, femngechi ñi wechurpual Jewba ñi ayükeel. Fey küme duampelayay llowalu am fentren kümeke dungu tañi ñochi duamngen mu.

12, 13. 1) Jose, ¿chumngelu duamniefuy ñi üngümküleal ñochi duam mu? 2) Jose, ¿chumngechi trokikefi tañi weda rupan?

¹² Abraam tañi laku, kafey eluwi ñi üngümküleal ñochi duam mu. Kidu Jose pingefuy, ka rupay fentren norngenochi dungu mew. Wüne, nielu 17 tripantu müten, tañi pu peñi fendeeyew ñi konayengeal. Fey wüla, dalluntukungey ñi küpa nüntukafiel tañi ñidol ñi domo, feymu püresuntukungey (Génesis 39:11-20; Salmo 105:17, 18). Kiñeke che rakiduamafuy: ‘Chaw Dios re wedalkafi ta Jose, kidu ñi nor piwkeyeetew rume’. Welu 13 tripantu rupalu, küme elkünungetuy ñi mongen. Lifrekünungey ka longkolerpuy Egipto mapu mew, fey ti Faraon müten wünelerpuy kidu mew (Génesis 41:14, 37-43; Hecho 7:9, 10).

¹³ Jose, ¿illkulefuy tati wedake dungu ñi rupan mu? ¿Rakiduami Jewba ñi kidukünuetew? Femlay. Kidu ñochi duam mu üngümkülefuy. ¿Chem kellueyew? Tañi maneluwken Jewba mu. Jose kimtukuy Jewba ñi ngünenieel kom ti dungu, feymu feypifi tañi pu peñi: “Llükalekilmün. Iñche ngelay tañi Ngünechen reke ñi feleael. Eymün rakiduamimün tamün wesa femmuafiel, welu Ngünechen welukünutufi ti wesa dungu tati küme dungu mew femngechi tañi femael tamün penietuel ta fachantü, tañi montulelafiel ñi mongen ta fentren che” (Génesis 50:19, 20). Jose kimniefuy ñi nierpual kümeke dungu eluwlu am ñi maneluwal Jewba mu.

14. David ñi ñochi duamngen afmatufali, ¿chumngelu feypiafuiñ tüfa?

¹⁴ Ti longko ülmen David rupay fillke norngenochi dungu mew. Kidu wechengelu Jewba dullieyew ñi longkoleal Israel mu, welu 15 tripantu üngümkülefuy ñi longkolerpual kidu tañi trokiñche mew (2 Samuel 2:3, 4). Kiñeke tripantu mu petu ñi üngümkülefel, David lefmawi ñi langümnoaetew Saulc (inaduamnge ti kimal dungu). Feymu, kiñeke mu mongelefuy kamapu mew ka kiñeke lolo wellin mapu mu. Rupayelu ti tripantu, Saul lay kiñe weychan mu. Welu David petu üngümkülerpuy regle tripantu ñi longkolerpual pu israelche mew (2 Samuel 5:4, 5).

15. ¿Chumngelu David eluwi ñi üngümküleal ñochi piwke mew?

¹⁵ Salmo 13 mu, David meli rupa ramtufi ta Jewba tunteñma ñi amuleal tañi wedake dungu. Welu ka femngechi pengeleiñmu chumngelu David eluwi ñi üngümküleal ñochi piwke mew. Kidu feypi: “Iñche, maneluwken eymi tami nor piwkeyen mu; ayüway tañi piwke tami femün mu ñi montulcheal. Ülkantulelafiñ ta Jewba, Kidu tañi rume füreneetew am” (Salmo 13:5, 6). David maneluwkefuy Jewba tañi nor piwkeyen mu. Kidu rakiduami chumngechi ñi kelluetew Jewba kuyfi mew, feymu ayüwün mu rakiduami ñi puwal ti antü Jewba ñi apümafiel tañi wedake dungu. David kimniefuy Jewba ñi kümelkayaetew tañi üngümkülen mu.

16. Jewba, ¿chumngechi pengelkey tañi ñochi duampiwkengen?

¹⁶ Jewba ñochi duampiwkengey, feymu ngülamtukeeiñmew taiñ ka femngechi femal. Kidu müna inayentufali, iney no rume doy ñochi duampiwkengenolu am (papeltunge 2 Pedro 3:9). Fentren warangka tripantu kuyfi mew, Eden lof mu, Weküfü dalluntukufi ta Jewba ñi norngenon. Fey Jewba küme rakiduam mew üngümküley ñi kimfalngeal tañi norngen. Puwle feychi antü, pu maneluwkülelu Kidu mew nierpuayngün afmatufalchi kümeke dungu (Isaías 30:18).

17. Jesus, ¿chumngechi pengelkey tañi ñochi duampiwkengen?

¹⁷ Jesus ka femngechi eluwkey ñi üngümal. Kidu mülepalu Mapu mu, kom ñi mongen mu nor piwkeyefi ta Jewba. Fey wüla, wenu mapu mu, 33 tripantu taiñ mülen antü mu, Jesus chalintukuy tañi kulpan-ngenochi mongen Ngünechen mew, wül-lu ñi montulngeal Adan ñi pu yall. Kafey, Jesus mülefuy ñi üngümal puwlu wüla 1914 tripantu mew ñi longkolerpual (Hecho 2:33-35; Ebrew 10:12, 13). Welu Jesus üngümküley ñi apümkangeal kom tañi pu kayñe, fey tüfa rupayay afle tañi Ngünenien Warangka Tripantu mu (1 Korintio 15:25). Jesus fentreñma mu üngümküleay. Welu kidu kimniey ñi müleal fentren kümeke dungu tañi üngümkülen mu.

¿CHEM KELLUAEIÑMEW?

18, 19. Eluwaiñ taiñ üngümküleal ñochi duampiwkengen mu, fey ¿chem kelluafeiñmew?

¹⁸ Feymu, eluwküleaiñ llemay taiñ üngümküleal ñochi duampiwkengen mu. Welu, ¿chem kelluafeiñmew? Ngillatuafiyiñ ta Chaw Ngünechen taiñ eluaetew ñi newen. Rakiduamtukuaiñ tüfa: llowliyiñ Jewba tañi newen, ñochi duampiwkengeaiñ (Efesio 3:16; 6:18; 1 Tesalonisense 5:17-19). Feymu llemay, ngillatuafiyiñ ta Jewba taiñ kelluaetew, femngechi taiñ yafüluwküleal ñochi duam mu.

¹⁹ Longkontukuaiñ tüfa: Abraam, Jose ka David üngümkefuyngün ñochi duam mu ñi femtripayal Jewba ñi feypikünuel, ¿chem kellueyew engün? Tañi maneluwken ka mupiltuken Jewba mew. Ka femngechi, doyümkelafuyngün ñi ayükeel ka tañi küme felen müten. Feymu, rakiduamliyiñ kom tati kümeke dungu ñi llowel engün, tüfa ka kelluaeiñmew taiñ ñochi duampiwkengeal.

20. ¿Chem eluwküleaiñ taiñ femal?

²⁰ Famülke mew, rupaliyiñ rume wedake dungu mu, eluwküleaiñ taiñ maneluwal Jewba mu. Welu kiñeke mu ramtuafuiñ: “¿Tunteñma am ta, awem Jewba?” (Isaías 6:11). Welu, Jewba tañi newen mu, Jeremia reke feypiaiñ: “Jewba, iñche tañi trokiñ ñi elungeel, [...] feymu pengelan ñi eluwkülen ñi üngümküleal kidu mew” (Lamentaciones 3:21, 24).