¿Chem piquei Biblia epu che cureyeunolu ñi trür müleal?

Biblia ñi quimeltuqueel

Biblia feipi: “Fei tüfa Chau Ngünechen ñi ayüqueel: [...] tamün con-noal pecan cudumuhun dungu mu” (1 Tesalonicenses 4:3, Traducción del Nuevo Mundo). Biblia feipilu “pecan cudumuhun dungu”, tüfa mu coneltulei epu che curehuen-ngenolu ñi cudumuhual, ñihuañpehual ñi afcadi ca cudumuhual chaf huentru ca chaf domo engu.

• Chau Ngünechen, ¿chumngelu falintuquefi tati curehuen?

• Trür müleliyiñ petu taiñ nieunon, ¿quelluafeiñmu ñi cüme tripayal ti curehuen?

• Ñi cüme tripayal tati curehuen, ¿chem chumafuiñ?

Chau Ngünechen, ¿chumngelu falintuquefi tati curehuen?

• Chau Dios deumacünui tati curehuen. Quisu elcünui tati hunen curehuen (Génesis 2:22-24). Chau Ngünechen ayüquelafui quiñe huentru ca quiñe domo ñi trür müleal engu petu tañi nieunon.

• Chau Dios quimniei chumngechi doi cümelcaleafui pu che. Ngünechen deumacünui tati curehuen, fei ñi rumel quiñeucüleal quiñe huentru ca quiñe domo. Tüfa cümelcaquefi ca cuñiutucuquefi tati familiahuen. Ngüneduamnge tüfachi dungu: ñi cüme deumayal quiñe mueble, duamfali inanieal tati manual. Ca femngechi inanieliyiñ Jehová tañi ngülam, taiñ familia cüme feleai ca ayüucüleai. Feichi pu che inanielu Chau Dios tañi ngülam, rumel cümelcalequei (Isaías 48:17, 18).

  

• Cudumuuliyiñ, petu taiñ nieunon, huesalcayafeiñmu. Tati femngechi femquelu tul cutran contuafeyu, ayünon mu rume niepüñeñafui ca rume huesa duamnagafui.⁠a

• Chau Dios elufi pu curehuen tañi cudumuhual, fei ñi nieal familia. Chau Ngünechen rume falintuquefi tati mongen. Feimu elufi tati curehuen quiñe falin regalo, fei tüfa ñi nieal pichiqueche. Chau Dios ayüniei taiñ yamnieafiel feichi regalo. Femngechi femliyiñ, yamnieafiyiñ taiñ curehuen-ngen (Hebreos 13:4).

Trür müleliyiñ petu taiñ nieunon, ¿quelluafeiñmu ñi cüme tripayal ti curehuen?

Ñi cüme tripayal tati curehuen, duamfal-lai ñi trür müleal engu petu tañi nieunon. Doi mai tati curehuen ñi cüme tripayal, duamfali tañi cüme enturpual tañi feipicünuhun engu, ca hueluquentu quelluhual rupan mu huesaque dungu.⁠b Epu che ta nieule, doi quiñeucüleaingu (Mateo 19:6).

Ñi cüme tripayal tati curehuen, ¿chem chumafuiñ?

Com pu curehuen-ngen rupaquei huesaque dungu mu. Huelu femngelu rume, com pu curehuen-ngen cüme tripayafui inaniele Biblia tañi ngülam. Peaiñ quiñeque ngülam:

• Doyümfinge tami afcadi ñi cümelcaleal (1 Corintios 7:3-5; Filipenses 2:3, 4).

• Hueluquentu piuqueyehuaimün ca yamniehuaimün (Efesios 5:25, 33).

• Quim dunguaimi (Proverbios 12:18).

• Ñom piuquengeaimün ca perdonaniehuaimün (Colosenses 3:13, 14).