Mülele huesaque dungu, pu Dunguquelu Ineingen Jehová, ¿coneltupei mai tañi quellucheal?

Mai. Mülele huesaque dungu, fütraque cürüf, mangin co, nüyün cam caquelu dungu, pu Dunguquelu Ineingen Jehová quelluquefiyiñ duamfalngechi dungu mu taiñ pu peñi ca lamngen coneltulelu taiñ feyentun mu, huelu cafei quelluquefiyiñ caquelu che. Femngechi inaniefiyiñ ti ngülam feipilu ti Biblia Gálatas 6:10 mu: “Feimeu pepi femliyiñ cümeque dungu, femaiñ ta itrocom che meu, doyelchi mai taiñ pu peñi ca lamngen feyentulelu ta Cristo meu”. Cafei nehuentuquefiyiñ ta che ca yafültuquefiyiñ ñi fülconcüleal Chau Ngünechen mu, tüfa müna duamfalngei rupalu huesaque dungu (2 Corintios 1:3, 4).

Taiñ adcünuucüleal

Feichi mapu rupamequelu huesaque dungu mu, tati pu loncolelu nütramcaqueingün com pu peñi ca lamngen conlu ñi trahunche meu ñi quimal tañi chumlen ca chem ñi duamnieel engün. Fei hula nütramcalelfingün tati ngünenieelchi ruca chem ñi rupamequen tañi mapu mu ca tati quellu deu ñi llohuel engün.

Tati pu trahunche mülelu feichi mapu mu rupamequelu huesaque dungu, pepi hulquenole engün com ti quellu ñi duamniengeel, tati pu Dunguquelu Ineingen Jehová ñi Quiñeucülechi Ngünenielu adcünuquei ñi elungeal com ti duamfalngechi quellu. Cafei tati ngünenieelchi ruca elfalcünuquefi quiñeque troquiñche ñi adcünual ti cüdau. Ca caquelu Dunguquelu Ineingen Jehová fentren troquiñ mapu mu hulqueingün tañi quellu ca ñi fillem (Proverbios 17:17). Hunen siglo mu ca femngechi fentren cristiano femingün tüfa rupalu quiñe fütra ngüñün (1 Corintios 16:1-4).

Tati llohuelchi plata

Pu Dunguquelu Ineingen Jehová ñi ngünenieelchi ruca llouqueingün plata ca caquelu mañum yehun, ca tüfa mu nentungequei quiñe troquiñ ñi quelluafiel pu cutrancaucülelu feichi huesaque dungu mu (Hechos 11:27-30; 2 Corintios 8:13-15). Com tati pu che quelluconcülelu cofraquelaingün, feimu com tati llohuelchi plata mu quellungequei ta che. Cüme cuñiutun mu adcünungequei tati fillque mañum yehun ñi lloungequeel (2 Corintios 8:20).