Pu Dunguquelu Ineingen Jehová, ¿chumngelu coneltuquelaingün hueichan mu?
Pu Dunguquelu Ineingen Jehová coneltuquelai hueichan mu, ¿chumngelu am?
Inaniequeingün Chau Ngünechen ñi huercün dungu. Tati Biblia feipicünui chem ñi chumal tati pu poyequefilu ta Chau Ngünechen: “Tañi fütra cuchillo, ta arau ngetuai” ca “quimhuelayaingün hueichan” (Isaías 2:4).
Inaniequeingün Jesús ñi huercün dungu. Jesús huercüfi tati apostol Pedro tüfachi dungu: “Üchaftucutunge tami huaiqui cheu tami niequefimum. Com tati langümchequelu ta huaiqui meu, ca femngechi langümngeai ta huaiqui meu” (Mateo 26:52). Femngechi, Jesús pengeli tañi pu inanieteu ngelai ñi hueichayal.
Cafei Cristo huercüfi tañi pu inanieteu ñi coneltunoal “Mapu tuhun pu che meu”. Ñi inanieafiel tüfachi huercün dungu, reyüconquelaingün chem politico dungu no rume (Juan 17:16, Traducción del Nuevo Mundo). Ca femngechi trahuluuquelai caquelu che engün tañi chaftuafiel pu soltau ñi femqueel, ca catrütuquelafingün inei no rume ñi coneltual ejercito mu.
Piuqueyequefingün tañi chafche. Jesús huercüfi tañi pu inaniequeteu tañi “hueluconque piuqueyehual” (Juan 13:34, 35). Quisu engün huall Mapu püle mülei, ca quiñe familia reque yeuqueingün, feimu turpu hueluquentu hueichaquelai (1 Juan 3:10-12).
Tati hunenque cristiano coneltuquelafui hueichan mu. Jesús quimeltulelfi tañi pu inanieteu ñi pengelal piuqueyen itrocom dungu tañi mongen mu, ca piuqueyeafiel tañi pu caiñe cütu. Feimu tati hunenque cristiano hueichaquelafuingün ca coneltuquelafuingün servicio militar mu, quimnielu am tüfachi dungu ñi chaftuquefiel Jesús tañi quimeltun, feipi tati lifru Encyclopedia of Religion and Huar. Cafei quiñe lifru feipi ñi raquiduamfalngenon Jesús ñi pu inanieteu ñi soltaungeal petu ñi cristianongen mu (Historia de la decadencia y caída del Imperio romano, Edhuard Gibbon).
Quelluqueingün com pu che ñi cüme feleal
Pu Dunguquelu Ineingen Jehová femquelai chem dungu no rume ñi huesalcayafiel tañi troquiñ mapu, huelu mai tañi femqueel mu quelluqueingün ñi cüme feleal. Yamniequeingün tati pu autoridadcülelu, femngechi inaqueingün Biblia ñi huercün dungu.
“Itrocom che felei ñi yamnieafiel tati mülechi pu autoridad” (Romanos 13:1).
“Elufimün tati emperador quisu tañi coneltuleel, ca elufimün ñi coneltuleel ta Ngünechen” (Mateo 22:21).
Feimu, inaquefiyiñ tati ley dungu, culliquefiyiñ impuesto, ca inaquefiyiñ ti dungu ñi femqueel tati autoridad ñi cüme feleal tati pu che.