“Ngüneniehuelaeneu quehuatun dungu”

TAÑI CUIFI MONGEN

Choyüngen Calgary huaria, Canadá mapu mu. Rume pichicalu iñche, hudaulu tañi ñuque ca ñi chau, ñi ñuque iñchiu amutuyu tayu müleal ñi chedqui ca chuchu engu. Com engün rume piuqueyeneu fei ayüucülefun ca tüngcülequefun. Ñi acordanieal feichi antü ayühuleneu ñi piuque.

Regle tripantu nielu iñche, calerumetuquei ñi mongen. Tañi ñuque huiño curengetui tañi chau engu, fei huiñamtuhuiyiñ Misuri Estados Unidos mapu mu. Üye mu, ngüneduamquefun ñi chau cutranpiuqueyequelai. Quiñe rupa acun mu iñche hue escuela mu, caquelu pichiqueche hulelcaeneu iñche chem no rume femlan. Fei hula, aculu ruca mu ñi chau quimürpui ñi rupan. Fei, ¿chem chumi? Rume illcui ca doi hulelcaeneu. Tüfa quimeltueneu ñi conal quehuan mu.

Tañi chau fente ñi illcufe chengen mu nüngaitufi ñi ñuque, fei eluhuingu ñi yafcahual. Fei mari quiñe tripantu nielu iñche, eluhun ñi drogatual ca pulcutual. Cafei doi quehuatuquefun, cheu rume ñi miyahun. Feimu tripalu colegio mu rume illcufe chengen ca quehuatuchefengen.

Nielu iñche 18 tripantu coneltun Infantería de Marina Estados Unidos mu. Iñche quehuatuchefengefun, huelu üyeu quimürpun chumngechi langümchefengeal. Rupalu 5 tripantu, soltaungehuelan, ayüquefun ñi cüdahual FBI mu, fei mu eluhun ñi chillcatual psicologia universidad, Estados Unidos mu, huelu fei hula Canadá mapu mu.

Universidad mu, huesa duamcülequefun. Com pu che re duamuuquei müten. Raquiduamquefun: Ngünam mongeleiñ fente ñi huesalcalen com dungu mapu mu. Turpu cüme elcünulayafuiñ.

Pefilu iñche com tüfa, re drogatuquefun ca pulcutuquefun. Doi falintuquefiñ plata ca cudumuhun. Amuquefun fentren fiesta ca cudumuuquefun caquerumechi domo. Tañi soltaungefel mu, raquiduamquefun iñche pepi chaftuafiñ chem rume. Iñche dulliquen chem ñi cümen ca chem ñi cümenon femngechi raquiduamquefun. Tati quehuan dungu ngünenieneu ñi mongen.

TI BIBLIA CÜME ELCÜNUTUENEU ÑI MONGEN

Tañi ruca mu tañi hueni iñchiu drogatumequefuyu ca pepicamequefuyu marihuana tayu fendeal. Tañi hueni ramtueneu ñi feyentuquen Dios mu, fei feipifiñ: “Cutrancaucülelu ti mapu Dios ñi duam mu, ¡duamlafiñ ñi quimafiel!”. Ca antü, mülelu tañi hue cüdau mu, quiñe compañ testigongelu ramtueneu: “Eimi, ¿Chau Dios ñi duam mu mülei cutrancahun?”. Afmatulehuen ca antü ca ramtungen feichi dungu mu. Iñche ayüniefun ñi doi quimal. Cayu cüyen nütramcayu fei quisu huiñoldungueneu quiñeque falinque dungu iñche ñi ramtuuquefel.

Trür mülefuyu tañi novia iñchiu, huelu quisu ayüquelafui ñi nütramcayafiel chem ñi hue quimün Dios mu. Quiñe antü feipifiñ: “Domingo antü mu cupayai pu testigo tayu chillcatual Biblia”. Huelu ca antü acutulu iñche tañi ruca mu, tañi novia amuturquei, fei quisucünueneu. Feimu tripan huecun ca ngümacahun, llellipufiñ ta Dios ñi quelluaeteu. Tüfa tati hunen rupa üitufiñ Jehová ñi üi llellipun mu, turpu femquelafun (Salmo 83:18).

Rupalu epu antü eluhun ñi chillcatual ti Biblia quiñe curehuen engu. Amutulu engu, iñche papeltufiñ ti lifru “Usted puede vivir para siempre en el paraíso en la Tierra” pingelu, ca quiñe pun müten com papeltufiñ.a Ñi quimürpuel Jehová ca Jesús mu, puhui tañi piuque mu. Quimürpun Jehová ñi cutranpiuqueyechequen ca pefiel mu taiñ cutrancahun fei ca cutrancauquei (Isaías 63:9). Nengümuhui ñi piuque ñi quimürpuel fente ñi piuqueyenieteu Chau Dios. Cafei Jesús lai iñche ñi duam mu (1 Juan 4:10). Quimürpun Chau Dios tañi ñom chengen “ayünielai ta inei no rume ñi apümcangeal. Ayüniei ta com pu che ñi nor raquiduamtual” (2 Pedro 3:9). Jehová ayüquei ñi fülcontuafiel, raquiduamün (Juan 6:44).

Feichi semana mu müten amun trahun. Chumngechi tañi adngen llicayafui che, pütrüquei tañi cal lonco, chahuaitulen. Huelu pu testigo familia reque troquitueneu, pengeli ñi rüf cristianongen. Cüme duamcülequefun, doi cümei ñi mülequefel ñi chedqui ca chuchu engu.

Pichin tiempo mu com ñi quimürpuel Biblia quellueneu ñi caletual ñi mongen. Catrün tañi cal lonco, elcünun com ñi pod cudumuhun ca tañi pulcutun ca droga (1 Corintios 6:9, 10; 11:14). Ayüfun ñi ayühulafiel ta Jehová. Quimlu iñche quiñe dungu ñi huesa femmequen incañpeuquelafun. Doi mai huesa duamcülefun “turpu femhuelayan tüfa” piquefun. Fei matu eluhun ñi caletual ñi raquiduam ca ñi femün. Tañi femün mu Jehová tañi ayüqueel tañi mongen doi cümelcaletui. Cayu cüyen rupalu ñi chillcatuel Biblia, fautizahun 29 conchi julio 1989 tripantu.

CHEM CÜMELCAN LLOHUN

Biblia quellueneu ñi cüme elcünutual ñi mongen. Cuifi quiñe che huesa feipielimu, illcufemquefun. Feula femquen com ñi pepi femün ñi cümelcaleal pu che engün (Romanos 12:18). Huelu iñche quisu tañi duam no, Chau Dios tañi nehuen ca tañi ngülam Biblia mu quellueneu ñi cüme elcünutual ñi mongen (Gálatas 5:22, 23; Hebreos 4:12).

Feula ngüneniehuelaeneu quehuatun dungu, ti pod cudumuhun ca droga, doi mai nehuentu cüdaumequen ñi ayühulafiel Jehová ca eluafiel doi cümelu. Tüfa tañi quelluafiel caquelu pu che ñi quimafiel ta Jehová. Quiñeque tripantu rupalu deu ñi fautizahun amun ca troquiñ mapu cheu ñi duamnielu quellu ñi amuldungucheal. Quimeltulelfiñ Biblia fentren che, feimu ngüneduamfiñ chumngechi cüme elcünutui ñi mongen engün. Ca rume ayühulqueneu tañi ñuque ca poyerpufi ta Jehová ngüneduamlu chumngechi ñi cüme elcünutun ñi mongen.

Feichi 1999 tripantu, El Salvador mapu mu, amun Escuela ñi Pepicangeam pu Amuldunguquelu Ngünechen ñi Gobierno. Tüfachi escuela mu quellungen ñi doi cüme amuldungucheal, tañi doi cüme cüdahual ca ñi cuidayafiel ti trahunche. Cafei, feichi tripantu mu niehuiyu quiñe lamngen Eugenia pingelu. Feula tañi domo iñchiu precursor regularngeyu Guatemala mu.

Huesa duamcülehuelan, ñamquiyauhuelan doi mai rume ayüucületun. Tañi inayafiel Biblia ñi quimeltun quehuafengehuelan ca conhuelan pod cudumuhun mu. Feula nien rüf piuqueyehun ca tüngcülechi mongen.