¿Chem pi Biblia hulngequen mu?
Biblia ñi quimeltuqueel
Biblia feipieiñmu taiñ quelluafiel caquelu che taiñ niequeel mu com taiñ piuque mu. Biblia ca feipi hul-liyiñ taiñ niequeel, ayüucüleaiñ, tati lloulu ca nieai ayühun (Proverbios 11:25; Lucas 6:38). Feimu Jesús feipi: “Doi cümei ta hulal ta llohun meu” (Hechos 20:35).
¿Chumül am cümei taiñ hulal?
Piuque mu tripale taiñ quellufiel pu che, ayühulafiyiñ. Biblia feipi: “Caque quiñeque felei tañi hulal tunte tañi raquiduamel ñi piuque meu, huelu huesa duamquechi no ca aporiangen meu no rume. Fei Ngünechen am piuqueyequefilu tati che ayühunquechi hulquelu” (2 Corintios 9:7).
Taiñ ayühulafiel ta Chau Dios, mülei taiñ hulal piuque mu tripalu (Santiago 1:27). Quellufiliyiñ tati pu che duamnielu quellun, cüdaucüleiñ quiñentrür Chau Dios iñchiñ. Quellufiliyiñ pu che, Chau Dios defenieteu troquihui, feimu culliaiñmu (Proverbios 19:17; Lucas 14:12-14).
¿Chumül am cümelayafui taiñ hulal?
Rüf piuque mu tripanole taiñ hulal, cümelayafui. ¿Chem dungu ta cümelayafui?
Hul-liyiñ caquelu taiñ penieteu (Mateo 6:2).
Quellufiliyiñ pu che cüpalechi antü taiñ culliaeteu (Lucas 14:12-14).
Ca femngechi hul-liyiñ Chau Dios taiñ cümelcayaeteu müten, cümelayafui (Hechos 8:20).
Taiñ hulqueel quelluntuculiyiñ Chau Dios tañi ayüquenoel, cümelayafui. Quiñe pengelün dungu: elufiliyiñ plata quiñe che ñi drogatual, ñi ngollicahual ca cuden dungu mu ñi conal, cümelayafui (1 Corintios 6:9, 10; 2 Corintios 7:1). Ca femngechi elufiliyiñ plata quiñe tremolechi che, huelu ayünolu ñi cüdahual, cümelayafui (2 Tesalonicenses 3:10).
Caquelu pu che quellufiliyiñ müten taiñ nieel, huelu quisu taiñ familia quellunofiliyiñ, cümelayafui. Biblia feipi tati ngen familia mülei tañi eluafiel com tañi duamnieel (1 Timoteo 5:8). Cümelayafui quiñe ngen familia caquelu che müten tañi quellufiel, huelu quisu ñi familia quellunofile. Ca femngechi Jesús feipi quiñe che quellunofile tañi pu chau, huelu caquelu che quellufile, cümelayafui (Marcos 7:9-13).