Raquiduamcüleli tañi langümuhual, ¿chumngechi quelluafeneu ta Biblia?

Biblia ñi quimeltuqueel

Biblia quelluafeyu tati cüpa langümuuquelu. Biblia tuhui Dios mu, fei yafültucuquefi pu ngañhuadcülelu (2 Corintios 7:6). Biblia quiñe lifru psicologia no, huelu quelluquefi fentrenque che eluucülelu tañi langümuhual. Biblia ñi ngülam eimi ca quelluafeimu.

• ¿Chem cümeque ngülam hulquei ta Biblia?

• ¿Tripapei mai Biblia mu quiñeque pu che ñi cüpa mongelehuenofel?

• Eimi ayülelmi tami langümuhual, ¿chem versiculo Biblia mu quelluafeimu?

• Quiñe hueni feipieliyiñmu ñi cüpa mongelehuenon, ¿chem mülei taiñ femal?

• Quiñe rupa deu tami eluumufel tami langümuhual, ¿chem quelluafeimu?

¿Chem cümeque ngülam hulquei ta Biblia?

• ● Feipinge chem tañi mülen tami piuque mu.

  Biblia feipi: “Quiñe rüfngechi hueni rumel piuqueyechequei, ca quiñe peñi reque felei ñi mülen mu hueñancün” (Proverbios 17:17).

  ¿Chem quimeltueiñmu? Quiñeque mu hueñancülen mu duamnieiñ taiñ quellungeal.

  Nütramcanofilmi inei no rume chumngechi tami felen, doi amuleafui tami huesa duamcülen. Nütramcalmi tami raquiduamcülen, doi cümelcautuaimi. Doi cüme raquiduam nietuaimi.

  

  Tüfa tami femal: Nütramcange fachantü quiñe tami familia cam quiñe cüme hueni.⁠a Ca huirintucuafuimi tami raquiduamcülen.

• ● Quintunge quiñe pepicahun-ngechi che tami quelluaeteu.

  Biblia feipi: “Tati cülfüncülelu ca mongelelu duamlai engün ta lahuentuchefe, huelu tati pu cutran mai ta duami ta lahuentuchefe” (Mateo 9:12).

  ¿Chem quimeltueiñmu? Cutrancüleliyiñ, mülei taiñ amual doctor mu.

  Ti cüpa langümuulu niepelai quiñe mental cutran cam emocional dungu. Tüfa ta yehuen-ngelai tañi nütramcangeal. Nielu tüfachi cutran quellungeafui ñi cümelcautual.

  Tüfa tami femal: Eluucülelmi tami langümuhual, quintufemnge quiñe doctor tami quelluaeteu.

• ● Quimtucunienge Chau Dios rume faliltunieimu.

  Biblia feipi: ‘¿Fendengequelai anta quechu pichique üñüm epu pichique moneda meu? Huelu femngellefule rume, tüfachi pichique üñüm quiñe no rume ngoimanielaeyu ta Ngünechen. [...] Feimeu llicalequilmün. Eimün ta doi falimün fentren pichique üñüm meu’ (Lucas 12:6, 7).

  ¿Chem quimeltueiñmu? Dios rume faliltunieimu.

  Raquiduamqueimi chi tami quisulen, huelu quisulelaimi. Chau Dios peniei ca quimniei chem dungu tañi rupamequen. Eimi ayülelmi tami mongelehuenoal, huelu Chau Dios duamtunieimu. Biblia feipi Chau Dios quisucünuquelafi ngañhuadcülelu (Salmo 51:17). Felei, Dios rume poyenieimu ca ayülei tami mongeleal.

  Tüfa tami femal: Quintunge ta Biblia mu ñi pengelqueel Dios ta poyenieimu. Por ejemplo, inaduamnge ti revista Ti Huerquen (com pu che ngealu) numero 3, 2018 tripantu.

• ● Ngillatufinge ta Dios.

  Biblia feipi: “Elcünumün Ngünechen meu com tamün fill raquiduamelnieteuchi dungu, quisu am ta piuqueyenieteu ta eimün” (1 Pedro 5:7).

  ¿Chem quimeltueiñmu? Chau Dios ayüniei com tami feipiafiel chem tami raquiduamcülen ca tami duamnieel.

  Dios eluaimu tüngün ca nehuen tami cüme amuleal (2 Corintios 4:7; Filipenses 4:6, 7). Femngechi quelluquei ta Dios ngillatungen mu (Salmo 55:22).

  

  Tüfa tami femal: Ngillatufinge Dios fachantü. Mütrümfinge quisu tañi üy mu, Jehová (Salmo 83:18). Feipifinge chem duamcülen, “quelluen” piafimi tami amuleal.

• ● Raquiduamnge Biblia ñi feipilen ñi doi cüme mongen mületual.

  Biblia feipi: “Tüfachi maneluhun elueiñmeu nehuen taiñ mongen meu, chumngechi tati fane fütra fierro queltahuengelu ti farcu tañi amucon-noal” (Hebreos 6:19).

  ¿Chem quimeltueiñmu? Quiñeque mu ayüucülequeiñ, ca quiñeque mu hueñancületuqueiñ. Quiñeque mu taiñ raquiduam quiñe farcu requelei, com püle miyauquei. Huelu Biblia tañi hulqueel quiñe maneluhun, fei doi eluafeiñmu taiñ tüngcüleal.

  Tüfachi maneluhun quiñe peuma no, rüfngechi dungu. Chau Dios tañi feipicünuel, com apümafi taiñ cutrancaqueteu (Apocalipsis 21:4).

  Tüfa tami femal: Doi adümfinge ti maneluhun ñi hulqueel ta Biblia. Pefinge internet mu Rüf maneluhun nieiñ.

• ● Femnge chem tami ayüqueel.

  Biblia feipi: “Quiñe ayüucülechi piuque cüme lahuen reque trüri” (Proverbios 17:22).

  ¿Chem quimeltueiñmu? Femülmi chem tami ayüqueel, doi ayüucüleafuimi.

  

  Tüfa tami femal: Allcütunge musica tami ayüqueel, fei doi cümelcayaimu. Ca papeltunge tami eluaeteu nehuen. Ca quintunge quiñeque chemcün tami adngelluhual. Ca femngechi quellufilmi caquelu che pichin dungu mu rume, ayüucüleaimi (Hechos 20:35).

• ● Cuidaucülenge tami tremoleal.

  Biblia feipi: ‘Quiñe che nehuentulele quelluayu tañi cülfüncüleal’ (1 Timoteo 4:8).

  ¿Chem quimeltueiñmu? Ejercicio femquelmi, cüme umautulmi ca cümeque iyael ilmi, cümelcayaimu.

  Tüfa tami femal: Tripange tami matuque trecayahual quiñe 15 minuto rume.

• ● Acordange, quiñeque raquiduam caletuquei ta mongen mu.

  Biblia feipi: “Quimlaimün rume ñi chumleal tamün mongen ta hule” (Santiago 4:14).

  ¿Chem quimeltueiñmu? Raquiduamafuiñ quiñeque huesaque dungu turpu cümelcaletulayai. Huelu cüpalechi antü mu, cümelcalerputuafui chi ti huesaque dungu.

  Ti huesaque dungu tami rupamequen rume cüdaungeafui chi tañi cümelcaletual. Huelu repente cümelcaletuafui ti huesaque dungu. Feimu eluucülenge tami nehuentuleal (2 Corintios 4:8). Tami huesaque dungu cümelcalerputuafui, huelu langümuhulmi huiño cümelcaletulayafuimi.

  Tüfa tami femal: Papeltufinge Biblia ca femngechi ñi rupan caquelu che, rume huesa ngañhuadcülefuingün, feimu cüpa mongelehuelafuingün. Inaduamnge chumngechi ñi cümelcaletun ñi mongen engün. Pefiyiñ chumngechi ñi rupan engün quiñeque tüfachi pu che.

¿Tripapei mai Biblia mu quiñeque pu che ñi cüpa mongelehuenofel?

Mai. Biblia feipi quiñeque che ayülefui ñi layal engün. Chau Dios illcutulaeyu engün, doi mai quellueyu. Ca femngechi Dios eimi quelluafeimu.

Femngechi dungu mu ñi rupan ta Elías

• ● ¿Inei am ta Elías? Quiñe nehuen-ngechi profeta, huelu quiñeque mu yafüngehuequelafui. Biblia feipi Elías ta quiñe huentru iñchiñ reque trürcülei (Santiago 5:17).

• ● ¿Chumngelu ayüfui ñi layal Elías? Elías quisulelu troquihui, llicalefui, ca femngechi ngünam cüdaucülelu troquihui. Feimu llellipufi Chau Jehová: “Müntuñmaen tañi mongen” (1 Reyes 19:4).

• ● ¿Chem quellueyu ta Elías? Elías ta feipifi ta Dios com dungu ñi mülefel tañi piuque mu. ¿Chumngechi yafültucueyu Jehová? Chau Dios pengeleyu tañi duamtunieteu, femngechi pengelfi tañi fütra nehuen. Dios ca feipifi Elías rume falin huentru ngen. Ca femngechi elfalcünufi quiñe hueche huentru tañi cuidayaeteu.

• ▸ Papeltunge Elías ñi rupan: 1 Reyes 19:2-18.

Ca femngechi dungu mu ñi rupan ta Job

• ● ¿Inei am ta Job? Quiñe ülmen huentru. Fentren familia niefui. Cüdahuelquefui ta Dios.

• ● ¿Chumngelu ayüfui ñi layal Job? Quiñe antü ñi rupan, Job tañi mongen huesalcalerputui. Com ñamümi tañi niequefel. Com tañi pu yall larumeingün. Contueyu quiñe rume huesa cutran. Feimu coila dungu mu culpatungei, fei ñi huesa femün mu rupai ti huesaque dungu pingei. Job rume cansalefui tañi mongen mu, feimu ayülehuelafui tañi mongeleal (Job 7:16).

• ● ¿Chem quellueyu ta Job? Job ngillatufi ta Dios, ca femngechi nütramcafi caquelu pu che (Job 10:1-3). Quellueyu quiñe cüme hueni Elihú pingelu, fei quellueyu ñi nietual doi cüme raquiduam. Doi falin-ngei, Job eluhui ñi quelluaeteu ca ñi adnieaeteu Chau Dios.

• ▸ Papeltunge Job ñi rupan: Job 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Ca femngechi dungu mu ñi rupan ta Moisés

• ● ¿Inei am ta Moisés? Moisés loncolefui cuifi rupachi Israel mu ca profeta ngefui.

• ● ¿Chumngelu ayüfui ñi layal Moisés? Moisés fentren cüdau niefui. Fill antü huesa pingequefui. Rume cansalequefui, feimu feipifi ta Dios: “Füreneen langümcünuen mai” (Números 11:11, 15).

• ● ¿Chem quellueyu ta Moisés? Moisés feipifi ta Chau Dios chumngechi ñi rupalen. Chau Dios entuñmaeyu pichin cüdau ñi fente cansalenoal.

• ▸ Papeltunge Moisés ñi rupan: Números 11:4-6, 10-17.