¿Chem feipilei Biblia ancanentungen mu quiñe püñeñ?

Biblia ñi quimeltuqueel

Biblia feipilelai ancanentupüñeñün meu. Huelu mai tati Biblia feipilei chem raquiduamquen Dios tati mongen meu, ca femngechi tati petu choyüngenolu.

Tati mongen Dios mu cüpai (Génesis 9:6; Salmo 36:9). Rüfcünu, com mongen rume falintufali Dios meu. Tüfa mu ca coneltulei tati petu choyüngenolu. Femngechi quiñe ñuque ancanentupüñeñle, fei quiñe langümchefe pingei Dios tañi adquiñ mu.

Dios ñi elufielchi ley pu Israel che feipi: “Epu huentru quehuamequele ca tuntucufile engu quiñe domo niepüñeñcülelu, ca fei allfün meu ancanentule ñi püñeñ, huelu ti domo ca ñi püñeñ lanole engu, feiti huentru mülei ñi cullitual tüfachi allfün meu. Huelu lale ti domo cam ñi püñeñ, fei ti huentru mülei tañi cullitual quisu ñi mongen mu” (Éxodo 21:22, 23).a

• ¿Chumül troquingequei ñi mongelen quiñe che?

• Dios, ¿perdonapeafui mai quiñe che ancanentupüñeñlu?

• Cuñihun-ngele ñi mongen ti ñuque cam ti choyüngenochi pichiche, ¿cümeafui ancanentupüñeñle?

¿Chumül troquingequei ñi mongelen quiñe che?

Niepüñeñlu müten ti domo, Dios mongelechi che troquifi ti petu choyüngenochi pichiche. Biblia pengeli quiñe pichiche petu choyüngenolu ca tati deu choyüngelu, Dios ñi adquiñ mu, mür che troquiqueyu. Peaiñ quiñeque troquiñ Biblia.

• Tati rey David feipifi ta Dios: “Tami nge peeneu petu tañi choyüngenon rume” (Salmo 139:16). Femngechi Dios ñi adquiñ mu David quiñe che troquifi, petu ñi choyüngenon rume.

• Peaiñ cangelu dungu. Dios nielelfi quiñe cüdau ta Jeremías petu tañi choyüngenon. Dios feipifi ta Jeremías: “Petu tami mülen pütra meu, iñche quimeyu. Ca petu tami choyüngenon, dullicünueyu tami profetangeal fillque mapu meu” (Jeremías 1:5).

• Ti medico Lucas huirintuculu Biblia, griego quehun mu huirintucui ñi trürcülen ti choyüngelu ca ti petu choyüngenolu (Lucas 1:41; 2:12, 16).

Dios, ¿perdonapeafui mai quiñe che ancanentupüñeñlu?

Mai, Dios perdonayafui tiyechi ancanentupüñeñlu. Quimle ñi femngechi fütra culpan, feipiafui Dios ñi perdonanoaeteu. Huelu Chau Dios duamlai ñi femngechi raquiduamal. Biblia feipi: “Jehová cutranpiuqueyechequei ca cüme piuquengei […]. Tunte alü camapulelu ti tripahue antü ca ti conhue antü mu, ca femngechi alü camapucünui taiñ culpan” (Salmo 103:8-12).b Jehová perdonaquefi com tiyechi rüf piuque mu repentiulu cuifique culpan mu, ca femngechi ti ancanentupüñeñlu meu (Salmo 86:5).

Cuñihun-ngele ñi mongen ti ñuque cam ti choyüngenochi pichiche, ¿cümeafui ancanentupüñeñle?

Chumngechi taiñ pefiel, Chau Dios rume falintuquefi pu pichiqueche ñi mongen, petu choyüngenole rume. Feimu ti doctor feipile ñi cuñihun-ngen ñi mongen ti ñuque cam ti pichiche, femfule rume, ngelai ñi ancanentupüñeñal.

Huelu puule ti antü ti ñuque ñi nieal ñi püñeñ, ruparumeafui quiñe cuñihun-ngechi dungu, fei layaimi eimi cam tami püñeñ feipiafeyu ti doctor. Femngechi dungu rupale, ti curehuen feipiafui chuchi tañi montulngeal.