¿Plata mai niepei culpa com huesaque dungu ñi rupaquen?

Biblia ñi quimeltuqueel

Femlai. Biblia feipilai ta plata ñi huesa dungu ngen. Quiñeque che feipiquei plata ñi duam mu rume huesaque dungu rupaquei, huelu feiti tripalai Biblia mu. Doi mai Biblia feipi: ‘Rume diñmatungeyüm ta plata fei ta folil reque felei, fei cüpalquei ta re huesaque felen’ (1 Timoteo 6:10).

¿Chem pi ta Biblia plata mu?

Biblia feipi cüme pünefiliyiñ plata, quelluafeiñmu ca quiñeque mu montulafeiñmu (Eclesiastés 7:12). Ca femngechi feipi ta Biblia com piuque mu mülei taiñ quelluafiel ta pu che taiñ nieelchi plata mu (Proverbios 11:25).

Ca femngechi feipi ta Biblia plata tañi doi falin-ngenon taiñ mongen mu. Biblia feipi: “Huesa ayütuquefilmün ta plata ca itrofill chemcün. Ayüucülemün tunten tamün nieel ta feula” (Hebreos 13:5). ¿Chem quimeltueiñmu tüfa? Plata ta quelluquei, huelu doi falintufal-lai. Doi falin-ngei taiñ ayüucüleal chem taiñ duamnieel: iyael ca ropa ca quiñe ruca (1 Timoteo 6:8).

**¿Chumngelu am cuñihun-ngei ñi poyengeal ta plata?**

Quiñe che diñmatuquefilu ti plata, dirpulayai ta rumel mongen (Efesios 5:5) ¿Chumngelu am? Poyengen mu ti plata, coilaque dios reque felei (Colosenses 3:5). Ca femngechi rume duamtuquefilu ti plata huesaque dungu mu conqueingün, femngechi ñi doi nierpual. Feimu Biblia feipi: “Feiti ayülu ñi matu ricungerpual lif raquiduam niehuetulayai” (Proverbios 28:20). Feiti rume diñmatuquefilu ta plata quiñeque mu hueñequeingün ca ngünencaquefingün che, ca secuestraquefingün quiñeque mu ta che, ca langümchequeingün.

Huesa dungu mu femlayafuiñ ta plata mu. Huelu poyefiliyiñ ta plata, huesa dungu nierpuafuiñ. Biblia feipi: “Tati ayülelu ñi ricungeal tranaconquei ñi illutuelchi huesaque dungu meu fei huesalcaqueyu itrofill dungu” (1 Timoteo 6:9).

Rüf inafiliyiñ Biblia ñi ngülam, ¿chumngechi cümelcayaiñmu?

Rüf respetafiliyiñ Dios tañi ngülam chumngechi taiñ nierpual plata, nieaiñ ta ayühun ca poyenieafiyiñ ta Chau Ngünechen com taiñ mongen mu. Rüf femliyiñ Dios tañi ayüqueel, fei feipicünueiñmu: “Chumcaunorume quisucünulayayu ca elcünulayayu rume” (Hebreos 13:5, 6). Dios ca feipicünueiñmu: “Quiñe nor che llohuai fentren cümelcan” (Proverbios 28:20).

Biblia ñi ngülamtuqueel plata mu

Eclesiastés 7:12 feipi: ‘Cuñiutucuchequei ta plata’.

¿Chem quimeltueiñmu? Cüme pünefiliyiñ ti plata, quelluaiñmu ca eluaiñmu cümelcan.

Lucas 12:15 feipi: “Che ñi mongen ta cümelcalequelai tañi nien meu müten ta fentren chemcün”.

¿Chem quimeltueiñmu? Ti plata doi falin dungu no taiñ mongen mu, plata ca montul-layaiñmu.

1 Timoteo 6:10 feipi: ‘Rume diñmatungeyüm ta plata fei ta folil reque felei, fei cüpalquei ta com huesaque felen. Müleyei ta che, fente ñi diñmangen meu, famtripatuquei ñi feyentun meu ca quisuque tañi mongen conquei cutrancahun meu’.

¿Chem quimeltueiñmu? Plata ta huesa dungu no. Ñi poyengen mu ta plata, fei ta huesa dungu. Quiñe che rume poyequefilu ta plata quiñeucülequelai rume tañi familia engün ca cutranconqueingün fente tañi cüdahun engün.

Hebreos 13:5 feipi: “Huesa ayütuquefilmün ta plata ca itrofill chemcün. Ayüucülemün tunten tamün nieel ta feula”.

¿Chem quimeltueiñmu? Chem chumliyiñ rume taiñ nieal ta plata, doi mai mülei taiñ ayüucüleal tunten taiñ nieel.

Mateo 19:24 feipi: “Doi cüdaungelai ta quiñe camello ñi rumeal ti lonco acucha meu, fei quiñe ricu ñi conal Ngünechen ñi ülmen mülehue meu”.

¿Chem quimeltueiñmu? Jesús ñi feipin tüfa, pichi rupalu müten, quiñe hueche huentru mangelfi tañi inayaeteu. Ti hueche huentru ülmen-ngefui, fei rume poyeniefui tañi nien fentren chemcün, feimu inalafi ta Jesús. Fei Jesús feipi quiñe che rume poyefile tañi fentren plata tañi nieel, huelu poyenofile ta Chau Dios, rume cüdaungeafui tañi nieal rumel mongen.