Pu Dunguquelu Ineingen Jehová, ¿chumngelu conquelaingün quiñeque fiesta meu?

• Pu Dunguquelu Ineingen Jehová, ¿chumngechi dulliqueingün chem fiesta mu ñi conal?

• Pu Dunguquelu Ineingen Jehová coneltuquelafuingün rume tüfachi fiesta mu, huelu ¿piuqueyeniefingün tañi familia?

• Pu Dunguquelu Ineingen Jehová, ¿obligaquefi caquelu pu che ñi coneltunoal tati fiesta mu?

Pu Dunguquelu Ineingen Jehová, ¿chumngechi dulliqueingün chem fiesta mu ñi conal?

Petu ñi dullinon chem fiesta mu conaingün, pu Dunguquelu Ineingen Jehová hune ngüneduamqueingün chem pilen Biblia. Fentren fiesta chaftuquefi Biblia ñi feipin, feimu pu Dunguquelu Ineingen Jehová conquelaingün müten. Huelu caquelu fiesta quisuque pu Dunguquelu Ineingen Jehová dulliquei ñi conal cam ñi connoal. Tañi cüme dullial, yafüluuquei “tañi lif raquiduam ñi nieal Ngünechen tañi adquiñ meu ca tati pu che meu” (Hechos 24:16).

Tüfa mu mülei chem ramtuuquei pu Dunguquelu Ineingen Jehová tañi cüme dullial.a

• Tachi fiesta, ¿nüucülepei mai Biblia mu? ¿Cam chaftuquepei mai?

  Biblia ñi feipin: Chau Jehová feipi: “Quisu engün ñi rangiñ meu mülequilmün, ca famtripalemün. Femquilmün ti huesaque dungu” (2 Corintios 6:15-17).

  Pu Dunguquelu Ineingen Jehová famentuquefingün itrofill fiesta nüucülelu huesaque dungu mu. ¿Chem huesaque dungu chi? Peafiyiñ.

  Fiesta nüucülelu coilaque dios mu. Jesús feipi: “Püramyeafimi [...] ca poyeafimi tami Ñidol Ngünechen müten” (Mateo 4:10). ¿Nüucülepei quiñeque fiesta caque dios mu? Mai, quiñeque tüfa tati Navidad ca tati Domingo de Pascua. Feimu tati pu Dunguquelu Ineingen Jehová famentuquefingün. Ca femngechi conquelaingün tüfachi fiesta mu:

  • Año Nuevo huinca. ¿Cheu tuhui tüfachi fiesta? Quiñe lifru feipi: “Ti lonco ülmen romano Julio César pingelu elcünui ñi fiestañmangeal ti Año Nuevo 1 conchi enero cüyen 46 tripantu mu petu ñi mülepanon Jesús. Tati pu Roma che elcünuingün feichi antü ñi poyengeal Jano pingechi dios” (ti lifru The World Book Encyclopedia).

  Fiesta nüucülelu coilaque huimtun mu ca femngequelu ñi nieal suerte. Biblia feipi pu poyequefilu ‘feichi dios hulquelu cüme suerte’, elcünuquefingün ta Jehová (Isaías 65:11). Feimu pu Dunguquelu Ineingen Jehová conquelaingün tüfachi fiesta mu:

  • Hue tripantu mapuche. Fill tripantu feichi junio cüyen mu acuquei hue tripantu. Feichi mu huiñoquetui antü, feimu “huengequetui itrofill mongen” piquei pu mapuche. Hue tripantu mu, fentren mapuche müñetuquei leufü mu cam huitrunco mu, femngechi tañi nieal cüme suerte, tañi contunoaeteu huesaque püllü ca ñi cümelcaleal cüpachi tripantu mu. Quiñe profesora mapuche feipi: “Hue tripantulu, feichi pun tati pu che mülei ñi pehutuleal mülele raracün, perimontun cam chem rume, femngechi ñi quimal ñi nieal cam ñi nienoal suerte. Huiñotun mu ruca mu, pu familia nütramcaquei chem tañi pehutuel engün ca ñi chem pifel tüfa” pi (Universidad Santiago de Chile ñi pagina, ñi huirintucuel Elisa Loncon). Ca femngechi hue tripantu mu femngequei caquelu huimtun nüucülelu coilaque feyentun mu. Fanten mu tati hue tripantu reyülngei quiñe fiesta catolico mu, feimu San Juan ca pingequei.

  Fiesta ca huimtun ñi ayühuelafiel pu la. Pu che raquiduamquei ñi laquenon ti am ca ti püllü, feimu conqueingün quiñeque fiesta ca huimtun mu. Huelu Biblia quimeltuquei lan mu pu che tripaquelai quiñe am cam quiñe püllü no rume, laquei müten (Ezequiel 18:4). Feimu quiñeque fiesta ca huimtun chaftufile tüfa ñi feipin Biblia, pu Dunguquelu Ineingen Jehová conquelaingün. Peafiyiñ quiñeque:

  • Día de los Muertos. Quiñe lifru catolico feipi: “Feichi antü acordangequei pu la”. Feimu tati pu che amuquei eltun mu, yelelquefi fela tati pu layelu ca ngillatuñmaquefi tañi piuqueyen che lalu. Ti lifru ca feipi: “Cuifi feipingequefui tati Día de los Muertos mu pu am peufaluuquei che reque, llünqui reque cam calcutufe reque. Peufaluuquei tañi pu huesalcaeteu mu pingequefui” (ti lifru New Catholic Encyclopedia).

  • Quiñeque huimtun femngequelu eluhun mu. Tati pu che fillque dungu femquei layüm tañi pu che. Tati Biblia chaftuquelafi fentren tüfachi dungu, huelu tati pu che femqueingün quiñeque huesaque huimtun eluhun mu. Quiñe cuifi lonco em nütrami ñi chumngequen tati pu la, feipi: ‘Fei tucungei feichi huampo la pu rüngan. Feimeu mülelu entungei feiti tacunielu huampo, nülael tucungei fill metahue pulcu, fotella pulcu, fentren cofque ca cancan ilo, melartucungei com tüfachi roquiñ. Feinolu fei huente huampo ca cadil huampo meu elngequei. “Calli ñi ipual ñi püllü nome lafquen” piqueingün’ pi (Lonco Pascual Coña ñi tukulpazugun, Testimonio de un cacique mapuche). Fanten mu petu femngequei ca femngechi dungu eluhun mu, “femngechi ti la ñi cüme amutual ca ñi huiñometunoal” piquei che. Huelu tüfachi huimtun chaftuquefi Biblia ñi feipin.

  Fiesta ca trahun nüucülelu huesaque püllü mu. Biblia feipi: “Ngelai ñi müleal eimi meu [...] inei no rume pelontuchequelu, adümcantuquelu ti calcu dungu, pehutuhun, calcu che, inei no rume dauquelu, inei no rume ramtuquelu tati rangiñelhuelelu ta pu huesaque püllü meu ca pu che engün meu, cam amuquelu quiñe pelontuchequelu meu, ca inei no rume ramtuquelu tati pu la. Com ti che femquelu tüfachi dungu, ünufalngei ta Jehová mu” (Deuteronomio 18:10-12). Ñi feipin mu tüfachi versiculo, pu Dunguquelu Ineingen Jehová coneltuquelaingün calcu dungu mu, pelontuchequelu mu ca chem no rume nüucülelu pu huesaque püllü mu. Feimu famentuquefingün tati Noche de Brujas ca caquelu fiesta ca trahun. Peafiyiñ quiñeque:

  • Mapuche ngillatun. Pu mapuche conlu ngillatun mu femqueingün ñi müleal mahun, nieal cümeque cosecha, tañi tremoleal ca tañi mañumtuafiel ta Chau Ngünechen piqueingün. Feitachi ngillatun mu tati machi cüimiquei cam conpapüllüquei. Quiñe chillca feipi: “Feipingequei tati machi rangiñelhuelei pu che ca pu püllü engün meu. [...] Ca feipingequei cüimilu tati machi nütramcamequefi tati pu püllü, fei ñi cümelcayafiel tati lof che” pi tati chillca (ñi entuel tati Oficina del Alto Comisionado de las Naciones Unidas para los Derechos Humanos). Huelu feingelai. Satanás ca pu huecüfü cüpa ngünencaquefi pu che, feimu cümeque püllü reque femfaluuqueingün. Feimu, ¿cuñihun-ngenoafulu am conal mapuche ngillatun mu?

• Tachi fiesta mu, ¿fentren religion trahuquei ñi quimeltun?

  Biblia ñi feipin: ‘Ngelai ta chem cümelcahun rume quiñe feyentulelu Cristo meu ca quiñe feyentulenolu engu. Ngünechen ñi ngillatuhue ruca chem meu rume quiñeucülelai adentun engün’ (2 Corintios 6:15-17).

  Pu Dunguquelu Ineingen Jehová yamniefi itrocom che, fei elcünui ñi feyentual engün müten. Huelu quiñeque fiesta mu trahulele fentren religion ñi quimeltun, pu Dunguquelu Ineingen Jehová conquelaingün.

  Quiñeque fiesta ca trahun trapümquefi itrofill religion ñi acordayafiel falinque religioso che. Cuifi rupan antü mu, Chau Dios yei tañi pu che cheu tañi mülen caque religion. Fei feipifi: “Eldungucünulayaimi fei engün mu ca tañi nieelchi dios mu. [...] Fei poyeñmafilmi dios engün, feita quiñe huachi reque feleafui ta eimi mu” (Éxodo 23:32, 33). Feimu pu Dunguquelu Ineingen Jehová conquelai feiti fiesta mu. Feula peafiyiñ quiñeque:

  • Día Nacional de las Iglesias Evangélicas y Protestantes. 31 conchi octubre mu, marcacünulngei pu evangelico ca protestante ñi fiesta. ¿Inei acordaquefingün feichi antü mu? Quiñe cuifi religioso, Martín Lutero pingelu. Feichi 31 octubre cüyen 1517 tripantu mu, Martín Lutero eluhui ñi chaftuafiel tati Iglesia Catolica. Feimu fanten mu itrofill iglesia evangelica ca protestante quiñeuqueingün ñi fiestayal feichi antü.

  Fiesta religioso feipinolu Biblia mu. Jesús femngechi feipifi ti pu ñidol religioso: “Eimün falintuquelafimün ta Ngünechen tañi huercün dungu tamün inayal quisuque tamün huimtun dungu”. Jesús ca feipi “tañi quimeltuqueel engün re che müten tañi adcünuelchi dungu”, feimu “falilai” pi (Mateo 15:6, 9). Pu Dunguquelu Ineingen Jehová cüme yenieñmaquefi Jesús ñi ngülamtuel, feimu conquelaingün femngechi religioso fiesta mu.

  • Fiesta de la Asunción de la Virgen María. Quiñeque che feyentuquei María ñi püran huenu tañi che cuerpo mu, feimu acordaquefingün tüfachi antü. ¿Chumül coni ñi fiestañmangeal tüfa? Quiñe lifru feipi doi 300 tripantu deu ñi lan ta Jesús. Ti lifru ca feipi: “Ti Nuevo Testamento chem no rume feipilai ñi femngeal tüfachi fiesta” (Diccionario de religiones comparadas).

  • Fiesta de la Inmaculada Concepción. Quiñeque che feipiquei María tañi choyüngen mu müten nielai quiñe culpan no rume. Huelu quiñe lifru catolico feipi: “Biblia turpu quimeltuquelai ñi rüfngen tüfachi feyentun taiñ nieel” (Enciclopedia Católica Online). Felei llemai, tati Iglesia catolica mu müten tuhui tüfachi quimün.

  • Cuaresma. Tüfa quiñeque medin antü ti pu che ñi quisu cutrancauquen ca ñi ngüñüluuquen. Huelu pu hunenque cristiano ñi antü mu mülequelafui tüfachi huimtun. Doi mai quiñe lifru feipi tüfachi huimtun coni ñi inangeal doi 200 tripantu deu ñi huirintucungen tati Biblia. Tati hunen antü tüfachi Cuaresma mu, tati pu che tuculelngei trufquen tañi tol meu, feimu Miércoles de Ceniza pingei. ¿Cheu tuhui tüfachi huimtun? Ti lifru ca feipi: “Ti papa Urbano II adcünui ñi femngeal tüfa tati concilio de Benevento pingelu 1091 tripantu mu” (Enciclopedia universal ilustrada europeo-americana).

• Tüfachi fiesta mu, ¿püramyengequei quiñe che, quiñe troquiñche, ti bandera cam caquelu dungu?

  Biblia ñi feipin: “Tüfa ta Jehová ñi feipin: ‘Malisiangei ti maneluulu pu huentru mu, ti maneluulu pu che ñi nehuen mu, fei tañi piuque püntütripaquei Jehová mu’” (Jeremías 17:5).

  Pu Dunguquelu Ineingen Jehová duamtuquefi itrofill che ca ngillatuqueingün tañi duam mu cütu, huelu conquelaingün femngechi fiesta mu:

  Fiesta ñi püramyengeal quiñe gobernante cam caquelu falinque che. Biblia feipilei taiñ maneluunoal pu che taiñ montulaeteu, tüfa engün ta pepi montulchequelai (Salmo 146:3). Feimu pu Dunguquelu Ineingen Jehová fiestañmaquelafingün ñi cumpleaños inei no rume, gobernantengeafui rume.

  Fiesta ñi poyengeal ti bandera. Pu Dunguquelu Ineingen Jehová coneltuquelaingün tati Día de la Bandera mu. ¿Chumngelu (chemu)? Biblia feipi “Cuñiutuumün tamün poyenoafiel tati pu adentun” (1 Juan 5:21). Quiñeque che feipiafui: “Quimnien tañi poyengenoal ta adentun, huelu iñche poyequelafiñ ti bandera”. Quiñe quim huentru Carlton Hayes pingelu feipi: “Quiñe pais mu, tati doi falin dungu fei tati bandera. Poyengequei quiñe dios reque”.

  Fiesta ñi püramyengeal pu santo. Biblia pengeli quiñe rupa quiñe huentru lucutui ñi llellipuafiel ta Pedro. Huelu Pedro huitrañpüramtueyu, fei feipieyu: “Huitratunge, iñche ta ca femngechi huentru eimi reque” (Hechos 10:25, 26). Pedro ca pu caquelu apostol turpu pilai tañi poyengeal. Feimu pu Dunguquelu Ineingen Jehová coneltuquelaingün feichi fiesta mu püramyequefilu tati pu santo troquingequelu. Peafiyiñ quiñeque:

  • Día de Todos los Santos. Feichi antü acordangequei com pu che santo troquingelu. Quiñe lifru feipi: “Fanten mu cüme quimngequelai cheu ñi tuhun tüfachi fiesta” (ti lifru Año cristiano).

  • Día del santo. Quiñeque che quiñe santo mu üi tuculquei ñi pu yall, feimu fill tripantu acordangequei feichi santo ñi üi. Fill religioso che femquei, feimu quiñe chillca feipi: “Ñi acordangequen tati santo, feita quiñe religioso huimtun” (ti lifru Celebrating Life Customs Around the World—From Baby Showers to Funerals).

  Pu che trahuquei ñi quelluntucual quiñe politico raquiduam. Feimu fill tripantu marcacünulngei quiñe antü tañi acordayafiel. Huelu Biblia feipi: “Doi cümei recüluhual Chau Jehová mu, fei maneluunoal pu che mu” (Salmo 118:8, 9). Pu Dunguquelu Ineingen Jehová maneluuquelaingün pu gobierno ñi cüme elcünutual tüfachi Mapu, feimu quelluntucuquelaingün ñi acordangeal politico dungu ca politico raquiduam. Quiñeque tüfa tati Día Internacional de la Juventud ca tati Día Internacional de la Mujer pingelu. Doi mai pu Dunguquelu Ineingen Jehová maneluuqueingün Chau Dios tañi Gobierno mu ñi com cüme elcünutuafiel ti illamcahun ca huesaque dungu Mapu mu (Romanos 2:11; 8:21).

• Tüfachi fiesta, ¿pengelquei quiñe troquiñ mapu cam quiñe lof ñi doicülen caquelu mu?

  Biblia ñi feipin: “Ngünechen tañi dullitunienofiel quiñeque che müten ti pu caquelu meu. Chuchi tuhunchengeafui rume, llouquefi com tati feyentunieteu tati eluucülelu ñi femal cüme dungu” (Hechos 10:34, 35).

  Pu Dunguquelu Ineingen Jehová falintuquefi tati lof mapu cheu tañi mülen engün. Huelu quiñe fiesta mu doicülelu troquiule quiñe troquiñ mapu cam quiñe lof che, pu Dunguquelu Ineingen Jehová coneltuquelaingün.

  Fiesta püramyequefilu tati pu soltau. Jesús tüng raquiduam niefui, feimu feipifi tañi pu inanieteu: “Piuqueyefimün tamün pu caiñe ca ngillatuñmayafimün tamün malisiaqueteu” (Mateo 5:44). Feimu pu Dunguquelu Ineingen Jehová coneltuquelai cheu tañi püramyengequen tati pu soltau. Peaiñ quiñeque tüfachi fiesta:

  • Día de las Glorias Navales ca Día de la Armada. Fill tripantu mayo cüyen acordangequei quiñe cuifi hueichan. Tüfa femngequei ñi püramyengeal tati pu marino amulu tati hueichan mu.

  • Día de las Glorias del Ejército de Chile ca Día del Ejército Argentino. Tüfa femngequei fill tripantu ñi acordangeal com tati pu soltau. Quiñe chillca feipi: “Tüfachi antü acordangequei com tati pu hueichalu ñi incañpeafiel taiñ troquiñ mapu” pi tati chillca (ñi entuel tati pagina Armada de Chile).

  Fiesta ñi acordangeal quiñe falin rupaelchi dungu ca tañi independencia quiñe troquiñ mapu. Jesús feipi tañi pu discipulo mu: “Chumngechi ta iñche coneltuquelan tüfachi Mapu tuhun pu che meu, quisu engün ca femngechi coneltuquelai tüfachi Mapu tuhun pu che meu” (Juan 17:16, TNM). Pu Dunguquelu Ineingen Jehová duamtuniefi tañi troquiñ mapu, huelu coneltuquelaingün tati fiesta nüucülelu tüfachi dungu mu:

  • Fiestas Patrias. Feichi antü celebrangequei ñi püntühun quiñe troquiñ mapu cangelu troquiñ mapu mu.

• Tüfachi fiesta mu, ¿ngollicauquei che ca femquei podngechi huesaque dungu?

  Biblia ñi feipin: “Rume fentren tripantu ta eimün femimün ca femngechi dungu ñi femqueel tati pu che püramyequefilu ti pu adentun ngünechen, ca niequefuimün fill huesaque huimtun dungu, huesaque illutun dungu, putun dungu ca ingentu icahun, ca llellipuquefuimün ti huesaque adentun” (1 Pedro 4:3).

  Inafiel mu tüfa ñi feipin Biblia, pu Dunguquelu Ineingen Jehová conquelaingün feichi fiesta mu cheu ñi ngollicauquen ca huedhuedcauquen pu che. Pu testigo ayüquei ñi cüme rupayal tañi pu hueni engün. Quiñeque putuqueingün, huelu medin müten. Pu Dunguquelu Ineingen Jehová nehuentuuqueingün ñi feyentual tüfachi ngülam: “Chumngechi rume, eimün ilmün, ca pütocolmün, ca femllelmün chem cangelu dungu rume, com femqueaimün Ngünechen tañi püramyengeal” (1 Corintios 10:31).

  Feimu pu Dunguquelu Ineingen Jehová coneltuquelaingün chem carnaval rume ca huesaque huimtun condenaquelu Biblia.

Pu Dunguquelu Ineingen Jehová coneltuquelafuingün rume tüfachi fiesta mu, huelu ¿piuqueyeniefingün tañi familia?

Mai. Biblia quimeltuqueiñmu taiñ piuqueyeafiel ca yamafiel taiñ familia, chem feyentun rume nieafuingün (1 Pedro 3:1, 2, 7). Pu Dunguquelu Ineingen Jehová coneltuhuenon mu quiñeque huimtun mu, tañi pu familia müte ayüucülelaingün chi. Doi mai huesa duamqueingün, hueñancüqueingün, traicionael troquiuqueingün. Feimu pu Dunguquelu Ineingen Jehová nehuentuuquei ñi pengelelafiel ñi familia ñi piuqueyeniefiel. Yamniefiel mu feipiquefingün chumngelu ñi coneltuquenon, ca quiñeque mu ñi quiñentrür müleal taiñ pu familia iñchiñ.

Pu Dunguquelu Ineingen Jehová, ¿obligaquefi caquelu pu che ñi coneltunoal tati fiesta mu?

Femquelai. Pu Dunguquelu Ineingen Jehová raquiduamquei pu che quisuque mülei ñi dullial chem tañi chumal (Josué 24:15). Yamquefingün com pu che chem feyentun rume nieafuingün (1 Pedro 2:17).