Deumacünuelchi rucan cüdau petu ñi acunon pandemia

Fill tripantu fautizauquei pataca huarancaque che, feimu duamniengei doi edificio ñi püramyengeal ta Jehová. Fei tati Troquiñche Adniequelu ti Rucan Dungu adniefi ñi deumangeal doi 2.700 edificio feichi septiembre 2019 puulu agosto 2020 tripantu mu.⁠a

Huelu aculu ti huesa pandemia, amulehuelai ti cüdau. Ti Troquiñche adcünuquelu ñi huirintucungeal fillque papel feipi ñi fentecünual epe com cüdau. Femngechi ñi cuñiutucungeal pu peñi, pu lamngen ca inayal ñi chem pin pu gobierno. Huelu septiembre 2019 puulu marzo 2020 tripantu mu, deumacünungei ca cüme elcünungetui doi 1.700 ruca cheu ñi poyengeal ta Jehová ca femngei doi 100 fütraque cüdau fillque Betel mu. Peaiñ quiñeque ca chumngechi cümelcafi tati pu peñi.

Betel Camerún mu mülelu. Ti Betel mülelu Duala pingechi mapu mu rume pichifui, fei duamniefui ñi doi cümelcacünungetual. Ti Troquiñche Ngüneduamquelu ñi Entuhuiringeal Fillque Papel ayüniefui ñi cümelcacünungetual ti Betel, huelu duamniefui fentren plata. Fei raquiduamfuingün ñi ngillayal cañpüle, deumayal hue Betel cam ñi ngillayal engün quiñe edificio ñi cümelcacünutuafiel engün. Huelu pepi femngelai.

Pu peñi allcütuingün ti gobierno ñi femal quiñe cüme fütra rüpü Duala mapu meu. Tüfachi fütra rüpü rupayai inafül taiñ Fütra Trahunhue Ruca püle. Feimu pu peñi raquiduamingün ñi doi cüdaungenoal ñi puhual engün ti Fütra Trahunhue Ruca mu, ca ñi nieal engün luz ca ñi nieal co engün. Fei tati Quiñeucülechi Ngünenielu feipieyu engün ñi deumangeal quiñe hue Betel cheu ñi mülen ti Fütra Trahunhue Ruca.

Pu peñi ñi deumayal engün ti Betel, quiñeque cüdau mu contrataingün quiñe empresa ñi doi matu nentual tañi cüdau engün. Femngechi ahorraingün tiempo ca ahorraingün doi 1.550 millon peso chileno (2 millon dolar). Femngechi dehui ti Betel petu ñi acunon pandemia, fei huiñamtuhui ñi puhual ti pu betelita.

Pu betelita Camerún mu doi cüme adcülechi ruca mu mületuingün ca cüdaucüleingün. Tati hue Betel quiñe regalo Jehová mu cüpalu troquiniefingün. Quiñe curehuen feipi: “Feula doi eluucüleyu tayu cüdahual, rume falintuniefiyu tüfachi regalo reque”.

Oficina cheu ñi rulpadungungequen tojolabal quehun dungun mu (RTO), México. Fentren tripantu mu ti oficina cheu ñi rulpadungungequen tojolabal quehun dungun mu mülequefui Centroamérica mu, tüfa püllelefui Ciudad de México mu. Huelu pu tojolabal quehun dunguquelu epe 1.000 kilometro püntütripalefui, Altamirano ca Las Margaritas pingechi epu huaria mu. Feimu pu rulpadunguquelu rume cüdautuquefuingün ñi quimürpuafiel ti quehun dungun. Feimu pu peñi rume cüdautuquefui ñi peal caquelu peñi ñi quelluntucual rulpadungun cüdau mu.

Feimu ti Quiñeucülechi Ngünenielu feipifi pu rulpadunguquelu ñi huiñamtuhual cheu ñi dungungequen tojolabal quehun dungun. Feimu ngillangei quiñe edificio, cüme elcünungetui. Femngechi fente pünengelai plata ñi alquilayal caquelu edificio cam ñi deumangeal quiñe hue ruca.

Quiñe rulpadunguquelu feipi ñi chum duamquen: “Mari tripantu cüdahun Betel mu, huelu pelan quiñe familia no rume dunguquelu tojolabal quehun dungun. Feula cheu taiñ mülen, com che dunguquei tojolabal quehun dungun meu. Feimu fill antü dunguquen tüfachi quehun dungun mu, femngechi doi cüme adümfiñ ca rume quelluqueneu tañi cüdau mu”.

Müleyechi cüdau ñi femngeal

Septiembre 2020 puulu agosto 2021 tripantu mu, feipingei ñi femngeal 75 oficina cheu ñi rulpadungual ca cheu ñi femngeal fillque escuela. Cafei amulngeai chi cüdau 8 Betel mu. Quiñe ta tüfa chi cüdau ñi femngequen Ramapo, Nueva York huaria mu. Cafei chi Betel mülelu Argentina ca Italia mapu mu cañpüle mületuai. Ca duamniengei doi 1.000 hue Trahunhue Ruca, ca mülei doi 6.000 ruca ñi trahuluupeyüm pu peñi müte cümehuenolu. Ca mülei 4.000 Trahunhue Ruca ñi cüme elcünungetual.

¿Chumngechi culliñmangequei com tüfachi cüdau? Ti peñi Lázaro González, coneltulelu ti Troquiñche Adcünuquelu Betel Centroamérica mu, feipi: “Tüfa mu pu peñi nehue nielaingün plata, quelluntucunofule pu peñi com huall Mapu mu, nielayafuiñ oficina cheu rulpadunguam. Mañumniefiyiñ tañi hulquen mu engün, femngechi pepi huercüafuiñ tati pu rulpadunguquelu ñi mülepual cheu ñi doi dungungequen ti quehun dungun. Mañumniehuiyiñ com pu peñi tañi cüme piuquengen mu”. ¿Ngüneduamimün? Com tüfachi cüdau ñi femngequen tañi quelluntucuelchi plata mu pu peñi, tañi femngeal Jehová ñi cüdau huall Mapu meu. Fentren pu peñi tañi quelluntucual hulquei plata ti pagina donate.jw.org mu.