Pu misionero puuqueingün “tuntepu ñi mülen ta Mapu”

Jesús feipifi tañi pu discipulo: “Tripayaymün tamün nütramyemuafiel ta iñche [...] tuntepu ñi mülen ta Mapu” (Hechos 1:8). Pu Dunguquelu Ineingen Jehová yafüluuqueingün ca cüme duamquechi amuldunguqueingün. Huelu pepi puuquelaingün com püle, feimu fentren che petu allcülaingün ti cümeque dungu. Ca quiñeque troquiñque mapu mu nehue ngelai Dunguquelu Ineingen Jehová (Mateo 9:37, 38). Feimu, ¿chem chumqueiñ taiñ puhual doi fentren che mu?

Ti Troquiñche Adcünuquelu ti Amuldungun Cüdau huercüquei misionero cheu ñi doi duamniengeel quellu, femngechi ñi huechutriparpual ñi feipicünuel ta Jesús. Famülque mu, mülei 3.090 misionero huercüngelu tañi amuldungual fillque mapu püle.a Fentren tüfa engün pepicangei tati escuela feipingelu Escuela ñi Pepicangeam pu Amuldunguquelu Ngünechen ñi Gobierno mu cam caquelu escuela mu. Tüfachi pu misionero eluucüleingün ñi elcünual com tañi nieel, femngechi ñi amual ca mapu ñi amuldungual. Cüme hueniyefingün ta Jehová, pepicaucüleingün ñi cüme amuldungual, feimu tati pu hue discipulo inayentuafeyu engün.

Quellungeal pu misionero ñi quelluafiel caquelu

Caque Betel mu, tati Troquiñche adcünuquefilu pu cüdauquelu amuldungun mu fill antü ca tati Troquiñche Adcünuquelu Betel ruca quiñehun cüdaucüleingu ñi quelluafiel pu misionero. Pu misionero elungei cheu ñi umayam ca tañi duamnieel ñi cümelcaleal engün, ca elungei pichin plata tañi duamnieel. Septiembre 2019 puulu agosto 2020 tripantu mu, gastangei doi 21.000 millon peso chileno (27 millon dolar) ñi quelluafiel pu misionero. Femngechi pu misionero eluucüleingün ñi amuldungual müten ca ñi quelluafiel pu peñi, pu lamngen trahunche mu.

¿Chumngechi quelluquei pu misionero amuldungun mu? Peñi Frank Madsen, coneltulelu ti Troquiñche Adcünuquelu Betel Malaui mu, feipi: “Pu misionero tañi pepiluucülen mu ca ñi yafüluucülen mu, quellufingün ti pu trahunche ñi amuldungual cheu cüdaungefule rume ñi conpual engün cam caque quehun dungun-ngechi pu che mu. Yafüluuqueingün ñi adümafiel chem mongen ñi yenien tati pu che ca tañi quehun dungun, feimu inayentufalingün. Cafei rume yafültucuquefingün tati pu hueche ñi doi cüdahuelafiel ta Jehová. Müna mañumniefiyiñ ta Jehová ñi adniefiel mu tati pu misionero”.

Quiñe peñi coneltulelu ti Troquiñche Adcünuquelu Betel cangelu pais mu feipi: “Pu misionero pengelingün taiñ quiñeucülen com chüf Mapu meu. Pu che testigongenolu rume ngüneduamquei chem no rume taiñ püntülquenoeteu, caque tuhun nieliyiñ rume. Biblia taiñ quimeltuqueteu mu quiñeucüleiñ”.

Pu misionero, ¿chumngechi quelluquefi pu peñi trahunche mu? Pablo, Timor Oriental mapu mu, rume mañumniefi pu misionero ñi puhun tañi trahunche mu. “Hutrengechi mapu mu rume tuufuingün, acuingün arengechi mapu mu. Huelu pu misionero catrütulaeyu are no rume tañi amuldungual. Fill antü pulihuen mu acuqueingün tañi amuldungual. Arengefule rume amulequei tañi amuldungun engün, huitrancontumefi ta pu che ca amulei ñi cüdahun nagantü mu. Fentren che quellufingün ñi quimal ti rüf dungu ca iñche llemai. Com tañi mongen mu eluucüleingün tañi cüdahuelafiel ta Jehová. Tañi femün mu engün yafültucufi tati trahunche ñi ca femngechi femal”.

Ketti, quiñe lamngen hunelequelu amuldungun meu Malaui mapu mu, feipi pu misionero tañi quellueteu ca tañi familia. “Huercüngelu engu trahunche mu, iñche müten testigongefun tañi familia mu. Rume quellueneu engu ca rume hueniyefi com tañi familia. Tañi pu püñeñ quimürpuingün cüdahuelfiel mu ta Jehová mülequei ta ayühun. Inayentufali tañi femün mu engu, feimu tañi cüla domo püñeñ hunelequei amuldungun mu. Tañi füta ca eluhui tañi trahuluhual” pi taiñ lamngen.

¿Chumngechi quellungequei tati pu misionero? Ñi hulqueel mu plata tati pu peñi ca pu lamngen ñi femngeal Jehová ñi cüdau huall Mapu mu. Fentren peñi ca lamngen huercüquei plata ti pagina internet donate.jw.org mu. Mañumniehuiyiñ fente tamün cüme piuquengen mu.