Isaías
28 Pu Efraín che ngollilelu quiñe ayüfalchi corona reque troquiniefingün tañi huaria.*
Pefingün ayüfalchi rayen reque huechuñ huincul mülelu laf mapu meu.
Huelu üye mu tati pu che ngollicahuingün pulcu mu.
¡Aungeaingün! ¡Tonfünagai tañi ayüfalchi rayen!
2 ¡Tüfei! Chau Jehová huercüai quiñe nehuen-ngelu ca pepiluhun-ngelu.
Quiñe fütra cürüftucu mahun reque feleai cüpalnielu tralcan ca pire,*
quiñe nehuen-ngechi mangiñ co reque com apümcaquelu.
Quisu nehuen mu ütrüfnacümafi ti corona mapu mu.
3 Pünocañmangeai
pu ayüfalchi corona ñi nieel pu Efraín che ngollilelu.
4 Feiti ayüfalchi rayen tonfünagcülelu,
huechuñ huincul mülelu laf mapu meu,
hue huefpachi breva reque feleai.
Quiñe che pefile, nüafi, feica müten lümüafi.
5 Feichi antü, Chau Jehová Ñidolcülelu pu hueichafe mu* quiñe ayüfalchi coronacünuhuai, quiñe ayüfalchi trarilonco femcünuhuai tañi mülehuechi pu che mu. 6 Fei Chau Dios femcünuai pu juez ñi nor juzgacheal, nehuentucuafi pu cuñiutucumequefilu ti huaria ñi puerta ñi lefcontumequengeel.
7 Pu sacerdote ca pu huerquen nor miyauhuelaingün pulcu ñi duam mu,
cülücülütu amuleingün feiti chem ngollilcachequelu ñi duam mu.
Feiti chem ñi duam mu nor miyauhuelaingün,
ti pulcu hueluraquiduamelqueyu,
cülücülütu amuleingün feiti chem ngollilcachequelu ñi duam mu.
Tañi pequeel mu engün nor miyauhuelaingün
ca cüme juzgaquelaingün.
8 Tañi mesa engün apolei rapin meu,
com podcülei.
9 Pu che feipiquei: “¿Inei am quimeltungeai?
¿Inei am quimelelngeai ti huercün dungu?
¿Pu hue moyohuenolu pemai?
¿Pu hue elungehuenolu ñi moyonoal?
10 Isaías re feipicaquei ‘tüfa ñi feipiel Chau Dios, tüfa ñi feipiel.
Re huercün dungu, re huercün dungu.
Re pichiquen dungu, re pichiquen dungu’”.
11 Fei Chau Dios adnieafi pu quetroquetrotu dunguquelu, femngechi dunguafi tüfachi pu che ca quehun dungu meu. 12 Quiñe rupa, Chau Dios feipifi engün: “Tüfa mu ürcütuafuimün. Pu ürcülelu ürcütupe, tüfa mu füshcütuafuimün”. Huelu fei engün pilai ñi allcütual. 13 Feimu lle Chau Jehová huiño feipiafi engün:
“Tüfa ñi feipiel Chau Dios, tüfa ñi feipiel.
Re huercün dungu, re huercün dungu.
Re pichiquen dungu, re pichiquen dungu”.
Huelu allcütulayaingün,
feimu mutruraingün, paila tripayaingün,
hueungeaingün ca nülcüconaingün huachi mu.
14 Feimu allcütumün Chau Jehová ñi feipin, eimün mallma piuquengelu,
pu ngüneniefilu tüfachi troquiñche Jerusalén mu.
15 Eimün feipiqueimün:
Femngechi ruparumele fütra mangiñ co,
ditulayaiñmeu.
Coila dungu mu chellcomtucünuhuiyiñ,*
fei tüfa ta montulaiñmu”.
16 Tüfa ñi feipiel tati Doi Fütra Ñidol Jehová:
“¡Tüfei! Sion mu tucumequefiñ quiñe yafüngechi cura,*
tüfachi doi falin cura mu cüme anücünungeai tañi ruca.
Inei rume maneluucülele, llicalayai.
17 Femcünuafiñ ti nor dungu quiñe llasu reque mediquelu,
quiñe plomo reque tami mediaeteu.
Ti pire apümcayafi ti coilangechi chellcomtupeyüm,
ti ellcaupeyüm* apoleai co mu.
18 Tamün eldungucünuel tamün lanoal, femtripalayai.
Tamün feipicünuel tamün amunoal Rüngan mu,* femngechi tripalayai.
Ruparumele ti fütra mangiñ co,
apümcayaimünmeu.
19 Tunte rupa rupale,
apümcayaimünmeu,
fillque pulihuen rupayai,
antü ca pun meu.
Llican mu engün adümürpuafingün ti huercün dungu”.
20 Rume pichicalu cai ti cahuitu, pepi norümcaulayafui ti che,
rume pichi rupai ti sabana tañi impolaeteu.
21 Chau Jehová huitrapürayai chumngechi ñi femün Perazim huincul meu.
Trepeai* chumngechi ñi femün ti laf mapu meu inafülcülelu Gabaón mu.
Femngechi huechunentuafi tañi cüdau, tañi cangechi cüdau.
Entuafi tañi cüdau, tañi raquiduamquenofelchi cüdau.
22 Allcün tati Doi Fütra Ñidol Jehová, Ñidolcülelu pu hueichafe mu,
eluhui ñi apümcayafiel com tüfachi mapu.
Feimu ayecaulayaimün,
femngechi tamün doi üftucunoaeteu tamün cadena.
23 Cüme allcütuaimün tañi dungun,
ngüneduamafimün, allcütumün tañi feipimequen.
24 Ti quetrafe, ¿com antü quetramequefi ti mapu petu ñi ngan-nofiel ti fün?
¿Turpu tüngnaglai am ñi rüngümcamequefiel ti mapu ca ñi rulpamequefiel ti huitraru?*
25 Ti quetrafe deu lafcünufilu ti mapu,
fill püle puhulquefi ti cüru comino ca nganquefi cangelu comino.
Cafei nganquefi cachilla, mijo fün ca cahuella,* caque quiñeque ñi troquiñ mapu meu.
Cafei nganquefi cangelu fün quetran* inaltu püle.
¿Femngechi femquei no am?
26 Quisu tañi Chau Dios quimelelqueyu.
Quimeltuqueyu* chumngechi tañi cüme femal.
27 Ti curü comino rüngümngequelai trafla mu,*
ti cangelu comino pünongequelai tati carreta ñi rueda mu.*
Doi mai ti curü comino cupafngequei fara mu,
ca ti cangelu comino quiñe mamüll meu.
28 Pünoquetran-ngen mu ti fün, ¿fente rüngümngepeai mai ñi deumangeal cofque?
Femlai, inei no rume fente rüngümquelafi trafla mu.
Ca rulpangen mu tati carretela* ñi rueda ca tañi pu cahuellu,
ca rüngümngequelai.
29 Com tüfa ca cüpai Chau Jehová mu Ñidolcülelu pu hueichafe meu,
tañi ngülam afmatufalngei,
com ñi femquen cüme tripaquei.*