Isaías
15 Tüfachi juician dungu feipicünulelngei ta Moab:
Ar mülelu Moab mu ñücüfcünungeai,
quiñe pun meu müten apümcangeai.
Quir mülelu Moab mu ñücüfcünugeai,
quiñe pun meu müten apümcangeai.
2 Tati pu che pürapuaingün ngillatuhue ruca mu ca Dibón huaria meu.
Amuaingün yamfal mülehue mu* tañi ngümacahual.
Moab hueñancümequeai Nebo ca Medebá ñi duam mu.
Com pu che cupilmangeai com ñi cal lonco, trailefcülehuetuaingun,* ca com catrüpayunaingün.
3 Rüpü mu com pu che sacu mu tucutuhuaingün.
Huente ruca mu ca plaza mu eyütumequeaingün,
ngümalen mu nagpayaingün.
4 Hesbón ca Elealé huiraraingu,
tañi dungun Jáhaz püle allcüngeai
Feimu pu Moab hueichafe* huirarmequeaingün.
Ti troquiñche müllmüllcüleai.
5 Tañi piuque huirarmequeai Moab ñi duam mu.
Tañi pu che lefmaulu Zóar ca Eglat-Selisiyá mu puhuaingün.
Ngümalen mu püramequeaingün ti lilcülechi rüpü Luhit mu.
Amulelu Horonaim rüpü mu, huirarmequeaingün ti huesa dungu mu.
6 Nimrim ñi co com arcüai.*
Ti carü cachu ancüai,
ngehuelayai cachu, chem no rume carülelayai.
7 Feimu yenieafingün tañi mülehuechi mongehue ca falinque fillem.
Rumeaingün ti laf mapu cheu ñi mülen alamo.
8 Com Moab mapu püle allcüngeai ti huirarün.
Eglaim mu allcüngeai ñi ngümamequen engün,
Beer-Elim mu allcüngeai ñi ngümamequen engün.
9 Dimón ñi co apoleai mollfüñ mu.
Chau Dios nielfi caquelu huesaque dungu ta Dimón,
huercülelafi quiñe trapial tati pu Moab che lefmaulu
ca tati pu mülehuelu ti mapu meu.