Isaías
16 Huercülelafimün quiñe caniru* tati ngünenielu feiti mapu mu.
Sela mu tripayai, huellin mapu püle* rupayai,
fei puhuai Sion ñi püñeñ tañi huincul mu.
2 Quiñe üñüm reque* huemünentungelu* tañi dañe mu,*
ca femngechi feleai pu Moab che Arnón ñi ngilahue püle.*
3 Hulaimün ngülam, huechunentufimün chem ñi dullingeel.
Antü mu tami llaufeñ* dumiñcülepe pun reque.
Ellcacünufinge* pu fill püle mülelu, ngünencaquefilnge tati pu lefmaulu.
4 Ahuem, Moab, tañi pu che fill püle puhulngelu mülepe eimi mu.
Ellcacünufinge engün tati malocontuchequelu ñi duam mu.
Ti huesalcachequelu ngehuetulayai,
fentepuhuai ti apümcan dungu
ca ti pu pünocachequelu mülehuelayai mapu mu.
5 Ti ülmen huancu mu anüai quiñe lonco ülmen David ñi pu cüpanche mu cüpalu.
Manelfalngeai, piuqueyehun mu* ngünenieai ca nehuencüleai.
Dullintuchelayai ñi juzgacheal ca müchai müten femai nor dungu.
6 Allcüntucuiñ ñi mallmangen ta Moab, rume mallmangei,
checahun-ngei, mallmangei ca rume illcufengei.*
Huelu tañi feipin falilai, turpu huechutripalayai.
7 Pu Moab che eyütuaingün tañi cutrancahun mu,
com engün eyütuaingün.
Tati pu hueungelu ngümayeafingün ti ancülechi ofad* Quir-Haréset mu cüpalu.
8 Tonfünagi ti lelfün Hesbón mu mülelu,
ca femngechi ti ofadentu Sibmá mu mülelu.
Pu ngüneniefilu pu troquiñche pünocafingün tañi rou* nielu fentren quelü ofad,
feitichi rou Jazer mu puhurquefui,
huellin mapu mu ca puhurquefui.
Tañi choyün* tremürquei, lafquen mu puhurquei.
9 Feimu ngümayeafiñ Sibmá ñi ofadentu chumngechi ñi ngümayequefiel ta Jazer.
Ahuem, Hesbón ca Elealé, tañi cülleñu mu cülchafcünuhuaiñ.*
Deu fentecünuingün ñi ayühunquechi huirarün pu püramquetranquelu* ca pu tumequefilu ti fün hualüng mu tripaquelu.
10 Ngehuelai ayühun huerta mu,
allcüngehuelai ayühun-ngechi ülcantun ca huirarün ofadentu mu.
Inei no rume pünoquelafi ofad cheu ñi deumangequen pulcu,
iñche fentecünulu am ti huirarün.
11 Feimu llemai Moab ñi duam mu, tañi piuque nengümcaumequei
quiñe arpa ñi cuerda reque,
rume hueñancülen Quir-Haréset ñi duam mu.
12 Moab yafüluule rume ñi amual tañi yamfal mülehue mu* ca amule rume tañi ngillatuhue ruca mu ñi llellipual, lloulayai chem no rume.
13 Chau Jehová tüfa feipicünurquefui nga ñi rupayal Moab. 14 Tüfa hula Chau Jehová feipi: “Moab rume afmatungequei, huelu rupale 3 tripantu yehuelcangeai. Tüfachi tripantu raquingeai chumngechi ñi raquiqueel tati pu cüdaufe cullingequelu. Müleai fentren pofolcahun, fei mülehueai rume pichin che yafüngehuenolu”.