Abdías
1 Tüfa tati afmatun dungu ñi pefiel Abdías:*
Doi Fütra Ñidol Jehová tüfa ñi feipifiel ta Edom:
“Allcüiñ quiñe dungu cüpalu Chau Jehová mu,
huercüngei quiñe huerquen ñi feipiafiel pu troquiñche:
‘Huitrapüramün. Pepicahuaiñ taiñ hueichayafiel’”.*
2 Tüfa ñi feipiel Chau Dios: “Femcünueyu tami falin-ngenoal fillque troquiñche mu.
Rume illamcangeimi.
3 Tami mallma piuque ngünencaeimu.
Fütraque cura mu ellcauqueimi,*
alüpüralechi mahuida mu mülequeimi. Fei feipiqueimi tami piuque mu:
‘¿Inei am nacümpayaeneu* mapu mu?’”.
4 Chau Jehová feipi: “Fente alüpüralefulmi rume* ñamcu reque,*
cam tucufilmi rume tami dañe* huangülen püle,
tiye mu nacümpayayu.
5 Pun meu cüpafule hueñefe,
¿hueñepelayafeimu mai tañi ayünieel müten?
¡Huelu eimi com teifücangeaimi!*
Cam cüpafule pu tuquefilu ofad,
¿elcünupelayafuingün mai quiñeque ñi üñiftungeal?*
6 ¡Peñmangei tañi nieel ta Esaú, ahuem, com müntuñmangei!*
¡Mülehuelai tañi falinque chemcün* ellcalefulu!
7 Ültrenentungeimi* cheu ñi puhun tami mapu.
Com tami quelluqueteu* ngünencaeimu.
Pu huentru tüngcülelu* eimi engu huehueimu.
Quiñentrür iquelu cofque eimi engu tuculelaimu quiñe huachi,
fei tami ngüneduamnon rume”.
8 Chau Jehová feipi: “Feichi antü
apümcayafiñ pu quimche Edom mu
ca pu quim ngüneduamquelu Esaú ñi mahuidantu mu mülelu.
9 Com pu mülelu Esaú ñi mahuidantu mu apümcangeaingün,
feimu Temán, com tami pu hueichafe rume llicaleaingün.
10 Rume huesa quehuafimi tami peñi Jacob,
feimu rume yehuentucungeaimi,
ngehuetulayaimi.
11 Pu ca cüpanche presuyefingün tami peñi ñi troquiñ hueichafe,
coningün tati huaria ñi puerta mu ca sortiañmafingün* Jerusalén ñi falinque fillem.
Feichi antü eimi quiñepüle huitracünuhuimi,
fei engün reque femcünuhuimi.
12 Feichi rupamequelu huesaque dungu tami peñi, mülelafui tami ayüucüleal.
Feichi lalu pu Judá che, mülelafui tami pürapapiuqueleal.
Feichi cutrantupiuquelelu engün, mülelafui tami mallma dungual.
13 Feichi huesa dunguñmalu tañi troquiñche, mülelafui tami conal ñi puerta meu.
Feichi huesa dunguñmalu engün, mülelafui tami ayüucüleal tañi huesa rupan mu.
Feichi huesa dunguñmalu engün, mülelafui tami nüafiel tañi falinque fillem.
14 Rüpü mu mülelafui tami langümafiel pu lefmaumequelu.
Mülelafui tami hultucuafiel pu mongetripalu cutrancahun antü meu.
15 Püllelepai chi antü Chau Jehová ñi cutrancayafiel com pu troquiñche.
Chumngechi tami femün ca femngechi femngeaimi.
Huiñolelngetuaimi chem tami femquefiel caquelu che.
16 Tañi lif huincul mu eimün putuimün,*
ca femngechi fillque troquiñche putunieaingün tañi illcun* pulcu reque.
Rüfcünu putuaingün ca lümüafingün iñche tañi illcun.
Turpu mülenolu troquingeai, ngehuetulayaingün.
17 Huelu ti lefmaulu müleai Sion huincul mu,
fei lifngeai,
Jacob tañi pu cüpanche huiño nietuaingün chem tañi niequefel.
18 Jacob ñi pu cüpanche cütral reque feleai,
José tañi pu cüpanche leuleucüleai.*
Huelu Esaú ñi pu cüpanche congilhue reque feleai,
fei lüpümngeai ca apümcangeai.
Inei no rume mongetripalayai Esaú tañi pu cüpanche meu,
Chau Jehová feipilu cai.
19 Nüafingün ti Négueb ca Esaú ñi mahuidantu,
ti Sefelá* ca pu Filistea che ñi mapu.
Nüafingün Efraín ñi lelfün ca Samaria ñi lelfün.
Cafei Benjamín nüafi Galaad.
20 Pu Israel che cañpüle yengetuingün feiti nehuen-ngechi cura malal mu.*
Huelu ngen-ngeaingün pu Canaán che ñi mapu puulu ta Sarepta mu.
Pu entungelu Jerusalén mu ñi yengeel Sefarad mu, mülepuaingün Négueb ñi fillque huaria meu.
21 Sion huincul mu pürapuaingün montulchefe,
juzgayafingün tati pu che mülelu Esaú ñi mahuidantu mu.
Fei Chau Jehová ngünenierpuai llemai”.