Tati Biblia trürlai caque lifru religioso mu, huarancaquechi tripantu mu fentren che entui chem tañi feyentuqueel Biblia mu. Huelu ca fentren che re papeltuquei tati Biblia ñi feipial chem dungu mu huelulcaleafui.

Quiñeque che adümuucülelu feipi: “Tati Biblia ñi mülen fachantü rume cuifi tuhun-ngei, feimu ¿cambiatunoalu cai chem ñi huirintucungeel?”. Quiñe huentru adümuucülelu religioso dungu mu feipi: “Tati Biblia ñi mülen fachantü, ¿trürngepei mai chem ñi huirintucungeel ta cuifi? Quimlayafuiñ rume, fentren dungu taiñ nieelchi Biblia mu huelulcalei. Epe com ti mülechi Biblia famülque meu, huirintucungei fentren tripantu rupalu hula ñi huirintucungeel ti cuifi huirintucun. Feimu trürlai engün troquifiñ” pi tüfachi huentru.

Caquelu pu che tañi nieel mu cangelu religion müte maneluuquelai chem ñi huirintucungeel Biblia mu. Quiñe huentru Faizal pingelu, tañi familia cristiano ngelafui, feimu quimelelngei Biblia ñi falin lifru ngen, caletui ñi feipin pieyeu ñi pu che. Faizal feipi: “Ñi quimeltungen mu, iñche müte maneluuquelafun chem che rume ñi nütramcayaeteu Biblia mu, fei nielafuingün ti cuifique huirintucun, feimu cambialetui tañi Biblia pilefun”.

¿Falin-ngepei mai taiñ quimal ñi caletun cam caletunon ti Biblia? Biblia cüpalniei cümeque dungu ñi mülerpual cüpalechi antü meu (Romanos 15:⁠4). Quimnienofilmi ñi mülen tüfachi cümeque dungu ti cuifique huirintucun mu, ¿feyentuafuimi? Cambialefule taiñ nieelchi Biblia, ¿inayafuimi tañi ngülam tami familia mu, tami cüdau mu ca tami poyefiel mu ta Chau Ngünechen? ¡Femlayafuimi!

Tati lifru ñi huirintucungeel ella mu ngehuelai, huelu ca mülei cuifique huirintucun taiñ inaduamal chem pin ta Biblia. Fentrelei pu pichique papel cheu ñi huiño huirintucungeel ta Biblia, huelu rupan mu ti tripantu huesañmauquei ti papel, cafei fentren che caiñetufi ti Biblia ca huelucünutuquei tañi chem pin. Femngelu rume, ti Biblia cüme tripai. ¿Chumngechi am? Quimün mu tüfa, ¿chumngelu am maneluhuafuimi taiñ nieelchi Biblia mu? Tami doi quimal papeltunge ti inalechi articulo.

CHEM ÑI CATRÜTUAFETEU: Cuifi mu ñi huirintucungeal ti Biblia pünengei papiro ca pergamino (2 Timoteo 4:⁠13).⁠a Huelu, ¿tunteñmayafui tati Biblia, huirintucungen mu papiro ca pergamino meu?

Tati papiro ancün mu huatroquefui ca leumauquefui, ca rupan mu ta antü trüfürquefui. “Ti guardantucungechi papiro percan-ngeafui ca fünafui, ca rülngantucungele piruafui ca pu dehu ca pu collella iyafeyeu”, femngechi feipi tati pu adümuucülechi huentru Richard Parquinson ca Stephen Quirque. Hue pengelu quiñeque papiro quiñeque rüngeingün ca caquelu fei ancüingün antü mu, fei huesañmahui.

Tati pergamino ñi deumangen trülque culliñ meu fentrentu mülequei, huelu ca huesañmauquei cuidangenofule cam elcünungele cheu ñi ütrelen ca antü mu elngele.⁠b Ti pergamino ca piruafui. Tati lifru La escritura cotidiana en el Oriente Grecorromano (Everyday Writing in the Graeco-Roman East) feipilei: “Cüdaungei ñi fentrentu müleal ti cuifique huirintucun”. Femngechi huesañmafule tati Biblia quimlayafuiñ ñi chem pin.

CHUMNGECHI ÑI TEIFÜNGENON TATI BIBLIA: Ti ley Jehová ñi elufiel pu israelche feipiquefui com pu rey “mülei ñi huirintucual tüfachi ley quiñe lifru mu”, fei tüfa tati quechu hunenque lifru ñi mülen Biblia mu (Deuteronomio 17:⁠18). Ca femngechi tati pu copista fentrenque rulpacünuingün cuifique huirintucun. Feimu ti hunen siglo mu, fentrelei tüfachi huirintucun Israel mapu mu ca fillque mapu meu Macedonia reque (Lucas 4:⁠16, 17; Hechos 17:⁠11). Rume fentren tripantu rupalu rume ñi deumacünuel tüfachi huirintucun, ¿chumngelu am petu mülei ta quiñeque?

Tati adümuucülechi huentru Philip Comfort pingelu feipi: “Quimngequei pu judio ñi femquefel cuifi mu, fei ellcacünuquefuingün tañi huirintucun fütraque meseng mu, fütraque metahue mu”. Ca femngechi femquefuingün pu hunenque cristiano. Feimu tüfachi huirintucun petu pengei fütaque meseng cam metahue mu quiñe lolo mu, dumiñ mu ca anquen mapu mu.

CHUM TRIPAI: Famülque meu pengei fentren pichique huirintucun mülelu Biblia mu, quiñeque ta tüfa 2.000 tripantu nielu. Nielai quiñe lifru no rume fentren tripantu nielu. Biblia müten fentrelei tañi cuifique huirintucun.

CHEM ÑI CATRÜTUAFETEU: Fentren pu loncolechi religioso ca politico caiñetufingün chem ñi quimeltun tati Biblia. Ñi rume falin-ngen mu, catrütuingün ñi deumangeal, rulpadungunoal ca ñi nienoal tati Biblia chuchi no rume. Feula peaiñ epu chem ñi chumün engün:

• Feichi 167 tripantu petu ñi mülepanon Jesus, ti rey Antíoco Epífanes mandafui pu judio ñi nieal ti griego religion, feimu mandafui ñi teifüngeal chem Hebreo Huirintucun ñi mülen. Ti adümuucülechi huentru Heinrich Graetz pingelu feipi: “Tañi pu cüdahulqueteu tati Rey Antíoco Epífanes quintufi cheu ñi mülen tati Hebreo Huirintucun, fei huicharfi ca lüpümfi. Cafei quintufi chuchi rume papeltuquefulu ti Biblia, fei ñi langümafiel”.

• Fentren tripantu rupalu Edad Media mu, mülefui che quimeltuquefilu chem pin ta Biblia, huelu no chem ñi quimeltuqueel tati iglesia catolica. Feimu pu loncolechi religioso rume illcuingün ñi quimelngen chem pin ta Biblia. Feichi pu che feyentuquenofilu tati iglesia catolica tuculelngei quiñe üi hereje pingei. Feimu dalluncungei ca hereje pingei feitichi pu che papetuquelu Biblia. Quiñe rupa trahuluhuingün pu loncolechi religioso quiñe mandan tripai com parroquia mu: “Ñochiquechi quintuafimün pu hereje ruca mu ca lolo naglechi ruca mu, feiti ruca cheu ñi mülen quiñe hereje teifüngeai.

Pu caiñetufilu ti Bibia hueufule engün, nielayafuiñ ta Biblia.

CHUMNGECHI ÑI TEIFÜNGENON TATI BIBLIA: Ti rey Antíoco caiñetufui Biblia Israel mapu meu müten, huelu tati pu judio ca mülequefui caque mapu meu. Pu adümuucülelu feipiqueingün doi rangiñ pu judio mülequefui caque mapu mu, tüfa engün niequefui engün ñi sinagoga meu quisuque tañi huirin chillca. Feitachi huirin chillca montuluhui, feimu püneeyeu caquelu pu judio ca tati hunenque cristiano (Hechos 15:⁠21).

Edad Media mu, amulequefui ñi huirintucungeal ca rulpacünungeal doi Biblia, caiñetungelu rume. Petu ñi deumangenon rume ti hunen imprenta, pichiñ mu quiñeque troquiñ Biblia rulpadungungei 33 quehun dungu mu. Fei hula matu amulei ñi rulpadungungeal fentren quehun dungun mu.

CHUM TRIPAI: Biblia feita doi rulpadungungei fentren quehun dungu mu, caiñetueyeu rume quiñeque rey ca pu loncolechi religioso. Biblia ñi feipin ca coneltulei quiñeque ley ñi mülen huall Mapu mu ca tati pu che ñi quehun ca mongen mu.

CHEM ÑI CATRÜTUAFETEU: Tati papiro ca tati pergamino, cheu ñi huirintucucünungeel tati Biblia, müchai huesañmauquefui rume ca caiñetungelu rume tati Biblia apümcangelai. Quiñeque copista ca rulpadunguquelu Biblia huelucünufingün quiñeque troquiñ Biblia, femngechi ñi nüucüleal tañi feyentun mu. Cüla dungu inaduamaiñ.

• Cheu ñi poyeniequeel ta Chau Dios. Feichi siglo meli puulu siglo epu petu ñi mülepanon Jesus, pu huirintuculu tati Pentateuco Samaritano⁠a püñamtuculelfingün Éxodo 20:⁠17 mu tüfachi dungu: “Guerizim pingechi huincul mu deumayaimün quiñe altar”. Femngechi pu samaritano feipiafui engün ñi elungeal ñi deumayal quiñe ngillatuhue ruca feichi huincul mu.

• Trinidad pingechi quimeltun. 300 tripantu rupalu deu ñi huirintucucünungeel tati Biblia, quiñe huentru feyentulu Trinidad mu püñamtuculelfi 1 Juan 5:⁠7 mu, tüfachi feipin: “Huenu mu tati Chau, Fotüm ca ti Lif Cüme Püllü, quiñelei müten engün”. Tüfachi dungun tripalafui ti hunen huirin meu. Ti adümuucülechi huentru Bruce Metzger pingelu feipi: “Rupalu ti siglo cayu, doi huirintucungei tüfachi dungu tati huirintucun latin quehun meu, quiñeque tüfa tati Versión Latina Antigua ca tati Vulgata Latina”.

• Chau Dios tañi üi. Cuifi mu pu judio raquiduamquefuingün ñi cümenon feipial Chau Ngünechen ñi üi. Feimu quiñeque rulpadunguquelu Biblia inafingün feichi huesa raquiduam, ca tucuhuetulafi Biblia meu engün. Doi mai tucucünufingün Señor, Dios cam Ñidol müten. Huelu Biblia mu, femngechi ca üitungequeingün pu huentru, pu coilaque dios ca Huecüfü cütu (Juan 10:⁠34, 35; 1 Corintios 8:⁠5, 6; 2 Corintios 4:⁠4).⁠b

CHUMNGECHI ÑI TEIFÜNGENON TATI BIBLIA: Quiñeque copista nehue cüme ngüneduamlafingün chi huirin. Huelu cangelu cüme inaduamqueingün chem ñi huirintucual feiti mu. Feichi siglo sexto ca decimo taiñ mülen antü mu, tati pu masoreta rulpacünuingün tati Hebreo Huirintucun mu ta cangelu texto mu, fei tüfa tati texto masorético pingelu. Quisu engün raquiquefuingün tunten letra ñi mülen, fei ñi huelucünunoal. Cafei cheu ñi mülen quiñe huelulcan, fei engün ca quiñe huirintucun tucuquefuingün. Pu masoreta püñamtucuquelafingün chem no rume tati huirintucun mu. Quiñe huentru adümuucülelu Moshe Goshen-Gottstein pingelu, feipi: “Pu masoreta papel rulpafilu chem ñi feipin Biblia, quiñe nentufile com tucunofile chem pin Biblia, rume culpafui fei engün”.

Fentren huirintucun mülelu, fei quellueyeu tuchi ngüneduamquelu Biblia ñi peal cheu ñi cümelenon. Pu loncolechi religioso feipiquefui fei ti pu latin dunguquelu Biblia mu, fei engün müten niefui ñi chem pin Biblia. Feimufula pu loncolechi religioso püñamtucufingün 1 Juan 5:⁠7 mu, tüfachi feipin: “Huenu mu tati Chau, Fotüm ca tati Lif Cüme Püllü quiñelei müten engün”. Feichi huelulcan ca tucungefui Reina-Valera mu. Pengelu caquelu huirintucun mu, ¿chem ñi pengelün feita engün? Quiñe quim huentru Bruce Metzger huirintucui: “Cuifique huirintucun mu tripalai chem ñi feipin 1 Juan 5:⁠7, tripalai tati cuifique huirintucun siríaco, copto, armenio, etiópico, árabe ca eslavo quehun dungu mu, feichi dungu latin quehun dungu mu müten tripai”. Feimu quiñeque Biblia ca tati Reina-Valera nentufingün feichi dungun nor feipingenolu.

¿Chumngelu tati cuifique huirintucun pengeli ñi petu mülecapen Biblia ñi feipin? 1947 tripantu mu pengei tati Rollos del mar Muerto, feiti quimque che ngüneduamfilu Biblia, fei engün trürümfi ti texto masorético ca chem ñi peel ti rollo mu. Quiñe huentru ngüneduamfilu tati Rollos del mar Muerto feipi: “Feitichi huirintucun ñi mülen doi huaranca tripantu ñi huirintucungen pu copista judio, fei ñi huirintucuel com felerpui ca rüf feyentufali”.

Tati Biblioteca Chester Beatty Dublín, mülelu Irlanda mapu mu, niei fentren papiro huirintucungelu fillque lifru ñi mülen tati Escrituras Griegas Cristianas mu, ca mülei quiñeque cuifique huirintucun, huirintucungelu feichi siglo segundo mu. Quiñe pataca tripantu afi ñi deumangen ta Biblia. Quiñe lifru The Anchor Bible Dictionary feipi: “Pu papiro cüme pengelquei fillque dungun tati texto mu, ca cüme pengeli fente ñi cüme huirintucungen tati texto mu, fentren tripantu rupafui rume”.

CHUM TRIPAI: Fentrequen cuifique huirintucun ñi mülen, fei pengelquei chem ñi feipin Biblia rume falin-ngei. “Ngelai chem lifru no rume fente ñi cüme huirintucungen ca ñi nieel fentrenque huirintucun Biblia mu reque, ca tuchi no rume feipilafui Biblia ñi feipin ñi manelfalnon”, femngechi feipi ti huentru Sir Frederic Quenyon. Ti quim huentru William Henry Green nütramcalu tati Escrituras Hebreas, fei ñi feipin: “Biblia rumeñma feyentufali, chem lifru no rume trürlai”.

Chem catrütueteu rume, Biblia felequei müten. Feimu llemai famülque meu com iñchiñ nieafuiñ quiñe Biblia taiñ papeltuafiel. Peafuiñ quiñeque Biblia manelfalngelu, cambialequenolu tañi feipin.⁠a Ti papel ca pergamino cheu huirintucungelu ti Biblia müchai huesañmauquefui. Cafei Biblia rume caiñetungei ca fentren che eluhui ñi caletucünuafiel chem ñi feipin. Huelu catrütungelai, ¿chumngelu? ¿Chumngelu am tati Biblia fente trürümfalngelai ta caquelu lifru mu?

Tati apostol Pablo huirintucui: “Com tati huirinconcülechi dungu ti Huirin Chillca meu huiringei Ngünechen tañi adcünuel ca ñi piel meu” (2 Timoteo 3:⁠16). Ca femngechi raquiduamqueingün fentren pu che ngüneduamlu Biblia ñi feipin, femngechi feipingün: “Biblia Ngünechen ñi dungu tati, feimu llemai Jehová ñi duam mu tati Biblia amulecai müten fanten mu”. ¿Acordafimi ta Faizal tripalu ellaconlu ñi feipin tüfachi revista? Fei fentren ramtun niefui Biblia mu, feimu eluhui ñi quisu ngüneduamfiel tañi chem pin, fei afmatulehuei ngüneduamfiel mu epe com pu iglesia ñi quimeltun tripalai Biblia mu. Cafei quimün mu Jehová ñi cüpa cüme elcünutuafiel ti Mapu, rume ayühuleyeu ta Faizal.

Faizal ca feipi: “Feula quimün tati Biblia quiñe regalo tañi elueteu Jehová. Chau Jehová deumacünulu cai ti huenu ca ti Mapu, ¿cuñiutucunoafulu am Biblia tañi feipin taiñ papeltuafiel? ‘¡Femlai!’ feipifuliyiñ, Ngünechen ta pepilnoalu troquiafiyiñ, fei chem che troquiafun iñche tañi femngechi feipial” pi Faizal (Isaías 40:⁠8).