EPE com che ca huimtun ca religion nieafui rume, llellipuquei. Quiñeque trahuqueingün iglesia mu, sinagoga cam quiñeque santuario mu. Fillque chemcün pünequeingün ñi llellipual: quiñeque rosario, quiñe rehue ca caquelu fillque dungu. Quisulelu rume cam fentrelelu rume, com llellipuqueingün.

Chi llellipun pengeli pu che doicülei caquelu ñi mülen Mapu mu. Pu culliñ duamniei co, iyael ca oxigeno. Iñchiñ ca femngechi feleiñ. Pu culliñ reque, choyüngeiñ, tremcüleiñ ca laqueiñ (Eclesiastés 3:⁠19). Huelu tati pu che müten llellipuquei. ¿Chumngelu?

Com duamnieiñ taiñ llellipual. Tati llellipun quelluquefi ta che ñi fülconpual tañi dios mu. Biblia feipi femngechi deumangeiñ (Eclesiastés 3:⁠11). Feimu Jesús feipi: “Ayühun niei tati duamnielu ñi llohual Ngünechen ñi cüme dungu” (Mateo 5:⁠3).

Tüfa mu com huall Mapu püle mülei fillque templo cam iglesia. Ca pu che pünequei fillque chemcün, fei tañi llellipual. Fillque hora mu llellipuquei ta che. Quiñeque che femngechi femquelaingün. Quintuquei quellun caquelu che mu cam quisutu tañi quelluhual. Huelu pu che femngechi femquelu, puuquelai. Pu che tañi mongen yafüngelai, pürüm rupai, feimu fentren quimün nielaingün. Duamnieiñ Chau Dios taiñ quelluaeteu. Quisu rumel mongen niei, doi quimün niei ca doi nehuen niei. Fei müten eluafeiñmu com taiñ duamnieel. ¿Chumngelu duamnieafuiñ taiñ llellipual?

Quiñeque mu quintuqueiñ cümeque ngülam, huelu inei no rume eluquelaeiñmu. Lalu quiñe taiñ pu che cam huelulcaulu iñchiñ, quiñeque mu inei no rume yafültucuquelaeiñmu. Quimnolu iñchiñ chem tañi chumal, “inei no rume quelluquelaeiñmu” piafuiñ. Eimi, ¿feitachi dungu mu rupaqueimi?

Biblia feipi cümei taiñ llellipual com feitachi dungu mu. Biblia mu huirintuculei chumngechi ñi ngillatun cuifi mülequechi domo, pu huentru. Fei engün llellipufingün ta Chau Dios tañi yafültucuaeteu, ñi adnieaeteu ca tañi perdonayaeteu. Ca ramtufingün ta Chau Dios falinque dungu (Salmo 23:⁠3; 71:⁠21; Daniel 9:⁠4, 5, 19; Habacuc 1:⁠3).

Com feiti pu che quimniefuingün inei tañi llellipuafiel, huelu famülque mu fentren che quimquelaingün feitachi dungu.

FAMÜLQUE mu fentren che feyentuquei com chi llellipun puuquei Chau Dios mu, falilai chem Chau Dios ñi llellipuafiel ca feipiqueingün com chi religion cümei. Huelu, ¿rüfngei?

Biblia pengeli fentren rupa, pu che llellipuquelafi ta Chau Dios. Cuifi mu huirintucungelu Biblia, pu che huimtulefui ñi llellipuafiel ta coilaque dios. Huelu Chau Dios fentren rupa feipicünufi tañi pu troquiñche ñi femnoal engün. Salmo 115:⁠4-6 feipi pu coilaque dios pilun niefuingün rume, allcüquelaingün. Müna quimfali chi texto tañi feipin. Ngünamca dungu llellipuafiel quiñe dios taiñ allcütunoaeteu.

Taiñ cüme quimtucual tüfa, peafiyiñ Elías tañi rupan. Biblia nütramcaquei Elías a pruebatucufi Baal tañi pu sacerdote. Elías llellipufi tañi Chau Dios. Ca pu sacerdote llellipuafilu ta Baal pingechi dios. Chi dios ñi huiñoldunguaeteu tañi llellipun, pengelai ñi rüf Dios ngen. Feimu tati pu sacerdote eluhuingün ñi llellipuafiel ta Baal. Fentren hora ca fentren rupa llellipufingün, huelu inei no rume huiñoldungulaeyu (1 Reyes 18:⁠29).

Huelu, ¿ca femngechi rupai ta Elías? Femlai. Elías aflu tañi llellipun müten, nagpai cütral huenu mu tañi lüpümafiel Elías tañi chalintucun, femngechi Dios huiñoldungufi ta Elías. ¿Chumngelu am femi? Elías alü llellipulai, huelu quisu tañi llellipun cüla rupa üitufi ta Jehová, Chau Dios tañi üi (1 Reyes 18:⁠36, 37).

¿Chumngelu afmatufali tüfa? Pu cananeo che poyefingün ta Baal, huelu caquerume üi mu piquefingün. Huelu Jehová ñi üi quiñelei müten. Com callfü huenu mu ca Mapu mu, inei no rume Jehová pingelai. Jehová feipi: “Iñche ta Jehová. Tüfa tañi üi. Iñche müten mülei ñi püramyengeal, ca inei no rume elulayafiñ ñi püramyengeal” (Isaías 42:⁠8).

¿Chumngelu Elías ñi llellipun müten allcütungei? Ñi poyeafiel ta Baal, pu che langümchequei ca conqueingün huesaque cudumuhun dungu. Huelu Jehová obligaquelafi tañi pu poyequeteu ñi contual podngechi dungu ca chem ünufalchi dungu mu no rume, doi mai ayüniei tañi üitungeal llellipun mu. Raquiduamnge tüfachi dungu mu: cüpa huercülelfilmi quiñe carta ta quiñe hueni, mülei tami üituafiel. Ca che ñi üi huirintuculmi, chi carta puulayai tami hueni mu. Ca femngechi tami allcütuaeteu Chau Dios, mülei tami üituafiel quisu müten.

Pu llellipuquefilu ta Jehová llellipufi tati com deumalu.⁠a Jehová “iñchiñ taiñ Chau tati” (Isaías 63:⁠16). Ca femngechi Jehová, Jesús tañi Chau tati. Feimu Jesús feipi: ‘Iñche amutuan ñi Chau meu, ca femngechi eimün tamün Chau, iñche ñi Ngünechen ca eimün tamün Ngünechen’ (Juan 20:⁠17). Jesús llellipuquefi tañi Chau Jehová. Feimu tati pu discipulo ca femngechi mülei ñi llellipuafiel ta Chau Jehová (Mateo 6:⁠9).

Biblia feipiquelai taiñ llellipuafiel ta Jesús, María, quiñe santo cam quiñe angel no rume. Jehová müten mülei taiñ llellipuafiel. Peafiyiñ chumngelu. Hune, ti llellipun pengeli taiñ poyeafiel. Biblia feipi iñchiñ mülei taiñ poyeafiel ta Jehová müten (Éxodo 20:⁠5). Epu, Biblia feipi Jehová “Allcütuquelu tati llellipun” (Salmo 65:⁠2). Jehová elfalcünuquei fillque cüdau, huelu mülei quiñe cüdau elfalcünuquelafi ta inei no rume. ¿Chem am? Allcütuquei ti llellipun.

Feimu Jehová taiñ allcütuaeteu taiñ llellipun, mülei taiñ üituafiel. Biblia feipi: “Com pu maneluucülelu Jehová ñi üi mu, montulngeai” (Joel 2:⁠32). Huelu, ¿fei müten pemai duamfalngei?

FENTREN religion quimeltuquei ñi chumcünual ti cuerpo ñi llellipual. Ca quimeltuqueingün rume falin-ngei cüme adcüleal tati llellipun. Huelu Biblia enseñaquelai feichi dungu, doi mai Biblia quimeltuquei chumngechi taiñ llellipual.

Biblia pengeli Jehová ñi pu che chumngechi tañi llellipuquefel engün. Fei engün llellipuqueingün fillque püle, caquerumei ñi chumcünufiel ñi cuerpo ñi llellipual. Quiñeque llellipuqueingün ñücüfcülen mu, caquelu allcütungequei ñi llellipun. Quiñeque püraquintuingün ñi llellipual, caquelu pochongnagqueingün. Pünelafingün imagen, rosario no rume ñi llellipual, doi mai entuingün ñi llellipun rüf piuque meu. ¿Chumngelu am Chau Dios allcütui ñi llellipun?

Tüfachi cuifique che llellipuquefi ta Jehová, feimu allcütungeingün. Quisu engün femingün quiñe dungu ñi allcüñmangeal tañi llellipun. Biblia feipi: “Nieiñ maneluhun ta Ngünechen meu, quimnielu am iñchiñ fei ngillatufiliyiñ chem rume taiñ duamtuel quisu ñi piel meu, fei allcüñmayaiñmeu taiñ ngillatuquefiel” (1 Juan 5:⁠14). Feimu mülei taiñ llellipual Chau Dios tañi ayüqueel mu, fei taiñ allcütuaeteu. ¿Chumngechi cünuafuiñ?

Mülei taiñ quimal chem tañi ayüqueel Chau Dios, feimu papeltuafiyiñ ti Biblia, femngechi quimafuiñ chem mu taiñ llellipuafiel ta Chau Dios. Duamfal-lai taiñ quimal com tati Biblia Chau Dios taiñ allcütuaeteu, doi mai Chau Dios ayüniei taiñ adümal quisu tañi ayüqueel. Ca femngechi ayüniei taiñ femal chem taiñ quimürpun (Mateo 7:⁠21-23). Taiñ papeltuqueel Biblia mu quelluafeiñmu taiñ cüme entual taiñ llellipun.

Doi quimfiliyiñ ta Jehová, doi maneluucüleaiñ quisu mu. Taiñ allcütuaeteu Chau Dios, rume falin-ngei taiñ maneluucüleal. Jesús feipi: “Itrocom tami eluen piel ta ngillatun meu feyentulelmün, llohuaimün” (Mateo 21:⁠22). Huelu re femngechi feyentulayaiñ. Doi mai cüme quimaiñ chemu taiñ feyentuleal Jehová mu penofiliyiñ rume (Hebreos 11:⁠1, TNM). Biblia fentren rupa pengeli Chau Dios ñi mülen, maneluhun-ngei ca allcütuquei llellipun. Jehová quelluen pifiliyiñ taiñ doi maneluhual, fei ayühunquechi quelluaiñmu (Lucas 17:⁠5; Santiago 1:⁠17).

Taiñ llellipual, ca quiñe dungu femaiñ. Jesús feipi: “Iñche meu müten feyentulu amuai ta Chau meu” (Juan 14:⁠6). Feimu Jesús ñi duam müten fülconpuafuiñ Jehová meu. Feimu Jesús feipifi tañi pu discipulo llellipun mu ñi üituafiel ta Jesús (Juan 14:⁠13; 15:⁠16). Huelu llellipulayafiyiñ ta Jesús, doi mai loncontucunieaiñ ñi lan mu llellipuafuiñ taiñ Chau Jehová.

Quiñe rupa, quiñeque discipulo feipifi ta Jesús: “Quimeltumuaiñ cai taiñ ngillatual” (Lucas 11:⁠1). Quisu engün quimniefuingün chumngechi ñi llellipual. Cüpa quimfuingün chem tañi feipial llellipun mu.

TATI llellipun ñi doi feipiquen tati pu che, padrenuestro pingelu. Fentren che ñi feipiquen tüfachi llellipun quimlaingün rume ñi chem pifel. Huelu Jesús ayülafui tati pu che ñi feipial fentren rupa femngechi müten. ¿Chumngechi quimnieiñ?

Petu ñi enseñanon Jesús feichi llellipun, feipi: “Ngillatulmün ca huiñome feipiquefilmün tamün deu ngillatuelchi dungu” (Mateo 6:⁠7). Feimu feipiafuiñ Jesús ayülai taiñ huiño feipifeipimequeal ti llellipun padrenuestro pingelu. Feichi antü, Jesús quimeltumequei chumngechi llellipual ca quimeltumequei chem falinque dungu mu tañi llellipual. Ngüneduamafiyiñ Jesús tañi llellipun, feita mülei ti lifru Mateo mu (Mateo 6:⁠9-13, TNM).

“Taiñ Chau Ngünechen huenu mu mülelu, yamniengepe tami üi”.

Jesús quimeltufi tañi pu discipulo ñi llellipuafiel Jehová müten. ¿Chumngelu am müna fali Jehová tañi üi? ¿Chumngelu mülei ñi yamniengeal tañi üi?

Ñi deumangen mu tati pu che, huesa dunguyengei ta Jehová, feimu huesa acordangequei ta Chau Dios. Huecüfü feipiquei: “Jehová müten duamtuniehui, fei coilangei ca cüme ngünenielafi com pu che” piquei Huecüfü (Génesis 3:⁠1-6). Fentren che quiñeucülequeingün Huecüfü engün, feimu huesa dunguyequefingün Jehová, “duamchequelai” piqueingün. Ca feipiqueingün Chau Dios perdonachequelai. Quiñeque che ca feipiqueingün ngelai ta Chau Dios. Caquelu che entuñmafi tañi üi Biblia mu. Ca feipiqueingün “üituquelayafimün Chau Dios tañi üi”.

Biblia feipi Chau Dios pengelai com coilatun Huecüfü (Ezequiel 39:⁠7). Ca femngechi Chau Dios eluaiñmu com taiñ duamnieel, ca apümafi com taiñ cutrancaqueteu. ¿Chumngechi femafi? Taiñ quimal, peafiyiñ ca chem ñi pin ta Jesús.

“Cüpape tami Ngünenien [Gobierno]”.

Famülque mu caquerume dungu feipiquei pu loncolechi religioso Chau Dios tañi Gobierno mu. Huelu Jesús ñi antü mu femngechi rupaquelai. Com pu allcütulu Jesús tañi llellipun quimniefuingün ñi cüpayal ti Mesías, fei ñi loncoleal Chau Dios tañi Gobierno mu (Isaías 9:⁠6, 7; Daniel 2:⁠44). Feitachi Gobierno quelluntucuai ñi cüme acordangetual Chau Dios tañi üi. Pengelai Huecüfü tañi coilangen. Apümafi tati Huecüfü, fei cüme elcünungetuai com tañi huesalcael. Jehová tañi Gobierno apümafi com tati cutran, aucan, filla ca tati lan dungu (Salmo 46:⁠9; 72:⁠12-16; Isaías 25:⁠8; 33:⁠24). Feimu feipifiel mu iñchiñ ta Chau Dios “venga tu Reino”, feipimequefiyiñ ñi femtripayal tañi feipicünuel.

“Femngepe tami feipin huenu meu, ca femngechi Mapu mu”.

Ñi llellipun ta Jesús pengeli Chau Dios femürpuai tañi ayüqueel Mapu mu chumngechi ñi femngequen huenu mu. ¿Chemu feipiafuiñ? Jesús ütrüfnacümpafi tati Huecüfü ca tati huesaque püllü Mapu mu, feimu femngequei Chau Dios tañi ayüqueel huenu mu (Apocalipsis 12:⁠9-12). Jesús tañi llellipun pengeli Chau Dios tañi ayüqueel doi falin-ngei iñchiñ taiñ ayüqueel mu. Chau Dios tañi ayüqueel rumel cümelcaqueiñmu. Feimu Jesús feipifi tañi Chau: “Felequilpe iñche quisu ñi ayüel, huelu mai eymi tami ayüel” (Lucas 22:⁠42).

“Elumuiñ taiñ duamnieelchi cofque fachantü”.

Jesús ca pengeli iñchiñ llellipuafuiñ ta Chau Dios taiñ nieal taiñ duamnieel. Femngechi femliyiñ, quelluaiñmu taiñ acordayal Jehová taiñ “elunieteu ta mongen ta itrocom iñchiñ fei ti cürüf ca com ti caquelu chemcün” (Hechos 17:⁠25). Ti Biblia pengeli Jehová quiñe chau reque felei. Ayühunquechi eluquefi tañi pu yall com tañi duamnieel. Huelu quiñe cüme chau reque, elulayaiñmu chem no rume taiñ huesalcayaeteu llellipufiliyiñ rume.

“Huiñoduamtumuiñ taiñ huesa femqueelchi dungu meu”.

Famülque mu fentren che quimlaingün rume chem am tati culpan ca fente taiñ huesalcaqueteu. Huelu Biblia pengeli tati culpan mu fente cutrancauqueiñ ca feimu laqueiñ. Choyüngelu müten iñchiñ, culpanchengeiñ, feimu müchaique huelulcaqueiñ. Chau Dios ñi perdonachequen mu müten, nierpuafuiñ rumel mongen (Romanos 3:⁠23; 5:⁠12; 6:⁠23). Biblia feipi: “Ahuem Jehová, eymi am cüme piuquengeimi ca pepicaucüleimi tami huiñoduamtual” (Salmo 86:⁠5). Taiñ quimfiel tüfa, rume cüme duamelqueiñmu.

“Montulmuiñ tati Huecüfü meu”.

Fentren che feyentuquelai Huecüfü tañi mülen. Huelu Jesús feipi ñi rüf mülen tati Huecüfü ca ñi ngüneniefiel tüfachi Mapu, feimu duamnieiñ Chau Dios taiñ quelluaeteu (Juan 12:⁠31; 16:⁠11). Huecüfü huesalcachequei, pilai taiñ hueniyeafiel ta Jehová, feimu ayüquei taiñ huelulcayaeteu (1 Pedro 5:⁠8). Huelu Jehová doi nehuen-ngei, feimu incañpequefi tañi pu poyequeteu.

Quimürpuiñ fentren dungu Jesús tañi llellipun mu, huelu fillque dungu mu llellipuafuiñ. Biblia feipi: “Nieiñ maneluhun ta Ngünechen meu, quimnielu am iñchiñ fei ngillatufiliyiñ chem rume taiñ duamtuel quisu ñi piel meu, fei allcüñmayaiñmeu taiñ ngillatuquefiel” (1 Juan 5:⁠14). Feimu “falilai chem tañi rupamequen” pilayaimi, nütramelafimi müten ta Chau Dios (1 Pedro 5:⁠7).

Huelu, ¿chem hora ca cheu llellipuafuiñ? Peafiyiñ cüpalechi troquiñ mu.

FENTREN religion feipi cheu ca chem hora mülei taiñ llellipual. Huelu feiti quimeltun, ¿tripapei mai Biblia mu?

Biblia feipi cümei taiñ llellipual femün mu quiñeque dungu. Quiñe ejemplo, petu ñi yafütunon, Jesús llellipufi ta Chau Dios ñi mañumtuafiel (Lucas 22:⁠17). Ca femngechi trahuluulu tañi pu discipulo, llellipufingün ta Chau Dios. Pu cuifique judio ca femngechi huimtulefuingün ñi llellipuafiel ta Chau Dios. Feimu Chau Dios ayüniefui com che ñi llellipual Jerusalén tañi templo mu (Marcos 11:⁠17).

Trahuluulu pu poyequefilu ta Chau Dios ca llellipufilu, Chau Dios allcütueyu. Quiñe che rüf piuque mu llellipule cümeque dungu müten, Chau Dios allcütuayu. Quiñeque mu quiñe llellipun ñi duam mu Chau Dios femquei quiñeque dungu raquiduamquenolu (Hebreos 13:⁠18, 19). Feimu iñchiñ pu Dunguquelu Inei Ngen Jehová ngen, llellipuqueiñ fill trahun mu. Mangelcünuhuayiñ tami amual taiñ trahun, ayühunquechi llohuaiñ.

Biblia feipiquelai cheu ca chem hora mülei taiñ llellipual. Biblia mu caquerumei cheu ca chumül ñi llellipun pu poyequefilu ta Jehová cuifi. Jesús feipi: “Eimi, ngillatualmi, con-nge tami catrüntucu ruca meu, racümnge tami hulngiñ, fei quisu ngillatunge tami huenu mapu mülechi Chau meu. Fei tami Chau tami pequenoel, ellcan meu pequelu tami chumün, eluaimeu tami duamtuel femngechi ta com che ñi quimal” (Mateo 6:⁠6).

Chau Ngünechen mangelcünuqueiñmu taiñ llellipuafiel chem hora rume. Ca feipicünui quisu allcütuaiñmu cheu rume müleliyiñ. Müna cümei tañi mangelün ta Chau Dios. Quisuleliyiñ rume, Chau Dios allcütuaiñmu. Feimu Jesús huichutripaquei ñi llellipual. Quiñechi, Jesús llellipui com pun ñi cüme dullial quiñe falin dungu (Lucas 6:⁠12, 13).

Biblia ca feipi caquelu pu che llellipuingün ñi dullial falinque dungu. Ca llellipuingün ñi rupan huesaque dungu mu. Quiñeque allcüñmangei tañi llellipun, caquelu ñücüfcülen llellipuqueingün. Quiñeque llellipuingün fentren che mülelu, caquelu quisulen llellipuingün. Jehová feipiqueiñmeu: “Rumel ngillatulequeaimün” (1 Tesalonicenses 5:⁠17). Jehová eluucülei taiñ allcütuaeteu fentren rupa rume llellipufiliyiñ. Tüfa pengeleiñmu Jehová rume ayüucülefui taiñ llellipuafiel.

Quiñeque che falintuquelafi ti llellipun, feimu ramtuhuafuimi chi: “¿Rüf quelluafeneu chi llellipun?”.

BIBLIA pengeli llellipun quelluqueiñmu (Lucas 22:⁠40; Santiago 5:⁠13). Feita quelluafeiñmu ñi fülconal Chau Dios meu ca taiñ cüme duamcüleal. ¿Chumngechi am?

Quiñe ejemplo peafuiñ. Elungeliyiñ quiñe regalo, mülei taiñ mañumal ca mañumeyu pial. ¿Chumngelu am falin-ngei feipial? Feipiliyiñ mañumeyu, doi mañumcüleafuiñ. Ca femngechi rupaquei llellipufiel mu ta Chau Dios. Peafiyiñ quiñeque ejemplo.

Llellipun taiñ mañumal. Mañumfiliyiñ ta Chau Dios cümeque dungu taiñ elueteu, loncontucunieaiñ cümeque raquiduam müten. Femngechi femliyiñ, doi mañumchefengeaiñ, doi ayüucüleaiñ ca cümeque raquiduam nieaiñ (Filipenses 4:⁠6).

Quiñe ejemplo: Jesús mañumfi tañi Chau tañi allcütueteu ca huiñoldungueteu (Juan 11:⁠41).

Llellipun taiñ perdonangeal. Chau Dios perdonaen pifiliyiñ, doi cüme peafuiñ chem tañi cümelcalen ca chem tañi cümelcalenon. Ngüneduamafuiñ taiñ culpan ca quelluafeiñmu taiñ doi arrepentiucüleal. Ca femngechi tüfachi llellipun quelluafeiñmu taiñ fente hueñancümequenoal taiñ culpan mu.

Quiñe ejemplo: David llellipufi ta Jehová fente ñi huesa duameleteu tañi culpan (Salmo 51).

Llellipun adcünungeal taiñ mongen ca quim chengeal. “Eluen quimün ca adcünuen” pifiliyiñ ta Jehová, doi ñom chengeafuiñ. Cafei quimtucunieafuiñ taiñ duamnieel Jehová ñi quellu, fei maneluucüleafuiñ quisu mu (Proverbios 3:⁠5, 6).

Quiñe ejemplo: Salomón llellipufi ta Chau Dios ñi adcünuaeteu ca ñi eluaeteu quimün, femngechi ñi cüme ngünenieafiel pu israelche (1 Reyes 3:⁠5-12).

Llellipun rupaliyiñ hueñancün dungu mu. Ñi ruparupangen huesaque dungu, fill raquiduam nieafuiñ. Femngechi dungu rupaliyiñ, cümeafui taiñ llellipuafiel ta Chau Ngünechen. Feipiafiyiñ com chem mülen taiñ piuque mu, femngechi tüngduamai taiñ piuque. Feimu maneluhuafuiñ Jehová meu, iñchiñ meu maneluulayaiñ (Salmo 62:⁠8).

Quiñe ejemplo: Asá pingechi rey llellipufi ta Jehová tañi cuñiutucuaeteu quiñe llicafalngechi caiñe mu (2 Crónicas 14:⁠11).

Llellipual ñi cümelcaleal pu duamnielu quellu. Tüfachi llellipun quelluqueiñmu taiñ raquiduamnieal taiñ cümelcaleal müten no, doi mai taiñ raquiduamal caquelu che ñi cüme feleal. Tüfa quelluqueiñmu taiñ cutranpiuqueyecheal ca duamtucheal.

Quiñe ejemplo: Jesús llellipui ñi cümelcaleal tañi pu inanieteu (Juan 17:⁠9-17).

Llellipun taiñ püramyenieal ta Jehová. Püramyeafiyiñ ta Jehová com tañi deumael ca ñi poyen Chau Dios ngen taiñ llellipun mu, femngechi doi yamnieafiyiñ ca doi poyenieafiyiñ. Cafei tüfachi llellipun quelluqueiñmu doi fülconcüleal Chau Dios meu.

Quiñe ejemplo: David ñi llellipun püramyefi ta Jehová com tañi deumael (Salmo 8).

Tati llellipun ca cümelcan eluqueiñmu. Ngünechen eluaiñmu “quisu tañi cüme tüngün, fei tüfachi fütra cüme tüngün ta doi cümei che ta pepil-layafui ñi nieal ta cüme tüngün” (Filipenses 4:⁠7). Rume cüdaungei ñi peal tüngün fachantü. Huelu pefilmi, cümelcayaimu (Proverbios 14:⁠30). Huelu, ¿iñchiñ taiñ cüdautun mu cüpai tüfachi tüngün? Cam, ¿duamnieiñ caquelu falinque dungu?

FENTREN che ramtuuquei: “Chau Dios, ¿allcütuquepeiñmu mai taiñ llellipun?”. ¡Femquei llemai! Huelu Biblia ca pengeli Chau Dios allcütuquelai com chi llellipun. Taiñ allcütuaeteu, mülei taiñ femal quiñeque dungu.

Jesús feipi pu lideres religiosos quisu ñi antü mu cüme piuquefaluuquefuingün. Llellipuqueingün pu che ñi peaeteu müten. Jesús feipi: “Quisu engün deu llohuingün tañi cullitu”. Feitachi pu lideres religiosos afmatuqueyu tati pu che, huelu Chau Dios allcütuquelai tañi llellipun (Mateo 6:⁠5). Ca femngechi famülque mu, fentren che quisutu duamuuquei müten. Llellipuqueingün tañi duamnieel müten, Chau Dios tañi dungu duamquelafingün. Tati pu che femnole Chau Dios tañi feipin, allcütuñmangelayai engün tañi llellipun.

¿Famülque mu cai? Chuchi tuhun-ngeafuiñ rume, Chau Dios allcütuquei taiñ llellipun. Biblia feipi: ‘Ngünechen dullitunielai quiñeque che müten ti pu caquelu meu. Chuchi tuhunchengeafui rume, llouquefi com tati feyentunieteu tati eluucülelu ñi femal cüme dungu’ (Hechos 10:⁠34, 35). Feimu yamniefilmi ta Chau Dios, hueñancül-layafimi. Tami femal cümeque dungu, femaimi Chau Dios tañi ayüqueel, femlayaimi tami ayüqueel müten cam caquelu che. Biblia pengeli chumngechi tami llellipual tami allcütuaeteu Chau Dios.⁠a

Fentren che ayüquei Chau Dios huiñoldunguaeteu tañi llellipun quiñe afmatun dungu mu. Huelu cuifi mu, Chau Dios quiñeque rupa müten femquei afmatun dungu. Biblia feipi Chau Dios femlu quiñe afmatun dungu rupaquei fentren tripantu ñi femnon. Biblia ca feipi ti afmatun dungu afi lalu tati pu apostoles (1 Corintios 13:⁠8-10). Femfulu rume, Chau Dios huiñoldunguquei taiñ llellipun famülque mu. ¿Chumngechi femquei?

Chau Dios eluqueiñmu quimün. Rüf quimün Chau Dios mu cüpai. Chau Dios ayühunquechi eluquefi tañi quimün tati pu duamnielu (Santiago 1:⁠5).

Dios eluqueiñmu tañi nehuen. Inei no rume doi nehuen-ngelai Chau Dios mu. Rupaliyiñ huesaque dungu mu, Ngünechen ñi nehuen quelluaiñmu ñi nehuencüleal. Huesa duamcüleliyiñ, quelluafeiñmu taiñ tüngcüleal. Ca femngechi Chau Dios tañi nehuen quelluafeiñmu taiñ cüme chengeal (Gálatas 5:⁠22, 23, TNM). Jesús feipi taiñ Chau Dios eluaiñmu tañi nehuen duamliyiñ (Lucas 11:⁠13).

Chau Dios quelluquefi pu ayülu ñi quimaeteu. (Hechos 17:⁠26, 27). Com püle, pu che quintuyahulquei ti rüfngechi dungu. Cüpa quimingün inei pingen ta Chau Dios, cafei chumngechi ayüquei Chau Dios ñi feleal pu che ca Mapu. Cüpa quimfuingün ñi chumngechi fülconal ta Chau Dios mu (Santiago 4:⁠8). Pu Dunguquelu Inei Ngen Jehová ayühunquechi quimeltuquefingün tüfachi pu che ñi feipin ta Biblia.

¿Eimi cai? ¿Ayüafuimi tami quimafiel ta Chau Dios? Tüfachi revista mu peno Chau Dios huiñoldungunieimu tami llellipun.