¿Chumafuimi tami cüme adcünual tami antü?

1: Cüme adcünunge tami tiempo.

Hune femaimi tami doi falin dungu. Biblia feipi: “Tamün doyümnieafiel ti doi falinque dungu” (Filipenses 1:⁠10, TNM). Tati Biblia ngülamtuqueiñmu taiñ cüme ngüneduamnieafiel chem am tati doi falin-ngelu. Huirintucuafuimi chem tami femafel, dulliafuimi tati doi falin-ngelu ca dulliafuimi chem tami pürüm femal. Huelu loncontucunge mülei quiñeque dungu falin-ngelu tami femal, huelu duamfalngelai tami pürüm femal. Cafei mülei quiñeque dungu duamfalngelu tami matu femal, huelu müte falilai.⁠a

Quim chengeaimi. Eclesiastés 10:10 feipi: “Yungümngehuenole ti toqui ca inei no rume yungümnofile, fentren nehuen mülei ñi femal tañi püneafiel. Huelu tati quimün quelluquei ñi cüme tripayal ti dungu”. Petu taiñ pünenofiel ti toqui mülei taiñ yungümafiel ca femngechi mülei taiñ cüme adcünual taiñ tiempo taiñ chumal. Femlayaimi quiñeque dungu doi falinolu, tüfa cansalafeiñmu müten. Fentecünulmi quiñe cüdau eluunge tami femal ca quiñe cüdau. Quim chengelmi feichi huentru yungümfilu tañi toqui reque, cüme tripayai tami cüdau.

Elcünunge tati doi falinolu. Femlayaimi tati dungu doi falinolu ca cansalqueimu müten. Fentren duam nielmi ayüucülelayaimi ca fill raquiduamcüleaimi.

2: Femlayaimi chem tami müntuñmayaeteu tiempo.

Nielmi quiñe cüdau “ca antü feman” pilayaimi ca epu rume raquiduamnielayaimi. “Tati ngüneduamquefilu ti cürüf nganlayai, ca tati adquintuquefilu ti tromü cosechalayai” (Eclesiastés 11:4) Quiñe nganquefe üngümle ñi cüme antüngeal tañi nganal, rupaantülei müten tañi femal. Tüfa müntuñmayaeyu tañi tiempo müten, nganquelai ca cosechaquelai rume. Ca femngechi fill raquiduamcüleliyiñ, rupaantüleai müten. “Ca antü feman” feipiqueafuiñ cam rume raquiduamtucuafuiñ quiñe dungu, fei tañi dullial chem chumal. Rüfcünu, quiñeque dungu taiñ dullial rume fali taiñ hune raquiduamtucual. Proverbios 14:15 feipi: “Ti adümuhun-ngelu cüme raquiduamquei tañi chem chumal”. Rüfcünu mai, quiñeque mu quimlayafuiñ chumngechi tripayai ti dungu (Eclesiastés 11:⁠6).

Quiñeque mu, cüme tripalayafui chi dungu chumngechi tami raquiduamqueel. Biblia feipi tati che lloulu Ngünechen tañi quimün, lif piuquengei (Santiago 3:17, TNM). Ayülmi tami cüme femal, saquifalngeimi. Huelu üngümnieliyiñ ñi cüme tripayal com tati dungu chumngechi taiñ raquiduamqueel, hueñancüleafuiñ. Raquiduamnge tüfa: quiñe che petu quimle quiñe hue quehun, huelulcahuafui. Huelu tati che üngümnielu com ñi cüme tripayal chumngechi tañi raquiduamqueel, llicayafui tañi huelulcahual. Feimu amulayai ñi quimün quehun dungu mu. Chumngechi feipi Proverbios 11:2: Tati “pu ñom chengelu niequeingün quimün”. Tati ñom chengelu cüme quimnieingün tañi huelulcahuafel ca ayentuingün cütu tañi huelulcan mu.

3: Cüme adcünunge tami tiempo ca rume quintuyahulquelayaimi tami cüpa nierpun.

Adcünunge tiempo tami cüdahual ca tami ürcütual. Biblia feipi: “Doi cümei pichi ürcütual ta rume cüdahual meu. Tüfa quiñe che reque inantucuyauquelu ti cürüf” (Eclesiastés 4:⁠6). Tati rume cüdauquelu re cüdauquei müten, fei hula niehuelai tiempo ñi ayüumayaeteu ñi cüdau. Ca tati chofüngelu re ürcütuquei müten, feimu ngünamcaquei tañi nieelchi tiempo. Huelu tati Biblia ngülamtueiñmu taiñ elcünual tiempo taiñ cüdahual ca elcünual tiempo taiñ ürcütual, femngechi rüf ayüucüleaiñ. Tüfa quiñe regalo reque cüpalu Chau Ngünechen mu (Eclesiastés 5:19).

Elcünunge tiempo tami umautual. Quiñe salmista feipi: “Cuduan ca tüngün meu umautuan” (Salmo 4:⁠8). Epe com pu trem duamniei pura hora ñi umautual, fei tañi cüme feleal, ñi cüme duamcüleal ca ñi tremoleal. Müna cümei taiñ umautual. Tüfa cümelcaqueiñmu taiñ lonco, fei taiñ acordayal com ca doi eluucüleaiñ taiñ quimal hueque dungu. Cüme umautunoliyiñ, doi huelulcahuafuiñ, fei ruparumeafui quiñe accidente ca doi illcufemafuiñ.

Rume quintuyahul-layaimi tami nienorpuafel. Biblia feipi: “Doi cümei taiñ ayüucüleal taiñ nieel meu müten, quintuyahulmequelayaiñ taiñ cüpa nierpun” (Eclesiastés 6:⁠9). Tati quim chengelu quim ngünenieuquei, eluucülelai tañi ngünenieaeteu tañi ayüqueel. Quimniei ñi mülen quiñeque dungu tañi nierpunoafel. Cafei rüf duamnienole, conlayafui defen dungu ca eluucülelai tañi ngünencayaeteu ti publicidad. Doi mai ‘ayüucülei tañi nieel meu müten’.

4: Inanienge ti cüme quimün.

Cüme ngüneduamnge chem quimün tami inaquefiel. Feichi quimün tami inaquefiel quelluafeimu tami quimal chem dungu tami doi falintuquefiel. Cafei quelluaimu taiñ doyümafiel tati doi falinque dungu ca ngünamcanoal taiñ tiempo. ¿Cheu peafuiñ feichi cüme quimün? Fentren che pefingün feichi cüme quimün Biblia mu, “fei mu mülei Chau Ngünechen cüpachi quimün” piqueingün (Proverbios 2:⁠6, 7).

Com dungu femaimi piuqueyechen mu. Colosenses 3:14 feipi: tati piuqueyechen “fei tüfa ta rume cüme dungu femngechi tamün quiñeucüleal”. Ngenole ta piuqueyechen, cüme duamcülelayafuiñ ca ayüucülelayafuiñ rume. Doyelchi mai pu familiahuen-ngelu. Huelu tati doyümquefilu ti cüdau ca ti plata ayüucülelayafuingün, feimu llemai Biblia ngülamtuqueiñmu fentren rupa taiñ piuqueyecheal, tüfa ta doi falin dungu taiñ femafel (1 Corintios 13:1-3; 1 Juan 4:8).

Adcünunge tiempo tami doi cüme hueniyeafiel ta Chau Dios. Quiñe huentru Geoff pingelu, niefui quiñe cüme domo, epu pichiqueche, cümeque hueni ca quiñe cüme cüdau pital mu. Huelu tañi cüdau mu pequefui ñi cutrancauquen ca ñi laquen fentren che. Fei ramtuuquefui: “¿femngechi müten felei ta mongen?”. Quiñe antü papeltui quiñe publicacion ñi entuel Jehová tañi troquiñche, tüfa cüme huiñoldungueyu tañi ramtuuquefel.

Feimu feipifi tañi pu che ca tañi pu hueni tañi quimürpuel, fei com tañi pu che eluhui tañi chillcatual ta Biblia. Femngechi quimürpuingün chumngechi ñi ngünamcanoal tañi tiempo. Cafei maneluhurpuingün ñi cutrancahuenoal che ca ñi rumel mongeleal cüpalechi antü mu (Apocalipsis 21:3, 4).

Geoff tañi rupan raquiduamelqueiñmu ñi feipin ta Jesús: “Ayühun niei tati duamnielu ñi llohual Ngünechen ñi cüme dungu” (Mateo 5:⁠3). ¿Eimi cai? ¿Elcünuafuimi tiempo tami doi cüme hueniyeafiel Chau Dios? Femülmi doi ayüucüleaimi. Ngelai chem dungu rume tami fente ayühulaeteu.