4. Com nehuen mu amuldunguquefiyiñ tati pu che

VIDEO: Amuldungukeiñ “tuntepu ñi mülen ta Mapu” (7:33)

• Pu Dunguquelu Ineingen Jehová tañi amuldunguchequen meu, ¿chem dungu doi afmatuleimu?

Papeltuaiñ Mateo 22:39 ca Romanos 10:13-15, fei ngüneduamaiñ tüfachi epu ramtun:

• Taiñ amuldunguchequen mu, ¿chumngelu (chemu) pengeli taiñ piuqueyefiel taiñ chafche?

• Jehová, ¿chumngechi troquiquefi tati pu che amuldunguchequelu? (Pefinge Romanos 10:15).

4. Elcünunge huesaque huimtun

Pütremtuquelmi cam drogatuquelmi, quimtucuniequepelaimi chi ñi fente cüdaungen quiñepülecünuafiel tüfachi huesaque huimtun. Fei ¿chem quelluafeimu? Cümeafui tami raquiduamal chumngechi huesalcayafeimu tami femmequen. Papeltuaiñ Mateo 22:37-39, ca ngüneduamaiñ tüfachi epu ramtun.

• Drogatual ca pütremtual, ¿chumngechi huesalcayafui tami hueniyefiel Jehová?

• Drogatual ca pütremtual, ¿chumngechi huesalcayafui tami familia cam caquelu pu che?

Raquiduamnge chem dungu quelluafeimu tami elcünual quiñe huesa huimtun.b Peaiñ ti VIDEO.

VIDEO: Eluhuaiñ taiñ quim ngüneniehual (2:47)

Papeltuaiñ Filipenses 4:13, ca ngüneduamaiñ tüfachi ramtun:

• Quiñe che ngillatule, chillcatule Biblia ca amule ta trahun meu, ¿quellupeafeyu tüfa ñi elcünual quiñe huesa huimtun? ¿Chumngelu cai?

5. Chaftufinge huesaque raquiduam ca huimtun

Papeltuaiñ Colosenses 3:5, ca ngüneduamaiñ tüfachi epu ramtun:

• Conal pornografia meu, huercüal mensaje, video cam foto ñi illutuafiel ta caquelu che cam quisutu malühual tañi yehuel, ¿chumngelu feipiafuiñ ñi ünufalngen tüfachi puque dungu Jehová tañi adquiñ meu?

• ¿Lif chengepeafuiñ mai chumngechi ayüquei Jehová? ¿Chumngelu am?

Quimürpunge chumngechi chaftuafuimi podngechi raquiduam. Peaiñ ti VIDEO.

VIDEO: Eluunge tami lif chengeal (1:51)

Jesús quimeltueiñmu chem chumafuiñ taiñ connoal huesaque dungu meu. Papeltuaiñ Mateo 5:29, 30, ca ngüneduamaiñ tüfachi ramtun:

• Jesús feipilai taiñ allfülcayal taiñ cuerpo, huelu mai ngülamtuqueiñmu taiñ femal fillque dungu taiñ connoal huesaque dungu mu. Fei ¿chem chumafuiñ taiñ famentuafiel podngechi raquiduam?c

Chaftumequelmi huesaque raquiduam, ngoimaquilnge Jehová rume falintuquei tami nehuentumequen. Papeltuaiñ Salmo 103:13, 14, ca ngüneduamaiñ tüfachi ramtun:

• Chaftumequelmi quiñe huesa huimtun, ¿quellupeafeimu mai tüfachi troquiñ Biblia? ¿Chumngechi am?

Huelulcahulmi rume, hueutripayafuimi

Huiño contulmi tami huesa huimtun meu, feipiafuimi chi: “Müna huesa, ngünam nehuentumequen. Doi cümeafui fentecünual tañi nehuentumequen”. Huelu raquiduamnge tüfachi dungu meu: quiñe huentru lefmequelu quiñe carrera meu tranürpui, fei ¿hueunoalu troquihuafui? Femlai, huitrapürayafui ca amuleafui müten tañi lefcülen meu. Ca femngechi eimi huiño contulmi tami huesa huimtun meu, ‘hueunoalu’ feipilayaimi, doi mai amuleaimi müten tami fentecünuafiel tami huesa huimtun. Ngoimaquilnge: Jehová tañi quellun meu elcünuafuimi chem huesa huimtun rume.