QUIMELTUN 49
¿Chumafuimi ñi ayüucüleal tami familia? (Troquiñ 1)
Pu hue curengelu rume ayüucüleingün, fei ayünieingün com tañi mongen ñi ca femngechi ayüucüleal. Huelu, ¿feleafui ta tüfa? ¡Felei llemai! Fentren cristiano inaniequefilu Biblia ñi ngülam ayüucüleingün tañi curehuen-ngen mu.
1. Biblia, ¿chem ngülam hulquei pu huentru curengelu?
Jehová elfalcünufi ti füta loncoleal tañi pu che meu (papeltuaimi Efesios 5:23). Jehová ayüquei pu füta ñi cümelcayafiel tañi pu che ñi dulliel meu. Biblia feipi: “Pu füta piuqueyenieafimün tamün domo” (Efesios 5:25). Fei, ¿chumquei ti füta piuqueyeniefilu tañi domo? Duamtuniefi ca pengelelfi tañi piuqueyeniefiel quisulen mu engu ca mülen mu engu caquelu che meu. Cafei ti füta incañpeniefi tañi domo ca eluquefi com tañi duamnieel ñi mongeleam (1 Timoteo 5:8). Huelu fei müten no, cafei quelluquefi ñi cüme duamcüleal ca ñi ayüucüleal. Huelu doyelchi mai, ti füta quelluquefi tañi domo ñi cüme hueniyeafiel ta Jehová (Mateo 4:4). Feimu quiñentrür llellipuafuingu ca papeltuafuingu Biblia. Com tüfa femle ti füta, cüme amuleai ñi hueniyefiel ta Jehová (papeltuaimi 1 Pedro 3:7).
2. ¿Chem ngülam hulquei Biblia pu fütangechi domo mu?
Biblia feipi: “Ti domo, com piuque mu mülei ñi yamnieafiel tañi füta” (Efesios 5:33). ¿Chem quelluafeyu ñi yamnieafiel tañi füta? Raquiduamafui tañi füta ñi cüme femqueel mu ca fente ñi cüdauquen ñi duamtuafiel tañi pu che. Cafei piuqueyen mu mülei ñi dunguafiel tañi füta ca cüme dungual quisu meu. Fei, ¿ca chem chumafui? Eluucüleai ñi yamnieafiel tañi huentru ñi dulliel.
3. Pu curehuen, ¿chumngechi doi quiñeucüleafuingün?
Biblia feipi epu che niehualu “trür quiñe chengetuaingu” (Mateo 19:5). Feimu cuñiutucuuqueingu ñi fentecünunoal tañi quiñeucülen engu. Fei, ¿chumquei pu curehuen cüme quiñeucülelu? Elantücünuqueingün ñi cüme rupayal ca piuqueyen mu dunguqueingün ñi chumngechi duamcülen. Cafei eluucüleingün ñi doyümnieafiel tañi afcadi caquelu che meu. Feimu hueniyequelafingün caquelu che chumngechi ñi hueniyefiel tañi afcadi.
DOI QUIMAIMI
Peaiñ quiñeque ngülam quellualu pu curehuen ñi doi quiñeucüleal.
4. Ti füta mülei ñi piuqueyeafiel ca duamtuafiel tañi domo
Biblia feipi: “Pu füta mülei ñi piuqueyeafiel tañi domo chumngechi quisu piuqueyeuquei” (Efesios 5:28, 29). Fei, ¿chumafui pu füta ñi inayafiel tüfachi ngülam? Peaiñ ti VIDEO, ca ngüneduamaiñ tüfachi ramtun.
¿Chumngechi ti füta pengelelafui tañi domo ñi piuqueyeniefiel ca yamniefiel?
Papeltuaiñ Colosenses 3:12, ca ngüneduamaiñ tüfachi ramtun:
Ti füta, ¿chumngechi inayafui ñi feipin tüfachi troquiñ Biblia?
5. Pu domo yamniefimün ca piuqueyeniefimün tamün füta
Biblia feipi ti domo mülei ñi yamnieafiel tañi füta. Huelu tañi füta poyenofile ta Jehová, ¿ca yamnieafi? Ca mülei ñi femal. Papeltuaiñ 1 Pedro 3:1, 2, ca ngüneduamaiñ tüfachi ramtun:
Tami füta poyenofile ta Jehová, eimi ayüpelafuimi ñi poyeafiel ta Jehová. Fei, ¿chem dungu doi cümeafui tami femal? ¿Re amuldungulelafiel cam tami cüme femün mu quelluafiel ñi poyerpuafiel ta Jehová? ¿Chumngelu (chemu) femngechi raquiduamqueimi?
Ti füta ca ti domo quiñentrür cüme dulliafuingu chem tañi chumal. Huelu quiñeque mu ti domo, tañi füta reque raquiduamlayafui. Fei cümeafui ti domo yamün meu feipiafiel tañi füta ñi chem raquiduamcülen. Huelu ti domo ngelai ñi ngoimayal Jehová elfalcünufi ti füta ñi cüme dullial chem tañi chumal ñi familia, femngechi tañi ayüucüleal engün. Feimu tati domo quelluntucule chem ñi dulliel ti huentru, tañi familia ayüucüleai. Papeltuaiñ 1 Pedro 3:3-5, ca ngüneduamaiñ tüfachi ramtun:
Ti domo yamniefile tañi füta, ¿chumngechi duamcüleai Jehová?
6. Pu curehuen hueutripayafuingün mülen mu huesaque dungu
Com pu curehuen huelulcauqueingün, feimu quiñehun duamfali ñi yafüluhual. Peaiñ ti VIDEO, ca ngüneduamaiñ tüfachi epu ramtun.
¿Chumngechi ti curehuen ñochiquechi quiñeucülehuelafuingu?
¿Chumingu tañi huiño quiñeucületual?
Papeltuaiñ 1 Corintios 10:24 ca Colosenses 3:13, fei ngüneduamaiñ tüfachi ramtun:
Pu curehuen inaniefile ñi feipin tüfachi troquiñ Biblia, ¿chumngechi quelluafeyu ñi doi quiñeucüleal?
Biblia feipi com iñchiñ mülei taiñ hueluconque yamuhual. Femngechi femliyiñ, piuqueyechefengeaiñ. Papeltuaiñ Romanos 12:10, ca ngüneduamaiñ tüfachi ramtun:
Ti domo cam ti huentru feipile: “Hunelu meu tañi afcadi pengelpe tañi yamnieteu”, ¿cümepeafui mai femngechi raquiduam? ¿Chumngelu femngechi feipiafuimi?
QUIÑEQUE CHE FEIPIAFEIMU: “Tañi afcadi iñchiu müte quiñeucülehuelayu cuifi meu reque”.
Quiñe che feipielmu tüfachi dungu, ¿chumngechi quelluafuimi Biblia tañi ngülam meu?
TAMI QUIMEL
Ti curehuen yamuule, piuqueyeule ca inaniele Biblia ñi feipin, rume ayüucüleaingu.
¿Chem piafuimi?
Tati füta, ¿chem chumafui tañi doi ayüucüleal tañi domo engu?
Ti domo, ¿chem chumafui tañi doi ayüucüleal tañi füta engu?
Eimi curengelmi cam fütangelmi, ¿chem ngülam Biblia meu quelluafeimu tami doi quiñeucüleal tami afcadi engu?
CA PEAFUIMI
Quimürpunge falinque ngülam tami quelluaeteu ñi ayüucüleal tami familia meu.
Pefinge quiñe video musica nielu, pengelquelu quiñe curehuen rume ayüucülelu tañi inaniefiel mu Chau Dios tañi ngülam.
Ngüneduamnge chumngechi ti domo pengelafui ñi yamniefiel chi cüdau Jehová ñi elfalcünulelfiel tañi füta.
“Pu domo, ¿chumngelu mülei ñi yamnieafiel tañi füta ñi loncolen?” (Ti Huerquen 15 mayo, 2010)
Quiñe curehuen hudaulu, ¿chumngechi cümelcautuingu?