-
Tati Biblia, ¿chem feipi tati cudumuhun dungu meu?¡Rumel ayüucüleaimi! Quimfinge chem pilen Biblia
-
-
QUIMELTUN 41
Tati Biblia, ¿chem feipi cudumuhun dungu meu?
Fentren che yehuentucuuquei nütramcayal cudumuhun dungu meu, huelu tati Biblia yamquechi nütramcaquei tüfachi dungu meu, ca tañi feipin cümelcaqueiñmu. Chau Jehová eli tati Biblia ca ayüquei taiñ cüme mongen nieal, feimu quisu pengelqueiñmu chumngechi ayühulafiel taiñ femün meu, femngechi taiñ ayüucüleal rumel mu.
1. ¿Chem raquiduamquei Jehová cudumuhun dungu meu?
Jehová eli quiñe huentru ca quiñe domo ñi niehual engu, femngechi quisu engu müten ñi cudumuhual. Femngechi pu curehuen-ngelu nierpuafuingün pichiqueche, huelu cafei pengeluhuafuingün fente tañi piuqueyeuquen. Feimu Biblia feipi: “Ayühun nieaimi tami domo meu ñi niefiel tami huechengen mu” (Proverbios 5:18, 19). Jehová ayüquei pu curehuen-ngelu ñi nor piuqueyehual engu, feimu ngelai ñi ñihualuhual (papeltuaimi Hebreos 13:4).
2. ¿Chem coneltulei pod cudumuhun dungu meu?
Biblia feipi: “Pu femquelu pod cudumuhun, [...] conlayaingün Chau Ngünechen ngünenietule ta mapu” (1 Corintios 6:9, 10). Biblia meu ñi nütramcangeal pod cudumuhun dungu meu, griego quehun meu huirintucungei pornéia. Fei ¿chem dungu coneltulei tati pornéia meu? 1) Cudumuule epu che curehuen-ngenolu.a 2) Cudumuule chaf huentru engu cam chaf domo engu. Tüfa ca feipingequei homosexualidad. 3) Cudumafiel ti culliñ. Coneltulenoliyiñ com tüfachi huesaque dungu mu, ayühulafiyiñ Jehová ca cümelcaleaiñ iñchiñ (1 Tesalonicenses 4:3).
DOI QUIMAIMI
Ngüneduamaimi quiñeque dungu tami connoal pod cudumuhun dungu meu, ca chumngechi cümelcayaimu tami lif chengeal.
3. Famentufinge pod cudumuhun dungu
Quiñe huentru, José pingelu, nor piuqueyefui ta Jehová ca eluhui ñi famentuafiel pod cudumuhun dungu. Papeltuaimi Génesis 39:1-12, ca ngüneduamaiñ tüfachi epu ramtun:
¿Chumngelu (chemu) lefmahui José? (Pefinge Génesis 39:9).
¿Cümepei mai José tañi femün? ¿Chumngelu cai?
Pu huechequeche, ¿chumngechi inayentuafui ta José ca quiñepülecünuafuingün pod cudumuhun dungu? Peaiñ ti VIDEO.
Jehová ayüquei taiñ famentuafiel pod cudumuhun dungu. Papeltuaiñ 1 Corintios 6:18, ca ngüneduamaiñ tüfachi epu ramtun:
Quiñe che, ¿chem yeafeyu ñi conal pod cudumuhun dungu meu?
¿Chumafuimi tami famentuafiel pod cudumuhun dungu?
4. ¿Chem quelluafeimu tami connoal huesaque dungu meu?
Quiñeque mu, ¿chumngelu cüdaungeafui famentuafiel pod cudumuhun dungu? Peaiñ ti VIDEO, ca ngüneduamaiñ tüfachi ramtun.
Taiñ peñi ngüneduami tañi femmequen ca raquiduamcülen meu yeafeyu tañi ñihuampeafiel tañi domo, fei ¿chem eluhui tañi femal?
Cüme hueniyefile rume ta Jehová, quiñeque mu pu cristiano ca cüdautuafuingün tañi famentuafiel huesaque raquiduam. ¿Chem dungu femafuimi tami raquiduamtucunienoal chem huesa dungu no rume? Papeltuaiñ Filipenses 4:8, ca ngüneduamaiñ tüfachi epu ramtun:
¿Chem dungu mülei taiñ raquiduamnieafiel?
Papeltufiliyiñ Biblia ca eluucüleliyiñ taiñ doi cüdahuelafiel ta Jehová, ¿quellupeafeiñmu mai taiñ connoal huesaque dungu meu? ¿Chem piafuimi?
5. Jehová tañi feipin cümelcaqueiñmu
Jehová quimniei chem dungu doi cümelcayafeiñmu, feimu feipiqueiñmu chumngechi lif chengeafuiñ ca quimeltuqueiñmu chumngechi cümelcayafeiñmu inayal tañi ngülam. Papeltuafuiñ Proverbios 7:7-27 cam peafuiñ ti VIDEO, fei ngüneduamaiñ tüfachi cüla ramtun.
Ti hueche, ¿chem dungu yeeyu ñi conal huesa dungu meu? (Pefinge Proverbios 7:8, 9).
Proverbios 7:23, 26 quimeltuquei taiñ rupayal huesaque dungu meu conliyiñ pod cudumuhun dungu mu, fei ¿chem huesaque dungu mu rupalayaiñ connoliyiñ tüfachi huesa dungu meu?
Connoliyiñ pod cudumuhun dungu meu, ¿chumngechi quelluafeiñmu taiñ rumel mongen nieal?
Biblia catrütuquefi ñi homosexualngen ta che, feimu fentren che feipiquei Biblia tañi feipin piuqueyechefengelai. Huelu Jehová rüf piuqueyechefengei ca ayüquei com pu che ñi ayüucüleal rumel meu. Feimu taiñ rumel mongen nieal, mülei taiñ inanieal quisu tañi feipin. Papeltuaiñ 1 Corintios 6:9-11, ca ngüneduamaiñ tüfachi ramtun:
Jehová tañi adquiñ meu, ¿pu homosexual müten huesa femqueingün?
Taiñ ayühulafiel ta Jehová com iñchiñ duamnieiñ cüme elcünutual quiñeque dungu taiñ mongen meu, fei femliyiñ ¿rüf cümelcayafeiñmu tüfa? Papeltuaiñ Salmo 19:8, 11, ca ngüneduamaiñ tüfachi ramtun:
¿Cümepei mai Jehová tañi huercün dungu? ¿Chem piafuimi?
Jehová fentren che quellufi tañi cüme elcünutual tañi mongen, feimu ca quelluafeimu ta eimi.
QUIÑEQUE CHE FEIPIAFEIMU: “Epu che piuqueyeule cümecai müten tañi cudumuhual engu”.
¿Chem piafuimi eimi?
TAMI QUIMEL
Jehová eli quiñe huentru ca quiñe domo ñi niehual engu, femngechi quisu engu müten ñi cudumuhual.
¿Chem piafuimi?
¿Chem dungu conquei pod cudumuhun dungu meu? ¿Chem piafuimi?
¿Chem quelluaiñmu taiñ connoal pod cudumuhun dungu meu?
Inafiliyiñ Jehová tañi feipin taiñ lif chengeal, ¿chumngechi cümelcayafeiñmu?
CA PEAFUIMI
Quimürpunge chumngelu Chau Dios ayüquei quiñe huentru ca quiñe domo ñi niehual engu, femngechi ñi trür müleal.
“¿Chem piquei Biblia epu che cureyeungenolu ñi trür müleal?” (Troquiñ internet mu)
Biblia quimeltuquei ñi cümenon homosexualngeal, huelu quimeltuquelai taiñ üdeafiel feichi pu che.
Inayal Biblia ñi feipin cudumuhun dungu meu cuñiutucuqueiñmu. Fau quimürpunge tüfa.
Quiñe huentru cudumuuquefulu ca huentru engu, cüme elcünutui tañi mongen. Quimürpunge tañi rupan ti troquiñ “Yamün meu duamtungen”.
“Ti Biblia cüme elcünutueyu ñi mongen” (Ti Huerquen 1 abril, 2011)
a Epu che curehuen-ngenolu cudumuulu coni pornéia meu. Huelu cafei cüllmafile, malütufile ñi dollüm, ñi cünüfül cam ñi cudañ tañi femngechi femün meu ca coningu pornéia meu. Cafei conquei pornéia meu cudumafiel quiñe che anühue meu.
-
-
¿Chem feipilei tati Biblia tati pu nielu afcadi ca pu nienolu?¡Rumel ayüucüleaimi! Quimfinge chem pilen Biblia
-
-
QUIMELTUN 42
¿Chem feipilei Biblia tati pu nielu afcadi ca pu nienolu?
Quiñeque troquiñ mapu meu pu che raquiduamquei tati pu nielu afcadi müten rüf ayüucüleafuingün. Huelu quiñeque che nielu rume afcadi rüf ayüucülelaingün ca caquelu che fütangenolu cam curengenolu rume, rüf ayüucüleingün. Biblia feipi Chau Dios eli tati curehuen, huelu ca feipi Ngünechen tañi adquiñ meu rume cümei fütangenoal cam curengenoal.
1. Quiñe che nienole afcadi, ¿chumngechi cümelcayafeyeu?
Biblia feipi: “Curengele cam fütangele quiñe che, cümei. Huelu femnole, doi cümelcayai” (papeltuaimi 1 Corintios 7:32, 33, 38). Pu curengenolu ca fütangenolu, ¿chumngelu (chemu) doi cümelcayai? Pu cristiano quisulelu ngelai ñi duamtunieafiel tañi afcadi, nienolu cai engün. Feimu doi tiempo nieafuingün ñi femal fillque dungu, fei quiñeque engün eluucülequei tañi doi cüdahuelafiel ta Jehová ca huiñamtuqueingün ca mapu mu tañi amuldungual. Ca doyelchi mai, doi elantücünuafuingün tañi cüme hueniyeafiel ta Jehová.
2. Epu che nieule ley dungu meu, ¿chumngechi cümelcayafeyeu?
Ca femngechi pu curehuen-ngelu, rume cümelcaleafui. Feimu Biblia feipi: “Epu che doi cümelcalei tati quisulelu mu” (Eclesiastés 4:9). Pu curehuen inaniequefilu Biblia tañi feipin quimnieingün ñi rüfngen tüfachi troquiñ Biblia. Epu che nieulu ley dungu meu feipicünuhuingu tañi piuqueyehual, yamuhual ca dapihual rumel meu. Feimu pu curehuen doi cümelcaleingün feichi pu che trür mülelu müten. Ca femngechi tañi pu pichiqueche doi cüme tremcülerpuqueingün.
3. Jehová, ¿chumngechi ayüquei ñi feleal pu curehuen?
Jehová elcünulu tati hunen curehuen feipi: ‘Feimeu ta huentru elcünuai ñi chau ca ñi ñuque fei tañi trahual ñi domo engu’ (Génesis 2:24). Jehová ayüquei tati curehuen ñi quiñeucüleal ca piuqueyehual tunte puule tañi mongen engu. Fei Jehová tañi adquiñ meu quiñe curehuen hudahuafui ley dungu meu, mülele müten ñihualuhun dungu. Femngechi dungu rupale, tati ñihuampengelu dulliafui hudahual cam femnoal (Mateo 19:9).a Jehová ayüquei tati pu nieulu ñi nieal quiñe afcadi müten (1 Timoteo 3:2).
DOI QUIMAIMI
Nielmi afcadi cam nienolmi rume, quimürpunge chem chumafuimi tami ayüucüleal ca ayühulafiel ta Jehová.
4. Pu nienolu afcadi cümeque dungu femaimün
Jesús feipi ñi rume cümen curengenoal ca fütangenoal (Mateo 19:11, 12). Papeltuaiñ Mateo 4:23, ca ngüneduamaiñ tüfachi ramtun:
Jesús curengelafui, fei ¿chumi ñi doi cüdahuelafiel tañi Chau ca quelluafiel ta caquelu pu che?
Pu cristiano nienolu afcadi ca ayüucüleafuingün tañi mongen meu inayentufile ta Jesús. Peaiñ ti VIDEO, ca ngüneduamaiñ tüfachi ramtun.
Pu nienolu afcadi, ¿chem chumafuingün?
¡Tüfei!
Biblia feipilai tunten tripantu meu fütangerpuafui cam curengerpuafui. Huelu Biblia ngülamtuquei ta che ñi fütangeal cam curengeal cüme ngüneule hula cudumuhun dungu meu, femngechi eluucüleafui tañi cüme dullial (1 Corintios 7:36).
5. Cüme dulliaimi tami afcadi
Rume falin-ngei tami cüme dullial tami afcadi. Papeltuaiñ Mateo 19:4-6, 9, ca ngüneduamaiñ tüfachi ramtun:
Pu cristiano, ¿chumngelu ngelai ñi dullifemal tañi afcadi?
Tati Biblia quelluafeimu tami quimal chumngechi chengeafui tami afcadi. Ca ngoimaquilnge, mülei tañi poyeafiel ta Jehová.b Papeltuaiñ 1 Corintios 7:39 ca 2 Corintios 6:14, fei ngüneduamaiñ tüfachi epu ramtun:
Quiñe cristiano ayüle tañi nieal afcadi, ¿chumngelu dulliai quiñe che trür feyentulelu?
Quiñe cristiano dullifile quiñe afcadi poyequenofilu ta Jehová, ¿chum duamcüleai Chau Jehová?
Quiñentrür trarifilmi caquerume culliñ ñi cüdahual, rume cutrancahuafuingu. Ca femngechi quiñe cristiano nieule quiñe che engu poyequenofilu ta Jehová, cüdaungechi dungu meu rupayai.
6. Inayentuafimi Jehová ñi raquiduamqueel curehuen mu
Israel meu quiñeque huentru ngünam hudaquefui tañi domo. Papeltuaiñ Malaquías 2:13, 14, 16, ca ngüneduamaiñ tüfachi ramtun:
Mülenole ñihualuhun dungu, ¿chumngelu Jehová üdequei ñi hudahual pu curehuen?
Tati ñihualuhun ca tati hudahun ñi duam meu, rume cutrancahuafui tati ñihuañpengelu ca pu pichiqueche.
Peaiñ ti VIDEO, ca ngüneduamaiñ tüfachi ramtun.
Tami afcadi poyenofile ta Jehová, ¿chem chumafuimi ñi ayüucüleal tami curehuen?
7. Inafinge Jehová ñi feipin curehuen meu
Quiñeque che cüdautuafui ñi inanieal Jehová tañi feipin curehuen dungu meu.c Huelu Jehová cümelcaquefi pu eluucülelu ñi inayafiel tañi feipin. Peaiñ ti VIDEO.
Papeltuaiñ Hebreos 13:4, ca ngüneduamaiñ tüfachi ramtun:
Jehová ñi feipin curehuen meu, ¿cümepei mai? ¿Chumngelu femngechi raquiduamqueimi?
Jehová ayüquei ti curehuen nieulu ñi huirintuculeal ley dungu meu, ca hudaule ti curehuen ca huirintucungepe ley dungu meu, femngechi feipiquelu cai tati autoridad fentren troquiñ Mapu meu. Papeltuaiñ Tito 3:1, ca ngüneduamaiñ tüfachi ramtun:
Eimi curengelmi cam fütangelmi, ¿huirintucülepei mai tami curehuen ley dungu meu?
QUIÑEQUE CHE RAMTUAFEIMU: “¿Duamfalngepei mai epu che tañi curehuen-ngeal ley dungu meu? ¿Doi cümelayafui am tañi quiñeucüleal müten?”.
¿Chem piafuimi eimi?
TAMI QUIMEL
Biblia feipi Chau Dios eli tati curehuen, huelu ca feipi Ngünechen tañi adquiñ meu rume cümei fütangenoal cam curengenoal. Fei pu curehuen-ngelu ca pu quisulelu inaniefile Ngünechen tañi feipin, rüf ayüucüleafuingün.
¿Chem piafuimi?
Pu nienolu afcadi, ¿chem cümeque dungu femürpuafuingün?
Quiñe che ayüle ñi nieal afcadi, ¿chumngelu mülei ñi quintual quiñe che quiñeucülelu tañi feyentun meu?
Biblia ñi feipin, ¿chem dungu meu müten yeafeyeu ti curehuen ñi hudahual?
CA PEAFUIMI
¿Chumngelu mülei taiñ quintual quiñe afcadi serfiniefilu ta Jehová müten?
Quimürpunge epu nütram quellualu pu cüpa niehualu ca pu curehuen ñi cüme dullial engün.
Quimürpunge chumngechi fütra cümelcangei quiñe peñi elcünulu fillque dungu ñi poyeafiel ta Jehová.
Petu ñi hudaunon cam püntüunon quiñe curehuen cristianongelu, ¿chem mülei ñi raquiduamal?
“Yamnieafimi ‘Ngünechen tañi trapümel’” (Ti Huerquen diciembre, 2018)
a Tami quimal chumngelu quiñe che püntühuafui tañi afcadi mu mülenole rume ñihualuhun dungu, pefinge ti Doi quimafiel ti dungu 4.
b Quiñeque troquiñ Mapu meu, ti chau ca ti ñuque dulliquei inei engu niehuafui tañi fotüm cam ñahue. Femngechi huimtun mülele tami lof meu, pu chau ca ñuque mülei ñi dullial quiñe che cüme hueniyefilu ta Jehová, tüfa doi falin-ngei tañi nieelchi plata meu cam tañi tuhun meu.
c Quiñeucülelmi quiñe curehuen reque, eimi dulliafuimi niehual ley dungu meu cam fentecünual tamu quiñeucülen.
-