8, 9. 1) Pedro, ¿chem ngüfetueiñmew? 2) Kiñe che, ¿chumngechi weda femafuy ñi lifrelen mu?

⁸ Mañumafiyiñ ta Jewba, welu kafey kuñiwtukuwaiñ ñi femnoal wedake dungu taiñ lifrelen mu. Feymu apostol Pedro ngüfetueiñmu ‘femngechi rakiduamkilmün “lifrelelu kay iñche, chem rume femafun, kümenole rume”’ (papeltunge 1 Pedro 2:16). Tüfa rakiduameleiñmu pu israelche ñi femün wellin mapu mew. Famülke mu doy duamfalngey inayal tüfachi ngülam. Weküfü ka tañi pu che wülkey ayüfalchi takun, adngelluwün ka itrofill taiñ iyal ka pütokoal. Kom püle pengelngekey adngechi che taiñ tukuduamelaetew ñi ngillayal itrofillem taiñ rüf duamnienofiel. Feymu kom tüfa ngünenkayafeiñmu ñi weda femal taiñ lifrelen mu.

11. Chaw Jewba, ¿chumngelu lifrekünueiñmu?

¹¹ Taiñ ngülamtuetew Pedro ñi weda femnoal taiñ lifrelen mu, ka feypi taiñ feleal “Ngünechen tañi poyekeetewchi kona reke”, femngechi küme femaiñ taiñ lifrelen mu. Rakiduamnge, ¿chumngelu Chaw Jewba werküy tañi Fotüm taiñ lifrekünuaetew kulpan ka lan dungu mu? Femngechi taiñ poyeafiel ta Jewba kom taiñ mongen mu.

12. Noe ka tañi pu che, ¿chumngelu inayentufali?

¹² ¿Chumafuiñ ñi küme femal taiñ lifrelen mu? Eluwaiñ taiñ mongen mu ñi poyeafiel ta Jewba. Femngechi doyümlayafiyiñ taiñ illutukeelchi dungu ka küme tripayal tüfachi Mapu mu (Galata 5:16). Inaduamaiñ ñi femün Noe ka tañi pu che. Epe kom tañi pu walloñmaniekefetew kewafengefuy ka femkefuy pekan kudumuwün. Welu Noe ka tañi pu che reyükonlayngün kakelu ñi ayükeel ka ñi femken mu. Doy may eluwingün ñi femal Jewba ñi elfalkünuletewchi küdaw. Dewmayngün ti fütra wampo ruka, echelfingün ñi iyal kidu engün ka pu kulliñ, ka amuldungucheyngün ñi küpayal ti Fütra Mangin Ko. Feymu Biblia feypi: “Noe femürkey kom chumngechi tañi werküetew ta Ngünechen” (Génesis 6:22). Femün mu tüfa, Noe ka tañi pu che montuyngün (Ebrew 11:7).

13. ¿Chem feypieiñmew Jewba taiñ femal?

¹³ Famülke mu kay, ¿chem feypieiñmew Jewba taiñ femal? Chaw Dios elfalkünufi ta Jesus ñi amuldungucheal, fey kidu rulpaleleiñmu tüfachi küdaw (papeltunge Luka 4:18, 19). Feley, Jesus reke iñchiñ elfalkünulelngeiñ ñi kelluafiel ta pu che tañi kimafiel engün ta Jewba, taiñ Chaw Ngünechen lifrechekelu (Matew 28:19, 20). Welu küdawngeafuy taiñ amuldungual. Weküfü trawmalniefi reke tati pu che, feymu ngüneduamkelayngün rume ñi konayeetew ti koylake religion, negosian dungu ka pu politiko (2 Korintio 4:4). Fey kiñeke mapu mu pu che duamkelay kimafiel ta Chaw Dios ka lladkütukeeiñmu kütu. Welu femngelu rume, ramtuwafuiñ: “Tañi lifrelen mu, ¿chumafun tañi doy küdawülafiel ta Jewba?”.