Wirintungey trafruka mu

¿CHEM rupamekey faw? Tüfachi pu che nieyngün kiñe fütra ilelkawün. Ti Babilonia rey mangelfi warangkake doy falin-ngechi pu che. Petu püneyngün tati milla, ka plata kopa, ka tason nentungelu Jewba ñi ngillatuwe ruka Jerusalen mu. Kiñe wentru ñi changüll kuwü pinüfkülen wefrumey (tripapay), ka koni ñi wirintükun ti trafruka mu. Kom che llükay.

Belsasar, Nafukodonosor ñi laku, fewla rey ngey. Fey mütrümi ñi küpalelngeal pu kimche wentru. ‘Tañi pepi chillkatulelaetew tüfachi wirin ka ñi feypiaetew chem ñi feypifel, elungeay fentren yewün, ka küla doy falin-ngechi ngünenielu ti reyno mu ngetuay,’ pi tati rey. Welu kiñe kimche no rume pepi chillkatulay, ka feypilay chem ñi pifel ti wirin mülelu trafruka mu.

Ti rey ñi ñuke allkülu ti rarakün, fey konpuy ti ipeyümchi katrüntüku mu. ‘Füreneen, müte llükakilnge,’ feypifi ti rey. ‘Tami reyno mu müley kiñe wentru kimniefilu tati pu lif dio. Rey ngelu tami laku Nafukodonosor, longkokünufi kom tañi pu kimche wentru mu. Daniel pingey. Fey mew küpape, ta Daniel feypiaymu chem ñi pifel kom tüfa.’

Fey mew pürüm küpalngey Daniel. Elungefuy yewün pilay llowalu, Daniel koni ñi feypiafiel chumngechi kiñe antü Jewba müntuñmafi Belsasar ñi laku ñi rey ngen. ‘Kidu rume mallmangekefuy,’ pi Daniel. ‘Ka kastigaeyew Jewba.’

‘Welu eymi kimimi kom dungu mu ñi rupan kidu,’ Daniel feypifi ta Belsasar, ‘ka petu mallmangeymi chumngechi ngefuy Nafukodonosor. Küpalimi tati kopa ka tason mülelu Jewba ñi ngillatuwe ruka mu, ka putukeymi (pütokokeymi) fey engün mu. Püramkefimi tati pu dio dewmangelu mamüll ka kura mu, ka yamkelafimi taiñ Fütra Pepiluwün-ngechi ñi Dewmaetew. Feymu lle Ngünechen werküy ti kuwü ñi wirintükuafiel tüfachi dungu.

‘Tüfa tati wirintükun,’ pi Daniel: ‘MENE, MENE, TEKEL ka PARSIN.’

‘MENE feypi Ngünechen rakifi chi antü ñi tuntepual tami ngünen, ka fentepuwi pi. TEKEL feypi fanefanetungeymi ti pesa mu pengeymi tami kümenon. PARSIN feypi tami reyno elungeay tati pu medo ka persa.’

Petu dunguley Daniel, tati pu medo ka persa koni ñi kewatuafiel engün ta Babilonia. Nüfi ti waria ka langümfi ta Belsasar engün. ¡Ti wirin trafruka mu feychi pun (trafia) wechurpuy! Welu ¿chem dungu mu rupayay tati pu Israel che fewla? Peafiyiñ, welu fewla wiñopetuayiñ chem dungu mu rupamekey ta Daniel.