Chi Weküfü ka ñi pu weküfü pilayngün tami küdawam Dio mu. Küpa kiñe püle entuniefi kom che Dio mu. ¿Chumgechi femafuy tüfa engün? Kiñe kintun tañi femal rüfgenolu poyen Dio mu (2 Korintio 11:13-15). Kiñe poyen koylangey wülnolu tañi kimeltun rüf dungu Biblia mu mülelu. Rüfgenolu poyen ta funa poñü reke trüri, lelingey kümelu kechiley, welu ponwi püdwiñküley, falilay. Ka, rüfgenolu poyen küpalelafeymu fentren wedake dungu.

Kimeltun koylakan poyen ayülafuy ta Jewba, ti Dio rüf dungu nielu. Jesu mülepalu mapu mu, pu longkolelu kiñe trokiñ feyentun nielu feychi antü mu, küpa langümfeyu. Tüfa engün rakiduamkefuyngün tañi poyen Dio kümelkalel. Feypikefuyngün: “Nieiñ kiñe chaw müten, Ngünechen [Dio] llemay”. Welu ¿feley may, pi Jesu? Feypilay. Kidu chaftun llowdungufi: “Eymün tamün chaw ta weküfü” (Juan 8:41, 44). Fachantü, fentren che küme poyeniefiel Dio trokiwküley, welu chi Weküfü ka tañi pu weküfü poyeniefi (1 Korintio 10:20).

Kiñe püdwiñ anümka reke wülkey wedake fün, femgechi rüfgenochi poyen ka wülkey che ñi femal wedake dungu. Kom mapu apoley wedake dungu mu, tañi wedake femken ta che. Müley yafkan wentru domo engü, kewan (nalün), weñen, ngeñkawün, langümün ka nüntukawün. Fentren tüfachi pu che femkelu niey ñi feyentun, welu ñi feyentun nengümlayu tañi femal kümelkalen. Weniyelayafuy Dio engün, elnole tañi wedalkameken (Matew 7:17, 18).

Rüfgenochi poyen kimelelfi che tañi nütramkayafiel adentun poyengekel. Dio ta feypi tañi ngütramkanoafiel adentun poyengekel, ka tüfa ta küme rakiduamün. ¿Ayüafuymi kiñe che turpu dungukenoelmu, welu dunguñmalmu tami adentun? ¿Feyti che weniyeafuymi? No, femlaafuy llemay. Ka femgechi, Jewba pi tati pu che kidu ñi dungungeal müten, kiñe adkünuche no, ka kiñe adentun nienolu mongen no rume (Éxodo 20:4, 5).

Rüfgenochi poyen kimeltuy langümual che mülele awkan (weychan) mu. Jesu feypi Dio ñi pu weni welukechi tañi piwkeyewal. Feymu, langümlayafuiñ che taiñ piwkeyel (Juan 13:35). Kümelay langümüm wedake che no rume. Jesu ñi kayñe amulu nüngeafilu, kidu pilay tañi pu inanieketu kewayal (nalüwal) feymu tañi montulgeal (Matew 26:51, 52).

Rüfgenochi poyen kimeltuy ta wedake che kutrankawküleal kütral mapu mu. Welu, Biblia kimeleli ta yafkan yen ta lan mu (Romanu 6:23). Jewba kiñe Dio piwkeyen nielu. ¿Rumel kutrankayafuy ta che kiñe Dio piwkeyen nielu? Femlaafuy llemay. Tati küme rumel mülewe mu müleay kiñe poyen Dio müten, chumgechi poyengeal tañi Jewba pin (Apokalipsi 15:4). Itrokom kakelu femgechi poyeken tuwkülelu chi Wekufü ñi koyla mu, kom afay.

Lan mu weluletuy mongen. Fütra kon umawtun reke (Juan 11:11-14). Lay che allküwelay, pelowelay, dunguwelay, rakiduamwelay chem no rume (Eclesiastés 9:5, 10). Rüfgenolu poyeafiel feypi tachi pu lalu, amuketuy chew mülen pu püllü, mongeleal ñi kuyfiche yem engün. Welu Biblia kimeltulay feychi dungu.

Lachi che kellulayafeymu ka weda femlayafeymu. Kom che reke wimtun dungunieyngün, tukulelafiel rokiñ eltun mew tati la ka ngütramkafi, tañi femün mu ayüwelafilu chi la trokiwkeyngün. Welu tüfachi wimtum ayülay Dio, tuwkülenmu ta Satana ñi kiñe koyla dungu mu. Ka ayülay ti lachi pu che, fey engün am niewenolu mongen. Ngelay tami llükayeafiel ka tami poyeafiel tati pu la. Müley ñi poyeafiel Dio müten (Matew 4:10).

Wiñotuay tañi mongen lalechi che. Küpalechi antü mu, Jewba trepeltuayu lalechi che tañi mületual kiñe küme rumel mülewe, Mapu mew (Juan 5:28, 29; Hecho 24:15). Dio trepeltuafuy ta che lalelu, eymi reke trepeltuafuymi kiñe che umawkülelu (Marku 5:22, 23, 41, 42).

Tati feypin taiñ lakenon feyta koyla, ka Satana chi Weküfü dewmay tañi fentren che tañi feyentual. Satana ka tañi pu weküfü rakiduamelfi ta pu che tañi am tati lalu mongeley ka kutranelcheafuy ka chem kake wedake dungu rume. Satana ngünenkachekey, kiñeke mu pewma mu kam perimontu mu rume, tañi feyentuam ta che feyti dungu, Dio mu tuwlu. Feymew, feyti küpa dungukefilu tati pu la, Jewba rume lladkutukefi, llowkelafi ka nüfakefi (kondenafi) (Deuteronomio 18:10-12).

Satana ayünieafuy kalku dungu tami inayal. Fentren che amukey pemeal kuyfike lalu, yelfi chem rume, kiñeke pulku putuñmamefi, kümelkaleal tañi am ka wedalkachenoam. Femkeyngün llükaniefiel mu tañi chumafetu rume tati pu am. Tüfachi pu che yeniekeyngün llankatu ka kelü füw tañi kutrannoam. Kiñeke che amukey “lawentuchefe” ngillatuy kiñe püllü mu, wirarkawi fentren pu che ka wente mu rupalelgey kiñe pichi row mamüll, ka kintual “lawen” tañi kümelkaleal ka pütokolniekeyngün. Kiñeke ellkakeyngün chem rume ñi kon ruka mu tañi kechanentuam wedake püllü. Kiñeke püney kalku “lawen” tañi kelluatu püram kachilla mu, küpanon weda nge, ka peal küme kompañ.

Doy küme tami chumnoatu mu ta Satana weniyefilmi Jewba. Jewba Dio ka tañi pu werken püllü doy niey newen Satana ka ñi pu weküfü mu (Santiaw 2:19; Apokalipsi 12:9). Jewba rume ayüniey püneal tañi newen inkayam tañi pu weni, feyti chumkawnorume elkünukenoetu (2 Crónicas 16:9).

Dio ñi Dungu feypi femlayaiñ kalkutun dungu. Jewba llowkelafi, nüfakefi (kondenafi), kalkutun dungu, tüfa inküyeafeymu ngüneniel newen Satana ti Weküfü mu (Levítico 19:26).