Fentren ül kimeltukeeiñmew ka yafültukukeeiñmew

DOY fütra lifru mülelu Biblia mu, niey kiñeke ül pünengekefulu ñi poyeafiel Ngünechen, trapümngelu epe kiñe warangka tripantu mu. Tati pu wirintukulu küme entuyngün ñi feypin, pengelam ñi rume (mütre) fentren mupiltun nielu. Ka pengeli fillke dungu nielu ñi piwke mu engün, ayüwün ka kutrantun, mañumtun ka wiñorakiduamtun, ti püramyen ka weñangkün. Kom feychi wentru piwkeyefi ta Ngünechen ka doy fülküley kidu mu. Peafiyiñ kiñeke dungu feypingelu chi lifru Salmos mu.

Müley taiñ püramyeafiel ka poyeafiel ti rüfngechi Ngünenielu itrokom dungu, Jewba. Salmo 83:18 küme feypi: “Tami üy Jewba pingeymi, eymi müten Alüpüralelu itrokom Mapu mu”. Fentren Salmos püramyefi ta Jewba dewmalu am kallfü wenu, tati wangülen, fillke mongen Mapu mu, ka taiñ afmatufalchi kuerpu (Salmos 8, 19, 139 ka 148). Ka fentren Salmos küme dunguyefi ñi ingkafiel ka montulfiel tati pu püntütripakenolu kidu mu (Salmos 18, 97 ka 138). Ka kakelu ülkantuyefi tañi nor Ngünechen-ngen, fey ñi kellukefiel tati pu kutrankawkülelu chi che, ka kastigakefi tati pu wedake che (Salmos 11, 68 ka 146).

Jewba kelluniefi ka yafülduamtukufi tañi pu piwkeyeetew. Feypingeafuy ti Salmo kapitulo 23 doy kimngekey, chew David trürümfi taiñ wenu Chaw kiñe poyengechi kamañfe reke, fey ngüyülfi, ingkakefi, ka ngüneytufi tañi pu che. Ka ti Salmo 65:2 tukulpakeeiñmew Jewba “Allkütukelu tati llellipun”. Salmos kapitulo 39 ka 51 yafültukufi tati pu che wedake dungu femkefulu. Tüfa engu müten, pengeli David ñi rüf wiñorakiduamtun ñi weda yafkan, ka rüf kimi Ngünechen ñi wiñoduamtuaetew. Ka Salmo 55:22, yafültukukeeiñmew taiñ maneluwal ta Jewba mew, ka elkünual taiñ küdawyekeelchi dungu kidu mu.

Mesia ñi Ngünenien mu Jewba küpalay kiñe we Mapu. Tati Salmos mu peiñ fentren dungu nüwkülelu tati Mesia, ti feypikünuelchi Longko Ülmen. Salmo 2 feypikünuy tüfachi Ngünenielu pünonakümafi chem trokiñche rume ñi chaftunieetew. Ti Salmo 72 feypi apümafi ti ngüñün, norngenochi dungu, ka kom mülechi kutrankawün dungu mu. Ka ti Salmo 46:9 feypi ta Ngünechen apümafi ti awkan (weychan), ka watrokaway itrokom weychawe Mesia ñi Ngünenien mu. Ka, ti Salmo 37 mu peiñ ti we Mapu mew, ngewelayay wedake che, ka tati kümeke che rumel (molkechi) mongeleayngün tüngün mew, ka welukentu tutewküleayngün.

(Tuwlu chi lifru Salmos.)