¿Tüfachi dungu ayüniefuy Chaw Ngünechen?

PAPELTULMI ti diario, adkintulmi television ka allkütulmi ti radio, ¿chem dungu pekeymi? ¡Müley fentren wedake dungu, weychan ka llükalkan-ngechi dungu! Kafey, rakiduamnge kidu tami wedake dungu mu. Kutrankawküleymi chi kiñe kutran mu ka layüm kiñe tami pu piwkeyenieelchi che. Job reke duamküleymi chi, tüfachi küme wentru feypi ñi nieel “fente illamkawün ka weñangkün” (Job 10:15).

Ramtuwkeymi chi:

• ¿Tüfachi dungu ayüniefuy Chaw Ngünechen iñche ka kom pu che mew?

• ¿Chew peafun kellu ñi chaftuafiel tañi wedake dungu?

• Kiñe antü mu, ¿mülepeay may tüngün Mapu mew?

Biblia ta wülkey kümeke wiñoldungun tüfachi ramtun mu.

BIBLIA KIMELTUY NGÜNECHEN KAKÜNUTUAFI TÜFACHI DUNGU MAPU MU.

“Angkümüñmangetuay engün tañi külleñu, fey ngewelayay ta lan, ngüman no rume, eyütun no rume, kutrantun no rume. Itrokom tati mülekefulu am ta kuyfi dew ta mülewetunolu.” (Apokalipsi 21:4)

“Tati küntrongelu wemul reke ringküyaway.” (Isaías 35:6)

“Pu trawma tañi nge pelotuay.” (Isaías 35:5)

“Itrokom tati pu layelu [...] fey tripapatuay engün ñi rüngan la mew.” (Juan 5:28, 29)

“Iney no rume feypilayay: ‘Iñche kutrankülen’.” (Isaías 33:24)

“Fentren iyael müleay mapu mew.” (Salmo 72:16)

NENTUNGE KÜMELKAN BIBLIA ÑI KIMELTUKEEL

Rakiduamkilnge rupachi pagina mu müleyechi dungu, re pewma no tati. Doy may Chaw Ngünechen ñi feypikünuel tüfa, ka Biblia feypi chumngechi femtriparpuay.

Doy fillke dungu mu, Biblia ka kümelkakeeiñmew. Tüfa kimeltukeeiñmew chumngechi yenieal kiñe ayüfalngechi mongen fantepu mu. Rakiduamnge kidu tami wedake dungu mu ka rakiduameletewchi dungu. Tüfa ta kiñeke dungu chi: fillalelmi, tami pu che ñi weda rupan, kutran ka lalu kiñe piwkeyenieelchi che. Welu Biblia kellukeeiñmew taiñ chaftuafiel tüfachi wedake dungu, kafey yafülduamkeeiñmew tati llowdungun ñi wülkeel tati küpaleyechi ramtun mu:

• ¿Chumngelu kutrankawkeiñ?

• ¿Chumngechi chaftuafuiñ tati rakiduameletewchi dungu taiñ mongen mu?

• Taiñ pu che ñi doy ayüwküleal, ¿chumafuiñ chi?

• Lan mu, ¿chem dungu mu rupakeiñ?

• ¿Wiño pepetuafuiñ may taiñ pu layechi piwkeyen che?

• ¿Chumngelu maneluwküleafuiñ Chaw Ngünechen ñi wechunenturpual ñi feypikünuel?

Tami papeltumekeel tüfachi lifru, tüfa pengeli tami küpa kimnieafiel Biblia ñi kimeltukeel. Tüfachi lifru kelluaeymu. Müley tami ngüneduamal tati parrafo, tüfa niey kidu ñi ramtun. Fentren warangka che müna ayüfingün tüfachi ramtun ka wiñoldungun pünekelu pu Dungukelu Iney Ngen Jewba ñi chillkatun Biblia mu, eymi ka ayüafuymi tati. Chaw Ngünechen kümelkayaeymu tami küpa ngüneduamfiel Biblia ñi rüf kimeltukeel.