¿Chem am tati Antü ñi Ramtukadungungeal ta pu che?

¿CHEM rakiduamkeymi tati Antü ñi Ramtukadungungeal ta pu che? Fentren che rakiduamkeyngün feychi antü mu rume fentren che kake kiduke engün fülkonpuay Ngünechen ñi ülmen wangku ñi ramtukadungungeal. Kafey rakiduamkeyngün kiñeke che elungeay ayüfal mongen wenu mapu mu, kakelu che kondenangeay ti kütral mapu mu. Welu Biblia pengeli tati Antü ñi Ramtukadungungeal ta pu che, feyngelay pu che ñi rakiduamken: feychi antü llükafalngelay, doy may müleay maneluwün ka küme elkünungetuay pu che ñi küme felekefel ellaka mu.

Apokalipsi 20:11, 12, ti apostol Juan femngechi feypi tati Antü ñi Ramtukadungungeal ta pu che: ‘Pefiñ kiñe lig ülmen wangku, fey ka Tati anülelu ti wangku mew. Kidu ñi fütra pepiluwün mew ñamyetuy nag mapu ka wenu mapu, fey chew püle no rume pengewetulay. Ka peyefiñ tati pu la, epe fill che, witralelu ti longko ülmen mülewe ñi adkiñ mew. Feymew nülangeyey tati pu lifru, ka femngechi kangelu lifru, feychi lifru, mongen lifru ürke. Tati pu la ramtukadungungeyey engün tañi chem chumken engün, chumngechi tañi wirikonkülen tati pu lifru mew’. ¿Iney am tati Kues anülelu ti ülmen wangku mew?

Chaw Jewba Doykülechi Kues ngey tati pu che mu. Welu elfalkünufi kiñe che ñi ramtukadunguafiel ta che. Feymu Hecho 17:31, ti apostol Pablo feypi: “Ngünechen am elkünulu kiñe medin antü, feychi antü mew ramtukadunguafi ñi chumün ta kom che mülelu mapu mew kiñe nor dungu mew, Ngünechen tañi dullintuelchi wentru mew”. Tüfachi Kues, wiñomongetuelchi Jesukristo tati (Juan 5:22). Welu, ¿chumül llituay feychi Antü ñi Ramtukadungungeal ta pu che ka tunteñmayay?

Chi lifru Apokalipsi pengeli tati Antü ñi Ramtukadungungeal ta pu che, llituay Armagedon pingechi weychan mu, tüfa apümngeay Satana ñi müleyechi dungu Mapu mu (Apokalipsi 16:14, 16; 19:19–20:3).a Rupale Armagedon rakümtukungeay ta Satana ka tañi pu weküfü kiñe fütra lolo mew, Abismo pingelu, ka rakümkonküleayngün warangka tripantu üye mu. Feychi antü mu, tati 144.000 dullingelu ramtukadunguafi ta pu che ka ‘longkoleay Kristo engün kiñe warangka tripantu mu’ (Apokalipsi 14:1-3; 20:1-4; Romanu 8:17). Chumngechi ngüneduampeiñ tati Antü ñi Ramtukadungungeal ta pu che, warangka tripantu mu puway.

Feychi warangka tripantu mu, Jesukristo müley “tañi ramtukadungupayafiel kom che tati mongelelu ka ti dew layelu” (2 Timotew 4:1). Chi dungun “tati mongelelu” küpa feypi tati pu che koneltulelu ta “fentren pu che” mongelen rupalu Armagedon mu (Apokalipsi 7:9-17). Apostol Juan ka pefi “tati pu la [...] witralelu ti longko ülmen mülewe ñi adkiñ mew” ñi ramtukadungungeal. Chumngechi ñi feypikünun ta Jesus “itrokom tati pu layelu [Ngünechen ñi tukulpaniefiel] allküay ta kisu ñi dungun, fey tripapatuay engün” ñi wiñomongeltungeel mu (Juan 5:28, 29; Hecho 24:15, TNM). Welu, ¿chem dungu mu am ramtukadungungeay kom pu che?

Apostol Juan pengelelngey tüfa: “Nülangeyey tati pu lifru” ka ‘tati pu la ramtukadungungeyey engün tañi chem chumken engün, chumngechi tañi wirikonkülen mew tati pu lifru mew’ (Apokalipsi 20:12). Tüfachi lifru mu, ¿wirikonkülepey may tati pu che ñi femkefel engün kuyfi? Femlay llemay. Tati pu che ramtukadungungelayay ñi femkefelchi dungu petu ñi lanon mu. ¿Chumngechi kimiyiñ tüfa? Biblia feypilu am ‘kiñe che ta dew layüm kuyfi mongen mew, ngünekelaeyew tañi kulpan’ (Romanu 6:7). Feymu kom tati pu wiñomongetulu ngoymanentungeay tañi kuyfike kulpan. Feymu lle, feychi lifru adentuley reke weke werkün dungu Chaw Ngünechen mu küpalu. Femngechi tati pu wiñomongetulu ka pu mongelen rupalu Armagedon mu, ñi afnoachi mongen nieal engün, müley ñi allkütual Chaw Ngünechen ñi werkün dungu, kom weke werkün dungu Jewba ñi wülnieael warangka tripantu mu. Feymu kake kiñeke engün ramtukadungungeay chem ñi femün feychi Antü ñi Ramtukadungungeal ta pu che.

Tati Antü ñi Ramtukadungungeal ta pu che, fentren warangka che feychi antü mu eluñmangeay ñi kimal Chaw Ngünechen ñi ayükeelchi dungu ka ñi inayal tüfachi dungu. Feymu kom Mapu mu müley ñi kimelngeal ta che. Femngechi ‘tati pu che Mapu mew kimayngün tati nor dungu mu’ (Isaías 26:9). Welu kiñeke che pilayayngün ñi femal Chaw Ngünechen ñi ayükeelchi dungu. Isaías 26:10 feypi: “Fürenengele rume ti weda che, kidu kimlayay nor dungu. Mülele rume nor dungu Mapu mew, kidu wedalkayay, ka fey pelayay Jewba ñi püramyen”. Tüfachi pu wedañmangechi che apümkangeay feychi Antü ñi Ramtukadungungeal ta pu che (Isaías 65:20).

Fentepuwle feychi Antü ñi Ramtukadungungeal ta pu che, kom pu che montulu ñi mongen, fey “wiñomongetuay” reke ka kulpanchengewelayay (Apokalipsi 20:5). Feymu lle, feychi Antü ñi Ramtukadungungeal ta pu che, küme elkünungetuay kom che ñi küme felekefel ellaka mu (1 Korintio 15:24-28). Af mew ka kintukaduamün-ngeay pu che. Neykümngetuay tati Weküfü, ka afchi rupa mu eluñmangeay ñi ngünenkayafiel ta che (Apokalipsi 20:3, 7-10). Kom feychi che chaftuniefile tati Weküfü, fey peayngün chumngechi ñi wechurpual kom ñi feypikünuel tüfa: “Tati pu norngechi che lloway ti Mapu ñi ngen-ngeal engün, ka rumel müleayngün fey mu” (Salmo 37:29). Rüfkünu llemay, feychi Antü ñi Ramtukadungungeal ta pu che, kümelkangeay itrokom manelfalngechi che.