QUIMELTUN 25
Chau Ngünechen, ¿chumngechi ayüniei ñi feleal tati pu che?
Biblia feipi tati pu che pichiquen tripantu meu mongelequei ca fillque huesaque dungu meu rupaquei tañi mongen meu (Job 14:1). Huelu, ¿feiti mongen pemai Chau Ngünechen ayüniefui taiñ nieal? Femngechi felenofule, ¿Chau Ngünechen chumngechi ayülei ñi feleal tati pu che? ¿Ca huechutripapeai mai quisu tañi ayünieel? Ngüneduamnge chem quimeltuquei Biblia.
1. Jehová ¿chumngechi ayüniei taiñ feleal?
Jehová ayüniei taiñ cüme feleal, feimu hue deumafilu tati hunenque che, Adán ca Eva, elcünufi engu quiñe ayüfalngechi mapu meu, Edén pingefulu. Fei Jehová feipifi engu: “Nieaimu rume fentren püñeñ, apolfimün ta Mapu ca quisu ngünetunieafimün” (Génesis 1:28). Jehová ayüniefui tüfachi curehuen ñi nierpual fentren fotüm ca ñahue, ñi cüme adcünuafiel ti Mapu ca ñi ngünenieafiel itrofill culliñ. Jehová ayüniefui com tati pu che ñi tremoleal ca ñi rumel mongeleal.
Feichi meu femtripanolu rume Jehová tañi ayüqueel,a quisu petu ayülei ñi femngechi feleal tati pu che (Isaías 46:10, 11). Jehová ayüniei com tati pu che tañi poyenieteu ñi afnoal tañi mongen ca cüme feleal engün (papeltuaimi Apocalipsis 21:3, 4).
2. Famülque meu, ¿chumngechi ayühun-ngechi mongen nieafuiñ?
Com iñchiñ duamnieiñ taiñ adnieaeteu Jehová, femngechi deumaeiñmu quisu. Feimu ayünieiñ taiñ quimürpuafiel ca poyeafiel (papeltuaimi Mateo 5:3-6). Jehová ayüquei taiñ femal com taiñ huercüeteu, taiñ piuqueyeafiel ca serfiafiel com taiñ piuque meu, femngechi cüme hueniyeafuiñ (Deuteronomio 10:12; Salmo 25:14). Femngechi femliyiñ, ayüucüleafuiñ rupaliyiñ rume huesaque dungu meu. ¡Felei llemai! Inaniefiliyiñ Jehová tañi feipin, rüf ayüucüleaiñ taiñ mongen meu.
DOI QUIMAIMI
Jehová müna cüme pepicacünufi ti Mapu taiñ mongeleal iñchiñ, fei inaduamaiñ chumngechi tüfa pengeli tunte taiñ piuqueyenieteu. Cafei inaduamafiyiñ chem quimeltuquei Biblia tati pu che ñi ayüucüleal.
3. Jehová ayüniei taiñ rume ayüucüleal taiñ mongen meu
Peaiñ ti VIDEO, ca ngüneduamaiñ tüfachi ramtun:
Chau Jehová, ¿chumngelu fente cüme deumafi ta Mapu?
Papeltuaiñ Eclesiastés 3:11, ca ngüneduamaiñ tüfachi ramtun:
Tüfachi troquiñ Biblia ñi feipin meu, ¿Jehová chumngechi ayüniei ñi feleal tati pu che?
4. Jehová petu ayüniei ñi cüme feleal pu che
Papeltuaiñ Salmo 37:11, 29 ca Isaías 55:11, fei ngüneduamaiñ tüfachi ramtun:
¿Chumngelu feipiafuiñ Jehová petu ayüniei ñi cüme feleal tati pu che?
Quiñe huesa ruca cüme elcünungetuafui. Ca femngechi, tati pu che huesalcafilu rume tati Mapu, Chau Ngünechen cüme elcünutuafi fei ñi müleam tati cümeque che.
5. Poyefiliyiñ ta Jehová, ayühun-ngechi mongen nierpuafuiñ
Quimliyiñ chem mülei taiñ chumal taiñ mongen meu, rüf ayühulafeiñmu. Peaiñ ti VIDEO, ca ngüneduamaiñ tüfachi ramtun:
Terumi quimürpui chem chumal tañi mongen meu, ¿chumngechi quellueyu tüfa?
Papeltuaiñ Eclesiastés 12:13, ca ngüneduamaiñ tüfachi ramtun:
Jehová femi fillque dungu taiñ ayüucüleal, fei ¿chumngechi pengelafuiñ taiñ mañumcülen?
QUIÑEQUE CHE RAMTUAFEIMU: “¿Chumürqueafuiñ taiñ ayüucüleal?”.
¿Chem feipiafuimi eimi?
TAMI QUIMEL
Jehová ayüniei taiñ cüme feleal tüfachi Mapu meu rumel meu. Poyefiliyiñ ta Jehová com taiñ piuque meu ayüucüleafuiñ famülque mu ca cüpalechi antü meu.
¿Chem piafuimi?
Jehová deumafilu Adán ca Eva, ¿chumngechi ayüniefui ñi feleal engu?
Jehová petu ayüniei taiñ cüme mongen nieal iñchiñ, ¿chumngelu feipiafuiñ tüfa?
¿Chem chumafuimi tami nieal quiñe ayühun-ngechi mongen?
CA PEAFUIMI
Ngüneduamnge fillque dungu pengelquelu ñi rüf mülerquefel Edén pingechi lof.
“Edén pingechi mapu, ¿rüf mülerquepefui mai?” (Ti Huerquen 1 enero, 2011)
Quimürpunge chumngelu tati Mapu rumel müleai.
Ngüneduamnge chem feipilei Biblia ñi rüf ayüucüleal tati pu che tañi mongen meu.
Quiñe huentru fillque chemcün niefulu rume, rüf ayüucülelafui, pefinge tañi rupan.
a Cüpalechi quimeltun meu inaduamaiñ chumngelu (chemu) petu huechutripalai chem ñi ayüqueel Jehová.