ÑI QUELLUNGEAL PU FAMILIA
Illculelmi, ¿chumngechi ngünehuafuimi?
Raquiduamnge illculcaelmeu quiñe dungu ñi feipiel cam ñi femel tami afcadi. Fei eimi re ellcacünulmi tami illcun, huelu tami afcadi ngüneduameimu tami illculen, feimu eluuquei tami ramtucayaeteu: “¿Chem raquiduamcüleimi am?”. Tüfa doi lladcüleimu, ¿felei no am? Femngechi rupan mu eimi, ¿chumngechi ngüneniehuaimi?
Tami quimafel
Eluhulmi tami illcufemal contupayafeimu cutran. Quiñeque chillca pengeli ngüneunoliyiñ taiñ illcun contupayafeiñmeu presion cutran, piuque cutran, depresion ca pütra cutran. Ca femngechi illculiyiñ cüme umautuhuelayafuiñ, huesa duamcüleafuiñ, cutran trahuacüleafuiñ ca lonco cutran nieafuiñ. Feimu llemai, Biblia feipi: “Famentunge ti nüngayühun, ca elcünunge ti illcun; lladcüquilnge ca eluuquilnge tami femal huesaque dungu” (Salmo 37:8).
Re ellcacünuliyiñ taiñ illcun fei huesalcayafeiñmeu. Fentecünunoliyiñ taiñ illcuduamcüleal quiñe cutran reque feleafui, tüfa huesalcayafui taiñ raquiduam ca piuque. Fei eluhuafuiñ chi ñi epurume piuquengeal ca huesa dunguyeafiel ta caquelu che. Femngechi femülmi, tami pu che cüdautuafui quiñentrür müleal eimi mu ca rume huesalcayafui tami curehuen-ngen.
Tami femafel
Ngüneduamnge tami afcadi tañi cüme chumngen. Huirintucuaimi cüla cümeque dungu ñi nieel tami afcadi. Fei huiño illculmi tañi feipieteu mu, raquiduamaimi chem tami huirintucuel quisu mu. Tüfa quelluaimu ngüneniehual tami illcun.
Biblia ñi feipin: “Feimeu mañumtulequeaimün” (Colosenses 3:15).
Huiñoduamtucheaimi. Hunelu mu, raquiduamnge chumngechi ñi pefiel ti dungu tami afcadi. Tüfa quelluaimu tami quimal tañi chum duamcülen, femngechi Biblia pengelquei tamu ‘piuqueyehual’ (1 Pedro 3:8). Cafei ramtuhuaimi: “¿Rüf pepi huiñoduamtulayafun tañi illcutueteu?”.
Biblia ñi feipin: “Quiñe che [...] rume cümelcaquei rulpacünufilu am ñi huesalcangeel” (Proverbios 19:11).
Ayüfal mu feipiaimi tami chum duamcülen. Nütramcalmu quiñe dungu, femngechi feipilayaimi: “Nehue duamtuchequelaimi. Feipilaen rume cheu tami miyahun”. Huelu mai, femngechi feipiafuimi chi: “Rume raquiduamcülefun eimi mu deu punlu ca quimnolu am tami chumlequen”. Femngechi entulmi tami feipin, ngüneniehuaimi tami illculenoal.
Biblia ñi feipin: “Ca femngechi tamün nütramyequeelchi dungu ñi ayüfal nütramngeal ca ñi falin cümeque dungual” (Colosenses 4:6).
Yamün mu allcütuaimi. Deu feipilelfilmi tami dungu, elufinge tami huiñoldunguaeteu tami afcadi ca catrütudungulayafimi. Deule ñi nütram, huiño feipiafimi quiñeque dungu tami feipipeteu tami afcadi, femngechi pengeleaimi tami cüme allcütufiel. Eluhulmi tami allcütual, quelluafeimu tami illcuhuenoal.
Biblia ñi feipin: “Mülei tamün hune allcütual, huelu mülei tamün pürümcaunoal tamün dungual” (Santiago 1:19).