Esdras
1 Ti hunen tripantu ñi lonco ülmencülen Ciro Persia mapu meu, Jehová adcünufi ta Ciro. Feimu nentui quiñe huercün com tañi mapu püle, femngechi ñi femtripayal Jehová ñi feipifiel ta Jeremia. Ti huercün feipi: 2 “Ciro, Persia ñi lonco ülmen, feipi: ‘Huenu Chau Jehová elueneu com Mapu müleyechi gobierno, ca feipieneu ñi deumayafiel quiñe ruca Jerusalén huaria, Judá mapu meu. 3 Chau Dios quelluafi tuchi coneltulelu tañi troquiñche mu. Huechupe engün Jerusalén huaria, Judá mu mülelu, ca huiño deumatupe engün Jehová tañi ruca, pu israelche ñi Ngünechen, quisu müten rüf Ngünechen ngei. Jerusalén huaria mu mülerquei tañi ruca. 4 Tuchi camapu mülele, cheu rume tañi mülen, tañi pu carucache mülei ñi quelluaeteu. Elungepe milla, plata, chemcün, culliñ ca chem rume ñi chalintucungeal ti rüfngechi Ngünechen ñi ruca meu, Jerusalén mu mülequefulu’”. 5 Feimu pu loncolelu fillque troquiñche Judá ca Benjamín mu mülelu ca ti pu sacerdote ca pu levita, com feichi pu che Chau Dios ñi nengümeleteu tañi piuque, pepicahuingün ñi huechual ca huiño deumatual Jehová ñi ruca, Jerusalén mu mülelu. 6 Cafei tañi pu carucache elueyu milla, plata, chemcün, culliñ, falinque fillem ca fillque mañumtun.