Job
1 Uz mapu meu mülefui quiñe huentru, Job pingelu. Quiñe culpan no rume nielafui ca nor chengefui Chau Dios tañi adquiñ meu. Rume yamniequefui ta Ngünechen ca cuñiutucuucülefui ñi femnoal huesaque dungu. 4 Ñi pu fotüm niequefuingün fütraque ilelcahun quisuque tañi ruca mu engün, ca mangelquefuingün tañi cüla lamngen engün ñi quiñentrür iyael ca pütocoal. 6 Quiñe antü trahuluhuingün Chau Dios ñi pu fotüm Jehová tañi adquiñ meu, fei Satanás ca conpui feichi trahun meu. 7 Fei Jehová feipifi ta Satanás: “¿Cheu miyaupeimi?”. Satanás huiñoldungufi ta Jehová: “Amupen Mapu meu ca miyaumepen fei püle”. 8 Ca Jehová feipifi ta Satanás: “¿Ngüneduamfimi am tañi poyequeteu Job? Mapu meu ngelai inei no rume fei reque. Quiñe huentru nor piuquengelu püntütripaquenolu, ca yamquefilu ta Chau Ngünechen ca famtripalelu huesaque dungu mu”. 9 Feimeu, Satanás huiñoldungufi ta Jehová: “¿Refalta pemai Job yamquefi ta Ngünechen? 10 ¿Malalcünulelfimi reque tami incañpeafiel quisu, ca tañi ruca, ca com tañi nieel? Eimi cümelcafimi tañi femelchi cüdau, ca tañi pu culliñ alün-ngei fill püle tüfachi mapu mu. 11 Huelu, ñi caletual tüfachi dungu, eluunge tami müntuñmayafiel com tañi nieel, ca peaimi tami malisiayaeteu tami adquiñ meu”. 12 Feimeu, Jehová feipifi ta Satanás: “¡Tüfei! Com tañi nieel tami cuhu mu mülei. ¡Huelu quisu chumquifilnge rume!”. Feimu Satanás tripai Jehová ñi adquiñ meu. 13 Fei quiñe antü, Job ñi hunen fotüm tañi ruca meu, Job tañi pu fotüm ca pu ñahue quiñentrür imequefuingün ca putumequefuingün. 14 Fei acurumei quiñe huerquen ca feipifi ta Job: “Tati pu mansun petu quetramequefuingün ca tati pu burro ütamequefuingün inafül quetranquelu pu mansun, 15 fei pu Seba tuhun-ngelu cüpaingün taiñ lefcontuaeteu ca yetufingün com pu culliñ, fei fütra cuchillo meu langümfingün com pu cüdaufe. Iñche müten montun tami feipipayafiel”. 16 Fei petu nütramcamequelu tüfachi cüdaufe, cüpai cangelu huentru, fei feipi: “¡Huenu meu nagpaleiñmu cütral Ngünechen, fei lüfi com tati pu ufisa ca pu cüdaufe! Iñche müten montun tami feipipayafiel”. 17 Petu nütramcamequelu ta tüfa, ca acui nga quiñe huentru, fei feipipai: “Tati pu caldeache cüla troquiñcünuhuingün, fei yepafingün tati pu camello, ca langümfingün com tati pu cüdaufe fütra cuchillo meu. Iñche müten montun tami feipipayafiel”. 18 Petu nütramcamequelu ta tüfa, ca acui quiñe huentru, fei feipipai: “Tami pu fotüm ca pu ñahue petu imequefuingün ca pulcutumequefuingün tami hunen fotüm ñi ruca meu. 19 Fei acurumei quiñe fütra cürüf tripalu ti huelliñ mapu meu, fei anüpai ti meli huitran ruca meu. Fei ti ruca trananagpai huente tati pu huechequeche meu, fei com laingün. Iñche müten montun tami feipipayafiel”. 20 Allcülu tüfa, Job huitrapürai ca huichafcafi tañi tacun, ca cüpilfi tañi lonco; fei tranacünuhui mapu meu ca lucutucünuhui, 21 fei feipi: “Chem no rume nielafun choyüngelu iñche, ca chem no rume yeñmutulayan lali. Jehová hulquei ca Jehová müntuñmaquei. Amulepe ñi püramyengeel Jehová tañi üi”. 22 Com tüfachi dungu mu, Job culpalai ca feipintuculafi ta Chau Ngünechen ñi huelulcahun.