Miqueas
1 Miqueas,* tuulu Moréset mu, llohui Chau Jehová ñi dungu. Feichi mu Jotán, Acaz ca Ezequías lonco ülmencülerqueingün Judá mu. Miqueas pengelelngei quiñe afmatun dungu chem ñi rupayal Samaria ca Jerusalén:
2 “¡Allcütumün com eimün pu troquiñche!
Ahuem, mapu ca com mülelu fei mu, ngüneduamcülemün.
Eluumün tamün juiciantucuaeteu tati Doi Fütra Ñidol Jehová.
Femngechi femai Chau Jehová tañi yamfal ruca mu.*
3 ¡Tüfei! Chau Jehová petu tripapai tañi mülehue mu.
Nagai, fei pünocayafi tati alüpüralechi mülehue mapu mu.
4 Chumngechi lliuquei* ti yihuiñ* cütral mu,
ca femngechi llihuai ti mahuida tañi miñche namun.
Chumngechi hutrunagquei* co lil mapu meu,
ca femngechi trirayai ti laf mapu.*
5 Com tüfa rupayai Jacob tañi huesaque femün mu,
Israel ñi pu cüpanche tañi culpan mu.*
¿Inei ñi duam mu huesa femi Jacob?
¿Samaria ñi duam mu no am?
¿Inei ñi duam mu mülei coilaque dios ñi ngillatuhue* Judá mu?
¿Jerusalén ñi duam mu no am?
6 Teifücayafiñ Samaria,
üye mu anümcangeai ofad.
Ütrüftucuafiñ tañi cura laf mapu mu,
re mülehueai müten cheu ñi anücünungeel ti huaria.
7 Com tañi pu adentun* apümcangetuai.
Quisutu fendehui, feimu fentren yehun* llohui,* huelu com lüpümngeai cütral mu.
Apümcayafiñ com tañi adentun.
Com ñi llohun Samaria tañi pod domongen mu,*
müntuñmangeai,* fei ñi cullingeal caquelu podngechi domo”.
8 Feimu eyütuan ca huiraran.
Triltrangnamuncünuhuan* ca triltrangquiyahuan.
Eyütuan auca trehua reque*
ca huiraran choique reque.
9 Samaria tremotulayai* tañi allfen meu,
Judá ca huesalcangei.
Feiti cutrancahun tañi troquiñche ñi conhue mu puhui, Jerusalén mu cafei.
10 “Quimeldungulayaimün feiti huesaque dungu Gat mu.
Ngümaquilmün, pichin no rume.
Bet-Afrá mu* ümülcaumün trufür mu.
11 Ahuem, pu Safir che, triltrangcülen amulemün ca yehuelemün.
Pu Zaanán che petu tripalaingün.
Bet-Ezel mu müleai eyütun, fei quelluntuculayaimünmeu.
12 Pu Marot che üngümcülerquefuingün* cümeque dungu,
huelu Chau Jehová huesaque dungu nacümfi* Jerusalén ñi conhue mu.
13 Ahuem, pu Lakís che, cahuellu mu pültrüntucufimün ti carretela.*
Eimün tamün duam mu Sion ñi püñeñ eluhui ñi culpayal.*
Pu Israel che reque chaftuen.
14 Feimu Moréset-Gat amutule, eluafimi yehun.
Aczib ñi pu cüpanche ngünencan dungungei Israel ñi pu lonco ülmen meu.
15 Ahuem, pu Maresá che, cüpaleluhuaiñ feichi caiñe com müntuquelu.
Adulam mu puhuai Israel ñi afmatufalngen.
16 Tamün poyenque yall* ñi duam mu cupiluumün ca catrümün com tamün cal lonco.