1, 2. Lan mu kiñe che, ¿chem ramtuwafuiñ?

BIBLIA feypikünueiñmew: “Ngewelayay ta lan” (Apokalipsi 21:4). Ti 5 chillkatun mu ngüneduamiyiñ Jewba ñi werküfiel ta Jesus taiñ montulaetew, feymu nieafuiñ rumel mongen. Welu famülke mu pu che lakey (Eclesiastés 9:5). Feymu ramtuwafuiñ tüfachi falin dungu: “Lan mu pu che, ¿kañpüle mongelekepetuy may?”

² Lale kiñe taiñ pu che kam kiñe weni, ayüafuiñ taiñ wiñoldungungeal tüfa. Ramtuwafuiñ: “¿Chew amutuy? ¿Puwkintuniekeeiñmew? ¿Kutrankawküley? ¿Kelluafeiñmew? ¿Wiño petuafuiñ may?”.

3. Kiñeke religion, ¿chem kimeltukey lan dungu mu?

³ Pu religion fillke dungu feypikey tüfachi ramtun mu. Kiñeke kimeltukey pu kümeke che ñi amuken wenu mapu mu, ka pu wedake che ñi amuken kütral mapu mu. Kakelu religion feypikey pu lalu ñi püllüngetun, fey ñi trawüluwketun tañi pu kuyfike che yem engün. Kakelu religion kimeltukey tati pu lalu ñi wiño choyüngeketun ka che mu.

4. ¿Chem kimeltukey epe kom pu religion?

⁴ Fillke dungu kimeltungekey lan dungu mu. Welu epe kom pu religion kimeltukey tüfa: lan mu pu che, tañi am kam püllü lakelay.a Welu, ¿rüfngepey may tüfa? Inaduamaiñ.

LAN MU PU CHE, ¿KAÑPÜLE MONGELEKEPETUY MAY?

5, 6. ¿Chem rupakey lan dungu mu?

⁵ Jewba kimniey chem ñi rupan lan dungu mu, feymu kimeltueiñmu tüfa: lan mu pu che, afkey ñi mongen. Feyngelay ñi mongeleken kañpüle tañi am ka tañi püllü. Feymu rakiduamwekelay, piwkeyewekelay ka üdechewekelay. Kafey allküwekelay ka pelowekelay rume.

⁶ Biblia feypi: “Mongelechi che kimingün tañi layal engün; welu tati  pu layelu chem dungu no rume kimwetukelayngün, ka kullingewekelay, dew ngoymayelu am engün ñi rakiduam. Ka ñi piwkeyewün, ñi üdewün, ka ñi ütriruwün ngewekelay, ka turpu koneltuwelay chem dungu mu rume ñi femal miñche antü mu. Kom dungu tami femal tami kuwü mu, femnge kom tami newen mu, fey ngenolu am küdaw, adkünun, kimün ka ngüneduamün Rüngan mew, chew tami amual” (Eclesiastés 9:5, 6, 10). Kafey Salmo 146:4 feypi “niewelay rakiduam” tati  pu layelu.

¿CHEM FEYPI JESUS LAN DUNGU MU?

7. Jesus, ¿chem feypi lan dungu mu?

⁷ Lalu Lasaru, Jesus feypifi tañi pu inanieetew: “Taiñ weni Lasaru ta dew umawtuy”. Jesus küpa feypilay Lasaru ñi ürkütulen, feymu feypi wüla: “Lasaru ta dew lay” (Juan 11:11-14). Femngechi Jesus trürümfi pu layelu tati fütra kon umawkülelu reke. Jesus feypilay Lasaru ñi amun ta wenu mapu, kam ñi trawüluwün tañi pu kuyfike che yem engün. Ka feypilay Lasaru ñi kutrankawkülen kütral mapu mu kam ñi wiño choyüngetun ka che mu. Welu may Lasaru fütra kon umawkülefuy reke. Kangelu rupa mu Jesus ka trürümfi pu layelu tati fütra kon umawkülelu reke. Wiñomongeltufilu ta Jayro ñi ñawe, Jesus feypi: “Tati pichidomo ta lalay. Umawküley müten tati” (Luka 8:52, 53).

8. Chaw Jewba, ¿dewmaeiñmu taiñ layal? ¿Chumngelu kimnieiñ tüfa?

⁸ Welu Jewba, ¿dewmafi ta Adan ka Eva ñi layal? Femlay. Kidu dewmafi engu ñi küme feleal ka afnoal tañi mongen. Chaw Dios dewmafilu pu che tukulelfi ñi duam mew rumel mongeleal (Eclesiastés 3:11). Pu chaw ayükelay tañi pu fotüm ka ñawe ñi füchayal kam layal. Ka femngechi Chaw Jewba ayükelay. Doy may, kidu dewmaeiñmu taiñ rumel mongeleal. Welu, ¿chumngelu lakeiñ?

¿CHUMNGELU LAKEIÑ?

9. Jewba ñi feypifiel ta Adan ka Eva, ¿chumngelu pepilfalngefuy?

⁹ Eden lof mu, Jewba feypifi ta Adan: “Iñmuaymi itrokom fün anümka müleyelu ti anümkawe mew, welu ikefilnge ti anümka wülkelu ñi kimngeael ti küme dungu ka ti wesa dungu. Ikefilnge tüyechi anümka ñi fün, fey ifilmi tati, rüf feyngey tami layael” (Génesis 2:9, 16, 17). Jewba ñi feypifiel ta Adan müna kimfali ka küdawngelafuy ñi inangeal. Kafey Jewba felefuy ñi feypiafiel ta Adan ka Eva chem femafuy ka femlayafuy engu. Fey engu allkütufule ta Jewba, pengelafuy ñi yamniefiel ta Jewba ñi Ngünechen-ngen. Ka pengelafuyngu fente ñi mañumniefiel kom ti küme dungu ñi eluetew Chaw Jewba.

10, 11. 1) Weküfü, ¿chumngechi welulkafi ta Adan ka Eva? 2) ¿Chumngelu küdawngelafuy Adan ka Eva ñi feyentuafiel ta Chaw Dios?

¹⁰ Welu Adan ka Eva eluwingu ñi allkütunoafiel ta Jewba. ¡Müna weda! Weküfü feypifi ta Eva: “¿Fey chem pieymumew anta Ngünechen? ¿Feypi tamu inoafiel kiñe anümka ñi fün no rume mülelu ti anümkawe mew?”. Fey Eva wiñoldunguy: “Kom tati anümka ñi fün iyafuyu, welu ngelay tayu iyafiel rangi ti anümkawe mew mülechi anümka ñi fün. Ngünechen ta feypieyumew tayu inoafiel ka tayu tunoafiel rume tüyechi anümka ñi fün, fey femliyu tayu layael” (Génesis 3:1-3).

¹¹ Fey Weküfü feypifi: “Feyngelay tamu layael. Ngünechen ta küme kimniey ifilmu tüfeychi anümka ñi fün, kimaymu tati kümeke dungu ka tati kümenolu, fey ta famngechi ta Ngünechen reke ta feleaymu” (Génesis 3:4-6). Weküfü küpa rakiduamelfi ta Eva ñi kidu dullial chem ñi kümen ka kümenon. Kafey koylatulfi ka feypifi ñi lanoal ifile feychi fün. Feymu Eva ifi, ka elufi tañi wentru. Welu kidu engu kimniefuy Jewba ñi feypietew: ñi inoafiel feychi fün. Tüfa küdawngelafuy, rüfkünu kimfalngefuy ka pepilfalngefuy llemay. Feymu Adan ka Eva allkütunofilu ta Jewba, famentufi ñi feypietew. Femngechi pengelingu ñi yamnienofiel tañi Wenu Chaw. Nielafuy engu chumngelu ñi feyentunoafiel ta Chaw Dios.

12. Jewba, ¿chumngelu weda duamnagi ñi femün Adan Eva engu?

¹² Adan ka Eva pengelingu ñi yamnienofiel tañi Wenu Chaw, feymu müna weda duamnagi Jewba. Rakiduamnge, müna yafüluwülmi tami küme kimeltuafiel tami fotüm kam püñeñ, welu kidu kayñetuelmu ka eluwle ñi femal kidu ñi piel müten, ¿chum duamnagafuymi? ¡Kutrantupiwkeafuymi llemay!

13. Adan feypingey: “Mapu mew ta wiñotuaymi”, ¿chem pin ta tüfa?

¹³ Tüfachi kurewen ñi mongen aflayafuy. Welu kulpalu, larpuy engu. Feymu Jewba feypifi ta Adan: “Mapu anta eymi, fey mapu mew ta wiñotuaymi” (papeltunge Génesis 3:19). ¿Chem pin ta tüfa? Petu ñi dewmangenon, Adan trüfür mapungefuy, nielafuy mongen. Fey lalu wiño trüfürngetuy chumngechi felefuy petu ñi dewmangenon (Génesis 2:7). Feymu lalu Adan, niewetulay mongen.

14. ¿Chumngelu lakeiñ?

¹⁴ Adan ka Eva allkütufule ta Jewba, petu mongeleafuy fantepu mu. Welu allkütunofilu, kulpayngu ka larpuyngu. Müley kiñeke kutran pu chaw ñi rulpalelkefiel tañi pu fotüm ka ñawe. Ka femngechi feley tati kulpan. Kom iñchiñ kulpafengeiñ taiñ choyüngen mu müten, feymu lakeiñ (Romanu 5:12). Welu Chaw Ngünechen pikelafuy ñi layal pu che, fey Biblia mu “kayñe” feypingey tati lan dungu (1 Korintio 15:26).

KIMFIEL TI RÜF DUNGU, LIFREKÜNUEIÑMU

15. Taiñ kimfiel ti rüf dungu, ¿chem koylake dungu mu lifrekünueiñmu?

¹⁵ Taiñ kimfiel ti rüf dungu ñi chumlen tati pu la, lifrekünueiñmu koylake dungu mu. Kiñeke religion kimeltukey taiñ nieel kiñe am kam püllü, fey tüfa kañpüle mongelekey lale rume ti che. Ka kimeltukeyngün taiñ pepi kelluafiel, feymu pu che kullikefi tati pu longkolechi religioso ñi ngillatuñmayaetew tañi pu che yem. Welu Biblia kimeltukeeiñmu ñi kutrankawkenon ka ñi weñangkükenon pu layelu. Pepi dungukelafiyiñ engün, ka kidu engün pepi dungukelaeiñmew. Pepi kellukelafiyiñ, ka kidu engün pepi kellukelaeiñmu. Kafey pepi wedalkakelaeiñmu, feymu llükakelafiyiñ. Kimnieiñ ti rüf dungu, feymu ngünenkakelaeiñmu kom tüfa.

16. Fentren religion, ¿chem kimeltukey pu layelu mu?

¹⁶ Tati koylake religion mew, Weküfü küpa ngünenkakeeiñmew ka küpa rakiduameleiñmew pu layelu ñi mongelen. Lale kiñe che, fillke religion kimeltukey ñi mongelen kañpüle tañi am kam püllü. ¿Tüfa tami kimeltungekeel? ¿Kam kimeltungeymi Biblia ñi feypin? Weküfü küpa püntünentukeeiñmu Jewba mu, feymu ngüchaltukuchekey ñi feyentual kom tüfachi koylake dungu.

17. Pu religion ñi kimeltukeel tañi rumel lüpümngeal pu wedake che, ¿chumngelu femngechi witrameldungukefi ta Jewba?

¹⁷ Fentren religion kimeltukey koylake dungu, femngechi witrameldungukefi Chaw Jewba. Kiñeke kimeltukey pu layelu ñi rumel lüpümngeal kütral mapu mew. Welu tüfa rüfngelay, Chaw Jewba femngechi kutrankakelafi pu che (papeltunge 1 Juan 4:8). Rakiduamnge, ¿chumngentuafuymi kiñe che lüpümüñmafile tañi fotüm ñi kuwü, femngechi ñi kutrankayafiel? “¡Müna weda che!” piafuymi. Küpa weniyelayafuymi. Ka femngechi Weküfü küpa rakiduamelafeiñmew ñi femngen ta Jewba.

18. ¿Chumngelu llükalayafiyiñ pu layelu?

¹⁸ Kafey kiñeke religion kimeltukey ñi püllüngeketun pu layelu. Feypikeyngün taiñ kümelkayafetew kam rume wedalkayafetew pu layelu, feymu müley taiñ ngillatuafiel ka ayüwelafiel. Fentren che feyentukey tüfachi koylake dungu, feymu llükakefi pu layelu, ngillatukefi ka küpa ayüwelkefi engün. Welu pu layelu chumkelayngün rume, feymu ngelay taiñ llükayafiel. Jewba dewmaeiñmew, ka iñchiñ taiñ Ngünechen tati, feymu ngillatuafiyiñ ka ayüwelafiyiñ ta kidu müten (Apokalipsi 4:11). Welu femngechi femkelay pu che feyentukelu ti koylake religion.

19. Taiñ rüf kimnieel ñi chumlen tati pu la, ¿chumngechi kellukeeiñmu?

¹⁹ Rüf kimnieiñ ñi chumlen tati pu la. Tüfa kellukeeiñmu taiñ feyentuwenoafiel ti koylake religion. Kafey kellukeeiñmu taiñ maneluwal Jewba taiñ müna kümelkayaetew küpalechi antü mu.

20. ¿Chem inaduamaiñ küpalechi chillkatun mu?

²⁰ Fütra kuyfi mu, kiñe wentru poyekefilu ta Jewba, Job pingelu, ramtuy: “Lale kiñe wentru, ¿ka wiñomongepetuafuy may?” (Job 14:14). Müna ayüwelaeymu Biblia ñi feypin feychi dungu mu. Küpalechi chillkatun mu inaduamafiyiñ.

1, 2. ¿Chem dungu mu püresuleiñ?

RAKIDUAMNGE chum duamnagafuymi rupafule tüfa: dalluntukungelmi koyla dungu mu, fey elngeymi tami püresuntukungeal kom tami mongen mu. Turpu lifretripalayaymi, niewelaymi maneluwün, chumlayafuymi rume. Welu perumeymi iney tami pepi montulaetew, fey küpa kellueymu.

² Iñchiñ femngechi reke feleiñ. Püresuleiñ reke lan dungu mu. Ka chumlayafuiñ rume taiñ lifretripayal. Welu Chaw Jewba niey newen taiñ montulaetew, ka küpa kellueiñmew, feymu feypikünueiñmew: “Ti kiñelewechi kayñe, tati lan dungu ka femngechi wewngeay” (1 Korintio 15:26).

3. Jewba, ¿chumay taiñ montulaetew lan dungu mu?

³ Feley llemay, Jewba apümafi ti lan dungu. Feymu müna küme duamküleaiñ lawenole pu che. Welu fey müten femlayay ta Chaw Dios, kafey wiñomongeltuafi pu layelu. Kidu feypikünuy: “Itrokom che wiñomongetuay” (1 Korintio 15:22). ¡Müna ayüwküleaymi femtripale tüfa!

LALE KIÑE TAIÑ PU CHE KAM WENI

4. 1) Lale kiñe taiñ pu che kam weni, ¿chem yafültukuafeiñmu? 2) ¿Chem kümeke weni niekefuy Jesus?

⁴ Lan mu taiñ pu che kam weni, müna weñangkükeiñ. Chumlayafuiñ rume ñi wiño witratual ta kidu, feymu rume weda duamnagkeiñ. Welu Biblia rüf yafültukukeeiñmu (papeltunge 2 Korintio 1:3, 4). Chaw Jewba ka Jesus rume ayüniey engu ñi wiñomongeltuafiel taiñ pu che lalu. ¿Chumngelu (chemu) kimnieiñ tüfa? Jesus mülepalu Mapu mu, witrankontumekefuy ta Lasaru ka tañi epu lamngen, Marta ka Maria pingelu. Müna küme weniwen-ngekefuyngün. Biblia feypiley: “Jesus rume piwkeyeniefuy ta Marta ka Maria ñi domo lamngen ka Lasaru” (Juan 11:3-5).

5, 6. 1) Jesus ngüneduamfiel pu che ñi ngüman Lasaru ñi lan mu, ¿chumi kidu? 2) ¿Chumngelu yafültukukeeiñmu ngüneduamfiel Jesus ñi weñangkünagün?

⁵ Welu kiñe antü Lasaru lay. Fey Jesus yafültukumefi ta Marta ka Maria. Kimlu Marta ñi fülpan Jesus, tripay ti waria mu ñi llowmeafiel. Kidu ayüwkülefuy ñi pefiel ta Jesus, welu feypifi: ‘Mülekafulmi tüfa mew, iñche ñi lamngen lalayafuy’. ‘Alüñmay ñi akual Jesus’ rakiduampelay Marta. Fey wüla Jesus ngüneduami Maria ñi ngümameken. Jesus ngüneduamfiel pu che ñi ngüman, müna kutrantupiwkey, fey ina ngümay (Juan 11:21, 33, 35). Ka femngechi lan mu taiñ pu che kam weni, müna weñangkükeiñ. Fey Jesus ngüneduamfiel tüfa, ka kutrantupiwkekey.

⁶ Müna yafültukukeeiñmu ngüneduamfiel Jesus ñi weñangkünagün. ¿Chumngelu? Tüfa kimeltueiñmu Jesus ka Chaw Jewba ñi üdekefiel ti lan dungu (Juan 14:9). Kafey Jewba niey ta newen ñi apümafiel ti lan dungu, ka feypikünuy ñi apümafiel pichin antü mu.

“¡LASARU, TRIPATUNGE TÜFEY MEW!”

7, 8. 1) Marta, ¿chumngelu pilafuy ñi nülangeal ti lolo chew ñi elngen Lasaru? 2) ¿Chumi Jesus?

⁷ Lasaru elngey kiñe lolo mew, fey ñi konwe takukünungey kiñe fütra kura mew. Jesus fülkonpuy üye mew, fey feypi: “Kiñe püle nentufimün ti kura”. Dew meli antüy ñi tukukünungeel lolo mew ta Lasaru, feymu Marta pilafuy ñi nülangeal ti lolo (Juan 11:39). Welu kidu kimlafuy ñi chumal ta Jesus.

⁸ Feypifi ta Lasaru: “Tripatunge tüfey mew”. Fey “ti dew lafulu tripapatuy, ñi epu kuwü ka ñi epu namun trariley kiñe pañu mew” (Juan 11:43, 44). Marta ka Maria afmatulewey. ¡Lasaru wiño witraturkey! Trawüluwtuy tañi pu che ka tañi pu weni engün. Feymu pangkokafingün ka nütramkafingün. ¡Afmatufali! Feley llemay, Jesus wiñomongeltufi ta Lasaru.

“PICHIDOMO, EYMI TA FEYPIPEEYU, WITRATUNGE”

9. ¿Iney elueyew newen ta Jesus ñi wiñomongelchetual?

⁹ Jesus, ¿kidu tañi pepiluwün mu wiñomongelchetuy? Femlay. Fey, ¿iney elueyew ta newen? Jewba llemay. Feymu petu ñi wiñomongeltunofiel ta Lasaru, Jesus llellipufi ta Jewba (papeltunge Juan 11:41, 42). Welu Lasaru müten wiñomongeltulafi. Biblia ka nütramkay ñi rupan kiñe pichi malen 12 tripantu nielu. Tañi chaw Jayro kimlafuy chem femal, rume kutrankülelu kay tañi kiñen ñawe. Fey llellipumefi ta Jesus ñi tremoltuafiel. Petu dungumekefilu ta Jesus, kiñeke wentru feypimeeyew: “Tami ñawe ta dew lay. ¿Chumael anta aporiamekefimi tami küpalafiel tati Kimeltufe?”. Welu Jesus feypifi: “Llükakilnge. Feyentunge müten ta iñche mew, fey tami ñawe ta mongetuay”. Epe puwlu engu Jayro ñi ruka mu, Jesus ngüneduami pu che ñi ngümameken, fey feypifi engün: “Ngümakilmün. Tati pichidomo ta lalay. Umawküley müten tati”. Jayro ka tañi domo ramtuwpelay ñi chem pifel. Jesus feypifi tati pu che ñi tripayal, fey kidu, ti chaw ka ti ñuke konpuyngün chew ñi mülemum tati pichidomo. Piwkeyen mu nüñmafi ñi kuwü, fey feypifi: “Pichidomo, eymi ta feypipeeyu, witratunge”. Fey tati pichi malen witrafemtuy ka eluwi ñi dungual. Jesus wiñomongeltufi tati pichidomo, feymu ¡müna ayüwpelay tañi chaw ka ñuke! (Marku 5:22-24, 35-42; Luka 8:49-56). Jesus ñi femün mu, Jewba kümelkafi tüfachi kurewen. Longkontukunieyngu tüfa, fill antü adkintufilu tañi pichidomo.a

10. Biblia ñi nütramkan tañi wiñomongetun kiñeke che, ¿chumngelu fente falin-ngey?

¹⁰ Jesus ñi wiñomongeltuelchi pu che ka wiño latuy. Welu femfulu rume, tüfachi nütram elukeeiñmew maneluwün. Feymu fente falin-ngey. Ka pengelkey Jewba ñi küpa wiñomongeltuafiel pu layelu. ¡Femay llemay!

ÑI WIÑOMONGETUN KIÑEKE CHE KUYFI MU, ¿CHEM KIMELTUEIÑMU?

11. Chumngechi ñi feypin Eclesiastés 9:5, ¿chumlefuy Lasaru lalu?

¹¹ Biblia feypi: “Pu layelu chem dungu no rume kimwetukelayngün” (Eclesiastés 9:5). Ka femngechi femi Lasaru. Lalu kidu, chem no rume kimwetulafuy. Umawkülefuy reke, chumngechi ñi feypin Jesus (Juan 11:11).

12. ¿Chumngelu kimnieiñ ñi rüf wiñomongetun Lasaru?

¹² Jesus wiñomongeltufilu ta Lasaru, pu che adkintulefuy. Jesus ñi pu kayñe ka kimniefuyngün ñi femün tüfachi afmatufal dungu. Kafey kimfali ñi feyngen Lasaru tañi wiñomongetun (Juan 11:47). Fentren che pemeeyew ta Lasaru, fey feyenturpuy Jesus ñi küpan Chaw Dios mu. Jesus ñi pu kayñe ayülay tüfa, feymu küpa langümfingün ta kidu ka Lasaru (Juan 11:53; 12:9-11).

13. ¿Chumngelu maneluwküleiñ Jewba ñi wiñomongelchetual?

¹³ Jewba akordaniefi tati pu layelu kidu ñi wiñomongeltuafiel. Feymu Jesus feypi “itrokom tati pu layelu” ñi wiñomongetual (Juan 5:28). Jewba dewmay itrokom mülelu. Feymu niey ta newen ñi wiñomongelchetual. Welu ñi femal tüfa, duamfali ñi akordanieafiel ñi chumngen ka ñi rupan feychi che. ¿Rüf femafuy tüfa? Rakiduamnge Biblia ñi feypin mu: “Pürakintumün kallfü wenu mew. ¿Iney am ta dewmay kom feychi dungu? Feychi entukelu ñi rakingen mu tati pu wangülen, kiñe trokiñ weychafe reke, ka kom mütrümkefi tañi üy mew. Fütra pepiluwün-ngelu am ka afmatufali ñi newen, fey kiñe no rume ñamkülelay” (Isaías 40:26). Feley llemay, müley rume fentren wangülen, welu Chaw Jewba akordaniefi kiduke tañi üy. Feymu ñi wiñomongeltuafiel kiñe che, ¿akordanoafulu am pu layelu ñi chumngen ka ñi rupan?

14, 15. Job ñi feypin, ¿chem kimeltueiñmu?

¹⁴ Kiñe kuyfi wentru poyekefilu ta Jewba, Job pingelu, maneluwkefuy ñi wiñomongetual pu layelu. Kidu ramtuy: ‘Lale kiñe che, ¿ka wiñomongepetuafuy may?’. Fey feypifi ta Jewba: “Eymi mütrümaymi, iñche llowdunguaeyu. Ayüaymi tami femün kidu tami kuwü mew”. ¿Chem kimeltueiñmu tüfa? Jewba rume ayüniey ñi wiñomongeltuafiel pu layelu (Job 14:13-15).

¹⁵ Müna yafültukukeeiñmu kimfiel tüfa. Eymi kay, ¿chumngentukefimi ñi wiñomongetual pu layelu? Ramtuwkepelaymi: “Iñche tañi pu che ka pu weni kay, ¿ka wiñomongepetuay may?”. Biblia kimeltukey iney ñi wiñomongetual ka chew ñi müleal engün. Inaduamaiñ.

“ALLKÜAY TA KISU ÑI DUNGUN, FEY TRIPAPATUAY ENGÜN”

16. Pu wiñomongetualu, ¿chumngechi feleayngün Mapu mew?

¹⁶ Pu che wiñomongetulu kuyfi, trawütuy tañi pu che engün Mapu mew. Ka femngechi rupayay küpalechi antü mu. Welu doy küme feleayngün. ¿Chumngelu? Wiñomongetule engün, ti Mapu felelayay famülke mew reke. Ngewelayay awkan, weychan, kutran ka chem weda dungu no rume. Ka pu wiñomongetualu rumel mongeleafuy Mapu mu.

17. ¿Iney engün am wiñomongetuay?

¹⁷ ¿Iney engün am wiñomongetuay? Jesus feypi ñi wiñomongetual “itrokom tati pu layelu” Jewba ñi longkontukunieel (Juan 5:28, 29). Kafey Apokalipsi 20:13 (TNM) feypi: “Tati lafken wültuy tati pu layelu mülelu fey mu, ka tati lan ka Rüngan wültuy tati pu layelu mülelu fey mu”. Feley llemay, rume fentren che wiñomongetuay. Kafey apostol Pablo feypi ñi wiñomongetual “pu norngechi che ka pu norngenochi che”. Biblia feypi: “Ka tüfachi pu wentru reke, iñche ka maneluwkülen Chaw Ngünechen mew, ñi wiñomongetual pu norngechi che ka pu norngenochi che” (Hecho 24:15, TNM). ¿Chem pin ta tüfa?

18. ¿Iney engün am tati “pu norngechi che” ñi wiñomongetual?

¹⁸ ¿Iney engün am tati “pu norngechi che”? Tüfa engün mew koneltuley pu rüf poyekefulu ta Jewba, welu lalu petu ñi küpanon Jesus. Tüfa engün wiñomongetuay Mapu mew. Kiñeke engün ta Noe, Abraam, Sara, Moyse, Rut ka Ester. Ebrew kapitulo 11 mu doy papeltuafuymi tüfachi pu che mew. ¿Iney engün ka koneltuley tati “pu norngechi che” mu? Pu rüf poyekefilu ta Jewba lalu famülke mew. Kidu engün ka wiñomongetuay.

19. 1) ¿Iney engün am tati “pu norngenochi che”? 2) Jewba, ¿chem eluaeyew engün?

¹⁹ Tati “pu norngenochi che” kay, ¿iney engün am? Tüfa engün mew koneltuley fentren che allkütunolu ti rüf dungu Jewba mew. Lalu engün rume, Jewba longkontukunieeyew, fey wiñomongeltuaeyew ka eluaeyew ñi kimafiel ka serfiafiel.

20. ¿Iney engün wiñomongetulayay?

²⁰ Fey, ¿itrokom tati pu layelu wiñomongepetuay may? Femlayay. Jesus feypi kiñeke che ñi wiñomongetunoal (Luka 12:5, TNM; inaduamnge ti kimelün dungu 17). ¿Iney engün wiñomongetulayay? Pu wedake che Jewba ñi adkiñ mew, ka küpa elkünunofilu ñi weda rüpü. ¿Iney am feypiay ñi wiñomongetunoal kiñe che? Jewba, kidu tati doy fütra Kues. Welu ka elkünufi ta Jesus “kiñe kues reke tati pu mongelelu mew ka tati pu lalu mew” (Hecho 10:42).

PU WIÑOMONGETULU ÑI AMUAL WENU MAPU MEW

21, 22. 1) Pu wiñomongetulu ñi amual wenu mapu mew, ¿chem kuerpu elungekey? 2) ¿Iney wüne wiñomongetuy tañi amual wenu mapu mew?

²¹ Biblia ka feypi kiñeke che ñi wiñomongetual tañi amual wenu mapu mew. Tüfachi pu che elungekelay kiñe kuerpu iñchiñ reke, püllüngeketuy engün.

²² ¿Iney wüne wiñomongetuy tañi amual wenu mapu mew? Jesus tati (Juan 3:13). Küla antü rupay ñi lan mu, Jewba wiñomongeltueyew, welu elungelay kiñe kuerpu che reke (Salmo 16:10; Hecho 13:34, 35). Apostol Pablo feypi: “Tüfey engün nielu ta kuerpu pepi konlayay Ngünechen tañi longko ülmen mülewe mew” (1 Korintio 15:50). Feymu, wiñomongetulu Jesus, kiñe newen-ngechi püllüngetuy (1 Korintio 15:3-6). Biblia feypi kakelu che ñi ka femngechi wiñomongetual.

23, 24. 1) Jesus, ¿iney feypifi “eymün ta pichinngeymün”? 2) ¿Tunten chengeyngün?

²³ Epe puwlu ñi layal Jesus, feypifi tañi pu weni: ‘Amuan tamün pepikaleluwal kiñe küme mülewe’ (Juan 14:2). Femngechi pengeli kiñeke kristiano ñi wiñomongetual wenu mapu mew. ¿Tunten che? “Eymün ta pichinngeymün”, pifi Jesus tati pu amualu üye mew (Luka 12:32). Apostol Juan feypi ñi tunten chengen. Kidu kiñe afmatun dungu pey, fey adkintufi ta Jesus wenu mapu mew “witralelu Sion pingechi wingkul mew. Kompañnieeyew pataka meli mari meli warangka che” (Apokalipsi 14:1).

²⁴ Puwlu Jesus ñi ngünenieal wenu mapu mu, wiñomongetuy pu amualu üyew. Femngechi feypi Biblia (1 Korintio 15:23). Feychi antü dew akuy, fey epe kom pu 144.000 dew wiñomongetuy wenu mu. Welu petu mülewey kiñeke engün Mapu mu. Fey lale, wiñomongefemtuay wenu mapu mew. Welu epe kom pu che wiñomongetuay Mapu mu küme elkünungetule tüfa, fey aflayay ñi mongen.

25. ¿Chem inaduamaiñ ti küpalechi chillkatun mu?

²⁵ Pichilewey taiñ lifrekünuaetew Jewba lan dungu mu, fey iney no rume lawelayay (papeltunge Apokalipsi 21:4). Welu ramtuwkeymi: Tati pu amualu wenu mapu mew, ¿chumpuayngün? Biblia feypi ñi koneltuleal engün kiñe gobierno wenu mew, fey ñi kiñeñtrür ngünenieal Jesus engün. Ti küpalechi chillkatun mu doy inaduamaiñ feychi gobierno mew.