KIMELÜN DUNGU
1 JEWBA
Jewba pingey Chaw Ngünechen. Kiñeke che adümuwkelu Biblia dungu mew pengeli chem küpa feypi tüfachi üy: “Femkelu tañi Femürpual”. Jewba fey tati kom newen nielu. Kidu dewmafi itrokom ñi mülen ka niey newen ñi femal chem rume ñi ayükeel.
Ebrew kewün mu, Chaw Dios ñi üy niey meli wirin. Tüfa adentuley tati letra YHWH kam JHVH. Tati Antiguo Testamento wirintukungelu Ebrew kewün mu, Chaw Dios ñi üy wirikonküley epe 7.000 rupa. Mapudungun mew rulpadungungey kiñeke trokiñ Biblia. Fey mu kiñe rupa feypi Jehovah ka 17 rupa feypi Jehova (Génesis [Llitun] 2:4, 5, 7, 8, 9, 15, 16, 18, 19, 21, 22; 3:8, 9, 13, 14, 21, 22, 23, Ngünechen ñi Neyüntükumuyümchi Chillka [1901]). Wall Mapu, kaleketuy chumngechi ñi feypingeken Jewba ñi üy. Pu che rulpakefi chumngechi ñi feypingeken kidu tañi kewün dungu mew.
2 BIBLIA “WIRINGEY NGÜNECHEN TAÑI ADKÜNUEL” MEW
Biblia Chaw Ngünechen mu küpay. Kidu adniefi kiñeke wentru ñi wirintukuafiel. Chaw Ngünechen ñi femün trürümngeafuy kiñe longkolelu ñi femken mu. Tüfa elukefi werkün dungu tañi werken, fey ñi kimeldunguafiel. Ka femngechi, kidu tañi newen mu Jewba adkünufi kiñeke wentru ñi wirintukuñmangeal tañi rakiduam. Kiñeke mu pewma mu, ka kakelu rupa pengelelkefi kiñeke dungu, fey wirintukufingün tüfa.
3 ¿CHEM FEYPIKÜNUNGEY TI MESIA MU?
Biblia mu wirikonküley fillke dungu ñi rupayal ti Mesia. Kom tüfa femtripay Jesus mu müten. Inaduamnge ti wichulechi dungu “¿Chem feypikünungey ti Mesia mu?”.
▸ 2 chillkatun, parrafo 17, kimal dungu
4 CHAW JEWBA, ¿CHUMNGELU DEWMAY TI MAPU?
Chaw Ngünechen dewmafi ti Mapu kiñe küme mülewe ngeal, fey ñi müleal tañi pu piwkeyeetew. Jewba petu ayüniey ñi femtripayal tüfa. Pichilewey antü ñi apümafiel ti wedake dungu ka eluafiel pu che ñi afnoal tañi mongen.
5 SATANA TI WEKÜFÜ
Satana fey ta kiñe püllü. Kidu wüne eluwi ñi kayñetuafiel ta Chaw Dios. Feymu üytukulelngey Satana, tüfachi üy küpa feypi “Kayñetufe”. Kafey koylake dungu kimelkey Chaw Dios mu ka welulkakefi pu che. Feymu ka Weküfü pingekey, tüfachi üy küpa feypi “Dalluntukufe”.
6 PU KÜMEKE PÜLLÜ
Petu ñi dewmanofiel ti Mapu, Jewba dewmay pu kümeke püllü ñi müleal wenu mapu mu. Müley fentren püllü (Apokalipsi 5:11). Trürlay engün ka kiduke niey ñi üy. Ñom piwkengeyngün, feymu pilayngün ñi poyeaetew pu che. Kiñeke püllü doyküleyngün kakelu mew ka trürlay ñi küdaw engün. Kiñeke küdawkeyngün Jewba tañi mülewe mu, wülkeyngün Chaw Dios ñi werkün dungu, adniekeyngün ti amuldungun küdaw, ingkañpekefingün ka adniefingün Chaw Dios ñi pu che. Kafey Jewba jusgafilu kiñe che, pu kümeke püllü femkeyngün kidu ñi feypin (Salmo 34:7; Apokalipsi 14:6; 22:8, 9). Küpalechi antü mu, kompañafingün ta Jesus Armagedon awkan mu (Apokalipsi 16:14, 16; 19:14, 15).
▸ 3 chillkatun, parrafo 5; 10 chillkatun, parrafo 1
7 KULPAN
Taiñ rakiduamkeel, femkeel kam nieel taiñ piwke mu kiñewkülenole Jewba ñi ayükeel mu, fey ta kiñe kulpan. Taiñ kulpafe chengen püntünentukeeiñmu Chaw Dios mu, feymu kidu elukeeiñmu kümeke ngülam ka falinke kimeltun. Tüfa kellukeeiñmu taiñ weñangkülnoafiel taiñ Fütra Chaw. Ellaka mu, Jewba ñi dewmael kom tutelkalefuy. Welu Adan engu Eva eluwi ñi feyentunoafiel ta Jewba, fey kulpayngu. Niewelayngu tutengechi mongen, füchayngu ka larpuyngu. Adan rulpaleleiñmu ñi kulpan, feymu iñchiñ ka füchakeiñ ka lakeiñ.
▸ 3 chillkatun, parrafo 7; 5 chillkatun, parrafo 3
8 ARMAGEDON
Tüfa ta Chaw Dios ñi awkan, weychan. Tüfa mew apümkangeay kom wedake dungu ka pu kiñewkülelu Weküfü engu.
▸ 3 chillkatun, parrafo 13; 8 chillkatun, parrafo 18
9 CHAW NGÜNECHEN ÑI NGÜNENIEN
Tüfa kiñe gobierno ñi elkünuel Chaw Dios wenu mapu mu. Jesus longko ülmenküley. Küpalechi antü mu, tüfachi gobierno mew Jewba apümafi kom wedake dungu. Chaw Dios ñi Ngünenien gobiernayafi kom ti Mapu.
10 JESUCRISTO
Jewba wüne dewmafi ta Jesus, petu chem ñi dewmanon rume. Werküfi ta Mapu mu ñi lapayal kom pu che mu. Langümngelu Jesus, Jewba wiñomongeltufi. Fewla Jesus Longko Ülmenküley Chaw Ngünechen ñi gobierno mu wenu mapu mew.
11 TATI 70 SEMANA
Biblia feypikünuy chumül ñi kimfaluwal ti Mesia: rupale wüla 69 semana.
Kiñe semana niey regle antü. Welu feypikünungelu tüfachi 69 semana, kiñe “antü” nielay 24 ora. Doy may kiñe “antü” fey ta kiñe tripantu, chumngechi ñi feypiel Biblia (Números 14:34; Ezequiel 4:6). Feymu kiñe semana niey 7 tripantu, ka 69 semana niey 483 tripantu. Tüfachi 69 semana eluwi ñi rakingeal 455 tripantu petu ñi mülepanon Jesus (p. m. j.). Feychi tripantu mu Neemia puwi Jerusalen mu ka eluwi ñi wiño dewmatual ti waria (Daniel 9:25; Nehemías 2:1, 5-8). Fey rakifiliyiñ 483 tripantu, puwaiñ 29 tripantu taiñ mülen antü mew (t. m. a.). ¡Feychi tripantu Jesus fawtisawi! Fey ti Mesia ngerpuy (Luka 3:1, 2, 21, 22).
Welu mülewey kangelu semana ñi feypikünungeel, regle tripantu tati. Feypikünungey ñi langümngeal ti Mesia feychi semana mu. Tüfa femtripay ti 33 tripantu mu. Fey konlu 36 tripantu, pu kristiano eluwi ñi amuldunguafiel itrokom che, judiu tuwün-ngenolu rume (Daniel 9:24-27).
12 TRINIDAD, KIÑE KOYLA KIMELTUN
Biblia kimeltukey tüfa: Jewba dewmafi itrokom mülelu. Kidu dewmafi ta Jesus, petu chem ñi dewmanon rume (Kolosense 1:15, 16). Jesus taiñ Fütra Chaw Ngünechen no tati. Kidu trürümuwkelay Chaw Dios mu. Welu may feypi: ‘Kidu doy wünen-ngey iñche mew’ (Juan 14:28; 1 Korintio 15:28). Welu kiñeke religion kimeltukey tüfa: ti Chaw, ti Fotüm, ka ti lif küme püllü kiñe Ngünechen-ngey müten. Tüfachi kimeltun Trinidad pingey, welu rüfngelay. Biblia kiñe rupa no rume feypilay “Trinidad”.
Mapudungun mu, tati Biblia Ngünechen ñi Küme Dungu feypilu lif küme püllü, tüfa kiñe rüf püllü no, doy may Ngünechen tañi newen. Tüfa mew Jewba femkey kidu tañi ayükeel. Feymu, Biblia feypi pu kristiano wünen siglo mu ‘apoy engün’ Chaw Dios tañi newen mu. Kafey Jewba feypi ñi ‘wütruñmayafiel’ tañi pu che tañi newen mu (Hecho [Femyefel] 2:1-4, 17, NCH).
▸ 4 chillkatun, parrafo 12; 15 chillkatun, parrafo 17
13 TATI KÜRUS
Pu rüf kristiano niekelafuyngün kürus tañi poyeafiel ta Chaw Ngünechen. ¿Chumngelu?
Pu koylake religion yeniey fentren tripantu tañi poyekefiel ta kürus. Fütra kuyfi mew kiñeke che poyekefuy ti Antü ka femkefuy pekan kudumuwün ñi poyeafiel koylake dios. Ñi femal tüfa müna falintukefuyngün ti kürus. Rupalu 300 tripantu Jesus ñi lan mu, pu kristiano niekelafuyngün kürus ñi poyeafiel ta Chaw Dios. Welu ti longkolelu Roma mu, Constantino pingelu feypifi tati pu kristiano ñi nieal ti kürus ñi poyeafiel ta Chaw Dios. Femngechi doy fentren che ñi konal kristiano feyentun mu. Welu Jesus koneltulekelafuy kürus dungu mu. Feymu kiñe falin lifru feypi: “Pu kuyfike che petu ñi akunon Jesus dew wimtulerkefuy nieal ta kürus. Ka femngechi wimtun niey pu kristiano ngenolu” (New Catholic Encyclopedia).
Jesus langümngelay kiñe kürus mew. Tati griego kewün rulpadungungelu “kürus”, rüf küpa feypi “mamüll witralelu” kam “orkon”. Kiñe falin lifru feypi: Tüfa ‘turpu küpa feypilay epu kakülkülechi mamüll [...]. Ka femngechi griego kewün pünengelu [Nuevo Testamento mu] chew no rume feypikelay epu mamüll’ (The Companion Bible). Jesus lay kiñe orkon mamüll mu witralelu.
Taiñ poyeafiel Jewba, kidu ayükelay taiñ nieal adentun (Éxodo 20:4, 5; 1 Korintio 10:14).
14 TRAWÜN JESUS TAÑI LAN ÑI AKORDANGEAL
Pu kristiano werküngekey ñi akordayal Jesus tañi lan. Pu judiu femkefuyngün ti Paskua 14 konchi Nisan küyen mu. Feychi antü pu kristiano akordakeyngün Jesus tañi lan fill tripantu mu. Taiñ kalendario mu, tüfachi antü müleafuy marzo kam abril küyen mu. Tüfachi trawün mu rulpangekey kofke ka pulku, tüfa adentuley Jesus ñi kuerpu ka ñi mollfüñ. Pu dullingelu ñi amual wenu mapu tañi ngünenieal Jesus engün ikeyngün ti kofke ka putukeyngün ti pulku. ¿Chumkeyngün pu maneluwkülelu ñi rumel mongeleal Mapu mu? Nor piwke mu amukeyngün ti Trawün Jesus tañi lan ñi akordangeal, welu ikelayngün ti kofke ka putukelayngün ti pulku.
15 AM
Tati Biblia mapudungun mu, ti ebrew dungun néfesch ka ti griego dungun psykjé kiñeke mu rulpadungungey “am” (alma). Welu Biblia kimeltukelay taiñ nien kiñe am amulealu ñi mongen laliyiñ. Rüfkünu may, ti ebrew dungun néfesch ka ti griego dungun psykjé küpa pengelkey 1) kiñe che, 2) kiñe kulliñ kam 3) ti mongen ñi nieel kiñe che kam kulliñ. Feymu ñi rulpadunguafiel néfesch kam psykjé, ti Biblia mapudungun mu fentren rupa feypiley “che”, “kulliñ” kam “mongen”. Inaduamaiñ kiñeke dungu:
Kiñe che. “Feychi mülelu ta Noe [...] pura che müten [griego kewün mu, psykjé] montuy” (1 Pedro 3:20). Tüfa mu, psykjé küpa feypi pu che: Noe, tañi domo, tañi küla fotüm ka tañi küla püñmo.
Kiñe kulliñ. “Feypi ta Ngünechen: ‘Mülepe ta kulliñ [ebrew kewün mu, néfesch] ko mew niealu mongen ka ti pu challwa, ka femngechi mülepe tati pu üñüm müpüyawalu ta kürüf mew wente mapu.’ [...] Feymew Ngünechen feypi: ‘Mülepe mapu mew ta itrofill kulliñ [ebrew kewün mu, néfesch]’” (Génesis 1:20, 24).
Ti mongen ñi nieel kiñe che kam kulliñ. Jewba feypifi ta Moyse: “Dew lalu am kom pu wentru kintukefulu tami langümaetew [ebrew kewün mu, kintukefulu tami néfesch]” (Éxodo 4:19). Kafey Jesus mülepalu Mapu mu feypi: “Iñche tati küme kamañkefilu ti ufisa. Tati kamañkefilu ti ufisa wülkey ñi mongen kütu [griego kewün mu, psykjé] ñi pu ufisa mew” (Juan 10:11).
Kafey, kiñeke mu ti ebrew dungun néfesch ka ti griego dungun psykjé tüfa pengelkey kiñe che femkelu kiñe dungu ayüwün mu kam kom ñi pepiluwün mu (Deuteronomio 6:5; Matew 22:37). Kafey tüfachi ebrew ka griego dungun pengelafuy ñi ayünieel kam ñi küpa in pu che ka pu kulliñ. Ka küpa feypiafuy ti la ñi kuerpu (Números 6:6; Proverbios 23:2; Isaías 56:11; Ageo 2:13).
▸ 6 chillkatun, parrafo 4, kimal dungu; 15 chillkatun, parrafo 17
16 PÜLLÜ
Biblia mu, tati ebrew ka griego dungun rulpadungungelu “püllü”, pengelafuy fillke dungu. Welu rumel küpa feypi kiñe dungu taiñ pekenoel, kiñeke tüfa ti kürüf kam ti neyen ñi nieel pu che ka pu kulliñ. Kafey küpa feypiafuy pu kümeke püllü, pu wedake püllü ka Chaw Ngünechen ñi newen. Biblia kimeltukelay taiñ nien kiñe püllü amulealu ñi mongen laliyiñ (Éxodo 35:21; Salmo 104:29; Matew 12:43; Luka 11:13, TNM).
▸ 6 chillkatun, parrafo 4, kimal dungu; 15 chillkatun, parrafo 17
17 GEHENA
Gehena fey ta kiñe griego dungun. Biblia mu küpa pengeli ñi apümkangeal pu wedake che, fey ñi wiñomongetunoal. Tati Biblia mapudungun mu, Gehena rulpadungungey “kütral mapu”. Welulkaley ñi feypin tüfa. Gehena pingey kiñe trokiñ mapu fülkülelu Jerusalen mu. Üye mu lüpümngekefuy ka apümngekefuy ti pod. Chem no rume pengelkelay ñi lüpümngekefel ka kutrankangekefel che kam kulliñ üye mu Jesus ñi antü mew. Feymu ti Gehena pengelkelay kiñe mülewe chew ñi lüpümngekeel ka rumel kutrankangekeel pu la. Jesus nütramkalu Gehena mu, küpa pengeli pu wedake che ñi apümkangeal, ka ñi turpu wiñomongetunoal (Matew 5:22; 10:28, TNM).
18 TI NGILLATUN PADRENUESTRO PINGELU
Jesus kimeltufi tañi pu inanieetew chumngechi ngillatual, feymu entuy tüfachi ngillatun. Kimeltueiñmu taiñ famngechi ngillatual:
“Yamniengepe tami üy”
Feypingekey fillke koyla dungu Jewba mu, feymu llellipukeiñ ñi liftuñmangeal tañi üy. Tüfa femtripale, kom pu mülelu mapu mu ka wenu mu püramyeafingün ka yamnieafingün Chaw Ngünechen tañi üy.
“Küpape tami Ngünenien”
Llellipukeiñ Chaw Ngünechen tañi gobierno ñi femal tüfa: ngünenieafiel kom ti Mapu, küme mülewe künutuafiel ti Mapu ka apümafiel kom ñi ngünenieel Weküfü.
“Femngepe tami feypin [...] Mapu mu”
Chaw Dios ayüniey kom pu che ñi feyentunieetew tañi kulpafengewenoal ka ñi afnoal tañi mongen Mapu mu. Tüfa ñi ayükeel Jewba dewmafilu tati pu che. Feymu llellipukeiñ ñi femtripayal tüfa.
19 JESUS WÜLI TAÑI MONGEN IÑCHIÑ MU
Taiñ lifrekünuaetew kulpan mu ka lan dungu mu, Jewba wüli ti montulchen. Duamfalngefuy tüfa, fey taiñ wiñolelngetual ti mongen Adan ñi ñamümel ka taiñ tutewkületual Chaw Ngünechen engu. Chaw Dios werküfi ta Jesus ñi layal kom pu kulpafe mu. Jesus ñi lan mu, kom pu che maneluwküleiñ ñi afnoal taiñ mongen ka kulpafengewenoal.
▸ 8 chillkatun, parrafo 21; 9 chillkatun, parrafo 13
20 ¿CHUMNGELU FENTE FALIN-NGEY 1914?
Chaw Dios ñi gobierno eluwi ñi ngünenieal 1914 tripantu mu. Ñi feypikünungeel Daniel kapitulo 4 mu pengeli tüfa.
¿Chem feypikünungey? Tati longko ülmen Nafukodonosor pewmay Jewba tañi duam mu. Tüfa pewmay ñi katrüngeel kiñe fütra anümka. Fey ñi tremnoal, ti mutrung trarikünungey pañillwe ka kofre mu “regle medin antü” mew. Rupalu feychi “regle medin antü”, ti anümka wiño tremi (Daniel 4:1, 10-16).
¿Chem kimeltueiñmu? Tati fütra anümka, fey ta Chaw Dios ñi ngünenien. Doy 500 tripantu mu, Jewba elkünuy fillke longko ülmen Jerusalen mu, fey ñi ngünenieafiel pu israelche (1 Crónicas 29:23). Welu tüfa engün püntütripay Jewba mu, feymu afi ñi ngünenien engün. Jerusalen apümngey 607 tripantu mu petu ñi mülepanon Jesus (p. m. j.). Feychi mu eluwi ñi rakingeal ti “regle medin antü” (2 Reyes 25:1, 8-10; Ezequiel 21:25-27). Mülepalu Mapu mu, Jesus feypi: ‘Pu judiu tuwün-ngenolu lefkonpuay ka fill weda dungu femay ta Jerusalen waria mew, fey puwle wüla ti tripantu tañi fentepu feypikünungeel’ (Luka 21:24). Tüfa tati “regle medin antü”. Feymu tüfa aflay Jesus mülepalu Mapu mu. Jewba feypikünuy ñi elkünual kiñe Longko Ülmen afle wüla ti “regle medin antü”. Tüfachi Longko Ülmen fey ta Jesus. Kidu ñi femün mu, pu poyekefilu ta Chaw Dios llowayngün fentren kümelkan ka aflayay ñi mongen Mapu mu (Luka 1:30-33).
¿Tunteñmay tati “regle medin antü”? 2.520 tripantu. Tüfa eluwi ñi rakingeal 607 tripantu petu ñi mülepanon Jesus. Fey rakifiliyiñ 2.520 tripantu, puwaiñ ti tripantu 1914. Feychi tripantu mu Jewba elufi ta Jesukristo ñi longko ülmen-ngeal Chaw Dios ñi gobierno mew wenu mapu mu.
¿Chumngelu feypikeiñ ñi tunteñman 2.520 tripantu? Biblia feypi küla medin antü ka rangiñ fey ta 1.260 antü (Apokalipsi 12:6, 14, TNM). Feymu “regle medin antü” fey ta 2.520 antü. Welu Biblia feypi chumngechi ñi rakingeal tüfa: “Kiñe antü kiñe tripantu tati”. Feymu 2.520 antü, fey ta 2.520 tripantu (Números 14:34; Ezequiel 4:6).
21 TATI FÜTRA WERKEN PÜLLÜ MIGUEL
Ti “fütra werken püllü” fey tati longkolelu kom pu kümeke püllü mu. Biblia feypi ñi mülen kiñe longkolechi püllü müten, Miguel pingey (Daniel 12:1; Juda 9).
Chaw Dios niey fentren weychafe: tati pu kümeke püllü. Miguel ta longkoley kidu engün mu. Apokalipsi 12:7 feypiley: “Miguel ka tañi pu werken püllü weychafi engün tati fütra filu [...] ka tañi pu werken püllü”. Biblia feypi Jesus longkoley Chaw Dios ñi pu weychafe mu. Feymu Jesus fey ta Miguel (Apokalipsi 19:14-16).
▸ 9 chillkatun, parrafo 4, kimal dungu
22 ¿EPE PUWKÜLEPEY MAY ÑI AFAL WEDAKE DUNGU?
May, ‘epe puwküley’ llemay (2 Timotew 3:1; 2 Pedro 3:3). Biblia feypikünuy ñi rupayal afmatufalchi dungu Mapu mu Kristo ngüneniele wenu mapu. Tüfa ta ‘fülkülepale ñi apümkangeal müleyechi dungu Mapu mu’, kam epe puwkülele Chaw Dios ñi gobierno tañi apümafiel Weküfü ñi ngünenieel (Matew 24:3, 27, 37, TNM). Chaw Dios ñi gobierno eluwi ñi ngünenieal wenu mapu mu 1914 tripantu mew. Feychi mu eluwi ñi rupayal kom feychi dungu feypikünungelu, ka fentepuay apümkangele Weküfü ñi ngünenieel Armagedon mu.
23 WIÑOMONGETUAY PU LAYELU
Biblia nütramkay aylla che ñi wiñomongetun. Jewba elufi pepiluwün ta Elia, Elisew, Jesus, Pedro ka Pablo ñi wiñomongeltucheal. Jewba feypikünuy “ñi wiñomongetual pu norngechi che ka pu norngenochi che” Mapu mu (Hecho 24:15, TNM). Biblia ka kimeltukey ñi wiñomongetual kiñeke che ñi amual wenu mapu mu. Chaw Dios dullikey tüfachi pu che ñi ngünenieal Jesus engün wenu mu (Juan 5:28, 29; 11:25; Apokalipsi 20:5, 6).
24 FÜLKONAL PU PÜLLÜ MU
Tati pu femkelu tüfa pemekefi ta kalku, machi ka pu nütramkakefilu pu püllü. Welu tüfa engün fülkonkey pu weküfü mu. Pu femkelu tüfa feyentukeyngün taiñ nien kiñe am kam püllü amulealu ñi mongen kañpüle. Welu tüfa koyla dungu tati. Kafey kakelu che rakiduamkey tati machi ñi rangiñelwelen pu che ka pu püllü mu, kam feyentukeyngün ñi mülen fillke ngen taiñ wedalkayaetew ngillatunofiliyiñ. Pu weküfü ngüchaltukuchekey ñi feyentunoafiel ta Chaw Dios. Feymu pu che femkey pewütuwün, pelotuwün, kalku dungu, machitun, ngüneduamkey pu wangülen, wedake pewma, perimontun, ka “welepelan“ pikeyngün. Kom tüfachi dungu nüwküley pu wedake püllü mew. Kafey welurakiduamelafeiñmu fillke lifru, revista, horoscopo, pelikula, musika, juego kam kakelu dungu. Rakiduamürpuafuiñ: “Ayüfali fülkonal pu püllü mu”. Welu rüf mew kom tüfa küpakey pu weküfü mu. Kafey rupan mu layeluwün, fentren che femkey fillke dungu: fiestañmakefingün ti la, fill tripantu trawüluwkeyngün ñi akordayafiel, yelelkefingün rokiñ ka pulku, mülenagkeyngün pun mew chew ñi mülen ti la, amulpüllükefingün, ka ti lantu domo kam lantu wentru femkey wedake wimtun. Tüfa ka nüwküleafuy pu weküfü mu. Ka kiñeke che drogatukey kam pütremtukey ñi nierpual weküfü mu küpachi pepiluwün (Galata 5:20, 21; Apokalipsi 21:8).
▸ 10 chillkatun, parrafo 10; 16 chillkatun, parrafo 4
25 JEWBA NGEN-NGEY ÑI NGÜNENIEAL ITROKOM
Chaw Ngünechen Jewba kom newen niey ka dewmay kom tati müleyelu (Apokalipsi 15:3). Feymu kidu ngen-ngey kom dungu mu ka koneltuley ñi ngünenieal itrokom kidu ñi dewmael (Salmo 24:1; Isaías 40:21-23; Apokalipsi 4:11). Jewba elkünuy fillke ley dungu ñi inayafiel itrokom ti müleyelu. Kafey kidu elfalkünuafuy ta kakelu ñi ngünenieal. Feymu, Jewba ngen-ngelu kay ñi ngünenieal itrokom, duamfali taiñ kelluntukuafiel. ¿Chumngechi? Piwkeyeafiyiñ ka feyentuafiyiñ taiñ Chaw Ngünechen (1 Crónicas 29:11).
26 ANGKANENTUPÜÑEÑAL
Tüfa küpa feypilay kiñe domo niepüñeñkülele, tuntukungele, angkatripale ñi püñeñ, lale chi pichiche, ka kiñeke mu kidu lakey. Doy may küpa feypi feyti angkanentule ñi püñeñ kidu ñi ayün mu, fey ñi langümafiel ti pichiche petu choyüngenolu. Niepüñeñlu müten ti domo, nierpukey kiñe che ponwi kidu mu. Jewba femngechi trokikefi tati pichiche petu ñi choyüngenoel.
27 TUKUNGEAL MOLLFÜÑ TI KUERPU MU
Mollfüñ niey meli trokiñ: globulos rojos, globulos blancos, plaquetas ka plasma pingey. Feymu kiñeke doctor tukulelkefi mollfüñ kam kiñe tüfachi meli trokiñ ti che ñi kuerpu mu. Kidu ñi ngülümngeelchi mollfüñ tukulelngeafuy kam kakelu che ñi mollfüñ. Welu pu kristiano eluwkelaiñ taiñ tukulelngeal tüfa taiñ kuerpu mu, müna falintukefilu kay ta mongen.
28 WELULKAWLE TAIÑ FOTÜM, ÑAWE KAM PÜÑEÑ, ¿CHUMNGECHI KELLUAFUIÑ?
Duamfali kimeltuafiel, ngüfetuafiel ka ngülamtuafiel taiñ pu pichikeche. Ka welulkawle engün, duamfali taiñ norümtuafiel piwkeyen mu. Jewba ka femkefi tañi pu che, welu kutrankachekelay (Proverbios 4:1, 2). Chumngechi ñi norümtuafiel kiñe che, kellukefi ñi küme llowaetew (Proverbios 12:1). Jewba piwkeyefi tañi pu che, fey pepikakefi. Kidu ngülamtukefi chumngechi küme elkünutual wedake rakiduam ka kimeltukefi ñi küme rakiduamal ka küme femal. Feymu Jewba müna inayentufali. Fey welulkawle ti pichikeche, tañi chaw ka ñuke müley ñi kimeltuafiel chumngelu duamfali ñi feyentual engün. Kafey kimeltuafi ñi piwkeyeafiel ta Jewba ka ti Biblia, ka kelluafi ñi adümafiel kümeke ngülam ka falinke kimeltun Biblia mu.
29 PU WEKÜFÜ
Tüfachi wedake püllü pengekelay ka niey fillke pepiluwün ñi nienoel pu che. Tüfa engün kümeke püllü ngefuy, welu feyentuwelafingün ta Jewba, fey kayñetufingün. Femngechi wesañmawingün (Génesis 6:2; Juda 6). Femkelayngün Jewba ñi ayükeel, feymu kiñewküleyngün Weküfü engün (Deuteronomio 32:17; Luka 8:30; Hecho 16:16; Santiaw 2:19).