Doi quimafiel ti dungu
1. ¿Inei am tati Fütra Babilonia?
Tati Fütra Babilonia adentulei com pu coilaque religion, ¿chumngelu feipiafuiñ tüfa? (Apocalipsis 17:5). Ngüneduamnge tüfachi dungu:
Com huall Mapu meu mülei ti Fütra Babilonia. Biblia feipi tati Fütra Babilonia anülei reque huente fentren troquiñche ca troquiñque mapu meu. Cafei ngüneniefi com tati pu loncolelu mülelu Mapu meu (Apocalipsis 17:15, 18).
Tati Fütra Babilonia adentulelai pu politico cam pu negociaquelu. Apümcangele tati Fütra Babilonia, pu lonco ülmen Mapu meu ca pu negociaquelu petu mülecayaingün (Apocalipsis 18:9, 15).
Tati Fütra Babilonia inayentuquelafi ta Chau Dios. Tati Fütra Babilonia eluhui ñi quiñeucüleal pu gobierno meu, femngechi ñi huehual plata cam ñi fürenengeal. Feimu trürümngei quiñe cüri domo reque, prostituta ca feipingequei (Apocalipsis 17:1, 2). Cafei ngünencaquefi rume fentren che com huall Mapu meu ca fentren che langümngei quisu tañi culpan meu (Apocalipsis 18:23, 24).
Huiñotuaimi ti quimeltun 13, troquiñ 6
2. ¿Chumül feipicünungei ñi peufaluhual chi Mesías?
Biblia feipi rupale hula 69 semana, peufaluhuai chi Mesías (papeltuaiñ Daniel 9:25).
¿Chumül coni ñi raquingeal feichi 69 semana? Feichi tripantu puulu Nehemías ta Jerusalén “ñi cüme elcünungetual ca huiño deumangetual Jerusalén”, coni ñi raquingeal feichi 69 semana (Daniel 9:25; Nehemías 2:1, 5-8).
¿Tunteñmai feichi 69 semana? Quiñeque mu Biblia meu quiñe antü adentuleafui quiñe tripantu (Números 14:34; Ezequiel 4:6) Feimu quiñe semana adentulei regle tripantu. Fei 69 semana adentulei 483 tripantu (69 x 7).
¿Chumül fentepui feichi 69 semana? Raquiliyiñ 483 tripantu feichi mu ñi acun Nehemías ta Jerusalén, puhuaiñ feichi tripantu ñi fautizahun Jesús ca Mesíasngerpun (29 t.m.a.) (Lucas 3:1, 2, 21, 22).
Huiñotuaimi ti quimeltun 15, troquiñ 5
3. Lahuentun dungu mu pünengequelu ti mollfüñ
Taiñ cristianongen meu llouquelaiñ mollfüñ ca hulquelaiñ taiñ mollfüñ femngechi ñi tuculelngeal cangelu pu che. Huelu lahuentuñmangelu quiñe che pünengeafui quisu tañi mollfüñ. Taiñ cristianongen meu pünequelafiyiñ quiñeque ta tüfa. Feimu ca entulelngelayafuiñ mollfüñ ñi ngülümngeal, femngechi huiño tuculelngeal operangen meu (Deuteronomio 15:23).
Huelu quiñeque mu llohuafuiñ taiñ lahuentuñmangeal quisuque iñchiñ taiñ mollfüñ. ¿Chuchi am llohuafuiñ? Examen de sangre, hemodiálisis, hemodilución, pünengeal ti maquina llouquefilu ti mollfüñ tripamequelu cam ti maquina circulación extracorpórea cam bomba de derivación cardiopulmonar feipingelu.a Quisuque pu cristiano mülei ñi dullial chumngechi ñi pünengeal ñi mollfüñ operangele, femngele fillque examen ca lahuentuñmangele. Caquerumeafui ñi lahuentuñmayal feichi che cutrancülelu. Feimu petu ñi operangenon ca lahuentuñmangenon, quisuque pu cristiano mülei ñi quimtucunieal chumngechi ñi pünengeal ñi mollfüñ. Feimu ramtuunge:
Duamfalngele quiñe maquina ñi llohual tami mollfüñ ca huiño tuculelngeal tami cuerpo meu, huelu pichiñma mu müten catrürumele chumngechi ñi amulen chi mollfüñ, tami raquiduam ¿elupeafeimu mai tami llohual feichi mollfüñ? Cam ¿tami raquiduam meu feipiafuimi feichi mollfüñ tripalu ti cuerpo meu duamfalngei ñi hutrunentungeal mapu meu? (Deuteronomio 12:23, 24).
Quiñeque lahuentun meu entungequei pu che ñi mollfüñ, cüme elcünungequei ca huiño tuculelngequei ti cutran che ñi cuerpo meu cam tañi allfeñ meu. Fei tami raquiduam inaquelu Biblia ñi ngülam, ¿elupeafeimu mai tami femngechi lahuentungeal cam femlayafuimi?
Huiñotuaimi ti quimeltun 39, troquiñ 3
4. ¿Chem dungu mu raquiduamafui quiñe che ñi püntühual tañi afcadi meu?
Biblia ngülamtufi pu curehuen tañi püntüunoal engu. Fei quiñe che püntüule tañi afcadi meu, huiño nieutulayafui cangelu che meu (1 Corintios 7:10, 11). Huelu quiñeque mu pu cristiano tañi huesa rupamequen meu, raquiduamafui tañi püntühual tañi afcadi meu. Inaduamafiyiñ quiñeque dungu ñi rupayafel tati familia meu.
Ayüquelai ñi eluafiel tañi familia com tañi duamnieel: Ti huentru pilai ñi eluafiel tañi pu che ñi duamnieel, feimu nielaingün chem no rume tañi mongeleam (1 Timoteo 5:8).
Ahucan dungu mülei curehuen mu: Fente ñi hulelcamequengen quiñe che ti curehuen meu, cutranürpuafui cam larpuafui (Gálatas 5:19-21).
Elcünuafui tañi hueniyefiel ta Jehová: Quiñe cristiano fente tañi catrütumequeteu tañi afcadi ñi poyeafiel ta Jehová, poyehuelayafui ta Ngünechen (Hechos 5:29).
5. Fillque fiesta ñi femngequeel
Pu cristiano coneltuquelaiñ feichi fiesta Jehová ayüquenolu. Huelu chaftuliyiñ quiñeque dungu nüucülelu fillque fiesta meu, quisuque iñchiñ inanieaiñ taiñ raquiduam nielu Biblia tañi ngülam, femngechi quimaiñ chem taiñ chumal. Feula inaduamafiyiñ quiñeque dungu ñi rupayafel.
Quiñe che feipiafeimu: “Ayühunquechi rupayaimi tüfachi fiesta meu”. Fei eimi “chaltu mai” piafuimi müten. Fei ti che ayüle tañi doi quimal, eimi quimelelafuimi chumngelu conquelaimi feichi fiesta meu.
Quiñe antü mu femngequelu quiñe fiesta tami afcadi poyequenofilu ta Jehová mangelafeimu tami quiñentrür iyal tami familia engün. Fei tami raquiduam eluelmu tami amual, eimi feipiafuimi tami afcadi: “Femngele huesaque huimtun feichi fiesta meu, iñche coneltulayan”.
Fülcülepale quiñe fiesta, tami ngen cüdau cüpa eluelmu quiñe bono. Eimi, ¿lloupeafuimi mai? Femafuimi chi, fei ramtuhuafuimi: “Tañi ngen cüdau, ¿eluaeneu ti bono tüfachi fiesta ñi duam meu? Cam ¿eluaeneu tañi mañumcülen iñche tañi cüme cüdaufengen meu?”.
Fülcülepale quiñe fiesta, quiñe che cüpa eluelmu quiñe regalo, ¿chem chumafuimi? Ti che feipiafeimu: “Iñche quimnien tami coneltuquenon tüfachi fiesta meu, huelu cüpa elueyu tüfachi regalo”. Fei ti che elupeafeimu chi feichi regalo cüme duam meu, huelu cümeafui tami ramtuhual: “¿Elupeneu mai feichi regalo tañi quimal tunte maneluucülen tañi feyentun meu cam tañi conal feichi fiesta meu?”. Deu ngüneduamülmi com tüfachi dungu, eimi mülei tami dullial tami lloupeal mai tüfachi regalo. ¡Felei llemai! Ayünieiñ ñi tüngcüleal taiñ raquiduam ca nor piuqueyeafiel ta Jehová com taiñ dulliel meu (Hechos 23:1).
Huiñotuaimi ti quimeltun 44, troquiñ 1
6. Tul cutran
Iñchiñ piuqueyefiyiñ tati pu che. Feimu quimliyiñ cam raquiduamliyiñ taiñ nieel quiñe tul cutran, cuñiutucuuqueiñ taiñ rulpalelnoafiel caquelu pu che. Iñchiñ inaniequeiñ Biblia ñi ngülam feipilu: “Piuqueyefinge tami chafche chumngechi piuqueyehuimi ta eimi” (Romanos 13:8-10).
Tati pu che tul cutran nielu, ¿chumngechi inayafui tüfachi ngülam Biblia mu? Cuñiutucuuqueingün tañi panconoafiel (rofülnoafiel), truyunoafiel cam mancuhunoafiel pu che. Cafei quiñeque peñi cam lamngen dulliafui mangelnoafiel tati nielu tul cutran tañi ruca meu, femngechi tañi cuñiutucuafiel tañi pu che. Fei tüfa rupale, feiti tul cutran nielu ngelai tañi lladcüal. Ca femngechi petu tañi fautizaunon, tati nielu tul cutran mülei ñi quimelelafiel ñi cutrancülen tati adcünuquelu ti troquiñ loncolelu. Femngechi fautizahuafui ca cuñiutucungeafui caquelu pu che. Cafei quiñe che ayüfule tañi daquelafiel ta cangelu che, huelu raquiduamle quisu tañi nieafel quiñe tul cutran, hunelu meu eluhuai tañi femngeal quiñe examen de sangre. Com tüfa femliyiñ, pengelaiñ taiñ quisu duamuuquenon ca taiñ duamtuniefiel caquelu che (Filipenses 2:4).
Huiñotuaimi ti quimeltun 56 troquiñ 2
7. Negocian dungu ca fillque dungu nüucülelu tati ley meu
Chem negocian dungu conliyiñ rume, cüme huirintucuafiyiñ chem taiñ nütramcapeel. Femngechi femaiñ taiñ pu peñi ca pu lamngen cütu (Jeremías 32:9-12). Huelu quiñeque mu taiñ pu peñi ca pu lamngen chaftuhuafui huelulcan dungu mu tati plata cam caquelu dungu ñi duam meu. Femngechi rupaliyiñ, quisulen meu cüme nütramcayafiyiñ taiñ peñi cam lamngen, femngechi taiñ cümelcautual.
Huelu dallucangeliyiñ cam ngünencangeliyiñ, ¿chem chumafuiñ? (Papeltuaiñ Mateo 18:15-17). Jesús elueiñmu cüla ngülam taiñ inayal iñchiñ:
Hunelu meu eluhuaiñ taiñ cümelcautual (pefinge Mateo 18:15).
Pepi cümelcautunoliyiñ, yemeafuiñ trahunche meu quiñe cam epu che cüme hueniyefilu ta Jehová taiñ quelluaeteu (pefinge Mateo 18:16).
Amulecale ti huesaque dungu, fei hula mülei taiñ quimelelafiel pu loncolelu (pefinge Mateo 18:17).
Femngechi dungu rupan mu iñchiñ, quintuquelaiñ ñi juiciañmangeal taiñ pu peñi ca lamngen, femngechi tañi huesa dunguyengenoal Jehová ca tati trahunche meu (1 Corintios 6:1-8). Huelu quiñeque mu duamfalngeafui ñi ngüneduamngeal taiñ rupan quiñe juicio meu. Tüfa ta quiñeque: hudahun mu quiñe che tañi afcadi meu, dullingeal inei ñi nieafiel pu pichiqueche cam tati pensión alimenticia. Cafei juicio mu ngüneduamngeafui quiñe testamento, quiñe che ayüle ñi cofrayal quiñe seguro cam quiñe empresa cullinole tañi defen feipiquelu cai tañi nienon plata, declaración de bancarrota ca pingequelu. Quiñe cristiano ayüle tañi quelluaeteu tati ley ñi cüme elcünutual feitachi dungu, chaftuquelai Biblia tañi quimeltuqueel.
Ca femngechi quiñe cristiano chaftulayai Biblia ñi feipin, quimelelfile pu autoridad ñi nüntucangeel cam huesalcangeel quiñe che cam pichiche. Cam ñi hueñeñmangen cam langümngen quiñe che.
a Tami quimal chem femngequei feichi fillque lahuentun meu, pefinge ti troquiñ “Pu papeltuquelu ñi ramtuqueel” tripalu Ti Huerquen 15 octubre, 2000.