• ¿Chem am Chau Ngünechen ñi Gobierno?
    ¡Rumel ayüucüleaimi! Quimfinge chem pilen Biblia
    • Quimeltun 31. Jesucristo lonco ülmencülei huenu meu Chau Jehová tañi adquiñ meu.

      QUIMELTUN 31

      ¿Chem am Chau Ngünechen ñi Gobierno?

      Biblia tati doi falin dungu ñi nütramcaqueel fei ta Ngünechen tañi Gobierno. Feichi Gobierno meu Jehová femürpuai chem tañi ayünieel tüfachi Mapu meu ellaca mu. ¿Chem am tüfachi Gobierno? ¿Chumngechi quimürpuiñ deu ñi ngünenien? Fantepu meu, ¿chem dungu ta huechunenturpumequei? Ca, ¿chem dungu femürpuai cüpalechi antü meu? Tüfachi puque ramtun huiñoldungungeai tüfachi quimeltun meu, ca epu quimeltun meu ñi cüpalen.

      1. ¿Chem am Ngünechen tañi Gobierno ca inei lonco ülmencülei?

      Jehová elcünui tüfachi Gobierno huenu meu ca lonco ülmencülei Jesucristo (Mateo 4:17; Juan 18:36). Biblia feipi Jesús ta “rumel ngünenieafi” (Lucas 1:32, 33). Jesús lonco ülmencülei Ngünechen tañi Gobierno meu, feimu ngünenierpuafi itrocom tati pu che mülelu Mapu meu.

      2. ¿Inei engün am ngünenierpuai Jesús engu?

      Jesús quisu ngünenielai. Jesús ngünenierpui quiñeque che caquerume tuhun nielu engün (Apocalipsis 5:9, 10). Jesús miyaupalu Mapu meu rume fentren che inanierpueyu. ¿Com tüfa engün pemai ngünenierpuai Jesús engu? Femlayai llemai, 144.000 che müten amuaingün huenu meu tañi ngünenierpual Jesús engün (papeltuaimi Apocalipsis 14:1-4). Com tati caquelu pu che mülealu ta Mapu meu eluucüleaingün tañi ngünenieaeteu Ngünechen tañi Gobierno (Salmo 37:29).

      3. Ngünechen ñi Gobierno, ¿chumngelu (chemu) doi cümei tati pu che ñi gobierno mu?

      Quiñeque che lonco ülmencülelu tüfachi Mapu meu ayüqueingün chi ñi cümeque dungu femal, huelu nielaingün nehuen ñi femürpual. Rupalu chi antü ca che ngünenierpuquei, fei tüfa engün huesa chengeingün chi ca eluucülelaingün tañi cümelcayafiel tañi troquiñche. Huelu Jesús inei no rume huelucontulayaeyu tañi ngünenierpual Ngünechen tañi Gobierno meu. Chau Ngünechen elcünui “quiñe ngünenien, chumcaunorume apümcangelayai” (Daniel 2:44). Jesús ngünenierpuai com Mapu meu ca dullintuchelayai. Jesús cüme piuqueyechefengei, nor chengei ca cutranpiuquechequei, fei quimelelafi tati pu che ñi femngechi chengeal ngünenietule ta Mapu (papeltuaimi Isaías 11:9).

      DOI QUIMAIMI

      Peaiñ chumngelu Chau Ngünechen tañi Gobierno doi cümei tati pu che ñi gobierno mu.

      Huenu meu Jesús ngüneniemequei ta Mapu. Jesús ñi furi püle mülei tañi pu quellunieteu ñi ngünenieal. Con tüfa engün mülei Jehová ñi adquiñ meu.

      4. Ngünechen tañi Gobierno ngünenierpuai com Mapu meu

      Jesucristo doi nehuen-ngei ca doi pepicaucülei ñi ngünenierpual chem che rume ñi ngünenieel tüfachi Mapu meu. Papeltuaiñ Mateo 28:18, ca ngüneduamaiñ tüfachi ramtun:

      • Jesús, ¿chumngelu doi autoridad niei ta caquelu pu che meu tañi ngünenierpual?

      Tati pu che pepicaucülei ñi ngünenierpual quiñe troquiñ mapu meu müten, ca rupalu chi antü hueluque conqueingün tañi ngünenierpual. ¿Ca felepei mai Ngünechen tañi Gobierno? Papeltuaiñ Daniel 7:14, ca ngüneduamaiñ tüfachi epu ramtun:

      • Chau Ngünechen ñi Gobierno rumel ngünenierpuai, feimu ¿chumngelu fente cümelcayaiñmu?

      • ¿Chumngelu fente cümengei ñi ngünenierpual com Mapu meu?

      5. Pu che ñi gobierno mülei ñi fentepual ñi ngünenierpuquen

      Chau Ngünechen ñi Gobierno apümcayafi com tati pu ngünenielu Mapu meu, fei ¿chumngelu duamfali ñi ngünenierpual pu che meu? Peaiñ ti VIDEO, ca ngüneduamaiñ tüfachi ramtun.

      VIDEO: ¿Chem am ta Chau Dios ñi Reino? (Pichi troquiñ) (1:41)

      • ¿Chem huesaque dungu femürpuingün tati pu che ñi ngünenierpuquen?

      Papeltuaiñ Eclesiastés 8:9, ca ngüneduamaiñ tüfachi ramtun:

      • ¿Chumngelu am raquiduamqueimi Ngünechen tañi Gobierno ñi hueluconal tati pu che ñi gobierno meu? ¿Chumngelu femngechi feipimi?

      6. Tati pu ngünenielu Ngünechen tañi Gobierno meu cutranpiuqueyeiñmu

      Taiñ Lonco Ülmen Jesús mongelepalu Mapu meu cüme quimnierpufi tati pu che, feimu “cutranpiuqueyequeiñmeu taiñ ngañhuadcülen” meu (Hebreos 4:15). Jehová dulli 144.000 domo ca huentru ñi ngünenierpual huenu meu Jesús engu. Fei tüfachi pu norngechi che ‘itrofill tuhun-ngei, caque quehun dungui, caque rume mollfüñ niei ca fillque troquiñche mu tuhui’ (Apocalipsis 5:9).

      • Jesús ca tañi pu compañ quimnieingün chumngechi taiñ rupaquen ta iñchiñ ca tunte taiñ cutrancauquen, feimu ¿yafültucupeimu mai tüfa? ¿Chumngelu am?

      Quiñeque huentru ca domo dullingelu ñi amual huenu meu fillque tuhun nielu.

      Jehová dulli quiñeque huentru ca domo fillque tuhun nielu ñi ngünenierpual Jesús engu.

      7. Ngünechen tañi ley dungu doi cümei tati pu che ñi ley dungu meu

      Tati pu che ñi ngünenierpuquen niequeingün quisuque tañi ley tañi quelluafiel ca cuñiutucuafiel tañi pu che. Ngünechen tañi Gobierno ca niei tati ley, fei com tañi pu che mülei ñi inayafiel ta tüfa. Papeltuaiñ 1 Corintios 6:9-11, ca ngüneduamaiñ tüfachi cüla ramtun:

      • Com tati pu che inanierpufule Ngünechen ñi ley, ¿chumletuaiñ?a

      • ¿Cümepei mai Jehová tañi feipiafiel tati pu che ñi inanierpual tañi ley dungu? ¿Chumngelu femngechi huiñoldunguimi?

      • Tati pu che inanienofilu rume tüfachi ley, ¿chumngelu quimnieiñ ñi cüme elcünutuafel tañi mongen? (Pefinge 1 Corintios 6:11).

      Quiñe soltau catrütuniefi tati auto, femngechi ñi catrürupayal tati pu che fill tripantu nielu.

      Tati pu che ñi gobierno elcünuquei fillque ley dungu ñi cümelcayafiel ca cuñiutucuafiel tañi pu che. Chau Dios tañi Gobierno doi cüme ley niequei ñi cuñiutucuafiel tañi pu che.

      QUIÑEQUE CHE FEIPIAFEIMU: “Ngünechen tañi Reino yeniengequei ta piuque meu”.

      • ¿Chem feipiafuimi?

      TAMI QUIMEL

      Ngünechen tañi Gobierno mülei ta huenu meu ca ngünenierpuai com ti Mapu.

      ¿Chem piafuimi?

      • ¿Inei engün am ngüneniequei Chau Ngünechen tañi Gobierno meu?

      • ¿Chumngelu Chau Ngünechen ñi Gobierno doicülei tati pu che ñi gobierno meu?

      • Chau Jehová, ¿chem ayüniei ñi femal tati pu che eluucülelu ñi ngünenieaeteu tañi Gobierno?

      Tami femafel

      CA PEAFUIMI

      Ngüneduamnge chem quimeltui Jesús cheu ñi müleal Chau Dios tañi Gobierno.

      “Ngünechen tañi Reino, ¿yeniengequepei mai ta piuque meu?” (Troquiñ internet mu)

      Pu Dunguquelu Ineingen Jehová, ¿chumngelu doyümquefingün Chau Dios tañi Gobierno ta pu che ñi gobierno meu?

      Com piuque meu quelluntucuquefiyiñ Chau Dios ñi Gobierno (1:44)

      Ngüneduamnge chem feipilei Biblia feichi pu 144.000 che ngüneniealu Jesús engu.

      “¿Inei engün am amuai huenu mu?” (Troquiñ internet mu)

      Quiñe domo carcelconcülefulu, ¿chumngechi quimtucui Chau Dios müten norümafi ti dungu Mapu meu?

      “Quimürpun chumngechi norümngetuai huesaque dungu” (¡Tami quimafel! noviembre, 2011)

      a Tati troquiñ 3 mu ngüneduamaiñ quiñeque ley ñi elcünuel Jehová taiñ adcünuñmayaeteu taiñ mongen.

  • ¡Chau Dios ñi Gobierno deu ngüneniei!
    ¡Rumel ayüucüleaimi! Quimfinge chem pilen Biblia
    • Quimeltun 32. Jesucristo lonco ülmencülei huenu meu, ca ngüneniemequefi ta Mapu.

      QUIMELTUN 32

      ¡Chau Dios ñi Gobierno deu ngüneniei!

      Ngünechen tañi Gobierno 1914 tripantu meu elcünungei huenu mu ñi ngünenierpual. Feichi tripantu meu Mapu mülechi gobierno raquiantüleingün reque ñi apümcangeal. Feula inaduamafiyiñ chem feipicünui Biblia ñi rupayal ca fillque dungu ñi rupan 1914 ta fantepu meu.

      1. ¿Chem feipicünui tati Biblia?

      Ñi feipin mu Daniel pingechi lifru mülelu Biblia meu, quimürpuiñ Ngünechen tañi Gobierno conai tañi ngünenierpual rupale hula “regle tripantu” (Daniel 4:16, 17). Fentren tripantu rupalu hula, Jesús ca üi tuculelfi ta tüfachi “regle tripantu”, quisu feipi petu ñi mülen engün “tati pu judiongenochi che ñi medin antü” (Lucas 21:24). Feula inaduamaiñ chumngelu (chemu) feipiafuiñ tüfachi “regle tripantu” afi 1914 tripantu meu.

      2. ¿Chem dungu rupamequei com huall Mapu meu 1914 ta fantepu meu?

      Jesús tañi pu discipulo ramtueyu: “Mülelmi iñchiñ mu, ¿chem dungu pengeai? Ca epe puucülele ñi afal mapu meu müleyechi dungu, ¿chem pengeai?” (Mateo 24:3). Jesús feipi fillque dungu ñi rupayal loncocünungele hula quisu Chau Ngünechen ñi Gobierno meu huenu meu. Jesús feipi ñi müleal fütraque nüyün, aucan cam hueichan, ca ñi müleal fütra ngüñün (papeltuaimi Mateo 24:7). Biblia ca feipi “epe puucülele ñi afal mapu müleyechi dungu”, “cuñihun-ngeai ta mongen” tati pu che ñi femmequen mu (2 Timoteo 3:1-5). Com tüfa femtripamequei 1914 tripantu meu ta fantepu mu.

      3. Ngünechen ñi Gobierno ngünenierpulu, ¿chumngelu rume huesaque dungu rupamequei?

      Pichi rupalu müten Jesús ñi loncocünungen huenu meu, quisu quehuatufi ta Satanás ca tañi pu huesaque püllü, fei Huecüfü hueungei. Biblia feipi quisu “Mapu mu ütrüfnacümngepai quiñentrür tañi pu huesaque püllü engün” (Apocalipsis 12:9, 10, 12). Satanás apümcangeai, feimu quisu rume pofo illculei. Huecüfü re huesaque dungu femmequei ca cutrancamequefi tati pu che huall Mapu meu. Huecüfü tañi duam meu femngechi felei ta Mapu. Huelu Chau Ngünechen tañi Gobierno cüme elcünutuafi com tañi huesalcamequen Huecüfü.

      DOI QUIMAIMI

      Ngüneduamaiñ fillque dungu pengelquelu Chau Ngünechen tañi Gobierno coni ñi ngünenieal 1914 tripantu meu. Ca quimaiñ chumngechi ñi quelluntucual tüfachi Gobierno meu.

      4. Biblia pengeli Chau Dios ñi Gobierno ngünenierpui 1914 tripantu

      Peaiñ ti VIDEO.

      VIDEO: Ngünechen tañi Gobierno ngünenierpui 1914 tripantu mu (5:02)

      Tati loncolefulu Babilonia huaria meu, Nabucodonosor pingefui. Chau Ngünechen peumalelfi chem ñi rupayal cüpalechi antü meu. Tüfachi peuma ca ñi chem pin Daniel tüfachi peuma mu adentulei quiñeque dungu ñi rupayal Nabucodonosor ñi gobierno meu. Huelu cafei chem ñi rupayal Chau Ngünechen tañi Gobierno mu. Papeltuaiñ Daniel 4:17.a

      Papeltuaimi Daniel 4:20-26, ca tami huiñoldungual cüpalechi ramtun ngüneduamnge chem ñi tripan pagina 133 meu.

      • A) Nabucodonosor, ¿chem pei tañi peuma meu? (Pefinge Daniel 4:20, 21).

      • B) ¿Chumngei feichi anümca ñi pefiel Nabucodonosor? (Pefinge Daniel 4:23).

      • C) Rupale hula tati “regle tripantu”, ¿chem rupayai? (Pefinge Daniel 4:26).

      Tati anümca tripalu ti peuma meu, ¿chumngechi nüucülepei Ngünechen tañi Gobierno meu?

      BIBLIA ÑI FEIPICÜNUEL (Daniel 4:20-36)

      Gobierno

      A) Quiñe fütra anümca.

      Quiñe fütra anümca.

      Catrüconi ti gobierno

      B) Catrüngei ti anümca, fei rupai “regle tripantu”.

      Quiñe anümca ñi mutrung traricünungei quiñe pañillhue trarihue meu ca quiñe cobre trarihue meu.

      Huiño coni ti gobierno

      C) “Elungetuaimi tami lonco ülmen-ngeal”.

      Quiñe fütra anümca.

      Tati hunen rupa ñi femtripan Biblia ñi feipin

      • D) ¿Inei adentucünungei ti anümca meu? (Pefinge Daniel 4:22).

      • E) ¿Chem tripantu catrüconi ñi ngünenieel? (Papeltuaiñ Daniel 4:29-33).

      • F) Rupalu hula ti “regle tripantu”, ¿chem rupai Nabucodonosor? (Papeltuaiñ Daniel 4:34-36).

      HUNELU MEU, ¿CHUMNGECHI FEMTRIPAI?

      Gobierno

      D) Nabucodonosor, Babilonia ñi lonco ülmen

      Ti rey Nabucodonosor rume mallmalei.

      Catrüconi ti gobierno

      E) Deu rupalu 606 tripantu p.m.J.,b Nabucodonosor hueluduami, fei loncolehuelai regle tripantu meu.

      Nabucodonosor imequei cachu culliñ reque.

      Huiño coni ti gobierno

      F) Nabucodonosor tremotui, fei huiño ngünenierpui.

      Ti lonco ülmen Nabucodonosor huitrapürami tañi cuhu.

      Tati epungechi rupa ñi femtripan Biblia ñi feipin

      • G) ¿Inei adentucünungei ti anümca meu? (Papeltuaiñ 1 Crónicas 29:23).

      • H) ¿Chem tripantu catrüconi ñi ngünenieel? Jesús ñi antü meu petu catrüconcülefui Ngünechen tañi ngünenieel, ¿chumngelu quimnieiñ tüfa? (Papeltuaiñ Lucas 21:24).

      • I) ¿Cheu ca chumül elcünungei ti gobierno ñi ngünenierpual?

      ¿CHUMNGECHI CA FEMTRIPAI?

      Gobierno

      G) Pu lonco ülmen Israel tuhun-ngelu adentulefui Ngünechen tañi ngünenieel.

      Fillque lonco ülmen Israel tuhun-ngelu. Quiñe pelon huente quisu engün meu huilüfcülei.

      Catrüconi ti gobierno

      H) Jerusalén apümcangei, fei 2.520 tripantu meu inei no rume Israel tuhun-ngelu loncolelafui.

      Apümcangei Jerusalén 607 tripantu mu petu ñi mülepanon Jesús. Fei rupai 2.520 tripantu.

      Huiño coni ti gobierno

      I) Huenu meu, Jesús lonco ülmencülei Ngünechen ñi Gobierno meu.

      Jesús huenu meu lonco ülmencülei 1914 tripantu mu. Quiñe pelon huente quisu meu huilüfcülei.

      Tati regle tripantu, ¿tunteñmai?

      Quiñeque troquiñ Biblia quelluqueiñmu taiñ doi cüme adümafiel caquelu troquiñ Biblia meu. Raquiduamnge tüfa, Apocalipsis pingechi lifru mu nütramcangei cüla tripantu ca rangiñ, fei tüfa adentulei 1.260 antü (Apocalipsis 12:6, 14). Quiñeque mu Biblia meu quiñe tripantu mu mülei 360 antü. Feimu feipiafuiñ “regle tripantu” adentulei 2.520 antü. Ca loncontucuaimi tüfa, quiñeque mu Biblia meu quiñe antü adentuleafui quiñe tripantu (Ezequiel 4:6). Feimu tati “regle tripantu” ñi feipiel Daniel adentulei 2.520 tripantu.

      5. Caletui müleyechi dungu Mapu meu 1914 tripantu mu

      Peaiñ ti VIDEO.

      VIDEO: 1914 tripantu ta fantepu mu caletui ta dungu Mapu meu (1:10)

      Jesús feipicünui chem ñi rupayal Mapu meu lonco ülmencünungele hula. Papeltuaiñ Lucas 21:9-11, ca ngüneduamaiñ tüfachi ramtun:

      • ¿Femtripapei mai Jesús tañi feipin? ¿Chem piafuimi?

      Ti apostol Pablo feipicünui ñi chumlerpual tati pu che epe afle Mapu müleyechi pu gobierno. Papeltuaiñ 2 Timoteo 3:1-5, ca ngüneduamaiñ tüfachi ramtun:

      • Ñi chem pin tüfachi troquiñ Biblia, ¿femtripapei mai? ¿Chem piafuimi?

      Fillque adentun pengelquei ñi chumlen Mapu müleyechi antü. 1. Quiñe loncolechi militar huirarmequei. 2. Pu edificio tranarupaingün rupalu quiñe fütra nüyün. 3. Quiñeque avion ñi nieel pu soltau. 4. Quiñeque che trecayahuingün ca yeniei tañi mascarilla. 5. Pu terrorista apümcafingün Torres Gemelas. 6. Quiñe huentru drogatumequei. 7. Quiñe huentru huirarmequefi tañi domo ca hulelcafi. 8. Fillque droga ca pulcu. 9. Epu domo ülmen tacun tucutuucüleingu ca entufotomequeingu. 10. Fentren che quiñe concierto meu. 11. Quiñe huentru protestayaulu ütrüftui quiñe bomba.

      6. Ngünechen tañi Gobierno ngüneniemequei, fei pengelnge tami maneluucülen tüfa meu

      Papeltuaiñ Mateo 24:3, 14, ca ngüneduamaiñ tüfachi epu ramtun:

      • Chau Ngünechen tañi Gobierno deu ngüneniemequei, ¿chem fütra cüdau pengeli ta tüfa?

      • ¿Chumafuimi tañi quelluconal tüfachi fütra cüdau meu?

      Chau Dios tañi Gobierno deu ngüneniemequei huenu meu ca pichiñma meu ca ngünenieafi ta Mapu. Papeltuaiñ Hebreos 10:24, 25, ca ngüneduamaiñ tüfachi ramtun:

      • Quimnielu cai ñi fülcülepan “Chau Dios ñi antü”, ¿chem eluhuaiñ taiñ femal?

      Fillque adentun: 1. Quiñe domo chillcatumequelu Biblia amui taiñ trahun meu. 2. Feichi domo chillcatumequelu Biblia amuldungulelfi ta quiñe che ñi quimniefiel.

      Pepi quellufilmi ta quiñe che ñi montual, ¿femafuimi cai?

      QUIÑEQUE CHE RAMTUAFEIMU: “¿Chumngelu pu Dunguquelu Ineingen Jehová fente nütramcaqueingün 1914 tripantu meu?”.

      • ¿Chem piafuimi?

      TAMI QUIMEL

      Biblia tañi feipin ca ñi chumlen ta Mapu ta fantepu meu pengeleiñmu Chau Ngünechen tañi Gobierno ngüneniemequei huenu meu. Fei trahuluuliyiñ ca amuldunguliyiñ pengelaiñ taiñ quelluntucumequefiel tüfachi Gobierno.

      ¿Chem piafuimi?

      • Deu rupalu tati “regle tripantu”, ¿chem rupai?

      • ¿Chumngelu maneluhuafuimi 1914 tripantu meu ngüneniemequei Chau Ngünechen tañi Gobierno?

      • ¿Chumngechi pengelafuimi tami maneluucülen Chau Ngünechen ñi Gobierno meu?

      Tami femafel

      CA PEAFUIMI

      Ngüneduamnge chumngechi caletui Mapu müleyechi dungu 1914 tripantu ta fantepu mu.

      “¿Tunten meu tati pu che famentufingün cümeque raquiduam?” (¡Tami quimafel! abril, 2007)

      Ngüneduamnge chumngechi ñi feipin Mateo 24:14 quellufi ta quiñe huentru.

      “Rume ayüquefun aucantual beisbol” (Troquiñ tripalu Ti Huerquen mu)

      Ñi feipin Daniel capitulo 4, ¿chumngelu feipiafuiñ ñi nüucülen Ngünechen ñi Gobierno meu?

      “¿Tunten mu ngünenierpui Chau Dios ñi Gobierno? (Troquiñ 1)” (Ti Huerquen 1 octubre, 2014)

      Tati “regle tripantu” feipingelu Daniel capitulo 4 fentepui 1914 tripantu meu, ¿chumngelu feipiafuiñ tüfa?

      “¿Tunten mu ngünenierpui Chau Dios ñi Gobierno? (Troquiñ 2)” (Ti Huerquen 1 noviembre, 2014)

      a Amunge tati troquiñ “Ca peafuimi” pingelu ca papeltunge tati epu inanque chillca tripalu fei mu.

      b Tripale p.m.J. tüfa ta feipi petu ñi mülepanon Jesús. Ca tripale t.m.a. tüfa ta feipi taiñ mülen antü.

  • Ngünechen tañi Gobierno, ¿chem dungu femai?
    ¡Rumel ayüucüleaimi! Quimfinge chem pilen Biblia
    • Quimeltun 33. Pu che mülei ti hue Mapu meu.

      QUIMELTUN 33

      Ngünechen tañi Gobierno, ¿chem dungu femai?

      Chau Ngünechen tañi Gobierno deu ngüneniei, fei pichiñma meu cüme elcünutuafi fillque dungu Mapu meu. Peafiyiñ quiñeque dungu ñi chumal Ngünechen cüpalechi antü meu ca chem chumafuimi tami maneluucüleal tüfa meu.

      1. Ngünechen tañi Gobierno, ¿chumai tañi cüme feletual ta Mapu?

      Pichiñma meu müleai quiñe fütra hueichan Armagedón pingelu. Tüfachi aucan meu Jesucristo apümcayafi pu gobierno ca tati huesaque che (Apocalipsis 16:14, 16). Tati Biblia feipi puule feichi antü “ti huesaque che ngehuetulayai engün” (Salmo 37:10). Tañi Gobierno meu Jesús quelluafi tati pu che ñi cüme feleal engün ca ñi müleal re norngechi dungu (papeltuaimi Isaías 11:4).

      2. Chau Ngünechen ngünenietule ta Mapu, ¿chumletuai ta che?

      Chau Ngünechen ngünenietule ta Mapu “tati pu norngechi che llohuai ti Mapu ñi ngen-ngeal engün, ca rumel müleaingün fei mu” (Salmo 37:29). Raquiduamnge, cüpalechi antü meu com tati pu che cümeque raquiduam nieai müten, com tati pu che poyeafi ta Jehová ca hueluconque piuqueyehuaingün, ¿cümenoafulu ta tüfa? Felei llemai. Cafei tati pu che cutranhuelayai ca lahuelayai.

      3. Ngehuenole huesaque che, ¿chumai Ngünechen ñi Gobierno?

      Jesús apümcayafi tati huesaque che, fei huaranca tripantu meu ngünenieai. Quisu ca pu 144.000 quelluafingün tati pu che ñi culpanchengehuenoal engün. Huaranca tripantu rupale hula, ayüfalngetuai ta Mapu ca com tati pu che inayafi Jehová ñi feipin, fei rume ayüucüleaingün. Com tüfachi dungu rupale, Jesús huiñoleltuafi tañi ngünenieal tañi Chau Jehová. Feichi antü meu llemai, rume yamniengeai Chau Jehová tañi üi (Mateo 6:9, 10). Quimfalcünungeai fente taiñ cüme ngünenieteu Jehová. Fei hula Jehová apümcayafi ta Satanás, pu huesaque püllü ca chem che rume tañi caiñetueteu (Apocalipsis 20:7-10). Femngechi Chau Ngünechen tañi Gobierno meu com cüme feletuai rumel meu.

      DOI QUIMAIMI

      Chau Dios tañi Gobierno femürpuai com ñi feipicünungeel Biblia meu. Feula inaduamaiñ chumngelu (chemu) maneluhuafuiñ tüfa meu.

      4. Chau Dios tañi Gobierno apümcayafi Mapu mu müleyechi gobierno

      ‘Tati pu che ngüneniefi caquelu pu che, fei quiñentrür ñi huesalcalerpual engün’ (Eclesiastés 8:9). Tañi Gobierno meu, Jehová cüme elcünutuafi com ñi huesa femqueel pu gobierno.

      Papeltuaiñ Daniel 2:44 ca 2 Tesalonicenses 1:6-8, fei ngüneduamaiñ tüfachi epu ramtun:

      • Jehová ca Jesús, ¿chumafingu pu gobierno ca com tati pu che ñi quelluntucueteu?

      • Tami quimürpuel Jehová ca Jesús meu, ¿chumngelu maneluhuafuimi ñi norngeal com tañi femafel engu?

      Jesús huenu meu ngüneniefi ta Mapu ayüfalngetulu.

      5. Jesús rüf pepicaucülei ñi ngünenieal

      Jesús ngünenietule ta Mapu fillque dungu femai ñi cümelcayafiel tati pu che. Peaiñ ti VIDEO, fei ngüneduamaiñ chumngelu maneluhuafuiñ Jesús ñi eluucülen tañi quellucheal ca chumngechi Jehová elufi nehuen ta Jesús ñi femürpual com tüfachi dungu.

      VIDEO: Jesús pengeli chem femürpuai Chau Ngünechen ñi Gobierno (1:13)

      Jesús ñi femün Mapu meu pengeli ñi chumal Chau Ngünechen tañi Gobierno cüpalechi antü meu. Inalechi cümeque dungu taiñ ngüneduamal, ¿chuchi am doi ayüafuimi tañi huechutripayal? Papeltunge com troquiñ Biblia pengelquelu chem dungu ñi rupayal cüpalechi antü meu.

      MÜLEPALU MAPU MEU, ¿CHEM FEMI JESÚS?

      MÜLEN MU HUENU MEU, ¿CHEM FEMAI JESÚS?

      • Afmatun dungu femi ñi elufiel iyael rume fentren che (Mateo 14:17-21).

      • Eluafi iyael ta com pu che, feimu fillahuelayai ta che (Salmo 72:16).

      6. Ngünechen ngünenietule ta Mapu com cüme feletuaiñ

      Chau Ngünechen tañi Gobierno ngünenietufile ta Mapu femngerpuai Jehová tañi ayüqueel, fei com tati pu che ayüucüleai rumel meu. Peaiñ ti VIDEO, fei ngüneduamaiñ chumngechi Jehová adniefi tañi Fotüm ñi femngerpual tañi ayüqueel.

      VIDEO: Ayüfalngetule ta Mapu, ¡cümeque dungu müleai! (4:38)

      Papeltuaiñ Salmo 145:16, ca ngüneduamaiñ tüfachi ramtun:

      • Chau Ngünechen eluafi tati pu che com tañi duamnieel cüpalechi antü meu, ¿chum duamelqueimu quimal tüfa?

      QUIÑEQUE CHE FEIPIAFEIMU: “Com quiñeucüleliyiñ, cüme elcünutuafuiñ huesaque dungu Mapu meu”.

      • Chau Ngünechen ñi Gobierno, ¿chem dungu cüme elcünutuafi ñi pepilnoel pu gobierno?

      TAMI QUIMEL

      Chau Ngünechen tañi Gobierno ngünenietufile ta Mapu femngerpuai Jehová tañi ayüqueel Mapu meu, fei com tati pu che cüme feletuai rumel meu.

      ¿Chem piafuimi?

      • ¿Chem femai Ngünechen tañi Gobierno ñi yamniengetual Jehová tañi üi?

      • Chau Dios tañi Gobierno femürpuai ñi feipicünungeel Biblia mu, ¿chumngelu maneluhuafuiñ tüfa meu?

      • Chau Ngünechen tañi Gobierno ñi femal, ¿chuchi am doi ayüfimi?

      Tami femafel

      CA PEAFUIMI

      Quimürpunge chem am chi Armagedón.

      “¿Chem am Armagedón?” (Troquiñ internet mu)

      ¿Chem rupayai acule ti “fütra cutrancahun” ñi feipicünuel Jesús? (Mateo 24:21).

      ¿Chem am ti fütra cutrancahun? (Troquiñ internet mu)

      Pefinge quiñe familia raquiduammequelu mületule ti hue Mapu.

      Raquiduamnge muletulmi ti hue Mapu meu (1:50)

      Pefinge ti troquiñ feipilu “Fillque dungu ramtuuquefun”. Fei quimaimi quiñe huentru chaftuquefilu politica, huelu quimürpui com tañi ramtuuquefel.

      “Ti Biblia cüme elcünutueyu ñi mongen” (Ti Huerquen 1 enero, 2012)