¿Pepicau­cülepeimi mai tami fautizahual?

Tami chillcatufiel tati Biblia quellueimu tami cüme quimürpuafiel ta Jehová. Ca elcünuimi chi cuifique huimtun, feula femürpumequeimi cümeque dungu. Huelu, ¿catrütunieimu chi quiñeque dungu tami hultucual tami mongen Jehová meu ca fautizahual? Tüfachi quimeltun meu quimürpuaimi quiñeque dungu tati pu che tañi catrütufeteu tañi fautizahurpual ca quimürpuafuimi chem chumafuimi tami chaftuafiel feichi dungu.

1. Petu tami fautizaunon, ¿tunten mülei tami quimal Biblia mu?

Tami fautizahual mülei tami “cüme quimürpuafiel ti rüf dungu” (1 Timoteo 2:4). Huelu duamfalngelai tami com quimürpuafiel tati Biblia. Tati pu cristiano fautizaucülelu rume, amulecaingün tañi doi quimürpumequefiel tati Biblia (Colosenses 1:9, 10). Doi mai, duamfali cüme quimafiel tati doi falinque dungu Biblia meu. Tati pu loncolelu ngüneduamaingün tami quimtucunieel tati hunenque dungu Biblia meu.

2. ¿Chem mülei tami femal tami fautizahual?

Biblia feipi: “Nor raquiduamtumün ca huiñotumün Chau Ngünechen meu” (papeltuaimi Hechos 3:19). ¿Chumngechi femqueiñ tüfa? Hueñancülqueiñmu com tati huesaque dungu taiñ femürpuel ta cuifi meu, fei ngillaturpufiyiñ ta Jehová taiñ feipiafiel taiñ perdonayaeteu. Cafei quiñepülecünuqueiñ com tati huesaque huimtun, fei eluuqueiñ taiñ femal Jehová tañi ayüqueel. Cafei trahuluuqueiñ Jehová tañi pu che engün ca amuldunguqueiñ.

3. ¿Chumngelu (chemu) llicalayaimi tami fautizahual?

Quiñeque che llicaleafuingün tañi femürpunoal chem tañi feipicünufiel ta Jehová. Quiñeque meu huelulcahuafuimi chi, chumngechi ñi huelulcahun quiñeque che tripalu ñi nütram Biblia meu. Huelu raquiduamtucunienge: Jehová quimniei taiñ culpafe chengen meu huelulcahuafuiñ (papeltuaimi Salmo 103:13, 14). Huelu eluucüleliyiñ taiñ cüme femal, Jehová rume ayüucüleai ca quelluaiñmu. Ca tati Biblia feipi: “Chem no rume catrütulayafui Chau Ngünechen taiñ piuqueyeaeteu” (papeltuaimi Romanos 8:38, 39).

DOI QUIMAIMI

4. Cüme quimürpufinge ta Jehová

Petu tami fautizaunon duamfali tami cüme quimafiel ta Jehová, femngechi piuqueyerpuafimi ta Jehová ca eluucüleafuimi tami inayafiel ñi feipin. Taiñ quimal chumingün quiñeque che tañi fautizahual peaiñ ti VIDEO. Fei, ngüneduamaiñ tüfachi ramtun.

VIDEO: Chem tañi femel ñi fautizangerpual (3:56)

• Ñi feipin ti video, ¿chem quellueyu pu chillcatuquelu ñi pepicaucüleal tañi fautizahual?

Papeltuaiñ Romanos 12:2, ca ngüneduamaiñ tüfachi epu ramtun:

• ¿Müte feyentuquelaimi quiñeque dungu ñi quimeltuqueel tati Biblia? ¿Feyentuquepeimi mai tati pu Dunguquelu Ineingen Jehová ñi rüf quimeltuqueel tati Biblia?

• Nehue feyentulenolmi, ¿chem chumafuimi?

5. Chaftufinge ti huesaque dungu

Eluhun meu taiñ feipifiel ta Jehová ñi serfiafiel com taiñ mongen meu ca fautizahual, rupaqueiñ huesaque dungu meu. Quiñe lamngen femngechi dungu meu rupai. Peaiñ ti VIDEO, ca ngüneduamaiñ tüfachi epu ramtun.

VIDEO: Piuqueyefiliyiñ ta Jehová, chaftuafuiñ chem huesa dungu rume (5:22)

• Taiñ lamngen, ¿chem dungu quiñepülecünui tañi cüme serfiafiel ta Jehová?

• Taiñ lamngen tañi piuqueyefiel ta Jehová, ¿chem mu quellueyu?

Papeltuaiñ Proverbios 29:25 ca 2 Timoteo 1:7, fei ngüneduamaiñ tüfachi ramtun:

• ¿Inei quelluafeimu tami chaftuafiel fillque huesaque dungu?

6. Maneluunge Jehová tami quelluaeteu

Jehová quelluaimu tami femal quisu ñi ayüqueel. Peaiñ ti VIDEO, ca ngüneduamaiñ tüfachi epu ramtun.

VIDEO: Jewba ta kelluaeymu (2:50)

• Ti chillcatulu Biblia, ¿chumngelu petu fautizaulafui?

• ¿Chem quellueyu ñi doi maneluhual Jehová meu?

Papeltuaiñ Isaías 41:10, 13, ca ngüneduamaiñ tüfachi ramtun:

• ¿Chumngelu maneluucüleafuimi tami femal com tami feipicünufiel ta Jehová?

7. Rume mañumcülenge Jehová tami piuqueyeteu

Ngüneduamülmi tunte tami piuqueyeteu Jehová, doi mañumnieafimi ca eluucüleaimi tami doi serfiafiel. Papeltuaiñ Salmo 40:5, ca ngüneduamaiñ tüfachi ramtun:

• Tati cümeque dungu tami elueteu Jehová, ¿chuchi am doi ayüfimi?

Tati huerquen Jeremías pingefulu, rume piuqueyerpufi ta Jehová ca tañi feipin. Ca femngechi rume falintuquefui yenieal Ngünechen tañi üi. Quisu feipi: “Tami feipin rume ayüumapiuquelqueneu, iñche am yenielu tami üi, ahuem Chau Ngünechen Jehová” (Jeremías 15:16). Ngüneduamaiñ tüfachi meli ramtun:

• ¿Chumngelu rume yamfalngei Dunguquelu Ineingen Jehová ngerpual?

• ¿Ayüpeimi mai tami fautizahual femngechi Dunguquelu Ineingen Jehová ngerpual?

• ¿Catrütuniepeimu mai quiñe dungu tami fautizahurpual?

• ¿Chem chumafuimi tami fautizahual?

TAMI QUIMEL

Chem huesaque dungu mu rume rupalmi, Jehová tañi quellun meu fautizahurpuafuimi.

¿Chem piafuimi?

• ¿Tunte duamnieimi tami quimal Biblia tami fautizahual?

• ¿Chem dungu mülei tami femal tami fautizahual?

• ¿Chumngelu llicalelayaimi tami fautizahual?

CA PEAFUIMI

Ngüneduamnge chumngelu dulliafuimi tami fautizahual.

“¿Pepikawkülepeymi may tami fautisawal?” (Ti Huerquen marzo, 2020)

Quimürpunge chumngechi chaftuafuimi quiñeque dungu, femngechi tami fautizahual.

“¿Chem katrütukeenew ñi fawtisawal?” (Ti Huerquen marzo, 2019)

Ngüneduamnge chumi quiñe huentru tañi fautizahurpual, rupalu rume cüdaungechi dungu meu.

‘Alüñmakilnge tami fautisawal’ (1:10)

Hunelu meu, quiñe huentru epurume raquiduamcülefui ñi fautizahual cam fautizaunoal. Ngüneduamnge chem quellueyu ñi fautizahual.

¿Llohuafulu am iñche com tüfachi cümeque dungu? (7:21)