Kiñe piwkeyen che weda kutranle ka nienolu lawen

DOREEN pingechi domo rume weda duamnagi, feypingelu tañi füta Wesley, 54 tripantu nielu, ñi nien kiñe rume weda tumor tañi longko mu.a Pu lawentuchefe feypieyew ñi mongeleal kiñe mufü küyen müten. Doreen feypi: “Koyla dungu trokifiñ ñi allkütumeken, fentren antü mu kimlafun ñi chumal. Rakiduamkefun kake che ñi rupameken tüfa, welu iñchiw no. Pepikawkülelafun ñi chaftuafiel”.

Fentren che femngechi duamnagkey Doreen reke rupan mu tüfa. Fey kom che konturumeafeyew kiñe weda kutran nienolu lawen. Ka femngechi kiñeke eluwküley ñi dapiafiel tañi piwkeyen che kutranrumelu, feymu sakifalingün. Welu femal tüfa müna küdawngeafuy. Pu familia, ¿chumafuy ñi dapiafiel ka yafültukuafiel tañi kutran piwkeyen che? Pu dapichekelu, ¿chumafuy ñi fill rakiduammekenoal ñi amulerpun ti kutran? Epe puwkülele ñi layal, ¿chem rakiduamafuyngün? Wüne ngüneduamaiñ chumngelu fente küdawngeafuy dapiafiel kiñe kutran nienolu lawen.

KIÑE KÜDAWNGECHI DUNGU FAMÜLKE MU

Ti lawentun dungu kakünukey chumngechi ñi laken pu che. Pataka tripantu kuyfi mu, kiñeke ülmen mapu mu kütu, pu che doy pichin tripantu mongelekefuy, fey lafemkefuyngün tul kutran kam allfülün dungu mu. Doy küdawngefulu am konal pital mu, epe kom pu che dapikefeyew ñi reñmawen, fey layngün ruka mu.

Famülke mu ñi doy amulerpun ti lawentun dungu kellufi pu lawentuchefe ñi chaftual ti wedake kutran, fey ñi doy amulerpual pu che ñi mongen. Kuyfi kiñeke kutran mu lafemafuy pu che, welu fewla doy mongelerpuafuy fentren tripantu. Fey tüfa tremoltulayafuy chi pu che. Fentren che weda kutrankülelu kidutu pepiluwkelay, fey doy küdawngey ñi dapingeal engün.

Feymu llemay, famülke mu pu che lakey pital mu. Ka epe kom pu che kimlay chumngechi ñi laken, ka pichin che müten pekey ñi lan kakelu che. Feymu kimnofiel mu tüfa, katrütuñmayafuy kiñe che tañi dapiafiel kiñe kutran piwkeyen che. ¿Chem kelluafeyew?

KÜME ADKÜNUNGE

Chumngechi ñi pengelkeel Doreen ñi rupan, fentren pu che rume weda duamkülekey kiñe tañi pu che nierpulu kiñe kutran nienolu lawen. Feymu fill rakiduamkülelmi, weñangkülelmi ka lladkülelmi, ¿chem kelluafeymu tami pepikawküleal? Kiñe wentru poyekefilu ta Jewba feypi: “Kimelmuiñ chumngechi ñi rakial taiñ antü, femngechi ta nieafuiñ kimün taiñ piwke mu” (Salmo 90:12). Feymu llemay, kom piwke mu ngillatuafimi ta Jewba tami eluaetew kimün, femngechi tami doy küme kelluafiel tami piwkeyen che petu ñi mongelen.

Feymu müley tami küme adkünual. Tami piwkeyen che petu pepi nütramkale ka ayüle ñi femal, kümeafuy tami ramtulelafiel: “¿Iney ayükeymi tami dunguñpeaetew pepi femnolmi?”. Rüf piwke mu nütramkafinge kidu tañi küpa mongeltungeal makina mu, yengeal pital mu kam chumngechi ñi lawentungeal, tüfa kelluafuy ti reñmawen ñi yafkawnoal ka weda duamkülenoal dullifile chem ñi chumngeal ti kutran pepiluwkülenolu. Pürüm müten kom piwke mu nütramkangele tüfa, kelluafuy ti familia ñi longkontukual ñi küme dapiafiel tati kutrankülelu. Biblia feypi: “Kiñe che ramtukenolu, weda tripakey ñi pepikakünuel” (Proverbios 15:22).

CHUMNGECHI KELLUAFIEL

Fentren rupa ti dapichekelu müley tañi doy yafültukuafiel ti kutrankülelu. Kiñe che lakonmekelu duamniey taiñ pengelelafiel ñi kidulenon ka fente taiñ piwkeyefiel. ¿Chumngechi femafuymi tüfa? Papeltulelafuymi kam ülkantulelafuymi tati kutrankülelu, dulliafuymi ayüfalchi papel ka ül tami ayüwmayafiel ka newentukuafiel. Fentren che yafültukueyew tañi pu che ñi witratuetew ka küme dunguetew.

Fentren rupa doy kümeafuy feypilelafiel tati kutrankülelu iney ñi witranmaetew. Kiñe chillka feypikey: “Pu lakonmekelu petu allkütukey küdaw-wenole rume kiñeke dungu ñi kuerpu mu. Ti che umawtulelu trokingeafuy, welu küme allkütumekeafuy llemay, feymu feypilayaymi chem no rume tami ayünoel ñi allkütual ti kutrankülelu”.

Pepilfalngele, ngillatunge ti kutrankülelu eymu. Biblia nütramkakey kiñe rupa mu, Pablo ka tañi pu kompañ rupayngün fütra kutrankawün mew, ka layalu trokiwingün kütu. ¿Chem kellu kintuyngün? Pablo feypifi tañi pu weni: “Eymün kelluniemuliyiñ tamün ngillatuñmaniemuafiel ta iñchiñ” (2 Korintio 1:8-11). Weñangküleliyiñ kiñe weda kutran mu, müna kellukeeiñmu ngillatuafiel ta Chaw Ngünechen.

NGÜNEDUAMNGE CHEM ÑI RUPAYAL

Kimal ñi lakonmeken kiñe piwkeyen che weñangkün-ngey. Fey afmatukilnge, iñchiñ dewmangenolu am ñi layal, feymu küme llowkelaiñ ti lan dungu taiñ mongen mu (Romanu 5:12). Feymu Biblia “kayñe” pifi tati lan dungu (1 Korintio 15:26). Fey küpa rakiduamlayafuiñ ñi layal taiñ piwkeyen che, doy may fentren che ka femngechi duamkey.

Welu ngüneduamal chem ñi rupayafel kelluafuy tati reñmawen ñi fill rakiduamwenoal ka longkontukual tañi doy küme kelluafiel ti kutrankülelu. Kiñeke dungu ñi rupayafel müley tati wichulechi dungu mu feypilelu “Epe puwle ñi layal”. Rüfkünu may, kom feychi dungu mu rupakelay itrokom pu kutrankülelu ka kakerumeafuy chumngechi ñi rupan. Welu may, epe kom pu kutrankülelu rupakey kiñe rewall.

Dew ñi lan kiñe piwkeyen che kümeafuy tami nütramkalelafiel kiñe küme weni, feypikünulu tami küpa kelluaetew. Pu dapichekelu ka ti reñmawen duamniey ñi feypingeal tañi piwkeyen che ñi kutrankawkülewenon ka ñi fentepun ñi weda rupan. Taiñ Fütra Chaw dewmafilu kom pu che, piwkeyen mu feypieiñmu: “Tati pu layelu chem dungu no rume kimwetukelayngün” (Eclesiastés 9:5).

TI DOY KÜME DAPICHEKELU

Petu ñi kutrankülen taiñ piwkeyen che müley taiñ maneluwal Chaw Ngünechen mu, doyelchi may weñangküleliyiñ dew lale ti kutrankülelu. Fey Chaw Dios kelluafeymu kakelu che ñi feypin ka femün mu. Doreen feypi: “Kimürpun tañi famentunoafiel kakelu che ñi kelluetew. Rumeñma kellueyumu engün, fey tañi füta iñchiw rüfkünu kimürpuyu Jewba tayu feypietew reke: ‘Eymi mu mülen tami kelluafiel ñi chaftual tüfa’. Turpu ngoymanentulayan tüfachi dungu”.

Feymu llemay, Chaw Jewba doy küme dapichekey. Kidu am taiñ Dewmaetew, fey kimniey taiñ weñangkülen. Kidu pepilniey ka eluwküley taiñ kelluaetew ka yafültukuaetew ñi chaftuafiel taiñ rupameken. Doy may, kidu feypikünuy ñi pürüm apümafiel ti lan dungu ka ñi wiñomongeltuafiel ta fentren che tañi rakiduamtukunieel (Juan 5:28, 29; Apokalipsi 21:3, 4). Femngechi Pablo reke feypiafuiñ: “Fey, eymi tati lan dungu, dew wewngeymi. Eymi tati lan dungu, dew niewetulaymi tami wülkeelchi wesa weñangkün” (1 Korintio 15:55).