Rüf quimaimi chumlerpual ta mongen
Eimi ramtuuqueimi chi: “¿Chumlerpuai ta mongen?”. Fei tami quimal, ngüneduamaimi chem feipi ti Biblia ñi rupayal cüpalechi antü mu.
Jesús quimeltui chem dungu ñi rupayal, fei taiñ quimal ñi fülcülepan ñi acual Chau Dios ñi Gobierno (Lucas 21:31). Tüfa ta quiñeque dungu ñi rupayal: müleai fütraque hueichan (aucan), fütraque nüyün, müleai ngüñün ca huesaque cutran fill mapu püle (Lucas 21:10-17). ¿Chem pimi cai? Fachantü, ¿femngechi dungu rupapelai? Ruparupangei llemai.
Cafei Biblia feipicünui ñi doi huesalcalerpual pu che. Ñi femquen mu engün quimfalcünungeafui ñi pichilehuen ñi apümcangeal ti huesaque dungu. Papeltuafuimi 2 Timoteo 3:1-5, tüfa pengeli ñi chumletual pu che. Ngüneduamülmi hula ñi feipiel Biblia, “femngechi che mülei tati” piafuimi.
¿Chem pengeli com tüfa? Pichilehuei ti antü Chau Dios ñi Gobierno re cümeque dungu cüpalai mapu mu, fei taiñ cüme feletual (Lucas 21:36). Biblia mu, Chau Dios fentren cümeque dungu feipicünueiñmu. Ngüneduamaiñ quiñeque.
CÜME GOBIERNO MÜLEAI
“[Jesús] elungei ñi ngünenieal, püramyengeal ca lonco ülmen-ngeal, femngechi ñi serfiaeteu com pu che, chem tuhun-ngele rume ca chem quehun dungule rume. Tañi ngünenien [gobierno] turpu aflayai ca tañi lonco ülmen-ngen apümcangelayai” (DANIEL 7:14).
¿Chem cüme dungu am ta tüfa? Chau Dios eluafi ta Jesús ñi ngünenieal com ti mapu, feichi mu com pu che ayüucüleai llemai.
TREMOLEAY TA CHE
“Inei no rume feipilayai: ‘Iñche cutrancülen’” (ISAÍAS 33:24).
¿Chem cüme dungu am ta tüfa? Ngehuelayai cutran, ngehuelayai cüntro, lahuelayai ta che.
CÜME FELEAY TA CHE
“[Chau Dios] apümcaniefi ti hueichan itrocom mapu mu” (SALMO 46:9).
¿Chem cüme dungu am ta tüfa? Ngehuelayai hueichan (aucan), feimu cutrancauhuelayai ta che.
RE CÜMEQUE CHE MÜLEAI
“Ti huesaque che ngehuetulayai engün [...]. Huelu pu ñomngelu ngen mapu ngeai engün” (SALMO 37:10, 11).
¿Chem cüme dungu am ta tüfa? Ngehuelayai huesaque che, re cümeque che müleai. Tüfa engün eluucüleai ñi inayal Jehová ñi feipin.
COM TI MAPU QUIÑE CÜME MÜLEHUENGETUAI
“[Pu che] deumarucayaingün, ca fei mu müleaingün, anümaingün ofad ca iñmuaingün ñi fün.” (ISAÍAS 65:21, 22).
¿Chem cüme dungu am ta tüfa? Fente cüme adcületuai com ti mapu. Femngechi Chau Dios femürpuai tüfachi dungu taiñ llellipuquefiel: “Tami ayüqueel [...] femngepe mapu mu” (Mateo 6:10).