Chau Dios, ¿chumül ngünenietuafi ta mapu?

¿CHEM FEIPI JESÚS ÑI RUPAYAL?

Jesús feipi: “Quiñe troquiñche hueichayafi cangelu troquiñche, ca quiñe gobierno hueichayafi cangelu gobierno. Müleai fütraque nüyün, fill püle müleai ta filla ca fill huesaque cutran” (Lucas 21:10, 11). Com tüfachi huesaque dungu rupale, fei cüme pengelai ñi fülcülepan ñi ngünenietual ti mapu Chau Dios. Fei, Jesús tañi feipiel, ¿ruparupangepei mai? ¿Chem pimi cai? Ngüneduamnge tüfachi dungu.

1. FÜTRAQUE HUEICHAN

Pütrün che feipiquei chem ñi rupan 1914 tripantu mu acordafali llemai, ¿chumngelu? Feichi mu rupai ti Primera Guerra Mundial. Tüfachi hueichan huesalcafi ta rume fentren pu che. Fei pünengei fütraque tanque, metralleta, fillque gas langümchequelu, ca fütraque avion ütrüfnacümquelu fillque bomba. Com tüfa pünengequei fill püle ñi langümngeal fentren che. Ca femngechi rupai ti Segunda Guerra Mundial. Feichi mu deumangei ca pünengei bomba atomica. Felei llemai, 1914 tripantu ca fantepu mu, fill püle mülei hueichan, fei ta rume fentren pu che larquei.

2. FÜTRAQUE NÜYÜN

Fill tripantu mu rupaquei fentren fütraque nüyün, 100 peno. Quiñe troquiñche feipi tüfachi fütraque nüyün “fütra huengacaquefi ta mapu” (Britannica Academic). Quiñe troquiñche ngüneduamquefilu ti mapu, estudiai tati fütraque nüyün ñi rupan 1900 tripantu mu ta fantepu, fei feipi: “Fill tripantu rupapelayai 16 fütraque nüyün”. Quiñeque che feipiqueingün feula doi cüme inaduamngequei chem ñi rupan mapu mu, feimu fachantü doi allcüngequei ñi ruparupangen fütraque nüyün. Iñchiñ quimquelaiñ ñi rüfngen cam ñi rüfngenon ta tüfa, huelu cüme quimnieiñ fachantü doi sufriquei ta che ca doi lanquepi engün rupan mu fütraque nüyün.

3. FILLA DUNGU MÜLEI

Fillque mapu püle mülei hueichan, huesaque gobierno, fentren pu che nielai ta plata, cafei huesaque cosecha mülei, feimu fillaquei ta che. Quiñe troquiñche quelluntucuquelu ñi fillahuenoal ta che feipi: “Huall mapu püle, 821 millon che fillalei, feimu müte iquelaingün. Tüfa engün 124 millon che doi huesalcaleingün, nielai ta iyael engün” (ñi feipiel 2018 tripantu mu tati troquiñche Programa Mundial de Alimentos). Fill tripantu mu, entriquei doi 3 millon pichiqueche, fei larpuquei engün. Ngüneduamnge tüfa: 2011 tripantu mu, lan mu 100 pichiqueche, 45 tüfa engün entrin meu laingün.

4. HUESAQUE CUTRAN MÜLEI

Tati Organización Mundial de la Salud ngüneduami ñi doi mülen huesaque cutran famülque mu. Fei feipi: “Tati cuifique cutran ca contupatueyu pu che, quiñeque tüfa: colera, peste ca fiebre amarilla pingechi cutran. Huelu hueque cutran ca contupaeyu engün, quiñeque ta tüfa: síndrome respiratorio agudo grave, influenza pandemica, síndrome respiratorio de Oriente Medio, Ébola ca Zica pingechi cutran”. Pichiñma mu rupaiñ ti pandemia coronavirus mu. Fentren cientifico ca pu doctor rume quimniefui ti cutran, huelu adümlafingün tañi tremoltuafiel ta che.

5. HUALL MAPU MU ENSEÑALNGEQUEI CÜMEQUE DUNGU

¿Ca chem feipicünui Jesús ñi rupayal? Feipi: “Tati cümeque dungu Chau Dios ñi ngünenietual ta mapu amuldungungeai huall mapu püle, femngechi com troquiñche ñi quimal engün. Fei hula afai mapu meu müleyechi dungu” (Mateo 24:14). Com mapu mu rupamequei huesaque dungu, femlu rume, doi 8 millon che amuldungumequei tati cümeque dungu ñi femal Chau Dios ngünenietule ti mapu. Femngequei tüfa 240 troquiñ mapu mu, ca doi mil quehun dungu mu. Turpu femngechi dungu femngequelafui.

ÑI FEIPIEL JESÚS, ¿CHEM QUIMÜRPUAFUIÑ?

Rüfcünu llemai, com ñi feipicünuel Jesús ruparupangei famülque mu. Com tüfa, ¿chumngelu fente falin-ngei iñchiñ mu? Jesús feipi: ”Pefilmün ñi rupan com tüfachi dungu, rüfcünu quimaimün ñi püllelepan Chau Ngünechen ñi ngünenietual ta mapu” (Lucas 21:31).

Ngüneduamliyiñ ñi ruparupangen chem ñi feipicünuel Jesús ca ñi feipicünungeel Biblia mu, quimtucuaiñ Chau Dios tañi elcünuel tañi Reino huenu mu 1914 tripantu mu.a Feichi mu, Chau Dios ca loncocünufi tañi Fotüm Jesús (Salmo 2:2, 4, 6-9). Pichin mu müten, Chau Dios ñi Reino apümcayafi com pu gobierno mülelu mapu mu. Chau Dios cüme elcünutuafi ti mapu tati pu che tañi rumel müleam engün, chumngechi tañi ayünieel.

Pichin mu, huechurpuai Jesús tañi elelchi llellipun, feipilu: “Cüpape tami ngünenietual mapu. Chumngechi ñi femngequen tami ayüqueel huenu meu, ca femngechi femngepe mapu mu” (Mateo 6:10). Fei Chau Dios ñi Reino, ¿chummequequei conlu 1914 tripantu mu? Ca, ¿chem femürpuai ngünenietule ti mapu?